San Mateo 4
4
(Mr. 1:12-13; Lc. 4:1-13)
1Chiyru güené Spíritu Sant Jesús nez lo yiubiz rut quɨt tu rbezti par gún bɨndxab prueb laany.
2Ruy guzuguaany cuarent dxi ne guxin sin quɨt xi niquiintiny, chiyru bldiaanny. 3Ax güegaany bɨndxab prueb laany, raipiy laany:
—Belati guldípacu noo Lliin Dios, gunabee gac de guiaré guechtily.
4Per Jesús cuaibny:
—Lo xquiits Dios rnii: “Gati púrzi pur guechtilti ibány bniety sino que néza pur irate de diidx ni rnii Dios.”
5Chiy güené bɨndxab laany láani guɨdx Jerusalén ax biepinéngui laany quia yudoroo xte Jerusalén, 6raipiy laany:
—Belati guldípacu noo Lliin Dios, biab desde ruc axtquɨ niguét, te pur lo xquiits Dios rnii:
Dios sxiaaldny de ánglɨ xtenny par icualodeny liú.
Sldiasdeny liú cun naadeny
par quɨt gunna guia niiu.
7Jesús cuaibny:
—Ziyza rnii lo xquiits Dios: “Quɨt gúntiu prueb Xtadu Dios.”
8Chiy güenéza bɨndxab laany quia tuby dany ni quesentiand yaa. Ruy bliuungui laany irate de naciony xte lo guɨchliu ne cun guelnazaac ni nuuza lo guɨchliu, 9ax raipiy laany:
—Nare inɨɨdxa liú irate ndé, belati sullibiu luaa ne itoo nare.
10Chiy cuaby Jesús:
—Quegüe, bɨndxab, te pur lo xquiits Dios rnii: “Bto Xtadu Dios ne tubyzi lony baany sirvɨ.”
11Chiyru bsaan bɨndxab laany, ax beed tuby tiop de ánglɨ xte Dios par baany sirvɨ lony.
(Mr. 1:14-20; Lc. 4:14-15)
12Chi gucbee Jesús dec aniagu Juany Bautist, ax zégacny nez Galilea. 13Per quɨt guleztiny guɨdx Nazaret, sino que güeldezny guɨdx Capernaum, tuby guɨdx ni ná ruxchu nis Galilea nez Zabulón cun Neftalí. 14Ziy guc par guc cumplir ni bcuaa profet Isaías chi guniib:
15De bniety Zabulón cun de bniety Neftalí,
ne de ni rbez gax ruu nisdoo cun de ni rbez dets gueeu Jordán
ne cun irateru de ni rbez nez Galilea rut rbez de bniety ni quɨt ná bniety Israel,
16iratedeb gubánydeb zecpacza de ni nabány rut nacay. Anre abdiacá tuby bieeny par laadeb
ne bieenqui bzieeny xquelrieny de ni quɨt xi speranzti gúp par cun Dios.
17Desde chiy guzulo bliuu Jesús xtiidx Dios de bniety, raipny laadeb:
—Gulchu zec ni nabánytɨ te pur abdzɨngax guelrnabee xte Dios.
(Mr. 1:16-20; Lc. 5:1-11)
18Deni zezá Jesús ruxchu nis xte Galilea, chiy gunány Simóny ni láza Bed cun betsbɨ Andrés. Laadeb cacuaadeb tarray lo nis par canaazdeb beld. 19Chiy raipy Jesús laadeb:
—Gulsanald nare, te iseeda laat xa xquel gúntɨ par itoptɨ bniety xlat ni inaaztɨ beld.
20Hóracqui bsáandeb xtarraydeb ax zénegacdeb Jesús.
21Mazru delantqui ax gunány stiop de bniety, Jacob cun betsbɨ Juany, de llingaan Zebedeo. Nuudeb láani tuby barcu cun xtaddeb cayunzaacdeb de xtarraydeb. Chiy gurɨdx Jesús laadeb, 22ax bsáandeb barcuqui cun xtaddeb, chiy zénegacdeb laany.
(Lc. 6:17-19)
23Jesús güeny iduibte nez Galilea, ne cad tuby de guɨdx biiuny laniudoo par bseedny de bniety. Bseedny laadeb xtiidx Dios, raipny laadeb xa ná guelrnabee xte Dios ne bsiacny de bniety ni rac calí rac ne de ni gúp iralote guelguidx. 24Iduibte nez Siria brɨɨch diidx pur Jesús, ax bednédeb irate de bniety ni cadeed guelzii xte iralote de mal, de ni racxú, de ni rac calí rac, de ni nuu bɨndxab láani lazdooni, de ni rac guelguidx ratiia ne de bniety ni quɨt chalee suldí ax bsiac Jesús laadeb. 25Quesentiand zieny bniety guzanald laany, zeclɨ de bniety Galilea, de bniety ni zá Decápolis, de bniety Jerusalén, de bniety ni zá nez Judea ne de bniety ni zá stuby lad dets gueeu Jordán.
© 1995, Wycliffe Bible Translators, Inc. All rights reserved.
