Naanearü ügüchiga 4
4
Caíü̃ rü Abéchiga
1Rü yexguma ga gumá yatü rü naxma̱x ga Ébamaxã namaxü̃. Rü ixãxacü namaxã ga ngĩne ga Caíü̃. Rü ngĩgürügü: —Marü choxü̃́ nangẽxma ya chaune ya Cori ya Tupana choxna namucü —ngĩgürügü.
2Rü gumawena rü wena ixãxacü namaxã ga Abé ga Caíü̃enexẽ. Rü gumá Abé rü carnéruarü yaexẽẽwa napuracü rü Caíü̃ rü naanewa napuracü.
3Rü yexguma marü ñuxre ga taunecü ngupetügu rü wüxi ga ngunexü̃gu rü Caíü̃ rü Tupanaca̱x nayagu ga norü ãmare ga nanetüarü o. Rü yemamaxã Tupanaxü̃ nicua̱xüxü̃.
4Rü yexgumarüxü̃ ta ga Abé rü Tupanana nayaxã ga nüxíraxü̃xü̃ ga norü carnéruxacü ga rümemaexü̃ rü yemamaxã Tupanaxü̃ nayarücua̱xüxü̃. Rü nüma ga Cori ya Tupana rü Abémaxã rü norü ãmaremaxã nataãxẽ.
5Natürü ga Tupana rü tama Caíü̃maxã rü woo norü ãmaremaxã nataãxẽ. Rü yemaca̱x ga Caíü̃ rü poraãcüxüchima nanu rü nanuchametü.
6Rü yexguma ga Cori ya Tupana rü ñanagürü nüxü̃: —¿Tü̱xcüü̃ cunu rü cunuchametü?
7Rü ngẽxguma chi aixcüma mexü̃ cuxü̱xgu rü chi cutaãẽchametü. Natürü ngẽma nax tama mexü̃ cuxüxü̃, rü ngẽma chixexü̃ rü ínamemare nax cuxü̃ naporamaexü̃. Natürü ega cuma rü tama naga cuxĩnügu rü tá nüxü̃ curüyexera i ngẽma chixexü̃ —ñanagürü.
8Rü wüxi ga ngunexü̃gu rü Caíü̃ rü naenexẽ ga Abéna naxu nax naanegu naxĩaneãxü̃ca̱x. Rü yexguma marü naanewa nayexmagügu, rü Caíü̃ rü naenexẽ ga Abéna nayuxu rü nayama̱x.
9Rü yexguma ga Cori ya Tupana rü Caíü̃na naca rü ñanagürü: —¿Ngecü nixĩ ya cuenexẽ ya Abé? —ñanagürü. Rü Caíü̃ nanangãxü̃ rü ñanagürü: —Tama nüxü̃ chacua̱x nax ngextá nangẽxmaxü̃. ¿Ẽ̱xna cuma nagu curüxĩnügu rü chauenexẽarü dauruxü̃ chixĩ? —ñanagürü.
10Natürü nüma ga Cori ya Tupana rü ñanagürü nüxü̃: —¿Tü̱xcüü̃ cueneexü̃ quima̱x? Erü yimá nagü ya waixü̃mügu bacü rü ñoma nümatama ya cuenexẽ choxna cagüxü̃rüü̃tama nixĩ i choxna nacagüxü̃ nax cuxü̃ ínaxuaxü̃xü̃ nax cuxü̃ chapoxcuxü̃ca̱x.
11Rü ngẽmaca̱x i ñu̱xma rü marü cuchixexü̃gu rü tá ícuta̱xüchi nawa i ñaa naane i nagu cunabaxẽẽxü̃ i nagü ya cuenexẽ.
12Rü woo tá naanewa cupuracü, natürü taxuxü̃táma i nanetü cuxü̃́ nixo. Rü tá ñaa naanegu cunaxũpetüanemare rü tagutáma curüngü̃ —ñanagürü.
13Rü yexguma ga Caíü̃ rü Cori ya Tupanaxü̃ nangãxü̃ rü ñanagürü: —Nataxüchi i ñaa poxcu i chomaxã cuxueguxü̃, rü tama yáxna namaxã chaxĩnü.
14Ñu̱xma rü marü choxü̃ ícuta̱xüchi nawa i ñaa naane rü ngẽmaca̱x tá curü yáxü̃guxüchima chanaxũpetüanemare, rü tagutáma icharüngü̃. Rü ngẽmaãcü ngexü̃rüüxü̃mare i choxü̃ iyangauxü̃ rü tá choxü̃ nima̱x —ñanagürü.
15Natürü nüma ga Cori ya Tupana rü nanangãxü̃ rü ñanagürü: —Ngẽxguma chi texé cuxü̃ ima̱xgu rü 7 e̱xpü̱xcüna tá curü yexera tapoxcu —ñanagürü. Rü yexguma ga Cori ya Tupana rü Caíü̃gu nanaxǘ ga wüxi ga cua̱xruxü̃ nax tama tayamáxü̃ca̱x ga guxema nüxü̃ iyanga̱u̱xe.
16Rü nixũ ga Caíü̃ nawa ga yema naane ga Tupana nawa namaxã idexaxü̃. Rü Edéü̃wa inaxũãchi rü éstewaama naxũ ga Nóxanewa. Rü yexma naxãchiü̃.
Caíü̃taagüchiga
17Caíü̃ rü naxma̱xmaxã namaxü̃ rü nüxü̃́ ixãxacü ga yema naxma̱x. Rü naxíra ga nane ga Enóx. Rü yemawena ga Caíü̃ rü wüxi ga ĩane yexma naxü. Rü nane ga Enóxgu nanaxüéga ga guma ĩane.
18Enóx rü Iráx nanatü nixĩ. Rü nüma ga Iráx rü Meuyaé nanatü nixĩ. Rü nüma ga Meuyaé rü Metuchaéx nanatü nixĩ. Rü nüma ga Metuchaéx rü Laméx nanatü nixĩ.
19Rü nüma ga Laméx rü nataxrema̱x. Rü guxema wüxíe ga naxma̱x rü Adá nixĩ ga tümaéga. Rü guxema toguxe ga naxma̱x rü Chilá nixĩ ga tümaéga.
20Rü guxema Adá rü tüxü̃́ nayexma ga wüxi ga tümane ga Yabágu ãégaxü̃. Rü gumátanüxü̃ nixĩ ga naxchirunaxca̱xmaxã ixãpataxü̃, rü ñu̱xũchi wocagü yaexẽẽxü̃.
21Rü nüma ga Yabá rü nüxü̃́ nayexma ga wüxi ga naenexẽ ga Yubágu ãégaxü̃. Rü gumátanüxü̃ nixĩ ga nüxü̃ icuáxü̃ ga árpaarü paxü rü woweruarü cue.
22Rü guxema toguxe ga naxma̱x ga Chilágu ãégaxe rü taxãxacü ta. Rü tüxü̃́ nayexma ga wüxi ga tümane ga Tubáx-caíü̃gu ãégaxü̃. Yema rü nüxü̃ nacua̱x nax fieruwa rü ñu̱xũchi bróũchewa naxüaxü̃ ga yemaxü̃gü. Rü Tubáx-caíü̃ rü nüxü̃́ iyexma ga wüxi ga naeya̱x ga Naamágu ãégacü.
23Rü wüxi ga ngunexü̃gu ga Laméx rü guxema naxma̱xgü ga Adá rü Chiláxü̃ ñanagürü:
—¡Mea choxü̃́ iperüxĩnüe i ngẽma pemaxã nüxü̃ chixuxü̃!
Chayama̱x i wüxi i yatü erü choxü̃ nanapi̱xẽxẽ.
Rü chayama̱x i wüxi i ngextü̱xüxü̃ erü choxna nanacua̱i̱xca.
24Rü yíxema Caíü̃xü̃ imáxe rü 7 e̱xpü̱xcüna tá tapoxcu.
Natürü yíxema choxü̃ imáxe rü 77 e̱xpü̱xcüna tá tapoxcu
—ñanagürü.
Norü tomaepü̱x ga nane ga Adáü̃ rü Éba
25Rü nüma ga Adáü̃ rü wenaxarü naxma̱xmaxã namaxü̃ rü ngĩma rü wenaxarü ixãxacü. Rü gumá nane rü Chéxgu nanaxüéga, rü ngĩgürügü: “Tupana choxna nanamu ya nai ya chaune nachicüxü ga Abé ga Caíü̃ yamácü”, ngĩgürügü.
26Rü nüma ga Chéx rü nüxü̃́ nayexma ga wüxi ga nane, rü Enóxgu nanaxüéga. Rü yexgumacürüwa inanaxügüe ga duü̃xü̃gü nax Cori ya Tupanaxü̃ yaxugüchigaxü̃.
© 2022, Wycliffe Bible Translators, Inc. All rights reserved.
