Matiyos 8
8
Bo̱r-u̱s eer
Ye̱so taasu̱te̱ ne̱t u̱t-cim
(Mark 1:40-45; 5:12-16)
1Bo̱ Ye̱so kyergu̱nte̱ n-to̱n u̱r-haag à, hun-ne̱ de̱e̱n do̱ru̱ru̱ wu̱. 2Wu̱ ken ko-cim-wu̱, haaru̱ be-de u̱n wu̱, wu̱ kwu̱ktu̱ru̱ u̱n co-o̱ u̱n wu̱. Wu̱ ze̱e̱ru̱, “Go̱s-wu̱, u̱rege̱ o co̱no̱g, wo̱a hoks me̱ m-taase̱ u̱n go̱m re.”
3Ye̱so tabbu̱ru̱ kom-o̱ u̱n wu̱, wu̱ ci'u̱ru̱ ká ne̱t-wu̱. Komo Ye̱so ze̱e̱ru̱, “U̱m co̱no̱g, go̱m ru te.” Ba u̱n rem káne̱, cim-to̱ u̱n wu̱ ta'e̱. 4Ka da-de Ye̱so ze̱e̱ru̱ wu̱, “Wo̱ jar o ru̱re̱ ne̱t bo̱ no̱me̱ á. Amba neke̱, o kute̱ wan-Co̱w u̱n ko̱n-se Shir, wu̱r-o ru taag. Komo o seke̱ u̱r-seke̱ bo̱ karamsa-o Mosa zee à. No̱m kaane̱ remen o kututé̱ hun-ne̱ u̱nze cim-u̱t ru taag.”#8:4 Hyen komo: Rewi 14:1-32.
Ye̱so taaste̱ go̱m-o̱ u̱n wà-wu̱ u̱n wu̱ ken ko-karma-wu̱ ko-Roma
(Ruka 7:1-10; Yoha 4:43-54)
5Bo̱ Ye̱so cu̱wte̱ u̱n bo̱-o̱ o-Kapanahum à, wu̱ ken caari-wu̱ u̱n ko-karma-wu̱ u̱n Roma-ne̱, wu̱ haanu̱ru̱ be-de u̱n Ye̱so. Wu̱ ko̱nu̱ru̱ wu̱, wu̱ zee, 6“Go̱s-wu̱, me̱ u̱n ko-ya-m-gu̱w ne̱ wan-campo̱ wu̱ piishe̱ á. Wu̱ ro̱ o-hur do̱mb, wu̱ ro̱ m-hoks m-nukte̱ á, wu̱ ro̱ m-swo̱ u̱r-ko̱o̱b de̱e̱n.”
7Ye̱so ze̱e̱ru̱ wu̱, “Man habe̱, u̱m taasu̱té̱ wu̱ go̱m-o̱ u̱n wu̱.”
8Ko-caari-wu̱ u̱n ko-karma-wu̱ u̱n Roma-ne̱ shasu̱ru̱ Ye̱so, “Go̱s-wu̱, me̱ bo'os o habe̱ u̱n hur-o re á, amba no̱m u̱t-ma temb, go̱m-o̱ u̱n wan-gu̱w-m re a te. 9Remen me̱ u̱n ce re u̱n ku̱s-o̱ u̱n gwo̱mo-to̱ u̱n ye̱ ken ye̱ u̱m ro̱, komo me̱ u̱n karma-ne̱ u̱n ku̱s-o re. Me̱ m-ze̱e̱ u̱n wan-gaan, ‘Neke̱, o nom kàane̱,’ wu̱ neke̱. Wu̱ ken komo me̱ m-ze̱e̱, ‘Haan,’ wu̱ argu̱ m-haan. U̱m zee ko-gu̱w re, ‘No̱m yo ká káane̱,’ wu̱ no̱mu̱ru̱.”
10Bo̱ Ye̱so ho̱gu̱te̱ kaane̱ à, wu̱ bo̱pu̱ru̱ o-nu. Wu̱ ze̱e̱ru̱ yan-neke̱-mo̱ u̱n wu̱, “Nip-o̱ me̱ no̱ m-ru̱re̱, ko̱ n-me̱ u̱n dak-o̱ o-Isra me̱ tak m-kum wa-m-she̱r m-'wo̱ns ne̱ u̱ntu̱n wu̱ ka á. 11Me̱ no̱ m-ru̱re̱ hun-ne̱ de̱e̱n ye̱ ro̱ Yahuda-ne̱ á ye̱a haan so̱ u̱r-ho̱ran, u̱r-ho̱rim ne̱ rwu̱u̱n-mo̱ u̱n to̱ ken dak-to̱. Ye̱ she'ette̱ ye̱ reet o-biki be-u̱r gaan u̱n Ibrahi ne̱ u̱n Ishaku ne̱ u̱n Yakubu ne̱ u̱n Gwo̱mo-to̱ Shir.#8:11 Gwo̱mo-to̱ n-To̱n o-shir. #8:11 Hyen komo: Ruka 13:29. 12Amba Shir a jorbu̱ no̱ n-me̱ o-comb no̱ ye̱ depete̱ no̱ wakte̱ hun-ne̱ ye̱ u̱n wu̱ à, amba no̱ yage̱. Kane̱ no̱ he u̱s-kan u̱n haw-se u̱n yin-ne̱.”#8:12 Hyen komo: Mati 22:13; 25:30; Ruka 13:28.
13Ka da-de Ye̱so ze̱e̱ru̱ ka caari-wu̱ u̱n ko-karma-wu̱ u̱n Roma-ne̱ wu̱, “Neke̱ jo o-hur, go̱m-o̱ u̱n ko-gu̱w ru a te bo̱ o she̱re̱ à.” Ba u̱n rem, wu̱r-o̱ u̱n ko-yan-gu̱w-mo̱ u̱n wu̱ taaru̱.
Ye̱so taasu̱te̱ mo̱o̱n Bitrus ne̱ go̱m
(Mark 1:29-31; Ruka 4:38-39)
14Bo̱ Ye̱so cu̱wte̱ u̱n hur-o Bitrus à, wu̱ 'wo̱su̱ru̱ ko-mo̱o̱n Bitrus ne'a wu̱ ro̱ do̱mb, wu̱r-o̱ dengu̱te̱ wu̱ o-ra. 15Ye̱so ci'u̱ru̱ kom-o̱ u̱n wu̱, ká go̱m-o̱ dossu̱ru̱. Wu̱ inu̱ru̱ wu̱ nomoru̱ ye̱ rii-yo m-re̱.
Ye̱so taaste̱ go̱m-se u̱n hun-ne̱ de̱e̱n
(Mark 1:32-34; Ruka 4:40-41)
16Bo̱ rim-m nomte̱ à, hun-ne̱ hantu̱ru̱ Ye̱so ye̱ ya-u̱t-ko̱t da'e̱ u̱t-hi à de̱e̱n. Wu̱ ruutu̱ru̱ ya-u̱t-ko̱t u̱n rwo̱r u̱t-ma temb. Wu̱ taasu̱ru̱ komo ya-u̱s-go̱m go̱m-se u̱n ye̱ kap. 17Ye̱so u̱n nom to̱ ká káane̱ remen a shoosté̱ rwo̱r-m Ishaya wan-Rwo̱r u̱n Ma-to̱ Shir u̱nze,
“Wu̱ de̱k swo̱ u̱r-ko̱o̱b u̱n na,
wu̱ taaste̱ go̱m-u̱s na.”#8:17 Hyen komo: Isha 53:4.
Ya-m-ze̱e̱ ye̱a do̱re̱ Ye̱so
(Ruka 9:57-62)
18Bo̱ Ye̱so hyente̱ caari-de u̱n bu̱u̱g-de u̱n hun-ne̱ keste̱ wu̱ ge̱w à, wu̱ ze̱e̱ru̱ yan-neke̱-mo̱ u̱n wu̱, “A pes no̱ de ká jit-de o-mar de re̱e̱no̱.”
19Ka da-de wu̱ ken wan-Yoos-de o-karamsa haanu̱ru̱. Wu̱ ze̱e̱ru̱ Ye̱so, “Wan-yoos, man do̱ru̱ wo̱ myet ko̱ ke so̱ o ha'e̱.”
20Ye̱so ze̱e̱ru̱ wu̱, “E̱ge̱-ru̱u̱g ro̱ u̱n wu-to̱ u̱n ye̱ ne̱, ye̱ge̱-no komo u̱n be-to̱ u̱n rew-mo̱ u̱n ye̱ ne̱. Amba me̱ Wà-wu̱ u̱n ne̱t#8:20 “Wà-wu̱ u̱n ne̱t,” con-de de Ye̱so ro̱ hi u̱n de u̱n wu̱ à. me̱tt be-de m-rew á.”
21Wu̱ ken wu̱ n-me̱ u̱n yan-neke̱-mo̱ u̱n wu̱ ze̱e̱ru̱ wu̱, “Go̱s-wu̱, yage̱ u̱m he u̱m ju̱kt tato re to̱ ko̱n da-o̱ wu̱ mere̱. Ka da-de u̱m haanu̱ru̱, u̱m do̱ru̱ru̱ wo̱.”
22Amba Ye̱so ze̱e̱ru̱ wu̱, “Do̱nd me̱, o yage̱ margan-ne̱ ye̱ o-ku̱kt, ye̱ ju̱kt o̱r u̱n ye̱ u̱n margan-ne̱.”
Ye̱so kangsu̱te̱ yo-mo̱ u̱n kem
(Mark 4:35-41; Ruka 8:22-25)
23Ka da-de Ye̱so co̱wu̱ru̱ hat-o̱ m-ho̱, yan-neke̱-mo̱ u̱n wu̱ do̱ru̱ru̱ wu̱. 24Ka da-de yo-mo̱ m-'wo̱ns indu̱ndu̱ru̱ o-mar har ho̱-m ro m-daan mo̱ ro̱ m-co̱w n-me̱ o-hat, amba Ye̱so ro káne̱, wu̱ ro m-rew. 25Yan-neke̱-mo̱ u̱n wu̱ haaru̱, ye̱ 'yonsu̱ru̱ wu̱. Ye̱ zee, “Go̱s-wu̱, gu te̱, ho̱-m a re te̱!”
26Ye̱so ze̱e̱ru̱ ye̱, “¿Remen yan no̱ ho̱gu̱te̱ o-gye̱r kaane̱? No̱tt m-she̱r be u̱n de de̱e̱n á.” Ka da-de wu̱ inu̱ru̱, wu̱ te̱pru̱ru̱ ká yo-mo̱ u̱n ká sa-mo̱ ne̱, kap o̱ u̱n ká be-de re̱su̱ru̱ ceen.
27Ká hun-ne̱ bo̱pu̱ru̱ o-nu, ye̱ ze̱e̱ru̱ hi u̱n de u̱n ye̱, “¿Yan go̱n ne̱t-wu̱ ne̱ wu̱ ka, wu̱ ro̱ har m-sa m-yo ne̱ mo̱ ro̱ wu̱ m-nome̱ o-do̱ro̱tte̱?”
Ye̱so dossu̱te̱ hun-ne̱ ya-u̱t-ko̱t
(Mark 5:1-20; Ruka 8:26-39)
28Ye̱so u̱n yan-neke̱-mo̱ u̱n wu̱ ne̱, wo̱o̱ru̱ u̱n de ká jit-de o-mar o̱ o-Gariri de. Ha-mo̱ u̱n dak-o̱ o-Gadare̱ne̱s. Ka da-de hun-ne̱ yoor-ye̱ ya-u̱t-ko̱t ro̱ m-rangse̱ à rwu̱u̱nu̱ru̱ n-me̱ u̱s-saag, ye̱ kawnu̱ru̱ Ye̱so ne̱. Ye̱ waktu̱ssu̱te̱ rii-ye̱ o-gye̱r ba m-so̱k har ma yatt-wu̱ ro̱ m-do̱re̱ u̱n ka co̱w-yo á.
29Ye̱ kangsu̱ru̱ Ye̱so, “Wà-wu̱ Shir, ¿ya o co̱ne̱ u̱n te̱ ne̱ ya-u̱t-ko̱t? ¿Ko̱ wo̱ u̱n haan o ye'et te̱ u̱r-ko̱o̱b cin ba da-o̱ u̱n wo̱o̱n o̱ Shir e̱sse̱ à?”
30U̱n co-o̱ u̱n ye̱ hiin, de ken caari-de u̱n kur-de u̱n ye̱ge̱-are̱de ro ko̱n, ye̱ ro u̱t-re̱. 31Ká ya-u̱t-ko̱t ye̱ ko̱nu̱ru̱ Ye̱so, ye̱ zee, “Wo̱ ruutu̱ te̱ be-de u̱n ka hun-ne̱ yoor-ye̱, o yage̱ te̱ cu̱wu̱t u̱n ká kur-de u̱n are̱de de.”
32Ye̱so ze̱e̱ru̱ ká ya-u̱t-ko̱t ye̱, “To̱, neke̱ no̱.” Ye̱ ruuru̱ be-de u̱n ká hun-ne̱ yoor-ye̱, ye̱ co̱wu̱ru̱ n-me̱ u̱n ye̱ge̱-are̱de. U̱n gyept-o̱ u̱n yish, kur-de u̱n are̱de nupu̱ru̱ u̱s-rek ye̱ yiru̱gbu̱ru̱, ye̱ he̱bu̱ru̱ n-me̱ o-mar. Ho̱-m re̱e̱ru̱ ye̱. 33Bo̱ yan-gu̱t-de u̱n are̱de hyente̱ kaane̱ à, ye̱ so̱mu̱ru̱ co̱w-mo̱ o-bo̱ be-de den-to̱ u̱n ye̱ ro̱ à. Ye̱ ru̱ru̱ru̱ hun-ne̱ rii-yo ko̱re̱ à. Komo ye̱ ru̱ru̱ru̱ hun-ne̱ yo ko̱re̱ u̱n ká hun-ne̱ yoor-ye̱ ne̱ à, ye̱ ro u̱n ya-u̱t-ko̱t ne̱ à. 34Myet-mo̱ u̱n hun-ne̱ ye̱ o-bo̱ rwu̱u̱nu̱ru̱ hyan-o Ye̱so. Bo̱ ye̱ hyente̱ wu̱ à, ye̱ ko̱nu̱ru̱ wu̱, wu̱ ru u̱n dak-o̱ u̱n ye̱.
© 2017, Wycliffe Bible Translators, Inc. in cooperation with the U̱t‑Hun Bible Trɑnslɑtion Project All rights reserved.
