Naanearü ügüchiga 12
12
Tupana rü Abráü̃ca̱x naca
1Rü wüxi ga ngunexü̃gu ga Cori ya Tupana rü Abráü̃xü̃ ñanagürü: —¡Ínaxũxũ nawa i ngẽma curü naane, rü ngéma nawogü i cutanüxü̃! ¡Rü ngéma nata̱x ya cunatüpata nax ngẽma naane i choma tá cuxü̃ chawéxü̃wa cuxũxü̃ca̱x!
2Erü tá nüxü̃ curüngü̃xẽxẽ i cutaxa nax yamuxü̃ca̱x rü wüxi i taxü̃ i nachixü̃ane nawa ngóxü̃ca̱x. Rü tá mexü̃ cumaxã chaxuegu rü tá cuxü̃ chatachigaxẽxẽ. Rü cugagu tá mexü̃ nayauxgü i togü.
3Rü mexü̃ namaxã tá chaxuegu i ngẽma duü̃xü̃gü i mexü̃ cumaxã uegugüxü̃. Rü chixexü̃ tá namaxã chaxuegu i ngẽma duü̃xü̃gü i chixexü̃ cumaxã uegugüxü̃. Rü cugagu tá nixĩ i mexü̃ namaxã chaxueguxü̃ i guxü̃ma i duü̃xü̃gü i ñoma i naanewa ngẽxmagüxü̃ —ñanagürü.
4Rü yemaacü ga nüma ga Abráü̃ rü ínaxũxũ ga Aráü̃wa, yema Cori ya Tupana namaxã nüxü̃ ixuxü̃ãcüma. Rü nüma rü nüxü̃́ nayexma ga 75 ga taunecü ga yexguma yema naanewa ínaxũxũxgu nax Canaáü̃anewa naxũxü̃ca̱x.
5-6Rü ngĩxü̃ niga ga naxma̱x ga Charái, rü namágü ga Lox. Rü yexgumarüxü̃ ta nayagagü ga norü duü̃xü̃gü ga ĩane ga Aráü̃wa nüxü̃́ puracüexü̃. Rü nayana ta ga guxü̃ma ga norü yemaxü̃gü. Rü yexguma Canaáü̃anewa nanguxgu ga Abráü̃, rü naxüpetü ñu̱xmata Chiquéü̃ ga ĩanewa nangu. Rü guma castaña ga uxtüne ga Moré ga naanewa rüxüxü̃newa nangu. Rü yéma nayachaxãchi. Rü yexguma rü yema naanegu naxãchiü̃gü ga Canaáü̃tanüxü̃.
7Rü yema nachicawa rü Cori ya Tupana rü Abráü̃ca̱x nango̱x. Rü ñanagürü nüxü̃: —Ñaa naane tá nixĩ i cutaagüna chaxãxü̃ —ñanagürü. Rü yexguma ga Abráü̃ rü yexma Tupanaégagu nanaxü ga wüxi ga ãmarearü guruxü̃ yerü yéma nixĩ ga naxca̱x nangóxü̃.
8Rü yemawena rü yema ínamáxpü̱xanexü̃waama naxũ ga Betéarü ĩanearü éstewaama, rü yexma naxãchiü̃. Rü yema nachica rü ĩane ga Beté rü ĩane ga Áiarü ngãxü̃wa nayexma. Rü yexma nanaxü ga wüxi ga ãmarearü guruxü̃ rü yéma nayumüxẽ rü Tupanaarü ngü̃xẽẽca̱x ínaca.
9Rü yemawena rü inaxũãchi rü meama inixũmare ñu̱xmata Négueanewa nangu.
Equítuanewa nayexma ga Abráü̃
10Rü yexgumaü̃cüxü rü nangebüane ga guxü̃ ga yema naanewa. Rü yemaca̱x ga Abráü̃ rü Equítuanewa naxũ nax yexma yaxãchiü̃xü̃ca̱x. Yerü ga noxri ínayexmaxü̃wa rü poraãcü taiya nüxü̃́ nangu̱x.
11Rü yexguma marü Equítuanewa nanguxchaü̃gu ga Abráü̃ rü naxma̱x ga Charáixü̃ ñanagürü: —Dücax, choma rü nüxü̃ chacua̱x rü wüxi i nge i mechametüxüchicü quixĩ.
12Rü ngẽxguma ngẽma Equítuanecüã̱x cuxü̃ daugügu rü ñanagürügü tá: “Ñaa nge rü daa yatüma̱x iyixĩ”, ñanagürügü tá. Rü ngẽxguma rü tá choxü̃ nima̱xgü rü naxma̱xü̃ tá cuxü̃ nigagü.
13Rü ngẽma nax mea choxü̃ nayauxgüxü̃ca̱x rü tama cugagu choxü̃ yama̱xgüxü̃ca̱x ¡rü namaxã nüxü̃ ixu nax chaueya̱x quixĩxü̃! —ñanagürü.
14Rü yexguma Abráü̃ Equítuanewa nguxgu, rü nüma ga Equítuanecüã̱xgü rü Charáixü̃ nadaugü ga nax namechametüxüchixü̃.
15Rü yexgumarüxü̃ ta ga yema Equítuanearü ãẽ̱xgacüarü ngü̃xẽẽruü̃gü rü ngĩxü̃ nadaugü. Rü norü ãẽ̱xgacü ga Faraóü̃maxã ngĩxü̃ nayarüxugü ga nax namechametüxüchixü̃ ga yema nge. Rü ñu̱xũchi naxü̃tawa ngĩxü̃ nagagü.
16Rü Charáigagu rü meama Abráü̃xü̃ nayaxu ga gumá ãẽ̱xgacü. Rü Abráü̃na nanamugümare ga carnérugü, rü wocagü, rü búrugü, rü caméyugü, rü puracütanüxü̃ ga yatüxü̃gü rü ngexü̃gü.
17Natürü ga Cori ya Tupana rü Charáigagu taxü̃ ga da̱xaweane naxca̱x ínanguxẽxẽ ga gumá ãẽ̱xgacü ga Faraóü̃ rü natanüxü̃.
18Rü yemaca̱x ga Faraóü̃ rü Abráü̃ca̱x nangema rü ñanagürü nüxü̃: —¿Tü̱xcüü̃ tama mea cugü quixu rü tama chomaxã nüxü̃ quixu nax cuxma̱x yixĩxü̃ i ñaa nge?
19Rü cuma nüxü̃ quixuxgu rü cueya̱x iyixĩ. ¿Rü ta̱xacü chi ngupetüxü̃ ega cho̱xma̱xü̃ ngĩxü̃ chayaxugu? Rü ngẽma iyixĩ. ¡Rü ngĩxü̃ iga rü ínaxũxũ i nua! —ñanagürü.
20Rü yexguma ga nüma ga Faraóü̃ rü norü duü̃xü̃güxü̃ namu nax Equítuanewa ínamuxũchigüãxü̃ca̱x ga Abráü̃ wüxigu ngĩmaxã ga naxma̱x rü guxü̃ma ga norü yemaxü̃gü.
© 2022, Wycliffe Bible Translators, Inc. All rights reserved.
