MATEO 3
3
Ni rluu Juaṉ ni rchôbnihs
(Mr. 1:1-8; Lc. 3:1-9, 15-17; Jn. 1:19-28)
1Tzcaḻ gahc, Juaṉ ni rchôbnihs meññ güyuꞌ me lo yu-bihdzy ni nu lo ṟegioṉ-Judea, guzlo galuu me meññ, 2gaya me:
―Lâ csaan ni nahcsy ni nac laꞌd, porni ba zidgahsh dzé ni ctzoo Dioz mdad.
3De Juaṉ‑e ni bzaa profet-Isaíaz lo xguehtzy me, ru ne me:
Rieññ gaquee to mpyquie riedz lo yu-bihdzy, ne:
“Lâ guistziaawy ru tedy Señor;
lâ cshal xguîlmbahñ laꞌd beeiy to ñaz-ndohp par dze-guiaad me.”#3:3 Is. 40:3
4No nutz Juaṉ shab ni güyaa no xguihtz camell, no riuꞌ to cinturoṉ-guiedy leññ me; no rahgü me ncüshar no roo me dziñdoo ni nu guehsh. 5No riahd meññ-nu Jerusaléṉ ridguieññ ni rnii me, no zehg riahd xtahl meññ-nu lo ṟegioṉ-le Judea no zrieñ guiedzy ni nu guingybi guiagü-Jordáṉ; 6no gadee yâme diidz guîlquie ni ptzoo yâme, no pchôbnihs Juaṉ leeyâme lo guiagü-Jordáṉ.
7Hor-bwieꞌ Juaṉ ziaad xtahl meññ-nac yahc fariseu no meññ-nac yahc saduceu par gyrôbnihs, ra me leeyâme:
―¡Laꞌd meññ-dirquihñ ni zidguiahc beeiy mbaḻbeedzy! ¿Dxu ra laꞌd beeiy gylaa laꞌd de lo xguîlné Dioz ni ziaad? 8Lâ ctzoo ni nac xñahzû lehdy guieññ ba psaan laꞌd ni nahcsy ni nac laꞌd, 9no na di gynii leññ ihqy laꞌd, ga laꞌd: “Ba xmeññ Dioz‑e nó porni de lo xfamily Braṉ‑e nó”; porni naa gapyaꞌ laꞌd, Dioz zegahc‑e beeiy ntzoo me xfamily Braṉ xtâ guie ni dxie yahc neꞌ. 10Zidguiahc meññ‑e beeiy to yag-cuannahsh; no guibyahg ba nashu puexd lehdy gyrug gyre yahg ni nehx mos xcuannahsh no yqueꞌ gueu. 11Naa ni uli we rchôbnisaꞌ laꞌd no nzeꞌ lehdy guieññ psaan laꞌd ni nahcsy ni nac laꞌd; per nu sto ni guiaad lux de ni biaḻaꞌ ni ma beeiyu lee que naa, ni nehx rsahcaꞌ ni xguidguial me niynonu. Beeiy to guîlrrôbnihs gdee me Spirt-Sant ni tzu leññ xguîlmbahñ laꞌd no ctzoo me guîlguxtisy no gue. 12Leeme zidtzoo mod-rtzoo meññ par rboo xguix trigü. Meññ-tziaawy gboo me lee diby lad beeiy rlesytziaawy meññ trigü leññ daꞌwy; no meññ-guîlquie glee me lee lo gue ni di ziuꞌ dzé ziee, beeiy rqueꞌ gue xguix trigü.
Byrôbnihs Jesúz
(Mr. 1:9-11; Lc. 3:21-22)
13Jesúz byruu me lo ṟegioṉ-Galilea, no güya me guiagü-Jordáṉ lehdy cchôbnihs Juaṉ leeme. 14Per nehx gucladzy Juaṉ nchôbnihs me Jesúz, no ra me lee:
―Lii we nchôbnihsiꞌ naa, dac‑e naa nchôbnisaꞌ lii, ¿no naꞌ zidyohbyiꞌ naa la?
15Ra Jesúz leeme:
―Per naꞌ, gacu ze; porni rquihñu ctzoo nó gyre ni ne Dioz gac.
No were pchôbnihs Juaṉ leeme. 16Byluxz byrôbnihs Jesúz, byruu me leññ nzeꞌ; no tohzy byxal gybaa, bwieꞌ me ziaht xiSpirt Dioz lguia me, beeiy to palom. 17No bieññ to riedz ni byruu gybaa, ne:
―Nirieꞌ we dShiñaꞌ ni ndzin lee, no ni rxilynon lee.
© 2019, Wycliffe Bible Translators, Inc. All rights reserved.
