Jọn 2
2
Ọki kꞌọyogo ẹpe Kena
1Ịyal aḍughul-otu reten, kụ ọghi kꞌọyogo pạ ẹmha phọ aKena sịphe eelhe phọ aGalili. Onhiin phọ ạJizos ạrol aani ni. 2Ụmagh aani kẹn ni Jịzos rꞌạbumatuan phọ ọdi ọghi kꞌọyogo phọ. 3Mem dị mọphughol oomo phọ amiim mọ ọmadan kụ onhiin phọ ạJizos ạḅeni Jịzos mọ, “Amiim ósugha mun.”
4Kụ ạJizos mọ, “Nịr phọ, nạ kụ ịmi kụ́ḅeni ịlo oḍighi. Amem ạmi kẹ̋teeny.”
5Kụ onhiin phọ ạJizos ạḅeni butelhedom mọ mọ, “Iḍighi ni tọrobo ịlo ọdi ịḅeni inyina!”
6Kụ ẹri, bụphe rọdaph bọ omeeraam ạbuo aJu phọ ọmoogh ni iilogh ịlo ootola ghan ạraghaagh. Esi ịduon phọ, odiiny aroko ạrana ịrologhu ni sịphe dị oko oko ạbugh ni dị katue ni aḍigh oniin okuron aruuku. 7Kụ ạJizos ạḅeni butelhedom mọ mọ, “Ịsanyan mụum emuzeḍi roko phọ ịphen!” Kụ bịdi ọsanyan omuzeḍi koi kꞌọnhu. 8Kụ ọdi ạḅeni bịdi mọ, “Nyịidipho, ipoor ekor mụum sịphe aroko phọ ẹsighe ẹghiomaan uwo ẹmhu ạgada kꞌọyogo phọ.” Kụ bịdi ọsighe mụum mọ ọghiomonaan nyọdi. 9Kụ ọdi ạnam apogh makitonu aḍighi miim. Ọdi ólhegheri ekpisi phọ amiim mọ ạmuen phọ ạḍua bọ kụ aru. Abutelhedom mọ ạbuphe okor bọ mụum mọ bịn ulegheri. Kụ ọdi ạmagh olhom mọ, 10kụ ạḅeni nyọdi mọ, “Oomo ạbunon awe ọpur ghan rọngo ọto ạrogo phọ mugey amiim mọ, tụtu rạperogh, kụ kogbi omitiom ạmulo ụ́karaghi ụnighe; kụ nạ ạḅile ghụn asugheeny mugey amiim mọ kꞌạnyiidipho!”
11Ịphen kụ ịḅel ịiḍaany dị ạJizos aḍighi kụ amiighom sịphe ẹmha aKena eelhe phọ aGalili. Ẹpe kụ ekpisi dị ọdi agananami eghuan phọ ọdi, kụ ạbumatuan phọ ọdi omeeraam nyọdi.
12 #
Mat 4.13
Ịphen phọ reten, kụ ạJizos rꞌonhiin phọ ọdi, rꞌabumor rꞌạbumatuan phọ ọdi onyeene ọghi ẹpe Kạpaniom, kụ ọrol ịyal-ikpo aḍughul-otu.
ẠJizos ạki aḍigh Otu Ịiḅereghi phọ
(Matiu 21.12-13; Mạk 11.15-17; Luk 19.45-46)
13 #
Ẹḍua 12.1-27
Mẹkar rẹkpul olhe ẹyaal ọphel otene phọ, kụ ạJizos ạghi Jeruselem, 14kụ aḍigh sịphe Otu Ịiḅereghi phọ, kụ ạmiin we dị roboologhi sịnam, rꞌiyool-ịga, rꞌạrukurughozo, rꞌạbudi ọrologhu ịdaabili ronmeeghi ghan ikpoki ạbidi. 15Kụ ọdi ạphur oḍigh aḍighi ịkpara kụ aphoroghom oomo phọ ịnam mọ, iyool-ịga phọ rꞌạsinam mọ, sịphe Otu Ịiḅereghi phọ. Ọdi agborion ni ịdaabili phọ azuughi ikpoki ạbuphe ronmeeghi bọ. 16Kụ ọdi ạḅeni we phọ ạbuphe robologhi bọ rụkurughozo phọ mọ, “Ịsighe ịnun anyina ẹḍuanam sịen! Kẹ́sighe otu Ọde phọ ạmi eḍighi otu aḍighi!” 17#Ạsuo 69.9Ạbumatuan phọ ọdi ụutughian ni ẹkpigh sịphe ạḍinya iigbia phọ dị ọge mọ, “Ẹnaan, mị ạsighe ologhi phọ ạmi ạḅam loor otu phọ ạna, kụ ologhi phọ ạmi raamor ịdipho ạnian.”
18Ạbuo aJu phọ opuru nyọdi mọ, “Eeghe ọdo ịiḍaany kụ ịdi nạ kaḍighi oḍeenaan ayoor mọ nạ ạsighe ịikpo phọ Ẹnaan kụ raḍighinom bọ ịphen phọ?”
19 #
Mat 26.61; 27.40; Mạk 14.58; 15.29 Kụ ạJizos mọ, “Ilereghi Otu Ịiḅereghi phọ ọphon, mị kạḅile ni ạlogh ọnon ạmadan esi ịraar aḍughul-otu.”
20Kụ bịdi ọḅeni nyọdi mọ, “Ẹsighe bọ inyadi rꞌodiiny ạsia ọlogh Otu Ịiḅereghi phọ ọphon, ọmadan kụ nạ ạḅem mọ nạ kạlogh esi ịraar aḍughul-otu bịn!”
21Kụ ọlo otu ịiḅereghi phọ ọpo ạJizos ạghaaph bọ, pọ aḍizu phọ ọdi. 22Ịphen kụ iḍighi bọ ịyaar phọ, mem mọ ọpo oḅeton bọ nyọdi sịphe aḍuugh phọ, ạbumatuan phọ ọdi ọghiom bọ ni ologhi mọ ọdi mạḅem ghan ni ịduon phọ. Kụ bịdi omeeraam ịpe ọge bọ sịphe ạḍinya iigbia phọ rꞌikpo ọnhu phọ ịpe ạJizos ạghaaph bọ.
ẠJizos alegheri ni iloghi oomo awe
23Mem mọ ọpo ạJizos ạrol bọ ẹpe Jeruselem olhe ẹyaal ọphel otene phọ, ịbadi umeeraam ni nyọdi ịdipho bịdi ọmiin bọ ịiḍaany phọ dị aḍighi yogh bọ. 24Kụ ạJizos ọ́ngo bịdi ọgel ologhi phọ ọdi, ịdi eḍighi bọ ọdi alegheri ni iloghi oomo phọ awe phọ ạmadan. 25Ịlo ọḅem mọ oye kụ kạgba ịlo awe ạḅeni nyọdi ị́tol mun, ịdi eḍighi bọ ọdi alegheri ni agey ịdi bịdi rọotughian pạ iloghi phọ ạbidi.
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
