MI CILIMA 13
13
1Abalama den ñani Ejipiti leni o pua leni wan den die yaala. O den yegi leni *Loto ke bi doni ki guani niganu diema nni.
Abalama leni Loto paadi leni biyaba
2Abalama den pia mi piama hali boncianla lan tie: ti yandi, ŋanjilifa leni wula. 3O den suagi liiga ki ñani niganu diema po ki guani Betela hali o gbandiena n den kpa tii naani hali mi cilima, Betela leni Ayi dogi yaa siiga. 4O den pundi wan den kpa maa yaa *padibinbinli n den ye naani. Abalama den jaandi ki kpiagi Li Miali Diedo yaa yeli lankani.
5Loto yua n den yegi leni Abalama moko den pia i pe, i ne leni a gbandiena. 6U dogu naa den dagidi ke bikuli n yaa ye kaanyendu kelima bi piama den yaba hali ke bi naa go den fidi ki yaa taa ki ye leni biyaba. 7Abalama yankpaaba leni Loto yankpaaba den koani leni biyaba. Kanana leni Felesa yaaba den ye mi diema nni laa yogunu. 8Abalama den yedi Loto: «N mia ŋa, tin da pia li koanli mini leni fini yaa siiga, bi n yankpaaba leni a yankpaaba yaa siiga kelima ti kpi leni ti yaba. 9Mi diema kuli ye a nintuali. Lanwani ŋan paadi leni nni. A yaa gedi niganu po n baa gedi nijienu po, a yaa gedi nijienu po, n baa gedi niganu po.»
10Loto den yaadi ki diidi Judana yaa boanjaali yaa fanma kuli ke mi kaani kuli soangi boncianla. Hali yaa yogunu ke Li Miali Diedo daa den bolini Sodoma leni *Gomola, laa tinga kuli hali Tisoala den naani leni Li Miali Diedo yaa koaŋamu ki go tie nani Ejipiti yaa diema yeni.#Cil 2.10 11Loto den gandi o yuli po Judana yaa boanjaali yaa fanma kuli ki fii ki teli hali puoli po. Lanwani lan den tieni maama n yeni ke bi den paadi leni biyaba. 12Abalama den ye Kanana yaa diema nni, Loto den ye li boanjaali yaa fanma yaa dogi nni ki tii o gbandiena ke a tiegi Sodoma. 13Sodoma yaa niba den bia ki tie ti tuonbiaciandi danba Li Miali Diedo nintuali.
14Abalama leni Loto n den paadi leni biyaba Li Miali Diedo den yedi Abalama: «Sedi ŋan ye naani ki yaadi ki diidi nijienu po leni niganu, puoli leni nintuali po kuli. 15Ŋan laa yaa diema kuli ne, n baa pa ŋa mikuli fini leni a puoliŋuani yaa yogu n tu yaa yogu kuli.#JTT 7.5 16N baa teni ke a yaa yaabila n yaa tie nani ki tinga yaa tanbiima. Nani nilo n kan fidi ki coadi ki tinga wagima maama yeni, moko oba kan fidi ki coadi a puoliŋuani.» 17Fii ki goandi mi diema mi foagimu leni mi pianu kuli, kelima n baa pa ŋa mikuli.
18Abalama den taa o gbandiena ki cua ki ti ŋa ki kali Mamile yaa tiidi, yii n yi sena ki ku leni ban yi naankani Ebiloni. O den maa li padibinbinli Li Miali Diedo po lankani.
Abalama, bi badiba leni Melikisedeki yaa maama
Gulmancema Bible © Bible Society of Burkina Faso, 2003.
