मत्तयाल 13
13
विज्जा तासानोना वेसुड
(मरकुस 4:1-9; लूकाल 8:4-8)
1अदे रोजु येसु लोताल पेय्सि समुद्रम ओड्डुनगा होंचि उदतोर. 2वेल्लेटुर लोकुल्क ओनगा जमा आताहेंका ओर उंदि डोंगा एक्किस उदतोर. लोकुल्क बारे ओना मुन्ने समुद्रम ओड्डुनपोर्रो नित्तिसि मत्तुर. 3अस्के ओर वेल्लेन पोल्लें वेसुडिं वेहासेक कराहतोर.
अव्टेटाल उंदि वेसुडि इल्हा मंता: “केंजट, वरोर कास्तकरि मनकल विज्जां वीतालय पेय्स्तोर. 4ओर वीतनेंके इच्चुं विज्जां हरदगा अरतां, अस्के अवुन पिट्टें वासि पेर्सि तित्तां. 5इच्चुं विज्जां बंडाना गेर्सेपोर्रो अरतां. अगा तोळि एक्को हिलुवादानकु आ विज्जां बिराने मोलियतां. 6गानि हिह्कु लोप्पोळ्क होनवाहेंका पोळ्द पेय्स्तस्के मोल्कां वत्सि हासोत्तां. 7इंका इच्चुं विज्जां हाह्कुना पोदाने अरतां. हाह्कुना पोदां इरगा बेर्सि अव विज्जन बेर्सा हिया हिल्लें. 8इच्चुं विज्जां बेसता जेगाते अरतां. बेस पंटा पेय्स्ता. अव उंद-उंदि मोदोल्कु बगा मुप्पै अंताल्क, बगा अरवै अंताल्क, बगा नूर अंताल्कुना पंटा पेय्स्ता. 9बोर्कु केंजालय केव्क मंतां ओर केंजट.”
वेसुडिं वेहचि वळकाना उद्देसम
(मरकुस 4:10-12; लूकाल 8:9,10)
10पजा सिस्युल्क ओनगा वासि, “गुरु, निमे लोकुल्कुनतोनि वळकानेंके वेसुडिं वेहासेक बारि वळकांतिन?” इंचि पूसकीतुर.
11येसु अस्के ओर्कु इल्हा वेहतोर. “मीक अय्ते स्वर्ग राज्येमता बारेमता मर्ममतुन एरपाट कीकुनालय बुद्दि मंता, गानि ओर्कु हिल्ले. 12बारित्ते, बोनगा अय्ते मंता, ओन्क पेन इंका हींता, अस्के ओन्क वेल्लेन आंता. गानि बोनगा अय्ते हिल्ले, ओनागटाल मात्रम मत्तदुनगुडा पेन वापस एतकुन्नार. 13ओर हूळुळ अय्ते हूळंतुर, गानि ओर्कु अद दिस अर्रो. ओर केंजुड अय्ते केंजांतुर, गानि ओर्कु केंजा वायो, अद ओर्कु तेळियोगुडा. अदुनहाटीं नना वेसुडिं वेहासेक ओरतोनि वळ्कंतन. 14यसायाह इनानोर ओरा बारेमते रासतद पेनदा पोल्ले इंदके इल्हा निजम आता:
“मिमेट केंजंतिर निजमे, गानि बस्केने अर्तम कीकुन्निर.
कळ्कुने हूळंतिर, गानि अद मीकु तोसो.
15ओर कळ्कुने हूळसि, केव्कुने केंजसि,
मनसुनाल अर्तम कीकुंचि नाहेके तिरियतस्के ओर्कुन नना बेस कीकन.
इल्हा बस्केने जर्गामन्नि इंचि ओरा मनसु गट्टि पडता,
केव्क बारे मंदोम आसि केंजा वायाकोंटा आतां, कळ्कुन बारे मुचकुतुर.”#यसायाह 6:9-10
इद पोल्ले नावां केंजवोरा बारेमते निजम आता. 16गानि मीवा कळ्कु हुळंतां, केव्क केंजंतां इंचि मिमेट आसिर्वाद दोर्कतोर आंदिर. 17नना मीकु निजम वेहांतन, इय्याला मिमेट बव हूळसंतिरो, केंजसंतिरो, अवुन वेल्लेटुर पेनदा कबुरतोर आनि नीतिमंतुल्क हूळालय, केंजालय तन्लाळुंदुर. गानि ओर्क हूळालय, केंजालय दोर्काहिल्ले.
विज्जा तासानोना वेसुडिता अर्तम
(मरकुस 4:13-20; लूकाल 8:11-15)
18मिमेट इंदके विज्जां वीतानोना वेसुडिता अर्तम केंजट. 19स्वर्ग राज्येमता बारेमता कबुरतुन केंजसि बोर दान अर्तम कीकुन्नोर, ओना मनसुने बतल अय्ते वीतिस मत्तनो अदुन देय्यम वासि इग्गिस ओंता. आ लोकुल्क इत्ते विज्जां अरता हर्दा जेगातसंटोर आंदुर.
20बोर अय्ते पेनदा पोल्लेतुन केंजसि कूस आसि बिराना दान ओप्कुंतोर, ओर इत्ते विज्जां अरता बंडाना गेर्से जेगातसंटोर आंदुर. 21ओनालोप्पो पेनदा पोल्लेता हिह्कु गट्टि पळुवाहाटीं, ओर कोन्नि रोजके अव्टे निल्सि मनांतोर. पजा पेनदा पोल्लेताहाटीं तिप्पल्क, कस्टाल्क वातस्के, विस्वासमताल ओर बिराना लक्कु आंतोर.
22बोर अय्ते पेनदा पोल्लेतुन केंजांतोर गानि सम्सारमता रंदि, दनमता आस्ति, इसोंटा विचाराल्क ओर केंजता पोल्लेतुन ओनालोप्पो बेर्सा हिय्यों. अस्के अद पोल्लेताल बतल पायदा आयो. असंटोर इत्ते, विज्जां अरता हाह्कुना पोदाना जेगातसंटोर आंदुर.
23बोर अय्ते पेनदा पोल्लेतुन केंजसि, ओप्कुंचि तेळियागोटकुंतोर, ओर इत्ते विज्जां अरता बेसता जेगातसंटोर आंदुर. ओर बेस पायदा तरांतोर. बगा मुप्पै अंताल्क, बगा अरवै अंताल्क, बगा नूर अंताल्क इल्हा पलांचंतोर.
हकोलिना वेसुडि
24येसु इंकुंदि वेसुडि वेहतोर. बोर मनकल अय्ते ओना पोलमते गोह्कुना बेस विज्जां वीततोर, आ मनकन लेह्का स्वर्ग राज्येम मंता. 25गानि अंटोर लोकुल्क मींडतद हूळसि ओना पगातोर वासि गोह्कुने हकोलिं#13:25 हकोलिं तोडेंगा, इवुना विज्जा बदन्ना पंटाते अर्रानय्ते अद पंटातुन पाड कीस पोहंतां. वीतिस होत्तोर. 26पजा गोह्कु मोलिय्सि पोट्टाक वासि मियतां, हकोलिं इंका दिसतां. 27अस्के नेदा मालकुनगा जीतागाह्क वासि, “मालक, निमे अय्ते नीवा नेदे बेसता विज्जां वीत्सि मत्तिन गदा? मरि अगा हकोलिं बेंदाल वातां?” इंचि पूसकीतुर.
28अस्के “इदु बोरो पगातोर कीता कबळ आंद.” इंचि मालक इत्तोर. “अय्ते निमे बतल इंतिन मरि, मोमोट होंचि हकोलितुन पीक्सि पोहकोमा?” इंचि जीतागाह्क मालकुन पूसकीतुर.
29अस्के मालक, “मन्नि, हकोलितुन पीकनेंके गोह्कुनगिंटा पीकिकिट! 30कोताक वयनदाका अव रोंडुगुडा कलियसे बेर्सिंकांटी. पजा कोताक वातस्के कोय्यानोर्कुंक नना, ‘मुन्ने हकोलिन कोय्सि, हेरकीं दोहाचि अवुन बोडसि पोहट. पजा नावा गोह्कुन जमा कीसि गुम्मिते दोस्सटु इंतन,’ इंचि जीतागाह्कुंकु वेहतोर.”
आवाल्कुना पेळेता वेसुड
(मरकुस 4:30-32; लूकाल 13:18,19)
31पजा येसु ओर्कु इंकुंदि वेसुडि वेहतोर. “स्वर्ग राज्येम, आवाल्कुना उंदि पेडेतसोंटद आंद. आ पेडेतुन बोरो वरोर मनकल ओसि, ओना तोटाते वीततोर. 32आवाल्कुना पेळे अन्नि पेडेकुंकन्ना सिन्नागा मनंता, गानि बेरस्तस्के अद तोटाते मनना अन्नि मराकुंकन्ना पेद्दा मरा आंता. मब्बुने परियना पिट्टें वासि दाना कोम्मांक गूडां दोहंतां.”
33येसु पजा ओर्कु इंकुंदि वेसुडि वेहतोर. “स्वर्ग राज्येम पुल्लटा पिंडितसोंटद आंद. बदो उंदि मुरतळ पुल्लटा इच्चुर पिंडितुन मूड तव्वना पिंडिते कल्पता. अय्ते मेल्लगा-मेल्लगा आ पूरा पिंडिअंता पुल्लगा आता.”
34इव अन्नि पोल्लें येसु लोकुल्कुंक वेसुडिनेन वेहतोर. वेसुडि वेहाका ओर्कु बतले वेहाकोंदुर. 35बारित्ते पेनदा कबुरतोराहेंदाल मुन्ने वेहचि मत्ता पोल्ले इंदके निजम आता, अद पोल्ले इल्हा मंता:
“नना नावा तोळ्दे वेसुडिं वेहंतन.
दुनिया पुट्तस्केटाल मक्सि मत्ता पोल्लेन नना वळ्किसि वेहंतन.”#बजन संहिता 78:2
हकोलिना वेसुडता अर्तम
36पजा येसु लोकुल्कुन होळसिसि लोन होत्तोर. अस्के सिस्युल्क ओनगा वासि, “गुरु, पोलमते वीतता हकोलिता वेसुडतुन माकु तेळियागोट्सि वेहा.” इत्तुर.
37अस्के येसु ओर्कु इल्हा वेहतोर. “केंजट, बेसता विज्जां वीतानोर इत्ते मनकना रूपमते पुटतोन नना आंदुन. 38पोलम इत्ते ई दुनिया आंदु. आनि बेसता विज्जां इत्ते पेनदुन ‘मावा राजाल’ इंचि विस्वासम कीतोर, हकोलिं इत्ते देय्याल्कुन पोल्लें केंजानोर आंदुर. 39हकोलिं वीतुता पगातोर इत्ते, देय्यम आंद. पंटा कोयना वेला इत्ते दुनिया मुंळगना आकिर वेला. कोय्यानोर इत्ते पेनदा दूतां आंद. 40अस्के बल्हा हकोलितुन कोयसि, जमा कीसि तडमि दोसतुर, अल्हेने इद दुनिया मुंळगना आकिर वेलाते आयार. 41बारित्ते अद वेलाते मनकना रूपमते पुटतोन नना, नावा दूतन लोहंतन. अव नावा राज्येमते मनना पापिर्कुन आनि पापम किया वेहानोर्कुन अंटोर्कुन पेच्हासि, 42बस्केने पिर्रकोंटा पोत्तना तडमिते वाटसींतां. अगा बस्केळ्क अळमळ, किटुर-किटुर पल्कु कोर्कमळे मनंता. 43अस्के नीतिमंतुल्क बोर अय्ते मंतुरो ओर ओरा पेनबाबाना राज्येमते पोळ्दुन लेह्का मेर्सेके मनांतुर. बोर्कु केंजालय केव्क मंतां ओर केंजट.”
पोलमते मकिस्ता दनमता वेसुड
44स्वर्ग राज्येम बारेमते इंकुंदि वेसुड वेहंतन केंजट. उंदि पोलमते दनम मक्किचि मत्ता. बोरो वरोर मनकल आ मक्किचि मत्ता दनमतुन हूळतोर. आनि मर्रा अग्गेन मक्किचि इरगा कूस आसि लोन होत्तोर. पजा ओर ओना लोन मत्तद-हिलवद अन्नि अमकुंचि वाता कोत्ताने अद पोलमतुन असकुत्तोर.
बेस मुच्च्याल्कुना वेसुड
45स्वर्ग राज्येम बारेमते इंकुंदि वेसुड वेहासेक केंजट. वरोर व्यापारि बेसता मुच्च्याल्क पहकसेक मत्तोर. 46अय्ते ओन्क उंदि वेल्ले दराता मुच्येम दिसता, अस्के ओर लोन होंचि ओनगा मत्तद-हिलवद अन्नि अमकुंचि वाता कोत्ताने अद मुच्येमतुन असकुत्तोर.
ओल्लता वेसुड
47“स्वर्ग राज्येम बारेमते मर्रा उंदि वेसुड वेहासेक केंजट. उंदि ओल्ला मत्ता. अद ओल्लातुन बेरेडते इसुरतस्के अन्नि रकाल्कुना मीन्कु अरतां. 48ओल्लामेड मीन्कु अरतस्के, मीन्कु पिय्यानोर दान ओड्डुंक इग्गुतुर बेसतवुन पेर्सि तोत्तिते वाटतुर, अल्हेने कराबतवुन बारे पोहचीतुर. 49इद दुनिया मुंळगना आकिर वेलातेगुडा अल्हेन आयार. पेनदा दूतां वासि, सेड्डोर्कुन नीतिमंतुल्कुनाल वेरे कींता. 50कीसि ओर्कुन बस्केने पिर्रकोंटा पोत्तना तडमिते वाटसींतां. अगा बस्केळ्क अळमळ, किटुर-किटुर पल्कु कोर्कमळे मनंता,” इंचि वेहतोर.
51पजा “इव अन्नि पोल्लें मीकु तेळियतंगा?” इंचि येसु सिस्युल्कुन पूसकीतोर. अस्के “हां गुरु, माकु तेळियतां,” इंचि ओर इत्तुर.
52अस्के येसु “बोर मनकल अय्ते ओना कजानाताल पूनद-पळानद सोम्मुन पलाते पेच्हांतोर, आ मनकन लेह्कने स्वर्ग राज्येमता सिस्युड मत्ता हरेक दर्मसास्त्रम कराहना गुरु मनांतोर, ओर यहुदि लोकुल्कुना पडाना आनि पूना बोदा रोंडु इंका करहा परांतोर.” इंचि ओर्कु वेहतोर.
येसु वापस ओना नार वांतोर
(मरकुस 6:1-6; लूकाल 4:16-30)
53पजा इव वेसुडिं वेहमळ महासि येसु अगटाल पेय्सतोर. 54ओना नार वासि अगाटा दर्मसास्त्रम कराहना लोते होंचि लोकुल्कुंक पेनदा पोल्लें कराहलय दल्गतोर. अस्के अव पोल्लें केंजसि अंटोर लोकुल्क इचंत्रम आसि, “ईनकु इच्चोर बुद्दि, अद्बूताल्क कियना ताकत, बगटाल दोर्कता? 55ईर अय्ते वडलना मर्रे गदा? ईना तल्लुर अय्ते मरियमे आंद, इंका याकोब, योसेप, सिमोन, यहुदल ईर अय्ते ईना तम्मुह्के आंदुर. 56अचोने आयका ईना हेलाह्कगुडा मना नड्डुमे मंतां. अय्ते मरि ईन्कु इवन्नि पोल्लें, कबाह्क बोर हीतुर?” इंचि नाटेनोर वळ्ककुनुंदुर. 57अदुनहाटीं ओर येसुनपोर्रो होंग आतुर.
अस्के येसु ओर्कुन इल्हा इत्तोर, “पेनदा कबुरतोंकु ओना नाटे, ओना लोते तप्पा दुनियांता कदर दोर्कंता.” इत्तोर. 58ओर विस्वासम कियवाहाटीं अगा येसु वेल्ले अद्बूतामाता कबाह्क किया हिल्लोर.
© 2022, Wycliffe Bible Translators, Inc. All rights reserved.
