Matthieu 14
14
Tsangô éowa aJean‐Baptiste
(Bono na Marc 6:14–29, Luc 9:7–9)
1Gô ndéô nene Hérode, amatôma tsenge ééndô mbe Galilée. Amookô kumane éaJésus. 2Hérode amanigôa ayanziedi mbe: Mômôgôô nône te Jean‐Baptiste amakunduga g’ôwa. T’ebandô andé na ngudi gôéyanza mane mamisôba masoongôa môma ésupua.
3Ebégôe émabaka te nane. Amuene Hérode amatôma migode gôétsôpa Jean na gôéengéda angô gô eba atsôgôô. Gô éne Hérode amookô ôgi aHérodiade, môgaya amôdimi edi, Philippe. 4Gôébégô Jean amadékéda Hérode mbe: Môge gôndé éwe gôébaa Hérodiade. 5Hérode amanyôngéô éyôha Jean ivô amookô Ajuif gomo, gôébégô muetso amaditéda Jean mbe te môpandôédi amatasa maNzambé.
6Ivô nyovo gômatsôkéa ahngô sueti éobôtu aHérode, muana aHérodiade amagina va miso moma ayekani amakôvukuni. Hérode ameena buedi gômaginangô. 7Hérode amasongéa na amavangana na tômbône mbe: Duka me éne énganyôngéô éwe, na me nangaôétsa. 8Hérodiade, yeene atômbône amamôbeenda mbe: Oduka te môtsé aJean‐Baptiste ôtsuaô gô gépede. Tômbône amaduka Hérode te nane. 9Hérode amasiô na singididi. Asiôngôé émôkékôéa éne émadukangô gôébégô oma ahmakôvangô amookô gamavangana ahngô. Amatôma migode gôéviga na éne émanyôngéô muanee. 10G’ôtômu aHérode, môvo amakea na go eba atsôgôô gôékitsa môtsée aJean‐Baptiste. 11Môtsée ômatsuaô gô gépede na ômeetsô tômbône. Na tômbône ameetsa yeedi. 12Aneengie aJean amakea gôébongo ôtôe aJean gôéôgunya. Vane ahmakea gôénigôa Jésus éne émabuéani.
Jésus amayekédéa mitônisa mitayi mioma môyakô
(Bono na Marc 6:30–44, Luc 9:10–17, Jean 6:1–14)
13Vamookô Jésus tsangône éowa aJean, amapeka gô mbôngô gôékea na gô tungu ésaba oma. Ivô oma amookô mbe Jésus akeyi na gô tungu asimbe na bôkaye. Oma amanôtôga gô mbôkaye yaô gôéaanda Jésus gô tsina gô nzéa éamôgogu. 14Vamasutuméa Jésus gô mbôngône, amadenga géômbé gévôni. Ameena ahngô ngeba na amadôngéda abeeyie amaviga n’ahngô.
15Vamabaka ndéône éka adikoo, aneengie aJésus ahmaviga na gôndé angô. Ahngô mbe: Nyee ôédi. Tungu nedué ésaba oma. Panganéda omeaa ahkea akesômba môyakô gô mbôkaye. 16Jésus amaabéa ahngô mbe: Asangakea. Itsani ahngô môyakô. 17Aneengie amaabéa Jésus mbe: We égô tôndé te na mipemba mitayi na tônyama tôbaé tagô mbeyi. 18Jésus amatôma ahngô mbe: Vigani n’eangô n’eva. 19Vane amatôma géômbége setso gôédigaa v’esingaa. Na amabongo mipembamie mitayi mine na tônyama tôbaé tagô mbéyi na amabôkaméa miso medi na g’ôba na amaduka Nzambé mate medi. Amabukua mipemba na ameetsa aneengie. Ahngô amamikabanéa n’oma muetso. 20Môma na môma amaa na amanguta. Aneengie ahmabongo tseseye n’ebéndékée émasanéakani émayuéséda nzima atsaô na tsaô dibaé. 21Tambô va gatse amuetso ahmaakani, gômabaka mitônisa mitayi miamôgôô, agetoe n’anee gétangé.
Jésus amananga gô ngongo ameba
(Bono na Marc 6:45–52, Jean 6:15–21)
22Vane Jésus amapekeda aneengi edi gô mbôngô gôéôbégéda ahngô na gô dipo tsényé yamubu. Amuene Jésus amasanéa gôépanganéda géômbége. 23Vamaagana Jésus n’omee, amakea na gô ngongo amôkôdi amuene gôévovo na Nzambé. Vameeda nyee, Jésus amabaka amuene va tsényé. 24Mbôngône émabaka éka va ngenge amubu, na miyôkiyôkimie mimayôkiméda yangô gésa na gésa. Gékungage dôta gémaviga gô mbene gémasikaméda mbôngône. 25Gô tsôsône éamapanga Jésus amakea na gôndé aneengie, yetaga gô ngongo amebame. 26Vameena ahngô Jésus akea gô ngongo amebame amatsôpu na gégomogomo. Ahmamenya mbe buétsé môgési. Ahmaamugana na gomo. 27Vane Jésus amavovo n’ahngô mbe: Sumédani mitémamie. Oô te me Jésus. Nôneena gomo. 28Ivô Pierre amavovo n’edi mbe: Kumu, ôkô mbe na gô pie te éwe, bambéa me nayeta va ngongo ameba naviwanyéda éwe. 29Jésus amamôbambéa mbe: Vigaka.
Pierre amasutuméa gô mbôngône na amakea ayeta gô ngongo amebame gôéwanyéda Jésus. 30Tsina na tsina Pierre ameena gékunga na amanikéa éôkô gomo. Vane amabandôa épandaméa gô mebame na amasambima amaadôngana mbe: Kumu tsôpa me. 31Vane Jésus amakonyo ôgogo edi gôétsôpa Pierre. Na amavovo n’edi mbe: Paga yoo dipoo. ?Oseetsa môtéma gô mane mavovo me gôndé?
32Ahmapeka muetso abaé gô mbôngône. Vane gékungage gémoota. 33N’avo aneengi ane amasanéaka gô mbôngône, amasiba mabongo maô va mbene aJésus gôémôneegeda. Amamôkuméda mbe: Na gô pie éwe te Muana ANzambé.
Jésus amadôngéda abeeyi gô Génésareth
(Bono na Marc 6:52–56)
34Vamamanahngô éabôga mubu, ahmatségéda mbôngône gô tsényé yaGénésareth. 35Asi gésage géne amabangôa mbe ône te Jésus. Tsangône émapaa ésee yetso mbe, te Jésus atsigini. Vane omee amatsuéa Jésus abeeyie muetso. 36Ahmaduka Jésus mbe: Singa adua ahsuméa ébanda géondoge samôkandee ôata éwe. Muetso ahmabandani ahmadônga.
Alliance Biblique du Gabon (Bible Society in Gabon) 1983
