Matiyò 3

Jon Fo Mòlû lâkà tum à Fùyèn

(Mâk 1.1-8; Lûk 3.1-8; Jon 1.19-28)

1À ndùku mô a mu tuk afû, Jon Fo Mòlû ndùku mô yi lak yi sùsi yîmì hì lâkà gha Fùyènì ha ghɨt ghe ghɨ ndùku mô a lak yi sùsi a Jùdiyà jîsà na, 2“Ghàn kahi təm ghana a sù be beka fə̂n wù Fùyènù ti bakhâ.” 3Jon ndùku mô wùt we fòktì Ìsayà tì jìsa kum wûn na: “Wùt jîsà bê yi lak yi sùsi na, ‘Ghàn fati lum wu Bâba; ghàn fati lumlà mù wûn, ma mù hi nânà.’”

4À ndùku mô ya, Jon mâkà sùnju ma ghɨ fati nì nyuŋsu gwò nyàm yìlè ghɨ toŋte na kàmêl, tama wu kwô ma fati nì gwò nyàm, mwə̀ mù yə̂mù wûn mô sùbên nì lû fùjòŋù. 5Jon ben hi yikê, ghɨta bênà ha wûn ma lo kə bâh wù jɨ̀m yi lak yi Jèlusalèm nì bâh wù jɨ̀m a Jùdiyà, ghɨt ghe ghɨ ndùku mô a tu bìtu jwô tù Jodàn hì boŋa bênà. 6Ghɨna bê ni jyê khɨmte wu wun kum besu ghɨna su, wù fo mòlû ha ghɨna a jwô à Jodàn.

7Jon yen ni te ghɨt a Falàsî nì ghɨt a Sadùsî boŋa bênà nâ hidù na wù fo mòlû ha ghɨna ki jîs ha ghɨna na, “Ywosu be sîn, à ghàn tobhi nde na ghàn tet ngək ye Yènfù khɨŋa hi fo ha ghàn agha? 8Ghàn hi mo tamu a ghàn a sù chyənà hi chwùtì na ghàn ti kahi təm ghana a ghàn a sùbe. 9Kə ghàn hi kwâktè na ghàn làhi tet a ngək à Fùyèn beka ghàn jìsà na ghàn mò wana wana Ablàhâm. Mu fòktè ha ghàn na Yènfù làhi nì ma ti ghɨ̂n kahi ha mwəlà ma wù fo ha Ablàhâm. 10Ghàn hi khə na njàm làwû a sah à mù kàk kə nâ chîn, ma faŋ nâbi fùni hi mo tamu jûŋù, ma ghɨ gbet ma maka wu wùs. 11Mu fo mòlû ha ghàn kə nì mòlû mù jwò hi chwùtì na ghàn ti kahi təm ghana a sùbe, biyani wùt lè bè lò a mu yi bàm chyâ mu, mu kpene wi hi tè fèt ha wun te a kwôs ghe ghɨ gbê nì gwusu wunsu wùsu. Wù nè hì fo mòlû ha ghàn nì Yohnà Yulena nì wusu. 12Wù kəta khət à khɨ̀ŋa a wun a wô gbûtè hi febte a saŋ. Febte saŋa wuna lêmà a wu tân biyani mô hi nyòk kpûlànù wu wùs we wu bame limne wi.”

Jisòs fyi mòlû

(Mâk 1.9-11; Lûk 3.21-22)

13À hì mô kəbi a mu tuk afû, Jisòs lo a Galìlî ben yen Jon na wù fo mòlû ha yi a jwô à Jodàn. 14Biyani Jon hì khɨŋa hi tunhe gha tɨni ki jîs na, “À kəta wò hi fo mòlû ha mu, à ti ben lô wò na mu fo mòlû ha wò yàni agha?”

15Jisòs jis ha wun na, “Ha chîn, fo kə yi fô beka a mò lum we ghàhnà kəta hi nì gha ye Yènfù khɨŋa atɨ̂n.” Jon bimi hi fô.

16Jisòs fyi mòlû hì fwo kwoka bênà kə a jwô ni, jwo nyə jimì, wù yen a Yohnà Fùyènà ghɨ chwo bênà kə wun a tû ni te fùlàtà. 17Kə ni, jyə̀ fwu ben a nyə̂ jis na, “Wùna mò Wâ mù wù kòŋ, mu saŋle kum wûn hanɨ̂ŋ.”

選択箇所:

Matiyò 3: bmv

ハイライト

コピー