मत्ती 13
13
बिज पेरनारान किस्सो
(मरकुस 4:1-9; लुका 8:4-8)
1ते दिहच यीशु ता गेराम रेन निकलीन देरीयान दिड़े जाईन बोह गीयो। 2#लुका 5:1-3एने ता हेरी माणहान होवटाली गेरदी टोलवाय गियी, तानकेरता यीशु डोंडह्या पोर चेड़ीन बोह गीयो, एने आखी बिड़ मीरे उबरियेल एती। 3ओवतो तो ताह किस्सा माय जुलूम वातु केयो, “एक पेरनार पेरने निकेलनो। 4पेरने बुखेत थोड़ाक दाणा वाटीन दिड़े पोड़ना, ताह चीड़ा आवीन खाय गीया। 5थोड़ाक दाणा सापराट्या जागा माय पोड़ना, एने ताहरी ताह होवटो माटड्यो नाह जुड़नो, तानकेरीन जेल्दी उग गीया। 6पुण दिह उगनो एने ता पोर दोप लागो एने ता बुजाय गीया, एने मुले नाह गाड़ाना ता माय ता हुक गीया। 7थोड़ाक दाणा काटाल्या जुरखील्या माय पोड़ना, एने जुरखील्या वोदीन ताह दाब देना। 8पुण थोड़ाक दाणा हाजाली बुई माय पोड़ना, एने फोल लावा, काल्लाह होव मोण, काल्लाह साठ मोण, काल्लाह तीस मोण ओहलो फोल आवा,”
9यीशु केयो, “हुमलो, जान कान एय, ता होमली लेय।”
किस्सान कारेण
(मरकुस 4:10-12; लुका 8:9-10)
10ओवता यीशुन चेला आहने आवीन ताह केया, “तु माणहा हिऱ्यो किस्सा माय काहा वातु किरेह?”
11यीशु ताह जापाप आप्यो, “तुमूह हेरगान राज ने मालमात ने सोमेज आप दियेल हे, पुण ओयाह नाह। 12#मत्ती 25:29; मरकुस 4:25; लुका 8:18; 19:26काहाकाय जा फाय हे ताह उंजु आपाय जाय, एने ता फाय होवटो एय जाय, पुण जा फाय कायच नाय मीले, ता फाय जो बी एय, तो मांगाय जाय। 13मी ता हिऱ्यो किस्सा माय ज्यानकेरता वातु केरथु काय ता देखते लेन बी नाह देखते, एने होमलीन बी नाह होमेलते, एने नाह सोमेजते। 14न्यान बाराम यशायान जाणाव पुरी ईथे:#यशाया 6:9-10
“तुमू काना केरीन होमेलहो, पुण सोमेजहो नाय;
एने डोला केरीन दिखहो, पुण तुमूह जाणाय नाय,
15काहाकाय न्या माणहान मोन वातड़ा एय जायेल हेते,
एने न्यान कान बेयरा एय जायेल हेते
एने न्या डोलाह बोंद केर लियेल हेते,
एने ओहलो नाय एय काय न्या डोला केरीन देखती,
एने काना केरीन होमेलती,
एने मोना माय सोमेज जाती,
एने न्या वोलीन बोगवानान उगे आवती,
एने मी न्याह बेमारी माय रेन हुदार देह।”
16 #
लुका 10:23,24 “पुण तुमू बोरकेतवाला हेते, काहाकाय तुमरा डोला देखतेह एने कान होमेलतेह। 17काहाकाय मी तुमूह खेरीच केथु काय जुलूम बोगवानान जाणकार एने देरमी माणहे ज्य होदताला काय जी वात तुमू देखतेह, देखी, पुण नाह देख्या, एने जी वात तुमू होमेलतेह, होमलेल, पुण नाह होमल्या।
बिज पेरनारान किस्सान व्याख्या
(मरकुस 4:13-20; लुका 8:11-15)
18“एवी तुमू पेरनारान किस्सान मतलब हुमलो। 19थोड़ाक माणहे वाटीन दिड़े पुड़ेल ता दाणान गेत हेते, जा बोगवानान राज ने वचन ते होमेलतेह, पुण वचन होमलीन बी नाह सोमेजते, काहाकाय तान मोना माय जो काय पेरायेल एतो। ता फाय रेन सैतान आवीन सांडाड़ ली जाथे। ज्या तास हेते जा वाटीन मीरे पेरायेल एता। 20एने थोड़ाक माणहे सापराट्या जागाम पुड़ेल दाणान गेत हेते, जा बोगवानान वचन होमलीन चालोच खुस एन मान लेतेह। 21पुण वचनान केरता तान जीवा माय दुख, तेकलीत, सेताव आवेह, ओवता चालोच ठोकेर खातेह, काहाकाय बोगवानान वचनाह हास केरीन मोना माय नाह देऱ्या, तानकेरीन ता थोड़ाच दिह्यान केरता रेतेह। 22थोड़ाक माणहे जुरखील्या माय पेरायेल दाणान गेत हेते, ता वचन होमेलतेह ते खोरा; पुण दुनिया दारीन चिन्ता एने मालदेनान दुको वचनाह दाब दिथे, एने तो विणफोल्यो रेय जाथे। 23थोड़ाक माणहे हाजाली बुई माय पेरायेल ने गेत हेते, जा वचनाह होमलीन मानतेह एने फोल लावतेह, काल्ला होव मोण, काल्ला साठ मोण, एने काल्ला तीस मोण।”
जेंगली बिजान किस्सो
24यीशु ताह उंजु एक किस्सो केयो: “हेरगान राज ता माणहान गेत हे, जो तान खेताम हाजालो बियारो पेरेह। 25पुण राती आखा माणहे हुव जातेह, ते तान दुसमोन खेताम आवीन जेंगली दाणा पेर दिथे। 26जेवी हुका निकेलना एने केणहे लागा, तेवी जेंगली दाणान टोटाला बी वोदीन देखाना। 27ता खेतान मालक्याह तान पावोर आवीन केया, ‘मालीक, काय तु तार खेता माय हाजाला दाणा नाह पेरेल ईतो? ते जेंगली दाणान टोटाला कारीन आवा?’ 28मालीक ताह केयो, ‘ज्य एगदा दुसमोनान काम हे,’ ता जापाप आप्या, ‘काय तारी मोरजी हे काय आमु जाईन ता टोटालाह उखाल दिज्यो।’ 29मालीक ताह जापाप आप्यो, ‘मा,’ ओहलो नाय एय काय जेंगली दाणान टोटाला हेऱ्या, तुमू गोवान टोटालाह उखाल दिहो। 30काटणेन टेम वोर दुयूह एकठास वोदणे दिवो। एने गोव काटणारे मोंजऱ्याह किज्यो, काय पेल जेंगली दाणान टोटालाह हेलगाड़नेन केरता उखालीन पुला बांद लिवो, एने गोवान दाणाह मार मोटक्याम टुलो किरो।”
राईन बिजान किस्सो
(मरकुस 4:30-32; लुका 13:18-19)
31यीशु ताह उंजु एक किस्सो केयो, “हेरगान राज राईन दाणान गेत हे, एक माणुह ता दाणाह ली जाईन तान खेताम पेरेह। 32राईन दाणो आखा बिजाह रेन आत्यो ते रेणे, पुण जेवी वोदणे। तेवी सोब बाजी पालाह रेन ओहलो मोठो जाड़ पोहाणे, काय चीड़ा बी पांजरो बाणावीन रेतेह।”
खमीर ने किस्सो
33यीशु ताह उंजु एक किस्सो केयो, “हेरगान राज खमीरान गेत हे, ताह एक बायकु लेन चालीह पायलान फिटा माय बेचकी देनी, तेवी आखो फिट खमीर बोण गीयो।”
यीशु किस्सान वापेर केरने
(मरकुस 4:33-34)
34जी आखी वातु यीशु किस्सा माय माणहाह हिकाड़तालो, एने बिगेर किस्सान यीशु ताह कायच नाह केतालो। 35काय जो वचन जाणकारे कियेल एता:#बजन 78:2
“मी किस्सान द्वारे मार वात सोमजाडुह;
उंजु केल बाणायेल तुलबूखेन लिकायेल वातु मी उगाडुह।”
जेंगली बिजान किस्सान व्याख्या
36तान पासाण यीशु माणहान गेरदीह सोड़ीन गेराम गीयो, तेवी तान चेला आहने आवीन केया, “जेंगली दाणान किस्सान मतलब आमुह सोमजाड़ दे।”
37यीशु ताह जापाप आप्यो, “हाजाला दाणा पेरनार मी माणहान बिटोख हे; 38देरती खेत हे, हाजाला दाणा बोगवानान राज ने सोरा हेते, एने जेंगली दाणा सैतानान सोरा हेते; 39एने जेंगली दाणा पेरनार सैतान हे, काटणे बुखेत ज्यी देरतीन सेवल्यो दिह हे, उंजु काटणारे हेरोगदुत हेते। 40जिहकेरीन जेंगली दाणाह उखालीन हेलगाड़ देणु, तिहेस केरीन ज्यी देरतीन सेवल्यो दिह बी रेय: 41मी माणहान बिटोख मार हेरोगदुताह मोकलुह, ता मार राज माय आखा खाराब काम केरनाराह, एने दिहराह पाप केरनाराह एकठा केरती, 42ओवता ताह बाहेर निकालीन देदेकताली आक्ठीन बाठी माय टाक देती, ताहरी रेड़नो एने दात केकड़ावणो रेय। 43तुलबूखे देरमी माणहे बोगवानान राज माय दिह्यान गेत चोमेकती। जान कान एय, ता होमली लेय।”
लिकायेल खेजानान किस्सो
44हेरगान राज खेता माय लिकायेल खेजानान गेत हे। एक माणुह ता खेजानाह देखीन लिकाड़ दिनो। तेवी तो खुस एन तान आखो मालदेन वेच देनो, एने ता खेताह वेचातो लेय लेदो।
मोंगाला हिरामोतीन किस्सो
45हेरगान राज, हिरामोतीह होदणारा एक वेपारीन गेत हे। 46जेवी ताह एक मोंगालो हिरामोती जुड़नो, ते तो गेर जाईन तान आखो मालदेन वेचीन ता खेताह वेचातो लेय लेदो।
मासा देरनारान जालान किस्सो
47ओवतो हेरगान राज मासा देरनारा जालान गेत हे। ताह देरीया माय टाकणु, एने जाल आखी बातीन मासाह ली आवेह। 48एने जेवी जाल बोराय जाणे, ते मासऱ्या जालाह खेचीन बाहेर काड़ लेणु, एने ता बोहीन हाजाला मासाह निवाड़ेन ठामला माय टुलो केऱ्या, पुण खाराब मासाह जुगार देना। 49ज्यी देरतीन सेवल्या दिह्याम ओहलोस एय; एने हेरोगदुत आवीन पापी माणहाम रेन देरमी माणहाह आंगे केरती 50एने हेरोगदुत पापी माणहाह नेरगान आक्ठीन बाठी माय टाक देती, ताहरी ता रेड़ती, एने दात केकड़ावती।
जुनाली एने नोवाली हिक
51यीशु तान चेलाह फुशो, “काय तुमू ज्यी आखी वात सोमेजना?” ता केया, “होव।”
52तेवी यीशु ताह केयो, “जिहकेरीन एक मालीक तान मोटक्याम रेन नोवाली एने जुनाली वोस्तु बाहेर काड़ दिथे, तिहेस केरीन देरेमगुरू न्या बोगवानान राज ने खेरायीन बाराम जाणतेह।”
नासरत गावा माय यीशुन अपमान
(मरकुस 6:1-6; लुका 4:16-30)
53जेवी यीशु ज्या आखा किस्सा हिकाड़ीन तारेन जात रिनो, 54एने तान गावाम आवो, एने यहुदिन बोक्ती केरन्या गेराम जाईन ओहलो हिकाड्यो, काय आखा माणहे बोंगलायीन एका दिहराह केया, “ज्याह ज्यी ताकेत एने इकेल कारीन जुड़ेल हे? 55काय ज्यो पोला हुतारान सोरो नाह सोतो? एने ज्यान आईख ने नाव मरीयम, एने याकुब, युसूफ, शमोन एने यहुदा ज्यान बाहख नाह सोता? 56एने ज्यान बोणह्युक आपणी न्या नाह रेत्यु काय? तीबी ज्याह ओली मोठी इकेल एने ताकेत कारीन जुड़ेल हे?” 57#योहान 4:44ओहलो विचार केरीन ता यीशु पोर बुरहो नाह केऱ्या।
पुण यीशु ताह केयो, “जाणकाराह तान गेराह एने गावाह सोड़ीन आखी जागे मान सम्मान जुड़ने।” 58यीशु ताहरी होवटा चोमेत्कार ने काम नाह किऱ्यो, काहाकाय तान गावान माणहे ता पोर बुरहो नाह केऱ्या।
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
