Mʉkpanganɨa 2
2
1Kʉdɔ, tɛa yɔ kɨa ɓisi nɔ dɔdɔ, ɨhɔ nɔ ɨkyɛmʉ iɓomu ngɨyɛ ya amati ɔngɔ, ya꞉sio.
2Akɔ ɓisi ɓɔ mɛɗɨanɛka, Asɔɓɨɨ a꞉ɓio ɓɔ ɔpipeni akɨa tɛa ngɨangɔ tɨa piponi. Kʉdɔ, ɔ꞉tɔhomwono tɨa kʉ nɔ ɓisi ngʉɓɔnanɨ. 3Ta nɔ ɓisi ngʉɓɔnanɨ ɓɔ mɛɗɨanɛka, a꞉homwono akɔ tɛa ngɨangɔ a꞉ɨkɨa. Kʉdɔ, ɔ꞉ɓukiokio ɓisi ngʉɓɔnanɨ nɔ, ɔ꞉ɓʉgbanga. 4Uduɓa ngʉwa Asɔɓɨɨ a꞉kɨa-ɔɔ ɓisi nɔ dɔdɔ, wa ɓanɨ.
Asɔɓɨɨ ɔmeyo moi nɔ mombi
Ngbinga ngɨa Asɔɓɨɨ MAKWƆƁƗƗ a꞉kɨa-ɔɔ ɓisi nɔ dɔdɔ, 5iju pɔ mɛngana ya꞉ɓio ta ɓɔ yangɔɓaenimʉ-sɨ, pɔ ɨkyɛmʉ yɛta ɨhʉnɛ, dɔ Asɔɓɨɨ MAKWƆƁƗƗ a꞉ɓio kʉ ɓɔ angɔneisenimʉ-sɨ ʉgbaá akɔ dɔdɔ. Nɔ, mombi adaa ngɨa a꞉pʉnga-ɔɔ nɨmakanaka ɓakʉbaa a꞉ɓiomʉ pɔ mʉngana. 6Yakamɛngana, mipo ka꞉ɓichwɛa aɨsɨ ɔ dɔdɔ akɔpɔakiso ɨtaka ta iɓomu. 7Asɔɓɨɨ MAKWƆƁƗƗ a꞉sɨka iɓungu yɔ dɔdɔ, nɔ, ɔ꞉tɔmeyo nayɔ mombi. Kʉdɔ, ɔ꞉muhuo nɔ ʉhʉ ngʉwa wenjo uɓei alihoo lɔ mɔɔ ga fu! Mombi ɔ꞉pʉnga nuhomuo.
8Asɔɓɨɨ MAKWƆƁƗƗ a꞉hʉna kʉbaa anɔ Ɛdɛnɨ#2:8 Ɛdɛnɨ: pɔ ɓɔ ɨsɨ yɔngɔ ɓɔ ʉmʉwa wɔta uɗo, ɨkʉmbʉ mɛngana ngɨyɛ ya꞉ɓio nɔ ʉgbaa mesu aki ɨpá yachʉchwaka-ɛɛ. Kʉdɔ, ɔ꞉mʉnapɨa mombi ngɨa a꞉mumeyo inani amati ɔngɔ. 9Asɔɓɨɨ MAKWƆƁƗƗ ɔ꞉ɓaiso migbo yɔ matɨ maɓomu, anɨnɨa maɗo akɔ mesu, nɔ kʉ, tɨpɨ akɔnɨdya. Ananɨ ati ɔ kʉbaa, ɔ꞉tɔɓaiso tɨa kʉ nɔ ɓʉtɨ mʉngana, ngʉɓa ɓenjo ɓombi ɓʉhɛa, nɔ ɓʉtɨ ngʉɓa mombi ɔdyeni ipumo yɔngɔ ɛmbɨa ɓuɗo, nɔ ɓʉɓɨɓɨ.
10Nesini mʉngana ata mʉja a꞉ɓio ɓɔ ɔchwɛeni anɔ Ɛdɛnɨ, akɔpɔakiso kʉbaa ngɨananɨ. Anɨngwa ananɨ, ɔ꞉tɔnagbana tɨa amɨtɨmanɨ ɓɔgɨna. 11Mʉtɨmanɨ ngʉwɔ pɛɨ, wa꞉ɓio ino ɓɔ Pɨsɔnɨ, ʉwa wa꞉naɓangaa amutii wɔ ɨkʉmbʉ ɨɓomu yɔ Avɨla aki ɔlɔ a-ɛɛ. 12Nɔ, ɔlɔ ɔ ɨkʉmbʉ ngɨyɛnɛnɨ, a muɗo. Inani, ya kʉ nɔ ikopi ngayɛmɔ yɔ ɨgabʉ, ɨyɛ, ɓaisoko nɔ ɨbʉla ɓɔ kɨchafalangɨ, nɔ, adʉdʉ ata mvo tɨpɨ ino ɓɔ bɛdɔla. 13Mʉtɨmanɨ ngʉwɔ ɓepini, wa꞉ɓio ino ɓɔ Gɨhɔnɨ. Ʉwa, waɓangaa amati ɔ ɨkʉmbʉ yɔ Kusi iɓomu. 14Ʉwɔ ɓeetu, wa꞉ɓio ino ɓɔ Hɨdɛkɛlɨ, ʉwa, wahingo anɔ Asulia nɔ ʉgbaa mesu aki ɨpá yachʉchwaka-ɛɛ. Mʉtɨmanɨ ngʉwɔ ɓɔgɨna, wa꞉ɓio ino ɓɔ Ɛfʉlatɨ.
15Kʉdɔ, Asɔɓɨɨ MAKWƆƁƗƗ a꞉sɨka mombi, nɔ, ɔ꞉mʉnapɨa akʉbaa nayɔ anɨma nɔ, nayɔ apɛmakɨa. 16Asɔɓɨɨ MAKWƆƁƗƗ ɔ꞉minjo mombi ʉpanʉ ɓɔ: «Wakwanana anɨdya lipumo lɔ matɨ maɓomu ngʉka amati ɔ kʉbaa. 17Yakamɛngana, ipumo yɔ ɓʉtɨ ngʉɓa ɓanimbiiso ɓuɗo nɔ ɓʉɓɨɓɨ, wa꞊ngɔɨdyamʉ, dɔ, ɓisi ngʉɓa wa꞊ɨdya-ɔɔ, wa꞊wo woni.»
18Asɔɓɨɨ MAKWƆƁƗƗ a꞉sugo ɓɔ: «Yangɔmʉ iɗo ɓɔ mombi ngɨa, iɓio nangana. Na꞊mʉkɨa abʉangɔ, ɨya, a꞊sisekio nayɔ, nɔ ɨya, a꞊ɓio nayɔ asalakɨa.» 19Asɔɓɨɨ MAKWƆƁƗƗ a꞉meyo ɓanama ɓaɓomu ngʉɓɔ iju, nɔ ɓanoi ɓaɓomu nɔ ɨtaka. Ɛ꞉ka naɓɔ apɛɨ ɔ mombi, anɨna ɓɔ, a꞊ɓʉsʉa mano tanɨ. Iɗo ambɔ, ɨkyɛmʉ iɓomu ngɨyɛ yahomuo, yiɓio tɨta nɔ ino ngɨyɛ mombi aɨsʉa. 20Kʉdɔ, ɔ꞉sʉa ɓanama ɓɔ ndei ɓaɓomu mano, ɨhɔ nɔ ɓanoi, nɔ ɓanama ɓaɓomu ngʉɓɔ iju. Yakamɛngana, sɔkɔmʉ pɛpɛ mombi ɨna abʉangɔ ngɨa, a kʉndʉ ɨyɔ, ɨya, eneni amʉsalɨa.
21Kʉdɔ, Asɔɓɨɨ MAKWƆƁƗƗ ɔ꞉kwaiso mombi tɔɔ ga gbɛ. Ɔ꞉mʉchwɛiso uho wɔ banja ngʉwangɔ mʉngana, nɔ, ɔ꞉tɔkuto anjɨɓɔ kʉ ananɨ ga wali. 22Ta akɔ uho ngʉwɔnanɨ, a꞉ʉchwɛiso amati ɔ mombi, Asɔɓɨɨ MAKWƆƁƗƗ ɔ꞉tɔmeyo tɨa moi. Kʉdɔ, ɛ꞉ka nayɔ apɛɨ ɔ mombi.
23Ga mombi ɓɔ:
«Eeeɓe! Gwa nga akɛ, a pɛpɛ ɓʉnʉ tɨta uho ngʉwɔsɛmɨ ɓɔ kpɛ,
nɔ tɨa kʉ anjɨɓɔ ngɨasɛmɨ ɓɔ kpɛ.
A꞊ɓio ino ta ɓɔ ‹moi›, dɔ, ɓɔ꞉muchwɛiso amati ɔ mombi.»
24Ya akʉʉ ɔ yaka ngɨyɛnɛnɨ, ɨyɛ gue angwa-ɔɔ atɨ ɨsɛ nɔ atɨ inye, nɔ, ɓɔjonokio tɨa nɔ moi angɔ, nɔ, ɓɛka tɨta ɨkyɛmʉ mɛngana. 25Gue, ɨɓɔ nɔ moi angɔ ɓa꞉ɓio ɓaɓomu ta munduu munduu. Yakamɛngana, sɔkɔmʉ ɓiɓio anɨkwa soni ati eɓo pɔ bele.
© 2021, Wycliffe Bible Translators, Inc.
