Jwon 5
5
Yeso Fa Gundung Cala ta Fai Yiir i Betzata
1Takfai ti andi, Yeso wa Yerushalima ɓurti got i Ju nin. 2Ta Yerushalima, si ti polok i ham nin ta ima si nggaar ya ti fagir ɓwayai hara. Ti alis i Ju si lai ii Betzata. Yis yiiri mata nggas ti Kwap i Tutwai. 3Ta wii i kikyal ima si nggaar ya ti manjiling i fagiri, som i mwatanan si tyai ta, hu manzyauwau, hu gundungang, hu som ima lo' ames sholus. Sin shwaiti muro i hami.#5:3 Shini kaadahai si ti 4 Ɓurti malu' i DeeƁwe ɗwar u ro hami myan hu myan, shak maɗufal ima tong muɗor ta wii takfai tima roii, njyang ta shak mwatanan ima mati. 5Maɗufal nin yis ta kyeli, ima mas wilyal hure ataat tau myarfu' yis ti mwatan. 6Myan ima Yeso ɗingus yis ɗarak, shangi yash ti mwatani, unai nyus, “Ha ɓweti wis ti cala haa?”
7Unai mamwatani nyus, “A Dee, i ti ɗeng kwa, ima u bumun ɓa i wis mulang ta hami myan ima si roi. Na i kin hai wa mulang ta, ɗeng u tongun.”
8Yeso nyus, “Luka fit, ha'a lapan ama ha at!” 9Fo abet maɗufali wis cala, ha' lapan ames wis.
Aɗengi fur a Mwen ti Lafos.#5:9 Mwen ti Lafos Ayis mii Mwen tima ɗufal si wai ya kwa si lafwas mwen andi. 10Ɓurti andi som Ju si lak maɗufal ima wis calai si ni, “Kwai a Mwen ti Lafos, ɓurti andi ngga' ima anggut amukan lak ta a kiga' ha ha' lapan ama kwa.”
11Unai maɗufali nyus, “A maɗufal ima fan calai ayis nyun, ɓa i ha' lapan amen i at.”
12Si lulus si ni, “Anggi maɗufali nya ha'a lapan ama ha at ya?” 13Maɗufal ima wis calai shang maɗufal ima fas calai kwa, ɓurti ai ɗufal hyang sin ta kyeli Yeso fotus ta saa ti ɗufal.
14Takfai ti myan ndyong, Yeso wisus ta Wur i DeeƁwe nyus, “Ɗingai ha wis cala! Ɓurti andi, hona masti mafwashi, ɓurti kandok ɗama nin ima ɓin mai rafat wisa.” 15Unai maɗufali wa lak mbayai i Ju ni, a Yeso fas cala.
Mupwet ta Fisel ti Al i DeeƁwe
16Som i Ju si fasus shum, ɓurti mas musut i ɗamam mii Mwen ti Lafos. 17Unai Yeso nyus, “Deen mata si ro ames ngang yes mwashi, yin hwak i ma ro.”
18Mai findeli kin som Ju si cu wei ti far ti ngga' ima ɓa si for Yeso ya shishat mandu'. Si ni, “A ɓurti nggyel anggut i Mwen ti Lafos ya kek je kwa, ma lai ti DeeƁwe ii Dees, kof ma ha' ti haisus ma kiga' hu DeeƁwe.”
19Yeso humuskyel ti findel ni, “I laksu mwawei, Ali mas ɗama ahwes kwa, aɗeng ima ɗing Dees yis masi. Ɓurti aɗeng ima Dees ma masi, ayisyi hwak Ali ma masi. 20Deehi ɓwet Ali, ma kwafansus shak ɗamam ima ma masi, ma wa kofsus roha mbayai ima si ɓin mii ɓurti ɓa hu shok na fwai. 21Fota ngga' ima Dee ma ha'an ti ɗufal fit ta mot, u fas mupwet, angga'i nai hwak, Ali fai mupwet wa kyel i maɗufal ima ɓwet fasus. 22Deehi twaat ɗeng ɓur hai kwa, fa a Ali andok i tot ti puɓwar shak, 23ɓurti ɓa shak ɗufal si ha' Ali ta fit fota ngga' ima si ha'an ti Deehi ta fit. Shak maɗufal ima wa' ha' Ali ta fit, ha' Dee ima ros kwa ndai.
24“I laksu mwawei, shak maɗufal ima ma hal ti findel amen, fa mwawei si maɗufal ima ron, mati mupwet i myan hu myan. Si wa totsus ɓur hai kwa, tuu pis mot i hai wis mupwet. 25I laksu mwawei, myan ma yes, myani tuu ru, ima som ima si mot si wa hal ti la i Al i DeeƁwe, som ima si hali, si wa mupwet. 26Fota ngga' ima Deehi mii mahuhur i mupwet, angga'i nai hwak kin Al ames te ii mahuhur i mupwet. 27Deehi tuu fas mbaitat i tot ɓur, ɓurti yis a Al i Maɗufal.
28“Ka hu shok na fwai ti mai i findeli kwa, ɓurti myan si yes ima shak ɗufal ima si ta fiyai si wa hal ti la asus, 29si rangya. Ima si mas maɗesi si wa muluk fit ti mupwet, ima si mas mafwashi si wa muluk fit ɓa si totus a ɓur i wa man. 30I mas ɗama ahwen kwa. I tot ti ɓur amen angga' ima DeeƁwe ma lakansun ɓa i masi ta. Ɓurti andi ɓur amen a mwawei, ɓurti i maas ti aɗeng ima mana mulut amen kwa, aɗeng ima mata mulut ames i yis ima rohun.
Findel si Yeso hai
31“Na i findel si haisun hai, findel amen mati mwawei kwa. 32Ɗeng mana ima ma findel si yin hai, i shangi findel ima ma laki si yin hai a mwawei.
33“Hu ro ɗufal wa kyel i Jwon, yis laku mwawei. 34Shak ta andi, i kinɓwi si laki i maɗufal kwa. I lak ati a ɓurti ɓa hu wis mupwet. 35Ai Jwon a man tima ti mat yit fati kweneng, hu ɓwet hu mas jakak ti kweneng amesi fwet i myan ndyong.
36“I ti findel i haisun i ma kingga ɓin i ma Jwon lak. Yis ro i ma Deen fan ɓa i dalai, hu i ma i masi, kof nyai, a Deen rohun. 37Dee ima rohun tuu findel si yin hai ti haisus. Hu hal la asus ta kyel ma kwa, hu ɗing ngga' i ma mata kwa. 38Findel ames tyai ta mulwat amu kwa, ɓurti hu fa mwawei wa kyel i maɗufal ima yis roi kwa. 39Hun a ɓata bene ti kaadaha i DeeƁwe ɓurti hu ɗingi fota hu wa wisti mupwet i myan hu myan ta wii. Mai worongi ta kaada i DeeƁwe ima si findel si yin hai. 40Shak ta andi, hu nggyu i yes kyel amen ɓa hu wis mupwet.
41“I mat ngye ta kyel i ɗufal kwa. 42I shangu, i shangi hwak nyai, hu ti matɓwet i DeeƁwe ta wii i mulwat amu kwa. 43I yes saa ti asum i Deen hu matun kwa, na ɗeng yes saa ti asum i haisus, hu wa matsus. 44Hu wa masi atini hu fa mwawei takfai tima hu mati ngye ta kyel i ɗiyai, ɗak hu ɓwet far ti ngye ima yes ta kyel i DeeƁwe yis andek ɗwyat kwa ya?
45“Ka hu ɗingi fota i wa lak ti asui ta kyel i Dee kwa. Ma lak ti asui a Mosis ima hu kin mulwat amu ti hali nyai, ma wa bumsu. 46Naɗin hu fa mwawei si Mosis, naɗin hu wa fati mwawei si yin hai, ɓurti Mosis worong si yin hai. 47Na hu fa mwawei si aɗeng ima Mosis worong kwa, hu wa masi atini hu fa mwawei si findel amen ya?”
© Wycliffe Bible Translators, Inc. and © The Nigeria Bible Translation Trust 2018
