Lu̱ka̱ 20
20
Adang ol cik Ya̱u̱do̱ alaanzet ci Ye̱su̱
(Ma̱te̱yo̱ 21:23-27; Marko 11:27-33)
1Anyak da̱ i̱i̱te̱n imma ci edemeze Ye̱su̱ ol reena Ce̱e̱ze̱ wa Ta̱mu̱ta̱dde̱no̱ kar bo̱do̱k kuwahek nogo kaviyak cik abunna, u̱lu̱tte̱ zin alaata cik olli wawaco ki de̱me̱zzo̱k wak lo̱ti̱nno̱u̱ ki lo̱ddi̱ki̱re̱ kar ki̱vi̱ta̱k nonno. 2Kar zin kizettek nonno ne, “Du̱wa̱kke̱ta̱, ogoni i̱nna̱ kaal ne̱ko̱ alaanzete ci ngene? Ngene ci aanyi i̱nne̱t katkaton necu?”
3O̱bo̱de̱k zin enne, “Ka̱jji̱nnu̱ng atidic anna i̱ge̱t bu̱k. U̱du̱kta̱ng, 4a̱kku̱ dim Joni ci okko a̱gga̱me̱k ol ba̱ti̱ti̱mo̱ ko̱ ta̱mu̱-kenga yo, icima ngati ol cik diirik?”
5Ozozit zin nege arrak do̱ kar kizeto ne, “Ming kizeto naga ne, ‘A̱kku̱ ta̱mu̱-kenga,’ okko atidic enne a̱jji̱nne̱, ‘Iróng niga elemannu nonno nya?’ 6Ma̱i̱je̱ ming kazi naga ne, ‘A̱kku̱ ngati ol cik diirik,’ ovvo ol do̱o̱k ovoccet biyene, eci nege do̱o̱k a̱tu̱ ming een Joni a̱ri̱to̱i̱t ci zoz ci Ta̱mu̱ta̱dde̱no̱.”
7O̱bo̱dde̱k zin nege nonno, “Iróng naga ka̱gga̱yya̱ nginti a̱kku̱nne̱ enne.”
8Ize zin Ye̱su̱ ne, “Iróng zin anna bu̱k ka̱du̱wa̱kku̱ng alaanzete ci ngene ci kogonne anna kaal ne̱ko̱ ko̱.”
Tubzenet ci ol cik tabinto
(Ma̱te̱yo̱ 21:33-46; Marko 12:1-12)
9Emena enne zoza kar ku̱du̱wa̱k ol tubzenet cu: “Irir e̱e̱ti̱ imma keen cik e̱e̱ggi̱n vi̱no̱,#20:9 Keet ci een vi̱no̱: Arir ol keet ci een vi̱no̱ ko̱, amacu olli Ya̱u̱do̱ o̱ya̱u̱ ciginnek kize merte. Ozoz gon Ta̱mu̱ta̱dde̱n azi ne ogon olli Ya̱u̱do̱ ki keet ci vi̱no̱ riili, wak orong enne abunna ming a̱bbi̱rna̱ o̱ya̱u̱ cik abunna. IkebCaliwon 80:8-16; Isaya 5:1-7; Jeremiah 2:21; Ma̱te̱yo̱ 21:33-46; Marko 12:1-12. kar kaanyik ol u̱gge̱ ke̱e̱vi̱t kar atin kitabit nonno kar enne keeron kuk reena e̱rki̱nya̱ cik meelek. 10Baling ize te̱di̱ne̱t ma̱na̱, i̱tto̱n zin enne du̱ca̱i̱t kuk ngati ol ne̱ke̱ kar kanycik nonno o̱ya̱u̱ u̱gge̱ ma̱ne̱ neci. Ma̱i̱je̱ ol ne̱k kar kitabit nonno ko̱ u̱ru̱we̱t du̱ca̱i̱t kar kottoit nonno ki̱mi̱re̱ kuk azzine ollin. 11I̱tto̱n zin enne bo̱do̱k du̱ca̱i̱t imma, ma̱i̱je̱ nege u̱ru̱we̱t zin du̱ca̱i̱t neci bu̱k kar kottoit nonno ki̱mi̱re̱ kuk azzine ollin. 12I̱tto̱n zin bo̱do̱k manyi ma̱na̱ du̱ca̱i̱t imma dee, kar nege ku̱vu̱rto̱zi̱k nonno kar kottoit nonno kuk reena.
13“Ize zin manyi ma̱na̱ do̱ ne, ‘Kogonni atidic anna nya? Ki̱tto̱nni̱ atin anna ngeranni wa kirezi ko̱; icima atin nege ovvo o̱ngo̱o̱le̱ nonno.’
14“Imma baling ovvo ol wak eev ma̱na̱ ko̱ acin nonno ming a̱kku̱, ozozit zin nege do̱. Azi nege ne, ‘Icu e̱e̱t ci okko aragiz ma̱na̱, ku̱ru̱we̱t nonno ka̱da̱k, kar atin naga karagizet ma̱na̱ cu kize cinna.’ 15Ottoit zin nege nonno manatoto kar ku̱ru̱we̱t nonno ka̱da̱k.
“Ogonik zin atin manyi ma̱na̱ nogo nya? 16A̱kku̱ atin enne kar ki̱ki̱ya̱ ku̱ru̱k ol ne̱k ujura ma̱na̱ cinne ko̱ ka̱da̱i̱to̱, kar kaanyik ma̱na̱ ol u̱gge̱.” Baling iziyyet ol ne̱ke̱ zoz neci, izeto zin ne, “Gerza zoz necu ming ogone!”
17Egelem zin Ye̱su̱ nogo kar ki̱jji̱nno̱, “Azi zin keng ci zoz ci e̱he̱rye̱ Warage ci Ta̱mu̱ta̱dde̱no̱ ko̱ ne nya?
“‘Okko bee bali abure ol wak eenyce ko̱
ize bee ci abilne ce̱e̱z kommog veelek.’#Caliwon 118:22
18Kar e̱e̱ti̱ ci i̱i̱na̱k bee neci okko enne a̱du̱le̱ oroot, ma̱i̱je̱ e̱e̱ti̱ ci i̱i̱na̱k bee neci nonno, a̱du̱le̱ ki̱zzi̱ ele cinne dakdak.”
U̱ru̱ktte̱k mucuru alaan ci a̱ddi̱ki̱re̱ Romi
(Ma̱te̱yo̱ 22:15-22; Marko 12:13-17)
19Orongit zin de̱me̱zzo̱wa̱ wak lo̱ti̱nno̱u̱ ki alaat cik olli wawaco gool ci kar kecebte nonno ataman, eci nege a̱gga̱ ozoz enne tubzenet necu aaruk nogo. Ma̱i̱je̱ nege o̱ngo̱o̱le̱ ol. 20Acin nege nonno oroot, kar ki̱tto̱ntta̱ volongnyok wak alaba talaben azi ne ke̱e̱ggi̱nna̱ ol cik kabunanna. Orong nege ka̱gga̱mi̱t Ye̱su̱ zo̱ze̱ ci ozoz enne kar kaanycik nonno ddi̱ki̱ryo̱i̱t ci gaalau. 21I̱jji̱nne̱t zin volongnyowa nonno, “De̱me̱zo̱i̱t, ka̱gga̱yya̱ naga ming ozozi kar demez zoz ci een de̱de̱, iróng i̱nna̱ engeri ol, abarik edemezi gool ci Ta̱mu̱ta̱dde̱no̱ zo̱ze̱ ci een de̱de̱. 22Abunna ngatinna ming ka̱ru̱we̱ka̱ mucuru alaan ci a̱ddi̱ki̱re̱ Romi yo icima gerza?”
23Icin zin enne zoz ci ahac nege kar kiizek nogo ne, 24“I̱ye̱lta̱ da̱ o̱ro̱bi̱ya̱c ci een zi̱i̱t. Anyak ri̱ri̱to̱n ci ngene ki zar cik ngene?”
25O̱bo̱dde̱k nege, “Ri̱ri̱to̱n ki zar cik alaan ci a̱ddi̱ki̱re̱ Romi.”
Izek zin enne nogo ne, “Aanycik zin alaan ci a̱ddi̱ki̱re̱ Romi kaal ciginnek, kar aanycik Ta̱mu̱ta̱dde̱n kaal cik Ta̱mu̱ta̱dde̱no̱.”
26Iróng zin nege ngen amuda gool ci kar ka̱gga̱mte̱ nonno zo̱ze̱ ci ozoz enne orgene ci ollu. Abarik u̱ku̱lte̱k nege nonno zo̱ze̱ ci abariz enne ko̱, kar zin kijakte li̱i̱m.
Ngazi daiza ki rucenet
(Ma̱te̱yo̱ 22:23-33; Marko 12:18-27)
27I̱vi̱tta̱k zin ol uggak cik e̱e̱ggi̱n Saddocis#20:27 Saddocis: E̱e̱ggi̱n ne̱ko̱ koole ci olli Ya̱u̱do̱ cik a̱tu̱ Lo̱ti̱nno̱k cik Musesi ming a̱vvu̱ ngati Ta̱mu̱ta̱dde̱no̱, iróng zin nege a̱tu̱ vongiz ki anjilo icima ingazi atin ol daiza. IkebBuk wa To̱ni̱a̱u̱ 23:8. Ye̱su̱, zo̱ze̱ ci azi ne, i̱llo̱i̱ atin e̱e̱t ci ingazi daiza. 28Izettek nege nonno ne, “De̱me̱zo̱i̱t, eherakket Musesi ti̱lo̱wi̱ne̱t ci azi ne, ming a̱da̱k e̱e̱ti̱ kar kutungek ngaa ci ngen ki̱ti̱ra̱ do̱le̱c imma, anyik gotoni kurumte ki ngaa necu kar ki̱ti̱rrtta̱ dooli cik gotononi. 29Anyak da̱ ba̱li̱ye̱ gotonen turgerem. I̱ti̱k zin lo̱gu̱t wa een a̱bu̱ ko̱ ngaa kar zin enne ka̱da̱k ataman, ngen ki̱ti̱ra̱ do̱le̱c imma. 30Urumte zin gotoniya co̱de̱ ki ngaa neci, a̱da̱k zin bo̱do̱k enne, ngen ki̱ti̱rra̱ do̱le̱c imma 31kar zin bo̱do̱k lo̱gu̱t ci annu gooni ko̱ kabaito ki ngaa neci, abaito zin nege do̱o̱k ngati e̱e̱ggi̱nne̱ turgerem ki ngaa neci, a̱da̱i̱to̱ zin nege do̱o̱k, i̱llo̱i̱ rok do̱le̱c ci a̱rri̱ta̱ ngaa neci. 32Imma vu̱rrta̱ a̱da̱k ngaa neci bu̱k. 33I̱yo̱ko̱ zin, ming ovvo atin ol ingazi daiza, okko atin enne een ngaa ci ngene, ming abaito enne ki logoz cik e̱e̱ggi̱n turgerem ko̱ do̱o̱k?”
34O̱bo̱de̱k zin Ye̱su̱ nogo, “Aruco ol cik bu̱u̱l cu kar uggak ki̱ti̱kte̱. 35Ma̱i̱je̱ ol wak abak baiz ci abunna bu̱u̱le̱ cu ming ovvo ol ingazi daiza, iróng atin nege aruce icima a̱ti̱ye̱, 36iróng zin atin nege ngen a̱da̱i̱; u̱tu̱gu̱zzo̱ nege kiwagon anjilonya. E̱e̱ggi̱n nege dooli cik Ta̱mu̱ta̱dde̱no̱, ming e̱e̱ggi̱n nege dooli cik ingazi daiza. 37Ma̱i̱je̱ zo̱ze̱ ci zari bali atuze ke̱, i̱ye̱la̱ zin bali Musesi bu̱k ingazi atin ol daiza, eci enne awu Manyi azi ne, ‘Ta̱mu̱ta̱dde̱n ci Aburahami, Ta̱mu̱ta̱dde̱n ci I̱sa̱ko̱ ki Ta̱mu̱ta̱dde̱n ci Ya̱ko̱bo̱.’#Lu̱ge̱z 3:6 38Iróng enne een Ta̱mu̱ta̱dde̱n ci ol cik a̱da̱i̱to̱, abarik een Ta̱mu̱ta̱dde̱n ci ol cik aruge, eci zo̱ze̱ cinne aruge ol do̱o̱k.”
39Izektek zin de̱me̱zzo̱wa̱ uggak wak lo̱ti̱nno̱u̱ nonno ne, “U̱du̱wa̱ zoz necu ju̱rru̱m, de̱me̱zo̱i̱t!” 40I̱llo̱i̱ e̱e̱t imma ci anime kar ki̱jji̱n nonno bo̱do̱k.
Een Ki̱ri̱sto̱ ngerrti ngene?
(Ma̱te̱yo̱ 22:41-46; Marko 12:35-37)
41I̱jji̱n zin bo̱do̱k Ye̱su̱ nogo, “Nya ming azi nege ne een Ki̱ri̱sto̱ Ngerrti Da̱vi̱de̱ ko̱?#20:41 Een Ki̱ri̱sto̱ Ngerrti Da̱vi̱de̱ ku̱? Een Ye̱su̱ Ngerrti Da̱vi̱de̱ eci bali a̱rri̱ta̱i̱ kize e̱e̱t ci diiri, een bali ji̱ji̱ti̱ne̱ Da̱vi̱de̱. Bali ngen enne ki̱ti̱rra̱i̱ aave bali enne ki Ta̱mu̱ta̱dde̱n ta̱mu̱-kenga kize Ngerinne. Nonno ci eenyca kaal do̱o̱k, i̱yo̱ko̱ zin een Ye̱su̱ wa een Ki̱ri̱sto̱ ki Manyi ci Da̱vi̱de̱. Ikeb1 Samwel 16:1-13; Caliwon 132:11-12; Jon 1:1-8. 42Eci Da̱vi̱de̱ ele ci eher buwe ci Caliwono, azi ne,
“‘A̱nne̱k Manyi, Manyi cinanni#20:42 A̱nne̱k Manyi, Manyi cinanni: Awu Manyi Ta̱mu̱ta̱dde̱n Ye̱su̱, azi ne, een enne Manyi. ne:
“A̱vvu̱ a̱tte̱ cinanni a̱zzo̱ ngati a̱di̱ngdi̱nga̱ni̱ ol i̱nne̱ta̱,
43zee ku̱tu̱gu̱ anna mo̱ddo̱ wagunnek,
ka̱vvu̱to̱ zoone cigunnek.”’#Caliwon 110:1
44Awu Da̱vi̱de̱ nonno kize ‘Manyi.’ Okko bo̱do̱k enne een Ngerinne ku̱?”
Ye̱su̱ ki demezyak cik lo̱ti̱nno̱k wak Musesi
(Ma̱te̱yo̱ 23:1-36; Marko 12:38-40; Lu̱ka̱ 11:37-54)
45Baling ngen ol do̱o̱k azikne, izek zin Ye̱su̱ nuyak ciginnek ne, 46“U̱zu̱tte̱ de̱me̱zzo̱k wak lo̱ti̱nno̱u̱! Eci nege owo aim ru̱u̱ma̱ni̱ cik u̱u̱ntti̱k kar kirezit ming izza ol nogo cuwa, kar kanyait lecerit cik riilik Ce̱e̱zi̱nne̱ wak Lawinto ki ngintik adahe ol kwo̱o̱r. 47Egerzan nege ce̱e̱zi̱ cik ngaai cik boyek, kar gon i̱ye̱li̱ne̱ e̱le̱tti̱ kalac Ta̱mu̱ta̱dde̱n u̱u̱mu̱c. Ovvo ol cik ogon niko edez atin Ta̱mu̱ta̱dde̱n nogo oroot.”
© 2018, Wycliffe Bible Translators, Inc. All rights reserved.
