Matthew 12
12
Sa Umillongan Da Judyu
(Mrk. 2:23-28; Luk. 6:1-5)
1Sin-aḻgaw ḵade sa umillongan da Judyu, nangoy da Jesus si pappayawe namuḻ-an si de wheat we isun ni pagoy. Nauḻat ḵad da disipuluna, ḵummuḻtungda'ḵ ḵinutimanda. 2Inninggaw da udume Pharisee ye innilada ḵingwada. Ḵananda ḵan Jesus, “Ilam ḵad, lisalison da disipulum da lintog taḵu we Judyu te an-anida si umillongan.”
3Pun ḵanan Jesus ḵan dida, “Ḵasapuḻane sosomḵonyu binasayu mipanggob atte ḵingwan Ari David ya da buḻunna'tte nauḻatanda. 4Nillumnoḵ si boḻoy Apudyus woḵ ḵinanna tinapaye nidatun ḵan Apudyus we adimpun ni lintog iyunude ḵanonda. Abus da papadi'ḵ miyunude angan si sadi ye tinapay.#12:3-4 1 Samuel 21:1-6; Leviticus 24:9. 5Sa osa bos, somsomḵonyu oḵyan nigili ye lintog Moses we anḵewaaḻ da papadi'tte templo si umillongan ya nilisalisda lintog si umillongan yaḵon adidapun maḵabasuḻ. 6Yaḵon ibagaḵ ḵan diḵayu, awad sina osae napatpatog nu sa templo. 7Ḵanan ni nigili si Ugud Apudyus, ‘Ḵan saḵon, amo napatpatog ḵumadagu ḵayu'tta asintataguyu nu sa angidatunanyu'tta ayam ya da udume datun ḵan saḵon.’#12:7 Hosea 6:6. Nu inigammuyu oḵyan pion ni anna ugudon, adiyu oḵyan pabasuḻon da tagu we ippun basuḻda.”
8Pun ḵanan Jesus we nangiyanungus, “Saḵone Abeng Di Tagu, anna ḵaḻabbongaḵ atta maḵwa si umillongan.”
Sa Tagu We Naangḵet Imana
(Mrk. 3:1-6; Luk. 6:6-11)
9Pun nallibbat da Jesus sidi woḵ ummoy si sinagogada. 10Inninggaw tagu we naangḵet imana. Inninggaw os da udume tagu sidi ye pionda pabasuḻon aḵ Jesus. Pun ḵananda ḵan siya, “Iyunud ḵamman ni lintog taḵu nu ḵaanon taḵu da saḵit si umillongan?”
11Ḵanan Jesus we summongbat, “Ngai inona nu awad osa ḵan diḵayu'ḵ ossaan karnerona ya nabituwan sanate karnero si umillongan? On umoyna ḵammos oḵaḻon? 12Da tagu ḵad, napatpatogda'ḵ amod nu da karnero. Pun iyunud ni lintog taḵu we ḵoon taḵu ambaḻu si umillongan.” 13Pun ḵanana si naangḵet, “Uyadom imam.” Inuyadna ḵad, nipaḻ-og woḵ bummaḻu we isun ni biiḵe imana. 14Pun ummoyon da Pharisee woḵ umoyda an-uugud si inondae angongat ḵan Jesus.
Sa Namiliyan Apudyus Ḵan Jesus
15Inigammun ḵad Jesus pionda ḵoon ḵan siya, ḵesan woḵ adu da nitun-ud ḵan siya. Ḵinaanna da saḵit da losane nasaḵit ḵan dida, 16woḵ binilinna dida ta adida ug-uggudon atta udum mipanggob ḵan siya. 17Ḵingwana ḵaḵna ta mituttuwa imbagan Apudyus si awe ḵan Profeta Isaiah we ḵanana,
18“Annaya sammiluḵe piniliḵ.
Siya ay-ayatoḵ ḵan mas-omaḵ.
Ibuunḵu Ispirituḵ ḵan siya ta iwaḻagawagna'tta losane Gentil
inon da tagu we maun-unan atte antotollong Apudyus.
19Adipun maḵasossongbat baḵon nu pumaleset
baḵon nu anaddangsoḻe guminga'tta ḵaḻsa.
20An-anggom atta tagu we anḵuya pammatidae
isun ni adinapun putton naḻupaḵe loda
baḵon nu badangana da aḵit pammatidae
isun ni adinapun ḵospon anḵusḵusyope silaw.
Pagatupanae an-anggom atta tagu we isun ni sana inggana'ḵ
ḵoona da tagu'ḵ maun-unan si antotollong Apudyus.
21Ḵad siya abus aḵ namnamaon da losane tagu we anagu ḵan dida.”#12:18-21 Isaiah 42:1-4.
Aḵ Jesus Ya Aḵ Beelzebul
(Mrk. 3:20-30; Luk. 11:14-23; 12:10)
22Naabus ḵad, indatongda ḵan Jesus naḵuḻap ya naumoḻ te naaḻanan. Pinaḻyawna ḵad aḻan, naḵaginga ḵan nadiyat atana. 23Sintotokoḻ da tagu si ḵingwana woḵ ḵanandae nan-asiimus, “Siya ḵamman ganaḵ Ari David we uuwayon taḵu?”
24Yaḵon dingngoḻ ḵad da Pharisee ḵananda, “Abus aḵ Beelzebul we pangat da aḻan aḵ nangitod atte ḵabooḻanae amaḻyaw atta aḻan.”
25Yaḵon iniiggammun Jesus da somsomoḵda woḵ ḵanana ḵan dida, “Nu awad umili'ḵ ampapatoy, madadail. Pun ḵaḵna bos maḵwa nu awad siyudad baḵon nu baḻyan aḵ ansusubog, mabuḵaḻda. 26Ḵaḵna bos aḵ Satan nu paḻyawona da asin-aḻanna, magoggogwa ampangatanae an-asisullagida ya madadail. 27Ngaipayu ḵamman ibagae aḵ Beelzebul nangitod atte ḵabooḻaḵe amaḻyaw atta aḻan? Nu tuttuwa da imbagayu, ngai bos nangitod si ḵabooḻan da disipuluyu we amaḻyaw atta aḻan? Pun gapu ta sa ḵabooḻan Apudyus amaḻyawan da disipuluyu'tta aḻan we daḵampun atte ḵabooḻan Satan, sana amanoḵnoḵe nankamali ḵayu si imbagayu mipanggob ḵan saḵon. 28Te sa ḵatuttuwaan, sa Ispiritu Santu nangitod atte ḵabooḻaḵe amaḻyaw atta aḻan ya sadi amanoḵnoḵe sinsadi gattoḵe awad ḵan diḵayu ampangatan Apudyus.”
29Ḵanan os Jesus we nangipani, “Aḵ Satan ḵad, mipani si tagu we maasngaan te naippun maḵaaḵaw atta ḵuḵuwana nu adina unaon baḻudon ya asinaot itallay dida.
30“Ngaimane adipun tumimpuyug ḵan saḵon, sumullagi ḵan saḵon ya ngaimane adipun bumadange anagup atta tagu we amati ḵan saḵon, amo buḵaḻona da tagu we umali ḵan saḵon. 31Pun sa ibagaḵ ḵan diḵayu, ngaimane basuḻ da tagu ya da an-ugud aḵ lawweng mipanggob ḵan Apudyus maḵwae pakawanon Apudyus. Yaḵon sa angamsew atte mipanggob si Ispiritu Santu, adipun maḵwae pakawanon Apudyus. 32Ḵad ngaimane an-ugud aḵ lawweng si mipanggob ḵan saḵone Abeng Di Tagu, maḵwae pakawanon Apudyus. Yaḵon sa angamsew atte mipanggob si Ispiritu Santu, adipun maḵwae pakawanon Apudyus sinsadi ya sa umali ye timpu.”
Sa Pani Atte Bungan Ni Ḵayu
(Luk. 6:43-45)
33Impanin os Jesus woḵ ḵanana, “Sa ḵayu we ngannonda ambaḻu, ambaḻu ambubungana. Sa ḵayu we ngannonda lawweng, lawweng ambubungana. Te sa ibungan ni ḵayu angipaila si kalasina. 34Diḵayu we ganaḵ ni uḻog! Ngai inonae ambaḻu da ugudonyu si gagangaye lawweng ḵayu? Te sa mapopompon atta somsomoḵyu, siya ugudon da sungadyu. 35Sa ambaḻu we tagu, ambaḻu da ugudona te siya mapopompon si somsomoḵna. Ḵad sa lawwenge tagu, lawweng os ugudona te siya mapopompon si somsomoḵna. 36Ibagaḵ ḵan diḵayu, nu dumatong aḻgawe anḵuwisan Apudyus, awad osa ya songbatana da losane ippun anunae inugudna. 37Te da losane inugudyu, siya usaron Apudyus we anguwis ḵan diḵayu, ḵad sadi amanoḵnoḵ nu naḵabasuḻ ḵayu baḵon nu adiḵayupun.”
Sa Ḵindawda Ḵan Jesus
(Mrk. 8:11-12; Luk. 11:29-32)
38Pune sadi, da udum atta Pharisee ya da mimistulun ni lintog, ḵananda ḵan Jesus, “Mistulu, pionni ye angipailaḵa'ḵ nakaskasdaaw ḵan diḵani ta angigammuwanni nu naḻpu ḵan Apudyus ḵabooḻam.”
39Yaḵon ḵanan Jesus ḵan dida, “Diḵayu we tagu si sanae lunap, lawwelawweng ḵayu te nan-awidanyu'ḵ Apudyus. Ḵodaḵodawonyu we ḵooḵ da nakaskasdaawe sinyal ta amanoḵnoḵe aḵ Apudyus nangibuun ḵan saḵon. Yaḵon ippun mipaila malaksid sinyale isun ni naḵwa ḵan Profeta Jonah. 40Te aḵ Profeta Jonah, inninggaw atte buwang ni daḵodaḵoḻe ugadiw si tuḻun aḻgaw ya tuḻun labi.#12:40 Jonah 1:17. Siya isun ni maḵwa ḵan saḵone Abeng Di Tagu. Inggawaḵ os si libon#12:40 Sa ibagana'tte Greek inggawaḵ si daḻom ni luta. Osa bose piona ḵanan, sa lugar da natoy ad Hades. aḵ tuḻun aḻgaw ya tuḻun labi. 41Da iNineveh bos, maḵataḵdogda'tta tagu we matattagu sinsadi'tte sadi ye aḻgaw si anguwisan Apudyus atta tagu. Sa nambabawiyan da tagu'd Nineveh amanoḵnoḵe dusaon Apudyus diḵayu. Te dida ḵad, imbabawida da basuḻda ya iyyagaydae nangwa si dingngoḻda iwwaḻagawag Profeta Jonah ḵan dida. Yaḵon diḵayu ḵad, taḵon ay nu annaaḵ sinsadi ye nangatngatu nu aḵ Profeta Jonah, adiyupun tuttuwaon da tuttuduḵ.#12:41 Jonah 3:1-10. 42Ḵad sa de Queen ad Sheba atte awe ye naḻpu'tte adaddayuwane ili'd daya,#12:42 1 King 10:1-13; 2 Chronicles 9:1-12. maḵataḵdog atta tagu we matattagu sinsadi si aḻgawe anguwisan Apudyus atta losane tagu. Sa gunayna amanoḵnoḵe dusaon oḵyan Apudyus diḵayu. Te taḵon ay adaddayuwan naḻpuwana, ummali sina'd Israel ta dongngona da ugud Ari Solomon we allaing. Taḵon ay nu annaaḵ sinsadi ye nangatngatu nu aḵ Solomon, adiyupun os dongngon ya tuttuwaon da ugudḵu.”
Sa Nipauliyan Ni Aḻan
(Luk. 11:24-26)
43Pinagatupan Jesus we nangipani woḵ ḵanana, “Mapaḻyaw ḵad aḻane naḻpu'tte tagu we naaḻanan, umoy anggaḵagaḵay si bumbummaaw ta angngit aḵ inggawana. Ḵad nu adi maḵaodas, 44ḵanana si somsomoḵna, ‘Mipauliyaḵ ay si tagu we isun ni boḻoye naḻpuwaḵ.’ Dumatong ḵad, odasana sadi ye tagu we napaḻyawanae ippun ogon aḻan ḵan siya sinsadi ye isun ni boḻoye ampoḻḵas ya nauḻnus ya ippun inggaw sidi. 45Ḵad umoyna ayagan da pitu we aḻane daldallu lawwengda nu siya ta miḵamboḻoyda. Ḵad amo ḵaddagu sadi ye tagu nu sa damu. Ḵaḵna maḵwa'tta tagu si sanae lunap.”
Sa Inan Jesus Ya Da Sunudna
(Mrk. 3:31-35; Luk. 8:19-21)
46Sissiya ḵad aḵ Jesus we maḵaug-uggud atta tagu, dummatong aḵ inana ya da sunudna. Inninggawda'tte lasin woḵ ummoyda impaayag te piondae maḵaug-uggud ḵan siya. 47Pun ḵanan ni osa ḵan Jesus, “Awad aḵ inam ya da sunudnu'k lasin we piondae maḵaug-uggud ḵan siḵa.”
48Yaḵon ḵanana ḵan siya, “Annaya da ibelangku'ḵ tuttuwae inaḵ ḵan susunudḵu.” 49Intuduna da disipuluna woḵ ḵanana, “Annaya da inaḵ ya da susunudḵu. 50Te ngaimane angwa si pinion Amaḵ ad langit, dida da mibelang aḵ inaḵ ḵan susunudḵu.”
© 2019 Translators Association of the Philippines (TAP), All rights reserved.
