Luk 23

Ọmeremi Jịzos ghisigh aPailet

(Matiu 27.1-2, 11-14; Mạk 15.1-5; Jọn 18.28-38)

1Kụ oomo aḍita awe phọ uḅerenu ni ọsighe Jịzos ọghiomonaan Pailet. 2Kụ bịdi omiigh ọgba ọḅam ẹmhu ọdi mọ, “Yoor usiph oye phọ ọphon, dị mạphueghi iloghi awe phọ ayoor. Ọdi ạḅeni ghan bịdi mọ kúsogh ghan iisogh uwo ẹmha phọ aRom, kụ ạḅile ghan kẹn rakola mọ ọno aKraist ọdaam ẹmha.”

3Kụ aPailet apuru nyọdi mọ, “Nạ kụ ọdaam ẹmha ạbuo aJu phọ ni?”

Kụ ọdi mọ, “Nạ kụ mạḅem ịduon phọ.”

4Kụ aPailet ạḅeni bụo ạrumhu ariil ạrikia phọ rꞌawe phọ mọ, “Erugh ípum oye phọ ọphon.”

5Kụ bịdi ụḅile ghụn ni bịn ọokonoghian opu ịḅel phọ mọ, “Ịtughemi phọ ọdi rẹgbaragbarami ghan iloghi awe. Ọdi amiigh ni kꞌaGalili kụ ạghaaph aleenye oomo aJudia, kụ nyịidipho ọdi maru bọ asi aani ẹphen.”

Ọmeremi Jịzos ghisigh ạHerod

6APailet ạnaghan bọ ịduon phọ apuru ni mọ, “Oye phọ ọphon ọnyo aGalili ḍụghum?” 7Mem dị ọdi ạnaghan bọ mọ ạJizos ọlo eelhe phọ ẹpe ạHerod kụ ạda bọ, ọdi ạlogh ni we dị ọsighe nyọdi ọghiomonaan Hẹrod. ẠHerod ạrol aani ni ẹpe Jeruselem mem mọ ọpo phọ. 8Ịḅaal li ologhi ạHerod iboom, mem dị ọdi ạmiin bọ Jịzos, ịdi eḍighi bọ ọdi mạnaghan ghan ni ịlo ọdi, kụ ạwa ghan ọmiin ọdi kꞌamem dị mebia ni. Ọdi ạwa ghan ni ọmiin ịiḍaany lọ ạJizos kaḍighi. 9Kụ ạHerod apuru ni Jịzos ịbadi asipuru, kụ ọdi ọ́phagharanaan rꞌaḍiniin. 10Kụ ạbuo ạrumhu ariil ạrikia phọ rꞌạbutughemia iilogh phọ umite ni kụ ọgba ịikpara ạsiagba iilogh ọḅam ẹmhu ọdi. 11Kụ ạHerod rꞌaweye ẹgham mọ ọdi uphogh ni nyọdi osooromi, ọḅile ọgilaam. Uunmenemi ni nyọdi ịkuakua iinmenan kụ oḅulemi ọghiomaan Pailet. 12Kụ ḍio phọ ạḍiphe phọ bịn ạHerod rꞌaPailet oḍighi rịghiri, kụ ạri ọbo ẹpomoghian phọ ạbidi mịtol li ẹghiom ghisigh.

Osoph erugh aḍuugh opume Jịzos

(Matiu 27.15-26; Mạk 15.6-15; Jọn 18.39—19.16)

13APailet ạmagh ni bụo ạrumhu ariil ạrikia phọ rꞌạbuo ịtooghi phọ rꞌawe phọ aakpomoghi 14kụ ạḅeni bịdi mọ, “Nyina ịsighe oye phọ ọphon iruomonaan ịmi kụ ẹgba mọ ọdi rạpueghi ghan iloghi awe phọ. Kụ nyịidipho, mị ạwa ạmiin sịen ghisigh anyina mọ erugh nyọdi ípum esi oomo phọ ịphen nyina rẹgba bọ kẹḅamaghi ẹmhu ọdi. 15ẠHerod kẹn ósoph ịiruen ophume nyọdi. Ọdi aḅulemi nyọdi uruom iyira. Ịyaar dị oye phọ ọphon aḍighi dị ạkpe oghiigh ílho. 16Loor ịphen phọ, mị kạgurogh nyọdi bịn aseere dị agheel.” [ 17Kụ ạri tọrobo amem ẹyaal ọphel otene phọ aPailet rạ́bile ghan oseere oniin ọnyo-ikoli ọngo ạbidi.]

18Kụ oomo phọ ạbidi ọyughuron mọ, “Kiigh ni nyọdi. Seere ghụn Bạrabas kụ ụngo iyoor.” 19(ẠBarabas phọ oniin onyugheel-ẹkpar dị ạko enu mem dị ọgbaragbara asoor ẹmha phọ kụ ọtuan ọlogh ikoli.)

20APailet ạwa ni oseere ạJizos, kụ ọdi ạḅile ạghaaph ịlo oḅorionom iloghi awe phọ. 21Kụ bịdi ọḅile bịn ọyughuron mọ, “Kạn nyọdi loor oreeny aghiigh. Kạn nyọdi loor oreeny aghiigh.”

22Kụ aPailet apuru bịdi amuneniom ịraar amem mọ, “Uḍighi ika? Ịghen ịkaraph kụ ẹdi ọdi aḍighi bọ? Mị ụ́miin ịyaar ọtuan oghiigh ọdi. Loor ịphen phọ, mị kạgurogh nyọdi bịn aseere dị agheel.”

23Kụ bịdi ọyughuron kꞌẹpe ạnyu opuemi ịḅel phọ mọ ọkan Jịzos oghiigh, kụ ịlooghi phọ ạbidi eḍighi ekol. 24Kụ aPailet asoph erugh phọ aphume Jịzos ịdipho bịdi ọwa bọ, 25kụ aseere oye phọ ọpo ọtuan bọ ọko enu phọ rꞌọgbaragbara phọ kụ ọlogh bọ ikoli phọ, ịdipho bịdi ọlom bọ mọ oseere phọ, kụ ạḅogh Jịzos ạngo bịdi mọ oḍighi ịlo ẹḅeeraan bịdi.

Ọkan Jịzos loor oreeny

(Matiu 27.32-44; Mạk 15.21-32; Jọn 19.17-27)

26Bịdi ụsighe ni Jịzos ọḍuanam. Bịdi oten rọki, kụ oozuanaan oye dị oghol mọ aSaimon ọlo aSairini, dị ạḍua eniin ẹmha ratu Jeruselem, kụ osiph kụ ọsighe oreeny phọ kọkanam bọ Jịzos ọngo nyọdi mọ arool ạdaph ọman ạJizos.

27Aḍita awe ụtuan ni Jịzos; sịphe ogbo phọ ạbidi, ạnmariir ụrol li dị ọkanagha siloor ọḅile omoghinaan nyọdi. 28Kụ ọdi akiton ạḅeni bịdi mọ, “Nmạriir aJeruselem, kímoghinaan ịmi. Imoghinaan ghụn loor anyina rꞌạnmuny anyina, 29ịdi eḍighi bọ ariiḍio retu ni mem dị aweye kọḅem mọ, ‘Ạḍiseph edianaan ni rạmar, rꞌạrukuruḅaka phọ ịpe kẹ̋mar ghan bọ, rꞌạramamaam mọ ịpe ọony kọ́maam ghan bọ.’ 30#Hos 10.8; Ogon 6.16Pọ kụ amem dị awe kọḅeni ruugum mọ, ‘Imeleghuom iyoor,’ ḅịle rạaḅaraph phọ mọ, ‘Iikpereghiom iyoor.’ 31Íḍigh bịn ẹgher, kụ ạghiom ologhi.”

32Ụsighenom ni ịyal abusereghiom sighiton ọḅaram rꞌạJizos. 33Bịdi rọghi rosi esi dị oghol mọ ạkpaḍi ịkeeghi ạrumhu, kụ ọkan nyọdi loor oreeny phọ kụ ogim, kụ ụḅaram aani ni ịyal phọ ạbueri phọ awe phọ, oniin ekeeny, oniin elhiom. 34#Ạsuo 22.18Kụ ạJizos mọ, “Ọde, sạr ịkaraph phọ ạbidi ạwilenaan bịdi, ịdi eḍighi bọ bịdi úlegheri ịpe bịdi roḍighi bọ.”

Bịdi ụsaaghi ni ẹlhel odianam iinmenan phọ ạJizos. 35#Ạsuo 22.7Awe ụmeregha ni pạ phọ ọmiin aani. Kụ ạbuo ịtooghi ạbuo aJu phọ ọgilaam ghan nyọdi mọ, “Ọpel bụnon dị ẹmhu ọdi útue ụpela. Ạphela ẹmhu phọ ọdi, eḍighi mạar dị ọdi kụ aru ni Mesaya phọ Ẹnaan eseere bọ!”

36 # Ạsuo 69.21 Rꞌaweye ẹgham mọ bịn ụnmoghoghoom ni nyọdi. Bịdi uru ni ghisigh ọdi, kụ ọngo nyọdi mụkpueneen amiim 37kụ ọḅem ghan mọ, “Eḍighi mạar dị nạ kụ aru ni ọdaam ẹmha ạbuo aJu phọ, pẹla ẹmhu phọ ạna.”

38Ụge ni pạ ạnyu oreeny phọ ikpo ọnhu phọ ịphen mọ: “Ọphon kụ ọdaam ẹmha ạbuo aJu phọ.”

39Oniin ọnyo abusereghiom sighiton phọ ọḅaram bọ rꞌọdi ọkan ạḅeni yogh ni nyọdi sịkaraph mọ, “Nạ kụ káKraist phọ ḍụghum? Pẹla ẹmhu ạna ụḅaram aani iyoor.”

40Ọphori phọ ạḅile ghụn ni ạḅaam ghan nyọori phọ mọ, “Nạ Ẹnaan rákiilaan ghan ḍụghum? Nyịidipho mosoph eniin erugh opume ḍita ayira. 41Tọrobo ịlo ẹrol, ịiruen phọ ịphen ayira ẹkpe ni, ịdi eḍighi bọ ịphen kụ ịikpia ịkaraph phọ yira oḍighi bọ, kụ oye phọ ọphon ịkaraph óḍighi.” 42Kụ ọdi ạmagh mọ, “Jịzos, ụutughian aani ni ịmi mem mọ nạ katu bọ ịdipho ọdaam ẹmha phọ.”

43Kụ ạJizos ạḅeni nyọdi mọ, “Mị ạkar rạḅeni ghan nyịna mọ rodon nạ rꞌạmi kụ kọtol ẹpe ooḅi ọmar phọ.”

Aḍuugh phọ ạJizos

(Matiu 27.45-56; Mạk 15.33-41; Jọn 19.28-30)

44 # Ẹḍua 26.31-33 Kụ rẹteeny ogbo ootaany, bịn ufiri aḍigh oomo eelhe phọ, tụtu ẹteeny ịraar asuogh dulhe. 45Kụ ukpe phọ ọkpo bọ sịphe Ạdol Iigbia Otu Ịiḅereghi phọ ạphaaru ịyal ipoḍi. 46#Ạsuo 31.5Kụ ạJizos ạlho ạghiom ạnyu mọ, “Ọde, mị ạḅogh uwaloor phọ ạmi ạlogh ḍịghaagh ạna.” Ọdi rọḅem bọ ịduon phọ bịn amugh.

47Kụ uwo ẹmhu ạbuo ẹgham mọ ạbuphe phọ ạmiin bọ ịphen emiteghu bọ ạseph ni Ẹnaan kụ ạḅem mọ, “Igey phọ ni, ọphon phọ oye aruukuan ni.”

48Oomo awe phọ ạbuphe osoor bọ kụ ọmiin bọ ịpe emiteghu bọ uphumugha ni rokpologhi kụ osiom iloghi aruutu. 49#Luk 8.2, 3Kụ oomo ạbuphe olegheri bọ nyọdi rꞌạnmariir phọ ọdaph bọ nyọdi kꞌaGalili oru, ụmeregha ni kꞌegher kụ ọmiin ghan ịphen phọ.

Amaḍi phọ ạJizos

(Matiu 27.57-61; Mạk 15.42-47; Jọn 19.38-42)

50-51Oniin ogey oye dị oghol mọ ạJosef, ọlo Arimatia sịphe eelhe ạbuo aJu phọ, ạrol li. Ọdi aḍighi ni oye aruukuan, dị agon ghan ọmiin ọmar phọ kꞌẸnaan. Ọbo ọdi aḍighi aani ni oniin ọnyo ookpomoghan ikpolom awe phọ; ọdi ómeeraam ịiruen phọ rꞌịpe bịdi oḍighi bọ. 52Ọdi ạghi ni ghisigh aPailet kụ ạlom ḍizu phọ ạJizos. 53Kụ ọdi ạsighe ḍizu phọ sịphe oreeny phọ ọkan bọ aseere ude, kụ ạsighe ọmur aphurughiom, kụ aḍi nyọdi oḍi dị oguph loor asighiigh dị kꞌekulha oye úḍi. 54Iḍighi dulhe arookolobian dị kẹḅaal ḍio ophooghian.

55Ạnmariir phọ ạbuphe ọdaph bọ Jịzos kꞌaGalili kụ oru ụdaph ni Jọsef ọghi ọmiin aani oḍi phọ rꞌọdo phọ eḍiom mọ oḍi bọ Jịzos. 56#Ẹḍua 20.10; Dut 5.14Kụ rọmiin kụ oḅula yogh iloghi aruutu ookolobian rolho eeḅi eḍu rꞌọota omuur aḍizu phọ.

Kụ ẹteeny bọ ḍio ophooghian phọ, bịdi uphooghian ni ịdipho iilogh phọ ẹḅem bọ.

選択箇所:

Luk 23: ẠḌI

ハイライト

コピー