Jon 1
1
Zoz ci rugeto
1Aave da̱ la̱du̱n kanante ci lo̱o̱tu̱ Zoz#1:1 Zoz: Awu Joni Ye̱su̱ Ki̱ri̱sto̱ ngatu kize, Zoz. to, arumze da̱ zoz neci ki Ta̱mu̱ta̱dde̱n, een da̱ Zoz neci Ta̱mu̱ta̱dde̱n. 2Arumze da̱ enne la̱du̱n ki Ta̱mu̱ta̱dde̱n ba̱li̱ye̱ kanante ci lo̱o̱tu̱. 3Eteehenya Zoz kaal do̱o̱k, i̱llo̱i̱ gi̱i̱ imma ci eenycai ngati a̱zze̱ne̱ enne to. 4Een Zoz neci ruget ci e̱e̱t ci diiri, okko rugeti neci anyahak ol vooriten ci i̱ye̱le̱k nogo gool ci baizo. 5Alanyit vooriten neci mu̱hu̱ra̱to̱, iróng bu̱k mu̱hu̱ri̱ uule kidit nonno.
6I̱tto̱na̱ Ta̱mu̱ta̱dde̱n e̱e̱t ci een zara Jon.#1:6 Jon: Een e̱e̱ti̱ cu Jon Ba̱ti̱ti̱mo̱, iróng een Jon wa een to̱ni̱a̱t bali eher waraga cu ko̱. 7A̱kku̱ enne kar ki̱ki̱ya̱ kibbac zoz ci vooriten neci, kar ucca ol do̱o̱k kelemit Zoz ci Ta̱mu̱ta̱dde̱no̱ zo̱ze̱ cinne. 8Iróng zin ba̱li̱ye̱ Joni eliya een vooriten, a̱kku̱ enne kar ki̱ki̱ya̱ kize ci ibbac vooriten. 9Een neci ba̱li̱ye̱ vooriten wa een de̱de̱, a̱kku̱ kar ki̱ki̱ya̱ kutukul ol do̱o̱k lo̱o̱ta̱.
10I̱ki̱ya̱k Zoz neci lo̱o̱c ba̱li̱ye̱, eenycai looci ngatinne, ma̱i̱je̱ olli lo̱o̱tu̱ iróng a̱gga̱ nonno. 11A̱kku̱nna̱k enne lo̱o̱c neci een cinne ke̱, iróng zin ol waginnek elemi nonno. 12Ma̱i̱je̱ ol do̱o̱k wak elemtta nonno, ki wak a̱tu̱ zoz cinne, aanyik enne nogo do̱o̱k gool ci ovvo nege e̱e̱ggi̱nne̱ dooli cik Ta̱mu̱ta̱dde̱no̱. 13Iróng nege bo̱do̱k a̱rri̱ta̱i̱ bi̱ye̱te̱, icima go̱o̱le̱ ci a̱rri̱ta̱ne̱ e̱e̱ti̱ ci diiri, abarik a̱rri̱ta̱ Ta̱mu̱ta̱dde̱n.
14I̱ki̱ya̱ Zoz neci ize e̱e̱t ci diiri kar zin kabak orgene cinna, anyak deten ki zoz ci een de̱de̱. Kicinnet naga komiz cinne, komiz ci anyak enne do̱ Ngerrti Ta̱mu̱ta̱dde̱no̱ wa o̱de̱ ṯok wa a̱kku̱ ngati Baatinne.
15U̱du̱wa̱ Joni zoz cinne, ize ne, “Een e̱e̱ti̱ cu e̱e̱t bali ka̱du̱wa̱kku̱ng kazi ne ‘A̱kku̱ atin vu̱rrte̱ cinanni, ommogja annita eci nonno ci a̱ddi̱ki̱re̱ ngatinanni.’” 16Imma deten wa anyak enne a̱ppwe̱ ko̱, kamuda zin naga do̱o̱k ma̱yu̱we̱ne̱t ci a̱ppwe̱. 17Anyaha ba̱li̱ye̱ Ta̱mu̱ta̱dde̱n lo̱ti̱nno̱k go̱o̱le̱ wa Musesi,#1:17 Muses: Baling okko Yosevo a̱da̱i̱, izeto dooli cik Israilo du̱cca̱k Masira, e̱de̱cca̱ e̱rki̱nya̱ cik e̱e̱ggi̱n obet we̱c (400). Atahala zin Ta̱mu̱ta̱dde̱n Muses kize e̱e̱t ci a̱lu̱ge̱ olli Israilo ngati e̱e̱ggi̱n du̱cca̱k Masire. Aanyik Ta̱mu̱ta̱dde̱n olli Israilo lo̱ti̱nno̱k ngati Musesi, nonno ci azi ol ne, Lo̱ti̱nno̱k cik Musesi. Abak i̱yo̱ko̱ da̱ Musesi e̱rki̱nya̱ i̱bbo̱ng co̱de̱ ki obet we̱c (1,400) bali ngen Ye̱su̱ ki̱ti̱rra̱i̱ ke̱. Ikeb Lu̱ge̱z 2-24. kar zin kuwahek ol; okko Ye̱su̱ Ki̱ri̱sto̱#1:17 Ye̱su̱ Ki̱ri̱sto̱: Azi keng cik zar cik een Ye̱su̱ ko̱ ne i̱ti̱ri̱zze̱t Ta̱mu̱ta̱dde̱n agita. Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. anyaha deten ki zoz wa een de̱de̱. 18Ngen e̱e̱ti̱ imma kicin Ta̱mu̱ta̱dde̱n udut, Ngerinne wa zinino o̱de̱ ṯok een Ta̱mu̱ta̱dde̱n bu̱k ci aanyyet ka̱gga̱c Ta̱mu̱ta̱dde̱n Baatinne.
Uwak Joni zoz cinne balala
(Ma̱te̱yo̱ 3:1-12; Marko 1:1-8; Lu̱ka̱ 3:15-17)
19Icu zoz ci Joni baling i̱tto̱nte̱k nonno ol cik een Ya̱u̱d Jerusalema ki bo̱do̱k ol wak wawaco#1:19 Ol wak wawaco: Azi lo̱ti̱nno̱wa̱ cik Musesi ne, ol wak wawaco do̱ cik ogon wawac Ce̱e̱ze̱ wa Ta̱mu̱ta̱dde̱no̱. A̱vvu̱ nege la̱du̱n boore ci Le̱vi̱. ki ol boore ci Le̱vi̱.#1:19 Ol boore ci Le̱vi̱: A̱li̱ngli̱ng ol ciko Ce̱e̱ze̱ wa Ta̱mu̱ta̱dde̱no̱. I̱jji̱nne̱t zin a̱nne̱k ne, “E̱e̱ni̱ i̱nna̱ ngene?” 20Ozoz zin Joni, iróng abure, ozoz zoz ci abile ṯop, azi ne, “Iróng anna ke̱e̱ni̱ Ki̱ri̱sto̱ wa atahalai.”
21I̱jji̱nne̱t zin nege nonno, “E̱e̱ni̱ zin i̱nna̱ ngene? E̱e̱ni̱ i̱nna̱ E̱li̱ja̱?”#1:21 E̱li̱ja̱: Een E̱li̱ja̱ a̱ri̱to̱i̱t ci olli Ya̱u̱do̱ bali okkoye Ta̱mu̱ta̱dde̱n nonno rugetet ta̱mu̱-kenga ke̱. A̱rri̱ta̱i̱ enne ba̱li̱ye̱ e̱rki̱nya̱i̱ cik een obet torkoc (900) baling ngen Ye̱su̱ ki̱ti̱rra̱i̱. Ikeb I Alaat 17-21; 2 Alaat 1-3.
O̱bo̱de̱k zin enne nogo a̱nne̱k ne, “A̱zze̱ to.”
I̱jji̱nne̱t zin bo̱do̱k nege nonno dee, “E̱e̱ni̱ i̱nna̱ a̱ri̱to̱i̱t#1:21 A̱ri̱to̱i̱t: Ozoz bali nege zoz ci obod ki a̱ri̱to̱i̱t imma ci azi Musesi ne, a̱kku̱ atin. Een Ye̱su̱ a̱ri̱to̱i̱t neci. IkebDeuteronomy 18:15-18; Jon 6:14; Buk wa To̱ni̱a̱u̱ 3:22-23; 7:37. ci muluk ci Ta̱mu̱ta̱dde̱no̱ wa bali u̱du̱ya̱i̱ okko atin i̱tto̱na̱i̱ ke̱?”
O̱bo̱de̱k Joni nogo a̱nne̱k ne, “A̱zze̱ to.”
22Izettek zin nonno ne, “E̱e̱ni̱ zin i̱nna̱ ngene? Du̱wa̱kke̱t, abunna kovvo kobodeka ol wak i̱tto̱nne̱t ke̱. Du̱wa̱kke̱t zin zoz ci obod ki i̱nne̱ta̱?”
23O̱bo̱de̱k Joni nogo zo̱ze̱ ci a̱ri̱to̱i̱t wa zoz ci Ta̱mu̱ta̱dde̱no̱ een zara Isaya ozoz azi ne, “Ke̱e̱ni̱ anna muluk ci e̱e̱to̱ ci kawe balale ci gi̱da̱ngi̱, ‘Idimantek Manyi gool ci okko ṯop.’”#Isaya 40:3
24I̱tto̱na̱i̱ da̱ ol ne̱ke̱ olle cik een Varacis#1:24 Varacis: E̱e̱ggi̱n Varacisi de̱me̱zzo̱k wak edemez ol lo̱ti̱nno̱k wak Musesi, a̱tu̱ nege vongiz, ki anjilo ci Ta̱mu̱ta̱dde̱no̱, ki bo̱do̱k zoz ci azi ne ingazi atin ol daiza. IkebBuk wa To̱ni̱a̱u̱ 23:8., a̱nne̱k Jon ne, 25I̱jji̱nne̱t zin nonno, “Ming iróng i̱nna̱ e̱e̱ni̱ Ki̱ri̱sto̱ wa atahalai, icima a̱ri̱to̱i̱t ci zoz ci Ta̱mu̱ta̱dde̱no̱ wa een E̱li̱ja̱, icima a̱ri̱to̱i̱t ci u̱du̱ya̱i̱ okko atin a̱kku̱ ke̱, a̱gga̱me̱k ol ba̱ti̱ti̱mo̱#1:25 Ba̱ti̱ti̱mo̱: Elemna ol a̱gga̱ma̱ ba̱ti̱ti̱mo̱ kar ki̱ye̱la̱ azi ne, utungtek nege mu̱nye̱n cigge̱k lo̱o̱c kar kunuwet Ta̱mu̱ta̱dde̱n. nya?”
26O̱bo̱de̱k zin Joni nogo, “Ka̱gga̱me̱k anna ol ba̱ti̱ti̱mo̱ maame, ma̱i̱je̱ zin orgene cunno̱ng, anyak e̱e̱t imma ci abile ci iróng niga a̱gga̱yyu̱. 27A̱kku̱ atin enne vu̱rrte̱ cinanni, ommogja enne annita, iróng wo̱ye̱ anna ke̱e̱ni̱ du̱ca̱i̱t cinne.” 28Ogone kaala ne̱ko̱ do̱o̱k o̱rge̱ ci een zara Bethany, moro ci een zara Jordan o̱to̱ne̱ ci je̱e̱ni̱, ngin bali a̱gga̱me̱ke̱ Joni ol ba̱ti̱ti̱mo̱ ke̱.
Een Ye̱su̱ Nyoon ci Ta̱mu̱ta̱dde̱no̱
29Ma̱i̱je̱ nge̱rre̱ti̱n ci reng, edenya Joni Ye̱su̱ ming a̱kku̱nna̱k nonno, kar kize ne, “Icinnet, Nyoon ci Ta̱mu̱ta̱dde̱no̱#1:29 Nyoon ci Ta̱mu̱ta̱dde̱no̱: Aanyik Ta̱mu̱ta̱dde̱n lo̱ti̱nno̱k Muses kar ku̱du̱wa̱k olli Israilo kapaktek nyoon ci Ta̱mu̱ta̱dde̱n kicin bi̱ye̱ abanyce ci tatuget cik ce̱e̱zi̱ cigge̱k Masire I̱i̱te̱ne̱ wa Va̱rda̱ngi̱nto̱. Azi zoz necu ne okko atin Ye̱su̱ een Nyoon ci Ta̱mu̱ta̱dde̱no̱ ci okko a̱vi̱la̱ mu̱nye̱n cik ol wak elemtta nonno lo̱o̱ta̱ ngatu ko̱ do̱o̱k. IkebLu̱ge̱z 12:13-15; Marko 14:12; Lu̱ka̱ 22:7; Jon 1:29-36; 1 Ko̱ri̱nto̱ 5:7; 1 Peturu 1:19. wa a̱vi̱la̱ mu̱nye̱n cik lo̱o̱tu̱! 30Een e̱e̱ti̱ icu e̱e̱t bali ka̱du̱wa̱kku̱ng ka̱nne̱kku̱ng ne, ‘Anyak e̱e̱t ci anuwannan, een enne e̱e̱t ci ommogjan eci i̱ki̱ya̱ enne oowa.’ 31Iróng anna eliya ka̱gga̱ nonno, ma̱i̱je̱ zo̱ze̱ cinne; ki̱ki̱ya̱ ka̱gga̱me̱k ol ba̱ti̱ti̱mo̱ maame kar ol cik Israilo ka̱gga̱c nonno.”
32U̱du̱wa̱ zin Joni zoz cu, azi ne, “Kicina Vongiz ci Ta̱mu̱ta̱dde̱no̱ alucak lo̱o̱c ta̱mu̱-kenga kiwagon lo̱be̱rru̱i̱, kar zin ki̱tta̱k nonno. 33Iróng wo̱ye̱ da̱ ka̱gga̱ nonno ming iróng a̱du̱wa̱ka̱ e̱e̱ti̱ bali i̱tto̱na̱na̱ ki̱ki̱ya̱ ka̱gga̱me̱k ol ba̱ti̱ti̱mo̱ maame ke̱. A̱nne̱ka̱ ne, ‘E̱e̱t ci acinni alucak Vongizi ci Ta̱mu̱ta̱dde̱no̱ nonno ke̱, kar ki̱tta̱k nonno, a̱gga̱me̱k atin enne ol ba̱ti̱ti̱mo̱ Vongize ci A̱li̱le̱#1:33 Vongiz ci A̱li̱le̱: Een Vongizi ci A̱li̱le̱ ko̱ Vongiz ci Ta̱mu̱ta̱dde̱no̱. A̱du̱wa̱ Zoz ci Ta̱mu̱ta̱dde̱no̱ azi ne, een Baba Ta̱mu̱ta̱dde̱n, okko Ngerinne Ye̱su̱ een Ta̱mu̱ta̱dde̱n kar bo̱do̱k Vongizi ci A̱li̱le̱ een Ta̱mu̱ta̱dde̱n. E̱e̱ggi̱n Baba, ki Ngerinne ki Vongiz nege do̱o̱k Ta̱mu̱ta̱dde̱n co̱de̱. IkebJon 1:1-18; 8:41-42; Buk wa To̱ni̱a̱u̱ 5:3-4..’ 34Kicina nonno, ka̱nne̱kku̱ng ne een enne Ngerrti Ta̱mu̱ta̱dde̱no̱.”
Awa Ye̱su̱ nuyak cik e̱e̱ggi̱n o̱o̱tti̱
35Imma nge̱rre̱ti̱n ci reng, abile da̱ Joni ki nuyak waginnek e̱e̱ggi̱n ram, 36kar zin kicin Ye̱su̱ ming owo izek zin nuyak ne, “Icinnet Nyoon ci Ta̱mu̱ta̱dde̱no̱!” 37Baling iziyyet nuyaha waginnek zoz neci, unuwet Ye̱su̱ niko. 38Ma baling utuhuwe Ye̱su̱ icin nogo ming annu nonno, kar enne ki̱jji̱n nogo, “Orongnyu niga nya?”
O̱bo̱dde̱k nege nonno a̱nne̱k ne, “Rabbi” (wa azi keng cinne ne de̱me̱zo̱i̱t), “abai dim i̱nna̱ nga?”
39O̱bo̱de̱k enne nogo a̱nne̱k ne, “I̱vi̱ta̱ kar icinnet.”
I̱vi̱ta̱ kar zin kicinnet nginti abahe enne, kar zin ka̱vvu̱to̱ ki nonno wazin neci. Aavtte zee ki̱gi̱nge̱ i̱i̱ kize yo̱mo̱n.
40Imma ol balik een rama aziye Jon ming ozoz ke̱ ciko Andereya wa een gotoni Si̱mo̱ne̱ Peturu. 41Een zoz ci orong Andereya arrak oowa, orong kuruba gotoni wa een Si̱mo̱ne̱, kar ku̱du̱wa̱k nonno kizek ne, “Kurubta Missaya wa een Ki̱ri̱sto̱ wa bali atahalai.” 42Kar zin Andereya kanyahak nonno rok Ye̱su̱. Icin Ye̱su̱ nonno kar zin kizek ne, “I̱nne̱t Si̱mo̱ne̱ ngerrti Joni. Anyik zar cigunnek kize Cephas, azi ungeci cik zar ne̱ko̱ ne Peturu.”
Awa Ye̱su̱ Vilip ki Nathanael
43Imma i̱i̱te̱n ci reng, odola Ye̱su̱ uk lo̱o̱ce̱ ci Ga̱li̱li̱. Urubak zin Vilip#1:43 Vilip: Een atin Vilipi cu nuyait ci Ye̱su̱. orog neci, iizek nonno ne, “Nuwan.”
44Een Vilipi e̱e̱t ci orog ci een Betsaida, e̱e̱ggi̱n ciko Andereya ki Peturu cik orog neci bu̱k. 45Uruba Vilipi Nathanael kar zin kizek ne, “Ku̱mu̱dda̱ e̱e̱t bali eher Musesi zoz ci obod ki nonno lo̱ti̱nno̱we̱ wak Ta̱mu̱ta̱dde̱no̱ ke̱, kar bo̱do̱k a̱ri̱tto̱wa̱ cik Zoz ci Ta̱mu̱ta̱dde̱no̱ keteherit zoz neci, een enne Ye̱su̱ wa orog ci een Nazeret, ngerrti Yosevo.”
46I̱jji̱n zin Nathanaeli Vilip izek ne, “A̱kku̱ wo̱ye̱ gi̱i̱ imma ci abunna o̱rge̱ ci een Nazeret?”
O̱bo̱de̱k zin Vilipi nonno, a̱nne̱k ne, “I̱jja̱ kar cin eberene cigunnek.”
47Baling icin Ye̱su̱ Nathanael ming a̱kku̱nna̱k nonno, izek nonno ne, “Cin e̱e̱t ci Israiloc de̱de̱, iróng anyak volong.”
48I̱jji̱n zin Nathanael nonno izek ne, “A̱gga̱ya̱n?”
O̱bo̱de̱k zin Ye̱su̱ nonno, a̱nne̱k ne, “Wanai ming ngen Vilipi kutuwin, kicini ming ngen aave muneca vu̱rrta̱.”
49Odola zin Nathanaeli ize ne, “De̱me̱zo̱i̱t, e̱e̱ni̱ i̱nna̱ Ngerrti Ta̱mu̱ta̱dde̱no̱, e̱e̱ni̱ bo̱do̱k Alaan ci Israilo.”
50O̱bo̱de̱k zin Ye̱su̱ nonno, a̱nne̱k ne, “I̱yo̱ko̱ elemna i̱nna̱ eci ku̱du̱wa̱i̱n kazi ne kicini wanai ming aave muneca vu̱rrta̱. Acinni atin i̱nna̱ kaal cik meelek ommog ne̱ko̱.” 51Emena Ye̱su̱ zoza kar kizek nonno bo̱do̱k ne, “Ka̱du̱wa̱kku̱ng zoz ci een de̱de̱, acinnu atin ta̱mu̱-keng ming o̱o̱ye̱, imma anjilonya#1:51 Anjilonya: E̱e̱ggi̱n nege vongizzok cik aavtte ki Ta̱mu̱ta̱dde̱n ta̱mu̱-kenga kar bo̱do̱k iróng nege anyak e̱le̱tti̱ cik okkomi. I̱tto̱n gon Ta̱mu̱ta̱dde̱n nogo i̱i̱te̱n imma koot lo̱o̱ta̱ kanyaktak ol zoz cinne. wak Ta̱mu̱ta̱dde̱no̱ ottod ne̱ke̱ ovvo uggak i̱i̱na̱k Ngerrti E̱e̱to̱.#1:51 Ngerrti E̱e̱to̱: Awu Ye̱su̱ ele cinne azi ne, ke̱e̱ni̱ enne Ngerrti E̱e̱to̱. I̱ye̱la̱ zoz necu azi ne, een enne Ki̱ri̱sto̱, alaan ci ba̱a̱li̱ne̱t ci abak udut. IkebDaniel 7:13-14.”
© 2018, Wycliffe Bible Translators, Inc. All rights reserved.
