Jọn 6
6
ẠJizos ạperemi eḍien oogh ọonir awe
(Matiu 14.13-21; Mạk 6.30-44; Luk 9.10-17)
1Ịphen phọ reten, kụ ạJizos ạḅeeny Ọphiiny aGalili ọta bọ mọ Ọphiiny ạTaibirias. 2Kụ aḍiboom aḍita awe ọdaph nyọdi, loor ịiḍaany phọ bịdi ọmiin bọ ọdi aḍighi yogh bọ loor bụphe úmoon bọ. 3Kụ ạJizos ạsiiny ạnyu ẹeḅaraph kụ ọdi rꞌạbumatuan phọ ọdi ọrologhu ude. 4Mẹkar rẹkpul olhe ẹyaal ạbuo aJu phọ dị oghol mọ ẹyaal ọphel otene. 5Mem dị ạJizos aphogh bọ akitonom ạmiin ni ḍiboom aḍita awe dị rotu ọteeny ọdi, kụ ọdi apuru Filip mọ, “Koko bọ ika eḍien, pịdi awe phọ ạbuen ole?” 6Ọdi ạḅem ịphen phọ olegheriom ologhi aFilip. Ọdi rꞌaloor ọdi alegheri ni ịpe ọdi kaḍighi.
7Kụ aFilip mọ, “Eḍien ịyal okuron ipoḍi asilva kẹ́kasian dị bịdi koonemanaan.”
8Ọnon ọnyo ạmatuan phọ, dị oghol mọ Ạndru, umor phọ aSaimon Pita, ạḅeni nyọdi mọ, 9“Oniin ọony odi ni sịen, dị ạmoogh oogh iiḅoghoḍi ạbred, rꞌịyal ina, kụ ịphen phọ kesi ḍighen esi ạbuen phọ?”
10Kụ ạJizos ạḅem mọ, “Ịḅeni awe phọ ọrologhu ude.” Pạ phọ atuboom ạroogho ạrol li, kụ alephiri ạnmuny phọ ọrologhu bọ ude phọ ụghiom ni oogh ọonir. 11Kụ ạJizos ạsighe iiḅoghoḍi ạbred phọ, kụ rọngo ḍịseph Ẹnaan kụ adiemi bụphe ọrologhu bọ ude phọ, kụ ạḅile ạsighe ina phọ ạtuugh adiemi, tọrobo ịlo oye phọ ạwa. 12Mem dị bịdi molhe ẹpherogh, ọdi ạḅeni bụmatuan phọ ọdi mọ, “Ịson ipoḍi phọ. Kémeera rꞌẹnum ephe.” 13Kụ bịdi ọson oomo ipoḍi oogh iiḅoghoḍi ạbred phọ olhe bọ osugheeny kụ omuzeḍi ḍioph rꞌịyal ạrigiel.
14Kụ bụphe ọmiin bọ ịiḍaany phọ ạJizos aḍighi bọ ụḅem mọ, “Ọkar igey ni, ọphon phọ kụ oyil phọ oguanaan bọ mọ katu ni sịen aḅirini phọ.” 15ẠJizos alegheri ni mọ bịdi rọwa ọsighe ẹekpara ekpeḍien oḍighinom ọno ọdaam ẹmha, kụ ogina ọdi ạḅile ni ạghi sịphe ẹeḅaraph phọ bịn ạrol.
ẠJizos atelhe ạnyu ạmuum
(Matiu 14.22-33; Mạk 6.45-52)
16Mẹteeny dulhe kụ ạbumatuan phọ ọdi ọḍua osoor osi ẹpe ọphiiny phọ 17kụ oḍigh oghuugh rọḅeeny ogheel ạKapaniom. Mekpereghian ni, kụ ạJizos kőḅula. 18Loor oboom oghim dị rakim, oologh amite ni. 19Mem dị bịdi mọzoghi oogh mụghumo odiiny itobi, bịdi ụmiin ni Jịzos dị arelhe ạnyu ạmuum mọ ratu ọteeny oghuugh phọ ạbidi, kụ aruugu asiph bịdi. 20Kụ ọdi ạḅeni bịdi mọ, “Mị ni. Kékiilaan.” 21Kụ ịḅeeraan ni bịdi ọsighe ọdi ọsaany sịphe oghuugh phọ: kụ egina amem bịn oghuugh phọ asul esiḍia phọ bịdi rọki bọ.
Awe phọ ọwa ghan Jịzos
22Ẹḅaal bọ ḍịroor phọ, awe phọ ọrologhu bọ ẹpe ẹḅeenyom ọphiiny phọ ụmiin ni dị oniin oghuugh bịn asugha pạ phọ. Bịdi ulegheri ni mọ ạJizos óḍigh aani oghuugh phọ ạbumatuan phọ ọdi omitiom bọ, mọ ạbumatuan phọ ọdi bịn kụ ụḍua. 23Ịnon arughuugh ịḍua ni Tạibirias eru esul esiḍia dị etuman esi phọ Ọmoogh-we phọ ạsighe bọ ạbred phọ kụ rọngo ḍịseph Ẹnaan kụ aḍita awe phọ olhe bọ. 24Mem dị awe phọ ọmiin bọ mọ ạJizos rꞌạbumatuan phọ ọdi pạ úlho, bịdi uḍiku ni rughuugh ọghi ẹpe Kạpaniom ọwa ghan Jịzos.
ẠJizos kụ eḍien aghuḍum mọ
25Mem dị awe phọ ọmiin bọ Jịzos ẹpe ẹḅeenyom ọphiiny phọ, bịdi upuru ni nyọdi mọ, “Rạbai, nạ uru ẹphen phọ pụr amem?”
26Kụ ạJizos mọ, “Mị ạkar rịḅeni ghan inyina mọ nyina ị́tuan ịiḍaany phọ nyina ẹmiin bọ, nyina ịtuan eḍien phọ nyina ele bọ ịpherogh inyina kụ rịwa ghan bọ ịmi. 27Kẹ́tuan ghan mun eḍien phọ ẹpe kẹḅor bọ, ịtuan ghan eḍien phọ ẹpe kẹtol bọ ẹteeny ghuḍum kꞌagee-pọ phọ kụ ekumuan ghan. Eḍien phọ ẹphen Ọony phọ Oye kụ kịngo inyina, ịdi eḍighi bọ Ẹnaan Ọde phọ mạlhogh nyọdi elegh.”
28Kụ bịdi opuru nyọdi mọ, “Yoor koḍighi aani ika kụ oḍighi ghan iiḍighi phọ Ẹnaan?”
29Kụ ạJizos mọ, “Oḍighi phọ Ẹnaan rẹwa bọ mọ iḍighi ghan phọ ọphon mọ imeeraam nyọpo ọdi arom bọ.”
30Kụ bịdi mọ, “Nạ kaḍighi eeghe ịiḍaany dị yoor kọmiin bọ kụ omeeraam nyịna? Nạ kaḍighi eeghe? 31#Ẹḍua 16.4, 15; Ạsuo 78.24Ạburude ạburude phọ ayira ule ghan mạna ẹpe ẹdala phọ, ịdipho ọge bọ sịphe ạḍinya iigbia phọ mọ, ‘Ọdi ạsighe kꞌạke eḍien kụ ạngo bịdi mọ ole.’”
32Kụ ạJizos ạḅeni bịdi mọ, “Mị ạkar rịḅeni ghan inyina, mọ eḍien phọ aMozis ịngo bọ inyina kéḍien dị ẹḍua kꞌạke kụ eru. Ọde phọ ạmi kụ rạngo ghan bọ ọkar eḍien phọ ẹpe ẹḍua kꞌạke eru. 33Eḍien phọ Ẹnaan rẹngo ghan bọ, pọ ọpo ạḍua bọ kꞌạke kụ aru, ọdi kụ rạngo ghan bọ aḅirini phọ ghuḍum.”
34Bịdi ọmagh nyọdi mọ, “Oye phọ, ụngo ghan iyoor eḍien phọ ẹphen phọ oomo amem.” 35Kụ ạJizos mọ, “Mị kụ eḍien aghuḍum mọ. Tọrobo oye lọ aru ụteeny ịmi, ọkoony nyọdi kásiph mun. Oye lọ umeeraam ịmi, ạmuum ọphughol nyọdi kạ́pu mun kꞌagee-pọ. 36Mị mịḅeni ni inyina mọ nyina mịmiin ni ịmi kụ kémeeraam. 37Oomo ạbuphe Ọde phọ ụngo bọ ịmi kụteeny ni ịmi, kụ oye lọ aru ụteeny ịmi, rꞌamem dị mị kaporogh nyọdi ílho, 38ịdi eḍighi bọ mị ụ́tuan oḍighi ịpe ịḅeeraan bọ ịmi, mị ụtuan oḍighi ịpe ẹḅeeraan bọ nyọpo urom bọ ịmi kụ mị ạḍua bọ kꞌạke aru. 39Ịphen kụ ịḅeeraan bọ nyọpo urom bọ ịmi mọ mị uḍighi phọ, mọ mị kútoph rꞌoniin ọnyo ạbuphe ọdi ụngo bọ ịmi, mọ ruukuna phọ mị uḅerion oomo phọ ạbidi esi aḍuugh, 40ịdi eḍighi bọ ịphen kụ ịdi ẹḅeeraan bọ Ọde phọ ạmi: mọ tọrobo oye lọ ạmiin Mọony phọ kụ ameeraam nyọdi kạmoogh ni ghuḍum kꞌagee-pọ, kụ ruukuna phọ mị kaḅerion ni bịdi esi aḍuugh.”
41Kụ ạbuo aJu phọ omiigh ogum mọ ọdi ạtuan eeghe kụ ạḅem mọ, “Mị kụ eḍien phọ ẹḍua bọ kꞌạke kụ eru.” 42Kụ bịdi mọ, “Oye phọ ọphon kụ kạ́Jizos ọony phọ ạJosef ḍụghum? Yoor olegheri ni ọde rꞌonhiin phọ ọdi. Nyịidipho phọ ịḅile iḍighi ika kụ ọdi rạḅem ghan bọ mọ, ‘Mị ụḍua kꞌạke kụ aru’ phọ?”
43Kụ ạJizos mọ, “Isophe ịgum mọ anyina. 44Oye kátue ụteeny ịmi, emuton oye lọ Ọde phọ urom bọ ịmi kụ aḍur aloghoma, kụ ruukuna phọ mị kaḅeton ni nyọdi. 45#Azay 54.13Ọge ni sịphe ạḍinya ariil phọ Ẹnaan mọ, ‘Ẹnaan kẹtughemi ni oomo phọ ạbidi.’ Tọrobo oye lọ ạnaghanan Ọde phọ ạḅile ạtuugha esi ọdi katu ni ụteeny ịmi. 46Mị rạ́ḅem ghan mọ oye mạmiin ghan ni Ọde phọ ekpeḍien. Ọnon oye dị mạmiin ghan Ọde phọ ólho, emuton nyọpo ạḍua bọ kꞌẸnaan kụ aru. 47Mị ạkar rịḅeni ghan inyina mọ ọpo ameeraam bọ ạmoogh ni ghuḍum kꞌagee-pọ. 48Mị kụ eḍien aghuḍum mọ. 49Ạburude ạburude phọ anyina ule ni mạna phọ ẹpe ẹdala phọ kụ umuughu ni. 50Mị rạkaaph ghan ịlo eḍien phọ ẹpe ẹḍua bọ kꞌạke kụ eru, ẹpe oye lọ ale kámugh bọ. 51Mị kụ eḍien aghuḍum mọ ẹḍua bọ kꞌạke kụ eru. Oye lọ ale eḍien phọ ẹphen kạtol li kꞌagee-pọ. Iphulupul phọ ạmi kụ eḍien phọ mị kạngo bọ, ịpe mị kạngo bọ pịdi aḅirini phọ ọmoogh ghuḍum.”
52Ọghaaph phọ ọphon ạsighe ni ọgbagara ọogbaghanaan ạlogh ogbo ạbuo aJu phọ mọ, “Ika nụun kụ ẹdi oye phọ ọphon kạngo bọ iphulupul phọ ọdi mọ yira ạa?”
53Kụ ạJizos ạḅeni bịdi mọ, “Mị ạkar rịḅeni ghan inyina mọ aghuḍum loor anyina kạ́tol emuton lọ nyina ạa iphulupul Ọony phọ Oye, ẹḅile ẹphughol ịḅaal phọ ọdi. 54Oye lọ ạa iphulupul phọ ạmi, ạḅile ạphughol ịḅaal phọ ạmi mạmoogh ghuḍum kꞌagee-pọ, kụ mị kaḅeton ni nyọdi ruukuna phọ, 55ịdi eḍighi bọ iphulupul phọ ạmi eḍighi ni ọkar egey eḍien olhe, ḅịle kẹn ịḅaal phọ ạmi ọkar egey ịyaar ọphughol. 56Ọpo ạa bọ iphulupul phọ ạmi ạḅile ạphughol ịḅaal phọ ạmi, atugh loor ạmi, kụ mị atugh loor ọdi. 57Ọde phọ odi ghan bọ kụ urom bọ ịmi kụ mị ạtuan bọ nyọdi kụ ạmoogh bọ ghuḍum mọ. Igina phọ kẹn kụ ẹdi ọlo ạa ịmi kạtuan aani ịmi kụ ạmoogh ghuḍum mọ. 58Ẹphen kụ eḍien phọ ẹpe ẹḍua bọ kꞌạke kụ eru. Ị́kigh ịdipho ạmana phọ ạburude ạburude phọ anyina olhe bọ, kụ omuughu bọ ni. Ọlo ale eḍien phọ ẹphen phọ kạtol li kꞌagee-pọ.”
59ẠJizos ạghaaph ịphen phọ mem mọ ọdi rạtughemi ghan we phọ ẹpe obughotu phọ ạKapaniom.
Ikpo ọnhu aghuḍum kꞌagee-pọ
60Ịbadi ạbumatuan phọ ọdi ụnaghan ni ịphen phọ kụ ọḅem mọ, “Ọghaaph phọ ọphon ạkpar ịikia. Ạnhian kụ katue bọ ạnaghanan?”
61Oye nyọdi ópuru kụ ạJizos alegheri ni mọ ạbumatuan phọ ọno mọtuan ọghaaph phọ ọphon rogum, kụ apuru mọ, “Ịphen phọ reḍighi dị nyina kekiton ẹḍua esi ạmi ḍụghum? 62Mem dị nyina ẹmiin dị Ọony phọ Oye ạḍua rakeel ẹpe kꞌạke phọ dị ạrol ghan bọ, nyina kẹkaaph ika nụun? 63Uwaloor phọ kụ rạngo ghan ghuḍum, iphulupul phọ sụo rẹ́ngo ghan. Ikpo ọnhu phọ mị mạghaaph bọ ịḅeni inyina eḍighi uwaloor, eḍighi kẹn ni ghuḍum. 64Kụ buniin anyina edi ni dị omeeraam ị́moogh.” (Kụ ạri ạJizos alegheri ni kꞌemiighom mọ bụphe úmeeraam bọ rꞌọpo kabool bọ nyọdi.) 65Kụ ọdi ạghaaph ạloghom mọ, “Ịduon kụ ịdi mị ạtuan bọ ịḅeni inyina mọ oye kátue utuman ịmi, emuton ọlo Ọde phọ kụ ạngo eepoogh.”
66Loor ịphen phọ, ịbadi ạbumatuan phọ ọdi útelhian ghan mun nyọdi. 67Kụ ạJizos apuru ḍioph rꞌịyal ạbumatuan phọ mọ, “Nyina phọ kẹn kẹḍua aani ni esi ạmi ḍụghum?”
68 #
Mat 16.16; Mạk 8.29; Luk 9.20 Kụ aSaimon Pita mọ, “Ọmoogh-we, yoor kọḅile ọki kꞌạnhian? Nạ kụ ụmoogh bọ ikpo ọnhu aghuḍum kꞌagee-pọ phọ. 69Kụ yoor momeeraam ni ọḅile kẹn olegheri mọ nạ kụ Oye Aghuḍuul phọ Ẹnaan eseere bọ.”
70Kụ ạJizos ạphagharanaan bịdi mọ, “Mịna ḍịen kụ ụma bọ ḍioph rꞌịyal phọ anyina, kụ oniin ọnyo anyina aḍighi bọ ni eru?” 71Ọdi ạghaaph ịphen phọ atiom Judas Ịskariot ọony phọ aSaimon, ịdi eḍighi bọ aJudas phọ kabool bọ nyọdi aḍighi aani ni oniin sịphe aḍioph rꞌịyal ạbumatuan phọ.
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
