Iiḍighi 12
12
Ịgbiphoghom mọ rẹbugh
1Pọ kụ amem mọ ạHerod ọdaam mọ amiigh bọ ọgbiphoghom abuniin ạbuo ạsiosi phọ, 2ạsighe elhool ẹgham asophom ẹmhu aJems umor phọ ạJon. 3Kụ ọdi ạmiin bọ mọ ẹḅeeraan ni bụo aJu phọ, ạghi ni asiph Pita. (Ịphen phọ imite mem ẹyaal phọ roliom ghan bọ ạbred phọ ọpo yist rọ́logh ghan bọ.) 4#Ẹḍua 12.1-27Kụ ọsighe nyọdi ọlogh ikoli, kụ ọḅogh ọngo ḍioph rꞌodiiny aweye ạbuo ẹgham, dị odi inya ạruuku, mọ ophogh ghan nyọdi. Kụ aḍuom ologhi mọ ẹyaal ọphel otene phọ reten, mọ ọno kạsighe Pita ạngo bụo aJu phọ. 5Ịdipho aPita ạrol bọ sịphe otu ikoli phọ, bụo ạsiosi phọ úsoph ghan mem oghol ẹmhu ọdi ọoḅereghi Ẹnaan.
Omitiom Pita ikoli phọ
6Ḍughul phọ ạḍiphe ạHerod ạnya bọ ọsighe aPita omitiom ọngo awe phọ, aPita ạmina ịbaay ịyal ạbuo ẹgham. Ọkasaghiom nyọdi ịyal izime, kụ abukoriom otu ikoli phọ ọmeregha pạ ọnhu-aḍibuo phọ. 7Egina amem bịn ọokpaany Ọmoogh-we phọ ạmeera sịphe, aḍiboom ạḍiḅaal esoor pạ osoph phọ, kụ aphum ọpha aPita ạsumeeny, kụ ạḅeni mọ, “Nụun aḅetenu!” Bịn izime phọ ẹghororo emeel. 8Kụ ọokpaany phọ ạḅeni nyọdi mọ, “Kpạramian ukpe ạna, ạlogha rokoro ạna!” Kụ ọdi ạtuugh ịduon phọ aḍighi. Kụ ọokpaany phọ ạḅeni nyọdi mọ, “Nyora ạsuoma phọ ạna, ụdaph ịmi!” 9Kụ aPita amite ạdaph, kụ ólhegheri mọ ịpe phọ ọokpaany phọ raḍighi bọ agey ni, agbiom ghan mọ ọno rạmiin uḍien. 10Kụ bịdi rotenom ọḅel ọnhu-aḍibuo phọ rꞌọdi atum sịphe, kụ oru osi nyọpo arukuron phọ asoman bọ ẹmha phọ. Kụ ogina ọdi bịn aghughuronu ni, kụ bịdi omite okiton osoor oniin oḅodo. Egina amem bịn ọokpaany phọ ạgbatanaan nyọdi ạḍua.
11Kụ mem dị aPita aloghoma bọ loor ọdi, ạḅem ni mọ, “Pụruku mị mạkar alegheri mọ Ọmoogh-we phọ kụ arom ọokpaany phọ ọdi mọ ụphel ịmi ạsighe ḍịghaagh ạHerod, rꞌoomo phọ ịpe ạbuo aJu phọ ogbiighiom bọ.”
12Ọdi rọotughian bọ rolegheri, kụ ạghi kꞌaMeri, onhiin ạJon Mạk, dị ạbuminighan awe ookpomoghan rọoḅereghi ghan Ẹnaan. 13Kụ ọdi akar eghuugh eḍighom mọ, kụ esina ọnyani dị oghol mọ aRoda aru omegheron. 14Kụ rọlogh elegh mọ ẹḍogh aPita, bịn óghughuron eghuugh phọ loor iboh, kụ aghiil aḅula ạḅem mọ aPita ạmeera ni sịphe ọnhu-aḍibuo phọ. 15Kụ bịdi mọ, “Nạ raḍigh ịnon!” Kụ ọnyani phọ ạkpaariom ni mọ agey ni. Kụ bịdi mọ, “Ọokpaany ọdi.”
16APita ósoph mem ookpo phọ. Kụ bịdi okughuron ọmiin nyọdi, kụ ẹpherogh bịdi. 17Kụ ọdi ạabo mọ bịdi oḅoroghian, kụ ạghaaph ịpe Ọmoogh-we phọ ạsighe bọ nyọdi amitiom pạ otu ikoli phọ ạḅeni bịdi. Kụ ọdi ạḅem mọ, “Ịkaaph ịphen phọ ẹḅeni Jems rꞌạbueri ạbuo ạsiosi phọ!” Kụ ọdi ạḍua agheel ẹnon ekpisi.
18Ẹḅaal bọ, oboom ọgbaragbara ạrol li ogbo ạbuo ẹgham mọ, mọ uḍighi ika Pita. 19Kụ ạHerod ạwa ạwa nyọdi ọ́miin, kụ apuru yogh bukoriom mọ, kụ ạto mọ ọze bịdi.
Aḍuugh phọ ạHerod
Kụ ạHerod ạḍua Judia agheel Sizaria, kụ ạrol.
20Kụ ọdi ạmoogh ni oboom ọghagh ologhi esi ạbuo aTaya rꞌaSaidon, kụ bịdi ọḅoph ọnhu kụ oru ọmiin ọdi. Kụ ọphur ọsighe rịghiri Blạstos opoghom ogiga phọ, kụ ogbi ọwa ạmuḅoph esi ọdaam mọ, ịdi eḍighi bọ eelhe phọ ọdi kụ retuom ghan rạmha phọ ạbidi eḍien.
21Kụ ogu ḍio dị ạHerod aanmenan ịlo ạraalha, kụ ạrolom ạgada ọdaam ẹmha phọ ạghaaph rạraar ạḅeni bịdi. 22Kụ awe phọ ọyughuron mọ, “Kẹ́ḍogh oye, ẹḍogh Ẹnaan!” 23Egina amem bịn ọokpaany Ọmoogh-we phọ asuom nyọdi ẹzegh, ịdi eḍighi bọ ọdi mạarom Ẹnaan eghuan, kụ ịbam ikpo eḍigh nyọdi, bịn amugh.
24Kụ ọghaaph phọ Ẹnaan aphoph aaleghaan.
25Kụ ạBanabas rꞌạSol roḍighi dom mọ rọmadan, kụ ọpham Jọn Mạk ẹpe Jeruselem orighelom Ạntiok.
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
