Kɨrara gɨ daa (Exode) Maktubu dɨ ka dwar̰ɨ
Maktubu dɨ ka dwar̰ɨ
Maktubu dɨnə «Kɨrara gɨ daa kwaynaniyə» da, way i dara dɨmə gɨnə nare nə Israyel day gɨ dɨmə nɨm bam kwaynaniyə sɨn̰a dɨ Ejibtɨ lə. Mana gɨ Maktubu dɨnə Mãr̰ĩyə da, maktubu dɨ ka di pam i maktubu dɨ «Diyə gɨ mani gɨndəgɨ» (Genèse) tardɨ. Nare nə Israyel di da, i mage nənə Abɨraham duwa me, Isak duwa me, Jakob duwa me. Jakob di, gɨ ꞌwogɨw sumɨw gɨ mɨn ɗang Israyel. Mãr̰ĩ biygɨ bii ba a ha hára gandagɨ ꞌyàgɨ́ sɨn̰a dɨ dùmbu me nãy me chow lə nan̰e. Pii da, nare nə Israyel gɨlə dɨrɨn̰ nan̰e aliya aru aru wodɨ dolgə nə Ejibtɨ ɨsɨragɨ lə. Me caga da, Mãr̰ĩ àl bɨw gɨ an̰ji wayɨw di me, dɨməgɨ bam sɨn̰a dɨ Ejibtɨ lə. An̰ji ùr ba a yɨ gandagɨ mɨlan dara cendi ba ꞌwacn̰ana sumɨw me ba mɨlawdɨnaw an̰ju mɨn tenene, an̰ju gɨ ba a i «Aba dama gɨ dɨrəw bɨr̰ɨn̰ gaba dɨməgɨ bam kwaynaniyə sɨn̰a dɨ Ejibtɨ lə di» (20.2).
Maktubu dɨ ta di, gɨ nem sabadɨ dodə korgɨn̰ jii. Tuldɨ dɨ pii da, i nare nə Israyel gɨlə day gɨ dɨrɨn̰ mana gɨ sɨn̰a dɨ Ejibtɨ lə. Me Mãr̰ĩ ba ꞌwogɨ Moyis i man dara dɨmə nare nə Israyel di bam sɨn̰a dɨ ta lə di me, mani nə dan̰a nə Mãr̰ĩ àlgɨ̀ dara dɨməgɨ nɨm bam sɨn̰a dɨ Ejibtɨ lə bɨraa ha gandagɨ mana gɨ kur̰a dɨ Sinay gɨndɨdɨ lə bá di mo? (ch. 1-18) Mana gɨ ta lə da, Mãr̰ĩ yɨ mɨlan gɨ nare nə Israyel dara cendi ba kɨdɨnə i nare duwa me, an̰ju ba a i Mãr̰ĩ day me. An̰ji ꞌyàgɨ́ bii duwa gɨ ꞌwoo me, cendi yɨ le. (ch. 19-24) Kur̰a dɨ Sinay dɨdə da, Mãr̰ĩ gɨlɨw Moyis ba i man me an̰ju ba ha ɗangr̰a kundi duwa gɨ ba a ha dama lə di me, mani nə woni àla giyə lə me, bɨraa wála gɨnɨn̰ wodɨ bá. (ch. 25-31) Me nare nə Israyel di nem gama Moyis cwara duwa bədə. Cendi ɗangr̰ɨ labe gɨ dwe dúndɨw ɨrmɨw ya Mãr̰ĩ day de me, hɨrwɨw me, way ba i an̰ji me ba dɨməgɨ bam sɨn̰a dɨ Ejibtɨ lə di. Mãr̰ĩ dusɨw so dɨdəgɨ lə nan̰e, me gɨra cor yɨ gandagɨ mɨlan bi dara an̰ji i aba yara nare n̰agɨni day. (ch. 32-34) Ɨr̰ɨ cendi ɗangr̰ɨ kundi gɨnə Mãr̰ĩ duwa me, wála gɨ kundi giyə duwa ꞌyen̰ bam mwom da, ꞌywagda gɨnə Mãr̰ĩ duwa chə́ə ya sawe de hára mu kundi di daa me wor dam lə. Ta di gɨl dara Mãr̰ĩ ba dam lə nare duwa dwar̰agɨ lə. (ch. 35-40)
ハイライト
シェア
コピー
すべてのデバイスで、ハイライト箇所を保存したいですか？ サインアップまたはサインインしてください。
© 2024 Wycliffe Bible Translators, Inc. All rights reserved.