Génesis 7
7
Bakan tita ꞌikuatsinkin uni këñua bana
1Usa ꞌain ka Nukën ꞌIbun Noé kakëxa: Mixëshi kamina uni ꞌatimati tsómainun ënë nëtënuax upiti tsotin, usa ꞌixun kamina ꞌën kakëxun kamabi ñu upíokin ꞌan. Usa ꞌain kamina nunti chaiirami ꞌakë anu mikamaxëshi min bakë bëchikë kamabë ꞌiruti ꞌain. 2Kamina biti ꞌain mapai achúshi ꞌimainun rabë́ aín bënëkama ꞌianan mapai achúshi ꞌimainun rabë́ aín xanu kamabi ñuina upíbu, ꞌaínbi kamina a pitima ñuina achúshi aín bënë ꞌimainun achúshi aín xanuishi biti ꞌain. 3Kamina timë́ti ꞌain mapai achúshi ꞌimainun rabë́ kamabi ñuina pëchiñu, usokin ꞌakëx ka ñuina pëchiñukama ax menuax këñutima ꞌikën, 4ënuax mapai achúshi ꞌimainun rabë́ nëtë ꞌikëbëtan kana cuarenta nëtë ꞌimainun cuarenta imë́ ꞌuí ꞌibúmiti ꞌain. ¡ꞌËx kana kamabi ñuina menu ꞌikë ꞌën uniokë akamabi këñuti ꞌain, ꞌën uniokë ꞌikëbi! 5Noénën ka Nukën ꞌIbu kakësabiokin kamabi ñu ꞌakëxa.
6A nëtën bakan tita ꞌikuatsinkin me mapurukë anun ka Noé seiscientos baritiañu ꞌiakëxa. 7Usa ꞌain ka Noé aín nunti chaiira anu aín xanu ꞌimainun aín bëchikëkama ꞌimainun aín bëchikënën xanukamabë, aturibia bakan këñutima kupí ꞌiruakëxa. 8A piti ñuinakama, ꞌimainun nun a pitima ñuinakama, ꞌianan axa nuánkë ñuina ꞌimainun axa men nirinkëkama akamabë, 9ka Noébë nunti chaiira anu ꞌiruakëxa, ꞌirui ka rabë́ aín bënë ꞌimainun rabë́ aín xanu, usai ꞌinua Diosan kakësabi oi.
10Usa ꞌain ka mapai achúshi ꞌimainun rabë́ nëtë ꞌikëbë bakan tita ꞌikuatsini ukin me abira abi mapuruakëxa. 11Anua rabë́ ꞌuxë ꞌirukë ax diecisiete nëtë ꞌikëbë ka Noé seiscientos baritiañu ꞌiakëxa. A nëtënbi ka me bákikëbë parúmpapa ꞌukëmëu ꞌikë ꞌumpax chaiira chikíakëxa, usai ꞌimainun ka naí panarabëkëbë manámi ꞌikë ꞌumpaxribi chaiira anpënkiakëxa. 12Usaia ꞌikëbë ka cuarenta nëtë ꞌimainun cuarenta imë́ menu nëtë́timisamaira ꞌitanun ꞌuñe ꞌibúakëxa. 13A nëtënbi ka Noé nunti chaiira anu aín bëchikëkama, Sem, Cam ꞌimainun Jafet, ꞌimainun aín xanu aín piaka rabë́ ꞌimainun achúshi aín bëchikënën xanu akamabë ꞌiruakëxa. 14Usai ꞌirukin ka kamabi ñuina a ꞌarakati ꞌimainun, ꞌarakatima akama ꞌimainun axa men niríkë ñuina ꞌimainun pëchiñu ñuina akamabëbi atsíankëxa. 15Kamabi ñuinanëx ka Noébë nunti chaiira ꞌakë anu rabëtax rabëtax atsíankëxa. 16Ka ꞌiruakëxa achúshi aín bënë ꞌimainun achúshi aín xanu achúshi achúshi ñuina, Nukën ꞌIbu Diosan Noé kakësabi oi, usaía atsínkëbëtan ka nunti chaiira aín xëputi Nukën ꞌIbun xëpúakëxa.
17Usa ꞌain ka baka chaiira ꞌëkë ax cuarenta nëtë ꞌuñe ꞌaisamaira ꞌibúakëxa. ꞌIbúkëbë bakan tita ꞌikuatsinkëbë mebi mapurukëbë ka nunti chaiira ax menuax nunkati bëspúruakëxa. 18Bakan tita ꞌëkin abira abi mapurukëbë nunti chaiira axribi, bëspúrui nunkákëxa. 19Chaiira bakan tita ꞌëkin ka aín bashi chairukë abi mapurukin me ꞌaíma ꞌitánun mapuakëxa; 20usakin aín bashikama maputankëx ka anuishi sënënima mapai achúshi ꞌimainun rabë́ manámiki bakan tita ꞌëi sënë́ankësa. 21Usai ꞌikin ka kamabi uni ënë menu tsókë këñuakëxa, ñuina pëchiñu ꞌimainun ꞌarakakë ñuina ꞌarakatima ñuina axa men niríkë ñuina akamax ꞌikësaribiti bamai këñuakëxa. 22Kamabi ñu menu ꞌikë axa tsókë ꞌimainun axa uinkë ñuina, akamaxbi këñuakëxa. 23Usaia këñúkëbëbi ka Noé ꞌimainun axa nunti chaiira anu ꞌikëkama ax kuni këñuama ꞌikën; Nukën ꞌIbu Diosmi sinánkë ꞌaish usaía ꞌimainun ka uni, ñuina ninu ꞌikë ꞌimainun ñuina pëchiñu manan nuánkë, ꞌimainun men niríkë ñuina akamaxbi këñuakëxa; 24usa ꞌain ka kamabi me bakan tita chaiira ꞌëkin mapukë ꞌaish ciento cicuenta nëtë ꞌimi basiakëxa.
© 1978, 1995, 2008, 2022 Wycliffe Bible Translators, Inc. All rights reserved.
