Andowoon 7
7
Andowoon 7:1-5,17,23
Urok Ye Weng
1Kwane dowan kerekore, Yarimanbed Noa yaa yedmenoon, “Kibik yaron kuu ebbedmo amunmo doberewen kowe, eb yoom eb wonong yoom eb karub dana yi amered yoom motod aom aomnime. 2-3Dingkan ani yeman maa maa korem ambi ediib yingki ediib ayari on maa maa korem ambi ediib yingki ediib durukman ye dingkan maa maa korem ambi mimoyiib yingki mimoyiib be aomnibko oonime. Dingkan be aomne oonibko amaanbed yemoon kereniwe muubnaniib. 4Wene ari kuu aron ediib dowan keranuune nembed am darewoob yedmaniine mananuun. Aronki 40yiib amnoom 40yiib menembaranuun kii. Kwani kowe, nimakaruwa dingkana yi korem okad yiri dobirimaib kuu monmaraniin.” andoon. 5Andoone, Noambed Yariman ye weng kunduk dakmoon kuu korem kwamunemo kamoon.
6Noa ye weeb 600iib yaron kuu 7Noa yoom ye wonong yoom ye karub dana ayoobmim yi amered yoom motod aom aomniwen. 8-16God ye weng kunduk dakmoon areb kuu dingkan korem amongkowiib kiiwiib darewoowiib embengiib ambiyiib yingkiyiib Noa yaa menebe motod aom aomnekoriwa, Yariman Godbed ambongko kebenoon. Aron ediib dowan keroon kowe, wood ayoob aron 17 arimbed kuu ok darewoob okad niindem yirimbed bangkanandedeerebeenan wunuune ambid arimbed am darewoob okad yimin yimin yaa munuune kameen kowe, urok muneen. Kuyaron kuu aron 40yiib am darewoob menembureen, amkiyiib aronkiyiib.
17Aronki 40yiib kuu urok derebeenu, motod kuu ok animari kanawaneen. 18Kanawanekoru, ok animari kanawadmenmo dewenebuun. 19Urok derebeenu, aangko darewoob korem kuu yukneen. 20Derebe dowan kerekoru, okad korem kuu yukneen. Aangko dungkunbed dingkimbed kimingkanmo wene ok animarimbed ye ambab kuu 15iib. 21-22Yukne dowan keruune, wadkeri yeman korem karuwa dingkana korem kuu dukniwen. 23Nimakaruwiib dingkaniib ayari oniib, okad yiri wad doriibdan korem kuu monmare dowan keroon kuned, Noa awene yoom dingkan yoom motod aom aomniwendan kuu yimbedmo dobiriwen. 24Okad korem yukneen yaron kuu 150yiib.
© 2003, Wycliffe Bible Translators, Inc. All rights reserved.
