От Матфея 14
14
Туқулъҳа Иоанным Крестителым
1Тама̄ни пилъыӷми Иродым, иглыӷутистыңан Галилеям, нагақуқа̄ Иисусым апыҳсыӷӯмалъҳа. 2Иродым қыпҳаҳтыни пикӣ: «Ипа уна Иоанныңӯқ Крестителым, уңува̄ма̄қ. Ысҳаҳуқун аҳтуӷьяҳқа̄нӷилъылык алъя̄ҳлъюхўаҳтилъыӷмун».
3-5Қавңанҳақ Иродым туқутыстыкақыхкаңа Иоанн Крестителым, қаюҳлъяк Иоанным уңипа̄ткақыхкаңа: «Қа̄ткунъыӷитутын Лӣлиҳтӯся̄мнъун тугулъыҳпыгун Иродиада, аңлыгутыхпык нулиҳа». (Иродиадам угиксяқаңа Филипп, Иродым уюӷа̄.) Иоанным уңипа̄тылъҳа апалъюқлъюку Иродым тугусқыхка̄ Иоанн, асиҳқылъюку анусимиңлъяӷвигмун канаҳтысқылъюку. Иродым туқутысюгуяқаңа Иоанн, нақам аликыхкӣ Иудеит сыӷлылӣҳқӣнаюката қаюҳлъяк ухпықықкаңат Иоанн ӯкналиқыстыңунилюку.
6Та̄хкын Иродым алъхыӷвиган аӷныӷани, Иродиадам панига тукалыгақақ Иродымлъю ақылъқитлъю сивуңитни. Ынңа̄талъ Ирод ыфқуӷьюхлъякақ, 7рыпалъ акықыхка̄: «Ипапыста̄қ сямың алңунак туңсиқувык тӯнылъықамкын».
8На̄ми каяхтылъҳатун пика̄: «Хўа̄ ма̄тын тагиваҳу қаю̄таӷра̄хкун лъилюку на̄сқўа Иоанным Крестителым».
9Умӣлык қивӷукақ иўырңа акықика̄тминың ақылъқами сивуңитни пиюкылъҳа каягутка̄. 10Ынка̄м Иродым анусимиңлъяӷвигми Иоанным на̄сқўа кыпыстыка̄. 11На̄сқуқ қаю̄таӷра̄хкун лъилюку тӯныхка̄т аӷнаӷаӷмун, ынка̄м на̄минун агля̄тка̄. 12Иоанным малихся̄ҳтыңи тагилютың югусӣ лъивыӷьяҳтуқа̄т. Та̄хкын Иисус уңипа̄сяҳтуқа̄т.
Иисусым Ныӷыстилъҳа 5,000ның Сӣпңалӷӣның Югның
13Иисусым нагақуӷьямигу уңипақ, аңьямун ӯхлъюни аӷуляқыхкақ па̄ҳқилъҳанун лъңинаҳа̄налюни. Иўырңа юлӷутыт нагақуӷьямыхтыху нымыхның малихтыка̄т пиюгмың. 14Иисус қӯтмун ӯхлъюни ысҳаӷлюки юлӷутыҳлъягыт наңлъыгьягутыҳлъякӣ, ынка̄м на̄лъҳуқуқӣ қинуюлъҳит.
15Хўаникуягу малихся̄ҳтыңита такулюку пика̄т: «Хўаникўа̄, ма̄на па̄ҳқитуқ; агляҳтӯтысқики нынун лъңитның нықыңысқылъюки».
16Иисусым пикӣ: «Ма̄нлъит. Лъпыси ныӷьяҳқалитыки».
17Пика̄т: «Хўа̄ лыган талъиматха̄гут нықыкшагыт, иқалъюха̄клъю».
18Иисусым пикӣ: «Тагитыки хўавык». 19Та̄хкын юлӷутыт ақумӯтысқыхкӣ выга̄ҳқун. Тугулюки талъимат нықыкшагыт, иқалъюха̄клъю, сивухлъюни қилягмун Кияӷнық игамсиқаюгвикыхка̄. Ӣхминың а̄вгуӷлюки нықыкшагыт, малихся̄ҳтыминун тӯныхкӣ уйыхтысқылъюки юлӷутнун. 20Қамахлъюни ныӷӯткақ кыпсю̄лъюни. Та̄хкын малихся̄ҳтыт тугукӣт қуля ма̄лӷук сӣпнықлъюку корзинат ыслъықңалӷӣт кагимлыӷитның нықыкшагыт сӣпныӷыт. 21Ынтақун 5,000ңӯт югыт ныӷӯткат, аӷнатлъю, таӷнуҳа̄тлъю кысюткыхпынаки.
Иисус Пиюлӷӣ Мыҳқун
22Та̄хкын Иисусым малихся̄ҳтыни каяхтыкӣ аңьякун аӷвиқыстӣсқылъюки на̄йвам иңлюңанун, лъңан агляҳтӯтысималюки юлӷутыҳлъягыт. 23Юлӷутыҳлъягыт агляҳтӯтысямики лъңинаӷми на̄йӷамун маюқақ юӷаӷналюни. Таўани иӷивгаӷми Иисус лъңина̄малюку, 24аңьят унга на̄йвами аўаваӷлютың, ынңа̄талъ имаҳлъӣқат қаюҳлъяк айгуӷнаӷускаңи. 25Акулыхкыни пиңают аӷвинлыккылъя̄к уна̄ңулюку Иисусым такукӣ малихся̄ҳтыни мыӷым қа̄йңакун пиюгмың. 26Малихся̄ҳтыт ысҳаӷлюку мыҳқун пиюлӷӣ какавнӣқат. Ынка̄м акилӷӯкат: «Таӷныӷа̄гуқ».
27Таўаниңинақ Иисусым пикӣ: «Алиңыхпынаси, Хўаңаңӯңа!»
28Та̄хкын Петырым пика̄: «Атанық, ипа лъпыңукувык тахсиӷңа лъпынун агляӷляңа мыӷым қа̄йңакун».
29Иисусым пика̄: «Таги». Ынка̄м Петр атыӷлюни аңьямың, мыӷым қа̄йңакун пиюгмың агляқақ Иисусымун. 30Иўырңа ануқа лъпыксямигу алиңыхкақ, калывуткылъюку акилӷӯкақ: «Атанық, югулиңа!»
31Таўаниңинақ Иисусым акуқаӷлюку пика̄: «Ухпықилъыҳқыста̄пигӯтын! Сяңавык малӷуклъизин?»
32Аңьямун ӯхтақуклъю ылъма̄рахтыкақ. 33Ынка̄м аңьямылңӯт манигуқа̄т Иисус. Пика̄т: «Ипапыста̄қ Кияӷныӷым Иӷнықа̄тын!»
Иисусым На̄лъҳускаңи Қинуюгыт Геннисаретыми
34Та̄хкын на̄йвақ аӷвиӷлюку тамлякат Геннисаретыкун. 35Тама̄кумӣт лӣсюқсямыхтыху Иисус, уңипа̄сяҳтӣсқыхкӣт нунаҳаӷмун қинуюхтӣӷит тагитысқылъюки Иисусымун. 36Манигӯтуткӣт қинуюлӷӣт ўаран ся̄фтысқылъюку кынӣкун ынка̄м қамахлъютың тама̄кут ся̄фтилӷӣт на̄лъҳутылъыңыхкат.
© 2022, Wycliffe Bible Translators, Inc. All rights reserved.
