Mwanzo 1
1
Wumpiwa wa olumwenku na vitthu zooshi ziriimo
1Omwanzo, Nluku ompa pinku na vathi. 2Olumwenku waari ohineeyane matthentto na khayaarimo hatha etthu, yaarivo yiiza vatulu wa pahari ya wiicha. Rooho ya Nluku yaari ozukulela vatulu wa maati.
3Aphano Nluku khuri: “Yiiyevo nuuru!” Khwiiyavo nuuru. 4Nluku khoona yoori nuuru yaari yooshapweya; khuvalula nuuru na yiiza. 5Nluku khutthaja Nuuru “nthana”, yiiza khutthaja “osikhu”. Khuripa khucha, siikhu ya mwanzo.
6Aphano Nluku khulupa theenya yoori: “Wiiyevo mwaawanyo vakatthi wa maati onvalulaaye maati na maati!” 7Nluku khuretta mwaawanyo ovaluliyeeyo maati vathi na vatulu. Khurettikhana etthiipo. 8Mwaawanyo opule Nluku khutthaja “pinku”. Khuripa khucha, siikhu ya phiiri.
9Nluku khuri: “Akusanyeye maati apa vahali vamote ari vathi wa pinku, epuwe tuulu!” Khurettikhana etthiipo. 10Tuulu yaya ethiito yawuuma khutthaja nzina la “tuniya”, maati apale aakusanyeyiyeeyo khutthaja nzina la “pahari”. Nluku khoona yoori pi zooshapweya. 11Nluku khulupa theenya yoori: “Tuniya yootthele tthuttu. Waaza nyaani zinimaaye peewu na miitthi zinimaaye mishumo, wakhula nshumo na phunje zaya khwa nanna zoofwarikhana!” Khurettikhana etthiipo. 12Tuniya khootthela tthuttu: nyaani zinimaaye peewu, miitthi zinimaaye mishumo na phunje zaya khwa jaati zaya. Nluku khoona yoori pi zooshapweya. 13Khuripa khucha, siikhu ya ttaatthu.
14Aphano Nluku khuri: “Otulu ziiyewo vimwasikhelo yoori ovaluleye nthana na osikhu! Ziiye alama zinthoonyezaaye elimwe na mwiita, siikhu na nyaakha. 15Vimwasikhelo ziriiye otulu ziiye zoomwasikhela vathi.” Khurettikhana etthiipo. 16Nluku khwaattala vimwasikhelo piiri khuulu. Emwasikhelo eti khuulu yaya yoori esala elokozela nthana, eti ttiitthi esala elokozela osikhu. Na theenya khwaattala matthottowa. 17Nluku khuttha vimwasikhelo epile otulu yoori esala emwasikhela vathi, 18na olokozela nthana na osikhu, zaawanye nuuru na yiiza. Nluku khoona yoori pi zooshapweya. 19Khuripa khucha, siikhu yanne.
20Aphano Nluku khuri: “Mpahari ziiyemo zumpe zawaatta za wiiyana ohaayi, na eeyevo anyannyi anvavaaye otulu!” 21Khwa etthiipo Nluku khumpa zumpe khuluzeene za mpahari na jaati zooshi za zumpe zineettettaaye na ziniitaalaaye mpahari khwa jaati zaya. Khuwompa theenya anyannyi ooshi khwa jaati zaya. Nluku khoona yoori pi zooshapweya. 22Nluku khuparikhiya araka: “Mwittheerelane mwaattelane, mwiitaale mpahari, na anyannyi aattelane va tuniya!” 23Khuripa khucha, siikhu yathaanu.
24Aphano Nluku khuri: “Ziiyemo ntuniya jaati zooshi za zumpe, nyama za ntthuttu, mifuwo za vaje na nyama zoojipurula!” Khurettikhana etthiipo. 25Nluku khumpa nyama za ntthuttu za wakhula jaati, zoojipurula za wakhula jaati, na mifuwo za wakhula jaati. Khoona yoori pi zooshapweya.
26Nluku khulupa theenya yoori: “Nimumpe pinaatamu woonishapihi wa wiiya nkhama fweeyo! Yoori eeyane owahi wooshintta swi za mpahari na anyannyi ootulu, mifuwo za vaje na nyama za ntthuttu mpakha nyama zooshi zinjipurulaaye vathi.”
27Aphano Nluku khumumpa pinaatamu
wa wiiya nkhama ye;
nlume na muukha ompiwa ti ye.
28Nluku khuwaaparikhiya khuwooza yoori: “Mwivokolelane, mwaattelane mwiitaale voolumwenku! Mwiiyane oshintta va tuniya, swi za mpahari, anyannyi ootulu na nyama zooshi zineettettaaye vathi!” 29Nluku khulupa theenya araka: “Yoori mweeyo mwiiyane etthu yoojiwa, kiniwinkhani nyaani zooshi za ntuniya zinimaaye peewu, miitthi zooshi zinimaaye mishumo na phunje zaya. 30Kininkha mathapa ooshi nkhama vitthu zoojiwa za nyama zooshi ziriina ohaayi: anyannyi ooshi ootulu na nyama zooshi mpakha epile zinjipurulaaye vathi.” Khurettikhana etthiipo. 31Nluku khoona yoori pi zooshapweya channu. Khuripa khucha, siikhu ya siitha.
© 2020, Wycliffe Bible Translators, Inc. All rights reserved.
