Matteyo 17
17
Etakwaco Hollum Yesu to Doŋe
Mk 9:2-13; Lk 9:28-36
1Ihalu oŋitek ille iyaro Yesu Petro, Yakobo, iko Yoane illanyi ihide doŋe. 2Attati inyi lufaji to homomite hosi ette omom honyi pyapyahi ihwa oloŋ bwo fe ette aboŋojin honyi bwaran ihwa ayafa. 3Igonyuni isi bwo fe Mose iko Elija hul ikyanai ikonyi. 4Ojo Petro jyo Yesu ojo, Hobu oyyu jihohoi iwanari dini. Kuyya iwak iye aduhu adi ni akukuhyen hunihoi; obo jihoi, obo jyo Mose, bwo obo jyo Elija. 5Ninya hekyana inyi ottu nedis an afaŋ’to ette tihonia isi. Bwo fe nekyana ette ’tuna totwa idis on ojo, “Lonyi hoŋ olo al amuno ni bebe. Itayiryete jihonyi.” 6Itaniŋye leyiyanak nekyana ana ette isi ruboho ifau ta abaŋi. 7Ottu Yesu ette ’tir isi ette jaran, Odyototi, hebaŋata. 8Attati isi fyalatyo ati obeŋi isi igonyuni obo atulo arari Yesu hama.
9Ninya isuruni isi to doŋe iramak Yesu isi ojo, Heramana obo atulo erre hodwo igonyuna tai many ibuhuniere Lonyi tulo to ye. 10Ette leyiyanak honyi ifiyo inyi ojori, ?Aŋai ojori legyorok jo ottu adi Elija ahosyere? 11Itarraŋ inyi jihosi ojo, Ottu adi Elija ahode ihuhumaniere erre daŋ. 12Ati eramak ni itai jo, Ottu nya Elija, ati obeŋi laati omijani bwo ihanie nya isi jihonyi ihwa awahi isi. Tania onyurak adi bwo fe Lonyi tulo adyaha ihas hosi. 13Ette leyiyanak honyi itaniŋuna jo ikyana inyi te eram Yoane Batista.
Etaŋidaryo Yesu Eito ol Owon iko Ajok on Orroho’to
Mk 9:14-29; Lk 9:37-43
14Al afanyi isi jyo eluluŋ wati, ottu obo atulo jyo Yesu ette rigoŋi jihonyi ojo, 15Hobu, omehinie jyo lonyi hoŋ, nyo inef ajok inyi ette ihanana ahwe. Enyyahita arryai okwahatyo inyi ihima bwo fe ihari. 16Eyaŋuno ni inyi jyo leyiyanak hoi ati obeŋi isi oremehini itaŋida inyi. 17Attati Yesu jaran jihosi ojo, Aii, itai aati hul obeŋi iko neruk bwo fe hul odwari tajya. ?Many baya adi etoŋo ni ikatai? ?Many baya adi adik ni itai? Iyaŋunie inyi jihoŋ. 18Ifuha Yesu ajok ta agolon ette inyi busana eito. Ta asaa ania ette eito ŋidari.
19Ofwonni leyiyanak jyo Yesu al owon inyi hama ette ifiyo ojori, ?Nyo ebeŋ hohoi eremik ifuhara inyi addi? 20Ette inyi itarraŋ jihosi ojo, Ittallihoto tai ifuhara inyi nyo omuta neruk hatai. Eramak ni itai ahode ahode jo, al owon neruk hatai ihwa aŋeryo bule iremehina adi itai jaran jyo adoŋe ana jo, Ihuto dia, bwo inyi ette hut. Obeŋ adi obo ariŋ agalik itai. 21Ati ittallihoto tai ifuhara inyi arari ta amojo iko ta aferuna#17:21 aferunaObeŋi laati hulo Hollum oŋiye to omuk oŋitek al omojoi isi obo ariŋ on ogol’to jyo Hollum. hama.
Enyyak Yesu Ikiluna Aye Honyi
Mk 9:30-32; Lk 9:43-45
22Hadahai isi Galilea ojo Yesu jihosi, Itinyyaŋani adi Lonyi tulo ihas wati. 23Ottohori adi isi inyi ati ihalu oŋitek hunihoi ibuhu adi inyi, ette leyiyanak honyi ijiriŋa bebe.
Aduma ono Amusuru
24Al afanyi isi Kapernaum ofwonni lamojok musuru jyo Petro ette ifiyo ojori, ?Obeŋ ettiyanani hoi oduma amusuru? 25Itarraŋ Petro ojo, Afe oduma inyi. Lajiŋa inyi ihaji ikyana Yesu jihonyi ojo, ?Igigilo iye anyo Simone? ?Omojuni hobwok hutta fau amusuru jyo haŋai? ?Omojuni isi jyo lonyirok hosi kuyya bu jyo atamonok? 26Ojo Petro jihonyi, Omojuni adi jyo atamonok. Ette Yesu jaran jihonyi, Tania obeŋi ati lonyirok odumai. 27Ati ŋadi hohoi etipal isi, ilo ihari eneittok, irrirryahari aham. Iduhu ahami abotye, aŋa etuk honyi, bwo fe inyurak adi iye arobia. Iyaro, odumai amusuru hoi iko hunoŋ.
This text was originally published by the British and Foreign Bible Society in 1969.
