Fúcihum 6
6
Atúuha najok émiremma min átuut mee an
1Nan bugan gommee nemeeŋ nꞌetaam yaayu, ngúbajul guleeh gukoña. 2Bugan gacineen mee nꞌémit nguñow mara guleeh gukoña bugara bugan gammee nꞌetaam sijanjaŋ, ngucaapooro ukoña bu mꞌbugo. 3Ñeer Acehériit mee narok : « Buroŋ ban isen mee bugan, mat bóoni mꞌbugo bu nanoonan. Maregen maregen, bugo uceha : eniin ngoom. Maareer mat guroŋ warege símit ceme nꞌgafaakan (120). »
4No bajembaj bugan búgaamak nꞌetaam. Guceeiil nguroŋ bo nan bugan gacineen mee nꞌémit gujaalo mee gutook guleeh gukoña bugara bugan gammee nꞌetaam min gubajiil guleeh. Guleeh gaagu gommee umaañen bugara no gásaleni mee, ban ngujamo.
5Acehériit mee nañow mara bugan peepe gammee nꞌetaam gúlaalaaj bálaaj. Funagóofunak upinooriil ekaan mákojie déhooro. 6Ñeer Acehériit mee najok émiremma min átuut mee an baabe nꞌetaam, ntáañiool máamak. 7Acehériit mee narok : « Injé be ewuut nꞌetaam yaayu bugan gaagu gan ítuut mee bu nꞌsínunkureŋ saasu ró, son sáfuuloore mee bu nꞌupuu waawu ró. Maregen maregen ijojok émiremma nꞌwan ítuut mee. » 8Bare Acehériit mee nabaj gabonket nꞌNówe.
Atúuha naliik Nówe bulago bara epak
9Waawe ubaj mee nꞌfiil fara Nówe. Nówe kankaan amaañen átiliŋe. Dó mꞌbuganool ho noonool áyinen mee Atúuha. 10Nówe abaje guleeh gumaañen gúfaajiir : Seem, Haam nꞌJaafet. 11Atúuha nañow mara bugan gammee nꞌetaam maareer gurege basigo. Múlaaj mmufik nꞌetaam yaayu. 12Atúuha nañeer etaam yaayu, nañow mara efeegut bafeek : bugan gaagu peepe bakaaneriil bujagut haani fáriita. 13Ñeer Atúuha narok Nówe : « Ijojok bu ganimen bugan gaagu peepe. Múfeegaahi'iil mucile min múlaaj mufik nꞌetaam yaayu. Injé ñeer bu ganimeniil ísuupoor dó nꞌetaam yaayu. 14Bare aw uŋar ubabar wahanke kaŋ min ucookoor busaana báamak bu nꞌaw, babaje úsaag wamemmeeŋ. Ufaak nuŋar egodoroŋ min unaanen far bo son tíyaŋ. 15Aw be ekaan bo maa : Gabaak bo be étiiŋ simetaar ceme nꞌgafaŋ gúruba nꞌguñen (150), muwuŋ bo be étiiŋ simetaar gafaakan nꞌfutok (25), mbúrooken butum simetaar guñen nꞌgaat (15). 16Nukaan bo gañuuh, nukat eŋaan butum gañen bu nꞌécugut etuhoor gañuuh gaagu son ubereberef waawu. Nukaan bo gápeegum nꞌgahaja, mbubaj sitaah sífaajiir.
17Min ínje, bu gawalenúl mal máamak mabile epiis mꞌmof maamu peepe mmunimen wanoowan wammee neyif nꞌetaam. Wanoowan wammee nꞌetaam, wo be ecet. 18Bare ínje be ejogi bapaalaay. Aw bu ganogen dó mꞌbusaana baabu, buguul nꞌakoñai nꞌguleehi nꞌukoñaiil. 19Nuŋar dó may wábuto'oore nꞌwayife mee peepe úrubaruba umaañen nꞌukoña, mbil upak ecet nu ganur nꞌaw. 20Sínunkureŋ saasu be éjool síbuto'oor, upuu waawu núbuto'oor son may sínunkureŋ sáfuuloore mee nsíbuto'oor, wo peepe be éjool úrubaruba bu to nꞌaw mimbil upak ecet. 21Nuŋar mutiñóotiñ ubaŋ búfaen mimbil jibaj múcahoaay bu nꞌsínunkureŋ saasu ró. » 22Ñeer Nówe nasoŋ nakaan wan Atúuha arogool mee peepe.
© 2023 (Active), Wycliffe Bible Translators, Inc. All rights reserved.
