BINZEN 6

Temi Serikemvu

1Temi le chonkenye pe kazü aphu kesü thyü lola, lo tenunyu nnyu pe a-nyugun tsüshü, 2tsontsin Sunggigü nyenyu dan le temi nyugi dan kezegwa hyu shüo, anyu kenyü nyu lope anyugun nu thyü lola. 3Tsüselo Npugü le, zo, “A kapu no kethonthen temi ge bin loha, a-le sikelai genyu. Ntsoka gerhonyu anyugun no che 120 nyesin yhun loha.” 4Tsügwenkho ka lo tsüsiki-e temi thungin le kazü nyu yhun hü tsüdan tsüle Sunggigü nyenyu dan le temi nyugi kelo tsipwen dan. Tsüdan tsüle nduka a-zan chwi kehü lo kekvu nyu dan.

5Npugü le kazü nyu temi le serimvu ritsin kela lo anyugun le thagwakemvu nti rüchün zin tinkela hyula, 6Tson-o Npugü le temi thyü pe kazü nyu keshü genyu rünyumvu la. A-le a-nyun gwamvu sala. 7Tson-o Npugü le, “Ale kazü soge ale nyhun keshü temi hi nke lati, lo nyukhu lo tegü dan-e sin-o nke lati, kechamvule ale anyugun thyüshüo rünyu mvu kela genyu.” 8Ai Npugü le Noah shwi a-kenyü lo.

9Hidan hile Noah tsipwen dan. Noah le temi kemitsin a-shenhe ka meno a-nmu lo kehanyu nme; Noah le Sunggigü zen kepfüshe hü. 10Lo Noah le a-nyu peche mishen le bin, Shem, Ham lo Jafet. 11Temi nmeme tse kethyü Sunggigü mhundyü nyu gwamvula, lo kega keseri kethyü le kazü kesü thyüla. 12Sunggigü le kazü gü nri keshüka, tsüle gwamvu kela hyulo, kechagenyu mvule temi le aphu serikemvu nyu yhun kebin genyu.

13Tson-o Sunggigü le Noah ka, “Ale temi aphu no a-keni thyü la titse rhilo laso. A-nyugun tha gwakemvu le kazü gü kesüthyü kela si genyu ale anyugun nke shü lati. 14Nle gofer sen pe ngenyu run nme chalo; lo run günyu katsen sathü lo, lo a-nyu zin lo tegwezin kükhin chün pe jeh lalo. 15Nle hihontse thyülo; run gü kethon no tsu tsishen, kegon no tsu henpvün, ketetso no tsu shenryü thyülo. 16Run gü a-kesun nme thyülo, kakehü lo kesun gü au ja no tsu me no bin lo. Tsü thyüpe heshen thyülo lo ka khenpvü thyü pe a-tezin shülo. 17Ale zü nipe kazü soge ndün shüo kerhün ronzin kebin aphu nke lati. Kazü nyu kebin aphu no sila ti. 18Ai ale nzen-o kejozen kelo nme thyü shüti. Nle, nnu, nnyupeche dan lo anyugun nunyu tse run günyu yü loti. 19Lo nle kerhün ronzin kebin nyunkhu lihi-e peche nme lo tenu nme tse kenyhun yhun senryü run günyu shülo, tsüno nzen-o simvu bin lo nrün genyu. 20Tegü, nyukhu lo kazünyu npvü kehü lihi-e kechacha kethyü kenyhun yhun n no ntsen pe rhün bin nrün genyu nki ryüti. 21Lo hagun genyu lo anyugun genyu ko tse tyükehü chvü lihi-e kequenlo.” 22Noah le Sunggigü le a-ka zokeshü hontse tsü aphu thyülo.

選択箇所:

BINZEN 6: REGSBSI

ハイライト

コピー