Naanearü ügüchiga 23
23
Iyu ga Chára
1-2Chára rü 127 ga taunecü imaxü̃ rü ĩane ga Quiriáx-abá ga Ebróü̃gu iyu ga Canaáü̃anewa. Rü Abraáü̃ rü ngĩxca̱x naxaxu ga nax nayuxü̃ ga Chára, rü poraãcü ngĩxca̱x nangechaü̃.
3-4Yemawena rü ínaxũxũ ga yema Cháraxü̃ne íxüxü̃wa, rü yema yémacüã̱xgü ga Itítanüxü̃maxã nüxü̃ nayarüxu, rü ñanagürü: —Rü woo to i nachixü̃anecüã̱x chixĩ i petanüwa ¡rü wüxi i naanemaxã choxü̃ petaxe nax ngẽxma ngĩxü̃ chatáxü̃ca̱x i cho̱xma̱x! —ñanagürü.
5-6Rü yema Itítanüxü̃ nanangãxü̃gü rü nüxü̃ ñanagürügü: —¡Dücax, toxü̃́ irüxĩnü, Pa Corix! ¡Rü cuma nixĩ i totanüwa Tupana cuxü̃ unetaxü̃! ¡Rü ẽcü ngẽma rümemaexü̃ i torü yuxetamaxü̃gügu ngĩxü̃ nata̱x i ngẽma cuxma̱x! Erü taxúema i totanüwa cuxna tayanuxü̃ i ngẽma torü yuetamaxü̃ —ñanagürügü.
7-9Rü yexguma ga Abraáü̃ rü inachi rü Itítanüxü̃pe̱xegu narümaxãchi, rü ñanagürü nüxü̃: —Rü ngẽxguma aixcüma penaxwa̱xegu nax nuxã ngĩxü̃ chatáxü̃ i cho̱xma̱x, rü chanaxwa̱xe i Chóa nane ya Efróü̃na peyaca nax choxü̃ namaxã nataxexü̃ca̱x i ngẽma Maxperáxarü ãxmaxü̃ i norü naanepechinüwa ngẽxmaxü̃. Choma rü tá mea nüxü̃́ chanaxütanü nax ñuxregu naxãtanüxü̃ i ngẽma naxma̱xü̃ nax ngẽmaãcü petanüwa choxü̃́ nangẽxmaxü̃ca̱x i wüxi i yuetamaxü̃ i choxrütama ixĩxü̃ —ñanagürü.
10-11Rü nüma ga Efróü̃ ga Itítanüxü̃ rü yéma natanüwa nayexma rü tagaãcü Abraáü̃xü̃ nangãxü̃ nax yemaacü nüxü̃ naxĩnüexü̃ca̱x ga yema natanüxü̃ rü guxü̃ma ga yema duü̃xü̃gü ga guma ĩanearü ĩã̱xwa chopetüxü̃. Rü ñanagürü: —Tama nixĩ, Pa Chorü Corix. ¡Rü dücax, choxü̃́ irüxĩnü! Choma rü cuxna chanaxãmare i ngẽma naane, rü ñu̱xũchi ngẽma naanewa ngẽxmaxü̃ i naxma̱xü̃. Rü ñaa chautanüxü̃ nixĩ i nüxü̃ ĩnüexü̃ rü nüxü̃ cua̱xgüxü̃ nax choma rü cuxna chanaxãmarexü̃. ¡Rü ngẽxma ngĩxü̃ nata̱x i cuxma̱x! —ñanagürü.
12-13Natürü nüma ga Abraáü̃ rü wenaxarü yémacüã̱x ga duü̃xü̃güpe̱xegu narüma̱xãchi. Rü guxü̃ma ga duü̃xü̃güpe̱xewa Efróü̃xü̃ nangãxü̃ga rü ñanagürü: —¡Dücax, choxü̃́ irüxĩnü! Rü cuxü̃ chaca̱a̱xü̃ nax ngĩxü̃ cuyaxuxü̃ca̱x i ngẽma diẽru i cuxna ngĩxü̃ chaxã naxca̱x i ngẽma naane. Rü ngẽmawena rü ngẽxma tá ngĩxü̃ chata̱x i cho̱xma̱x —ñanagürü.
14-15Rü yexguma ga Efróü̃ rü nanangãxü̃ rü nüxü̃ ñanagürü: —¡Choxü̃ irüxĩnü Pa Chorü Corix! Rü ngẽma naane rü 400 tachinü i diẽru naxãtanü. Rü ngẽxgumaepü̱x i natanü rü taxũtáma ngĩxca̱x yigümaxã tarüxutagagü. ¡Rü ngẽmaãcü ngẽxma ngĩxü̃ yata̱x i cuxma̱x! —ñanagürü.
16Rü nüma ga Abraáü̃ rü norü me nixĩ ga ngĩxü̃ naxütanüxü̃ ga yema diẽru ga Efróü̃ Itítanüxü̃pe̱xewa ngĩgu unetacü. Rü yemaca̱x noxtacüma wüxicana ngĩxü̃ naxütanü ga yema diẽru.
17-18Rü yema Efróü̃arü naane ga Maxperáwa yexmaxü̃ ga Mamréarü éstewaama, rü Abraáü̃ naxca̱x nataxe namaxã ga yema naxma̱xü̃ rü guxü̃ma ga yema nanetügü ga yema naanewa rüxügüxü̃. Rü yemaacü Abraáü̃arü nixĩgü. Rü yema Itítanüxü̃ ga yéma yexmagüxü̃ rü guxü̃ma ga yema duü̃xü̃gü ga guma ĩanearü ĩã̱xwa chopetüxü̃ nüxü̃ naxĩnüe, rü yemaacü nüxü̃ nacua̱x nax aixcüma Abraáü̃arü yixĩxü̃ ga yema naane.
19Rü yemawena ga Abraáü̃ rü naxma̱x ga Cháraxü̃ nagu ngĩxü̃ narüxǘcuchi ga yema naxma̱xü̃ ga Maxperáanewa yexmaxü̃ ga Mamréarü éstewaama. Rü yema Mamré ga Canaáü̃anewa yexmaxü̃ rü Ebróü̃ ta nixĩ ga naéga.
20Rü yemaacü Abraáü̃arü nixĩ ga yema naane rü yema naxma̱xü̃ ga nawa yexmaxü̃ ga Itítanüxü̃ namaxã nüxü̃ taxexü̃ nax tauque yixĩxü̃ca̱x.
© 2022, Wycliffe Bible Translators, Inc. All rights reserved.
