Matthew 10
10
Da Nasawaḻan Aḵ Duwae Apostol
(Mrk. 3:13-19; Luk. 6:12-16)
1Sin-aḻgawan ḵad, inayagan Jesus da nasawaḻan aḵ duwae disipuluna. Pun innatodna ḵaḻabbongan ḵan didae amaḻyaw atta aḻan ya angaan atta losane kalasin di saḵit ya da ampaḵaḻaman da tagu. 2Annaya da ngadan da nasawaḻan aḵ duwae apostol Jesus, aḵ Simon we nginadananda'ḵ Peter, aḵ Andrew we sunudna, da James ḵan John we abeng Zebedee, 3da Philip, Bartholomew, Thomas, aḵ Matthew we andadagup atta bugis, aḵ James we abeng Alphaeus, aḵ Thaddaeus, 4aḵ Simon we nginadananda'ḵ Angitaḵdog si ilina ya aḵ Judas Iscariot we nangituyuḵ ḵan Jesus.
Sa Nangibuunan Jesus Atta Apostolna
(Mrk. 6:7-13; Luk. 9:1-6)
5Imbuun Jesus da nasawaḻan aḵ duwae apostolna woḵ ḵananae namilibilin ḵan dida, “Adiyu ayon da daḻane umoyon atta ilin da Gentil ya da daḻane umoyon atta ilin da iSamaria. 6Yaḵon inḵayu'tta buḻun taḵu we ganaḵ Israel we da isudan nataḻaḵe karnero. 7Dinumane ayanyu, iwaḻagawagyu we sinsadi gattoḵe awad ḵan diḵayu ampangatan Apudyus. 8Ḵaanonyu da saḵit, taguwonyu da natoy, ḵaanonyu saḵit da naleprosy ya paḻyawonyu da aḻan atta naaḻanan. Naippun nambayadyu si annae ḵaḻabbongane innatodḵu ḵan diḵayu, pun adi ḵayu bos patangdan. 9Adi ḵayu angawit aḵ buḻawan ḵan pilaḵ, 10baḵaḻ, suḻḵud, sandal ḵan ansuḵatanyu'ḵ silup te labbongnae awaton da anḵewaaḻ ḵanonda.
11“Ḵad ngaimane ili ye ayanyu, singtonyu tagu we ḵamamangili ta siya dawosonyu ḵan inggawanyu inggana'ḵ tenanyu sadi ye ili. 12Lumnoḵ ḵayu ḵad atte osae boḻoy, ḵananyu we, ‘Itton Apudyus lin-awa ḵan diḵayu.’ 13Ḵad nu pion diḵayu mangiliyon si boḻoyda, aḵ Apudyus angitod si lin-awa ḵan dida. Yaḵon nu umadida mangiliyon diḵayu, adimpun Apudyus itton ḵan dida lin-awa. 14Nu awad tagu'ḵ adinapun mangiliyon diḵayu baḵon nu adi dumngoḻ atta ituttuduyu, tenanyu sadi ye ili. Ḵad nu inḵayun, ipaḻpagyu da gabu'tta dapanyu ta igammuwondae dida asi ḵigad si madusaanda. 15Ibagaḵ ḵan diḵayu ḵatuttuwaan, nu dumatong anguwisan Apudyus atta losane tagu, nadagdagson dusan da tagu si sadi ye ili nu sa dusan da iSodom ḵan iGomorrah.”#10:15 Sa awe da tagu'd Sodom ḵan Gomorrah amod da ḵingwadae lawweng pun ḵawagase dinadail Apudyus sanate siyudad atte apuy. Nu piom basaon mipanggob ad Sodom, maila si Genesis atta chapter 18-19.
Sa Dumatonge Ampaḵaḻaman
(Mrk. 13:9-13; Luk. 12:11-12; 21:12-17)
16Pinagatupan os Jesus woḵ ḵanana, “Sosomḵonyu anna. Ibuunḵu diḵayu'tta lawweng ya ḵaog-ogyate tagu ḵad isuyun karnero we umoy atte lugar we igaw da tanane asu. Ḵad ḵasapuḻane nalaing ḵayu we isun da uḻog ya adiyu ḵoon lawwenge isun da kalapati. 17Ḵad ummanyu bos te doḵmaanda ḵan idaḻum diḵayu'tta ḵuḵunsisaḻ ya ap-apliton diḵayu'tta sinagogada. 18Gapu'tte pammatiyu ḵan saḵon, midaḻum ḵayu'tta gobernor ya da ari ta panoḵnoḵanyu Ambaḻu we Damag ḵan dida ya da Gentil. 19Ḵad nu sumaḻyaonda diḵayu, adi ḵayu ambinsaw mipanggob si inonyu we anaḵdoḻ si mipanggob ḵan saḵon ya sa isongbatyu te sa sadi ye timpu mipaigammu da ustu we ugudonyu. 20Te daḵampun ḵan diḵayu maḻpuwan ni ibagayu nu adi sa Ispiritu Santu.
21“Sa sadi ye timpu, awad da udume idaḻumda da sunudda'tta papangat ta gongatonda dida. Ḵaḵna bos atta ama ḵan inae ituyuḵda da abengda'tta papangat ta gongatonda dida. Sasangngaan os da abeng da amada ḵan inada ḵad pagongatda bos dida. 22Ḵad sasangngaan os diḵayu'tta losane tagu gapu si pammatiyu ḵan saḵon. Yaḵon ngaimane angiyattom atta losane ampaḵaḻaman ya gogomgomana pammatina, matagu'ḵ inggana. 23Nu ampaḵaḻamonda diḵayu si osae ili, an-atun ḵayu si osae ili. Ibagaḵ ḵan diḵayu ḵatuttuwaan, nu dumatongaḵe Abeng Di Tagu, daanyupun gangputon da ḵewaaḻe paḵwaḵ ḵan diḵayu'tta losane ili'd Israel.”
24Pun pinagatupan Jesus we nantuttudu woḵ ḵanana, “Naippun uswila'ḵ nangatu nu sa mistuluna ya naippun os sammilu'ḵ nangatu nu sa apuna. 25Pun mat-op oḵyan an-adaḻ nu miyisu si mistuluna ḵad isuna bos si sammilu nu miyisu si apuna. Nu ipanida saḵon si simboḻoye aḵ Beelzebul we pangat da aḻan, aaddi ye amo dallu we lawweng angngadanda ḵan diḵayu we niḵamboḻoy.”
Sa Labbongnae Misipog
(Luk. 12:2-7)
26Pinagatupan Jesus woḵ ḵanana, “Adi ḵayu maḵimut ḵan dida te da losane mitataḻu ḵan adipun mipaigammu sinsadi, mipaigammuda'tte umali ye aḻgaw. 27Sa ibagaḵ ḵan diḵayu'tte umabus taḵu'tta labi, ḵasapuḻane mipaigammu'tta adu we tagu'tta aḻgaw. Ḵad sa iyagapaapḵu ḵan diḵayu, ḵasapuḻan ose iyip-ipḵawyu'tta losane tagu. 28Adiyu isipog da lamogda gongaton da long-agyu yaḵon naippun lamogdae angongat atta ḵalidodwayu. Sa isipogyu oḵyan, aḵ Apudyus. Te lamogna dadailon long-ag ḵan ḵalidodwa'd infiernu. 29Annaya oḵyan sosomḵonyu, taḵon ay nu naippun patog da tilin, naippun matoy ḵan maottag atte luta ḵan dida'ḵ taḵon ay ossaan nu adimpun Apudyus we Amayu iyunud. 30Maguḻaman diḵayu we tagu we igammuna belang da buuḵyu. 31Pun adi ḵayu maḵimut te napatpatog ḵayu'ḵ adayu we tagu nu da pigae tilin.”
Da Angitaḵdog Ḵan Amuḵlit Ḵan Jesus
(Luk. 12:8-9)
32Pinagatupan Jesus woḵ ḵanana, “Pun ngaimane amigbig ḵan saḵon si sinagung da tagu, bigbigoḵ os atte sinagung Amaḵ ad langit. 33Ḵad ngaimane amuḵlit ḵan saḵon si sinagung da tagu, puḵlitaḵ os si sinagung Amaḵ ad langit.”
Aḵ Jesus Gapun Ni Ansisinaan
(Luk. 12:51-53; 14:26-27)
34Ḵanan os Jesus, “Adiyu sosomḵone ummaliyaḵ ta uḻnusoḵ maḵabuḻbuḻunan da tagu'tta udum sina'd luta. Te sa ummaliyaḵ, ansisinaan ḵan ansusubogan da tagu. 35Ḵad ummaliyaḵ ta iyyaḵ ambubusuḻon da an-aama ya da an-iina ya da anḵatḵatugangae bubai. 36Ḵad sa ḵabusuḻ ni osae tagu, da mismu we ḵabaḻyanna.#10:35-36 Micah 7:6.
37“Sa tagu we amod ayatna'tta amana ḵan inana ya da abengna nu sa ayatna ḵan saḵon, adipun mibelang aḵ disipuluḵ. 38Ḵad ngaimane adinapun bubuḵḵudon de krosna ya maḵasaganae ampaḵaḻam ḵan matoy ta mitun-ud ḵan saḵon, adipun paat mibelang aḵ disipuluḵ.#10:38 Sa ḵasomsomḵan Matthew, sa amuḵud atte krosna siya tagu we ipapatina unudon aḵ Jesus taḵon ay nu siya gapun ni matoyana. 39Te ngaimane angipatog atte long-agna, matoy pos pagay. Yaḵon sa angiḵatoy atte pammatina ḵan saḵon, itton Apudyus ḵan siya biyag aḵ inggana.”
Sa Gungunae Itton Apudyus
(Mrk. 9:41)
40Ḵanan os Jesus, “Ngaimane ammangili ḵan diḵayu, saḵon minangilina. Ḵad sa ammangili ḵan saḵon, minangilina bos nangibuun ḵan saḵon. 41Ḵad ngaimane mangiliyona profeta gapu ta profetaḵ, maittan aḵ gungunana'ḵ isuna gungunan ni profeta. Ngaiman ose ammangili si naun-unane tagu, maittan aḵ gungunanae isuna gungunan ni naun-unane tagu. 42Ibagaḵ ḵan diḵayu ḵatuttuwaan, ngaimane ampainum taḵon ay nu abuse sintasae danum atte osa'tta sanae ḵamḵama gapu ta disipuluḵ, aaddi ye magungunaan.”
© 2019 Translators Association of the Philippines (TAP), All rights reserved.
