Jonáa 4
4
Jonáa ni̱ꞌnisŋaꞌ ga̱jma̱a̱ Anulúꞌ Mekhuíí
1A̱ꞌkhui̱nꞌ Jonáa majpú táni̱gu̱u̱ꞌ, numuu ndíi támbe̱énꞌ xa̱bu̱, ikhú ra̱ꞌkháaꞌ muu tháán nikhiꞌnáa. 2A̱ꞌkhui̱nꞌ niꞌthánminaꞌ ga̱jma̱a̱ Anulúꞌ Mekhuíí, xígi̱ niꞌthúun:
―ꞋÁlá Anuꞌ Mekhuíí, lá ra̱ꞌkháaꞌ rígi̱ ñejuunꞌ ndíi ni̱tha̱a̱nꞌ nákhí xóó xtáá náa xojñuꞌ róꞌ. Ikhaa jŋgóoꞌ ikhúún ni̱ga̱yuꞌ ma̱ꞌgá náa Társí. Numuu ndíi nda̱yo̱o̱ ndíi ikháán ñejuaanꞌ mbáa Ana̱ Mekhuíí wi̱ mba̱a̱ a̱jkiu̱u̱n, méjáánꞌ xa̱bu̱ nindxaaꞌ, mba̱yu̱u̱ꞌ ndíi ma̱khiꞌnáá, majpú nagawíinꞌ a̱jkia̱a̱nꞌ, kamí nataŋga̱a̱ a̱jkia̱a̱nꞌ ndíi xátha̱ni̱ ndíi mixkawiꞌ. 3Ikhaa jŋgóoꞌ xúgi̱ rá, Anuꞌ Mekhuíí, na̱tha̱nkháñaaꞌ ndíi ma̱tríya̱a̱ꞌlaꞌ xi̱ꞌ ndíi ndaꞌya náa aúun a̱jkiu̱nꞌ ikhúún. I̱tháán máꞌ méjánꞌ ndíi xáxtáá jún, a̱kha̱ñúꞌ kha ―niꞌthén Jonáa.
4A̱ꞌkhui̱nꞌ Anulúꞌ Mekhuíí niꞌthúun:
―Lá méjánꞌ ethani̱ e̱khu̱ma̱a̱ꞌ ikháán, ndíi nakhiꞌnáá wéñuúnꞌ róꞌ.
5Ikhú xuꞌkhuíin nigájnuu Jonáa ni̱jka̱gáxtáa náa jmbuu na̱ꞌkha̱ a̱jka̱ꞌ náa rauunꞌ xojin. Kamí ikhí ni̱ꞌni mbá xtúgua náa ni̱gi̱da̱mixooꞌ, mundíi mba̱ꞌyoo ndíí jniiꞌ árígá náa aúun xojin ruꞌkhuíin.
6A̱ꞌkhui̱nꞌ Anulúꞌ Mekhuíí ni̱ꞌni ndíi ma̱khudánꞌ mbá iná ndíi náa ma̱ꞌni xkamixoo Jonáa, mundíi ma̱ꞌni̱i̱laꞌ wáa a̱jkiu̱u̱n. Ikhú ra̱ꞌkháaꞌ muu tháán nidxuuꞌ Jonáa ga̱jma̱a̱ numuu iná ruꞌkhuíin. 7Múú ndíndu̱ nijtsi i̱mbo̱o̱ꞌ mbiꞌi, Anulúꞌ Mekhuíí ni̱ꞌni ndíi mbáa ñu̱u̱ mi̱khu̱ a̱jmu̱u̱ iná kamí ikhú nijndooꞌ. 8A̱ꞌkhui̱nꞌ ndíndu̱ ni̱ꞌkha̱ a̱jka̱ꞌ, Anulúꞌ Mekhuíí ni̱ꞌni ndíi maxnúu mbáa i̱ŋáxooꞌ ndíi majpú mijka kamí nitsikhá a̱jka̱ꞌ edxuu Jonáa. A̱ꞌkhui̱nꞌ nakhámindúu kamí na̱ꞌni a̱jkiu̱u̱n ndíi ma̱kha̱ñúu, ikhú eꞌthén: «I̱tháán máꞌ méjánꞌ ndíi xáxtáá nu, a̱kha̱ñúꞌ kha». 9Ikhú Anulúꞌ Mekhuíí niꞌthúun Jonáa:
―Lá méjánꞌ ethani̱ ndíi ra̱ꞌkháaꞌ muu tháán ekhiꞌnáá ga̱jma̱a̱ numuu iná ján róꞌ.
A̱ꞌkhui̱nꞌ niríꞌña̱a̱ꞌ Jonáa:
―¡Ra̱ꞌkháaꞌ muu tháán ekhiꞌnúú e̱khu̱mu̱ꞌ, a̱jndu̱ ma̱kha̱ñúꞌ eꞌni a̱jkiu̱nꞌ!
10A̱ꞌkhui̱nꞌ niꞌthén Anulúꞌ Mekhuíí:
―Nagawíinꞌ a̱jkia̱a̱nꞌ eꞌni iná ndíi ikháán, ndíi ndi̱tháan na̱ŋguá nithañejuíínꞌ ndíi ma̱tha̱ni̱makhii. Mbá mbroꞌon nikráꞌán nikhii, kamí mbá mbroꞌon nikháñuu. 11Lá xágawíinꞌ a̱jkiu̱nꞌ ikhúún ga̱jma̱a̱ numúún xa̱bu̱ nínibe̱ róꞌ. Mbá xojin ndíi ra̱ꞌkháaꞌ muu tháán mba̱a̱, kamí ikhí khúwe̱e̱n mbá siéntú i̱mba̱muskíñúꞌ míi xa̱bu̱ (120,000), wi̱ na̱ŋguá eyáá náá ndíi méjánꞌ kamí náá ndíi ra̱méjánꞌ. Ra̱ꞌkháaꞌ muu tháán xu̱jkúꞌ khúwe̱e̱n maŋgeen ―niꞌthén Anulúꞌ Mekhuíí.
© Wycliffe Bible Translators, Inc. All rights reserved.