Genesis 4
4
Si Cain aw si Abel
1Nayan, migpeleyokay si Adam aw esawa din, aw miglaman si Eva. Pegtebaw te batà din, minikagi si Eva, “Pineokit te tabang te Timanem, doen den batà ko meama.”
Iningedanan din se batà din ki Cain (kelebadan niyan, doen den). 2Penga niyan, todà sikandin migbatà te doma batà din meama si Abel.
Si Abel se biyasa egdiyaga te menge ayam-ayam, aw si Cain se biyasa egpawà. 3Doen sebad aldaw, nengibing si Cain te menge pongo te tinanem din amon ibegay din iyan diyà te Timanem. 4Meneng si Abel se nemallì te penganay nati te menge karniro din, aw iniyaw din iyan, aw inibing din se melambò onod niyan amon ibegay din iyan diyà te Timanem. Neluba se Timanem ki Abel aw sìyan imbegay din. 5Meneng wedà keluba se Timanem ki Cain aw sìyan imbegay din. Yan ontò neopal si Cain aw timàmod.
6Penga niyan, minikagi se Timanem diyà ki Cain, “Kenà mèpiya se pegkeopal nikaw. Kenà mèpiya se pegtàmod nikaw. 7Aw metòlid se inangen nikaw, yan meluba a kamno. Meneng aw eked ka peg-inang te metòlid, delisegen ka den i Satanas amon meg-inang ka te salà. Dàgen ka peden te peg-inang no te salà, meneng keilangan domaeg ka kenyan.”
8Wedà kenamay, minikagi si Cain diyà te kedowa din si Abel, “Taking ka kanak doton te pawà.”
Pegdateng dan doton te pawà, inimetayan i Cain se kedowa din.
9Mig-insà se Timanem diyà ki Cain, “Kenan lay se kedowa no si Abel?”
Timaba sikandin, “Inday. Kenà a teletonggò te kedowa ko.”
10Minikagi se Timanem, “Ontò den medaet se ininang no seini. Iling te egpengenganay se dipanog din diyà kanak lekat te tanà. 11Lekat seini, ipelumun ko sikona. Eked den kepakay aw meg-obong ka te tanà, so tanà se inegseban te dipanog te kedowa no te pegpengimatay no kandin. 12Aw todà ka megpawà, eked pongo se tinanem nikaw. Keilangan gayed ka meglegeb dini lanto te tanà.”
13Minikagi si Cain, “Pelaban melima se pegpelumun no kanak, aw eked a peketayod kenyan. 14Eked a no den pepewai, aw ipekesayo a no den lekat kamno. Keilangan gayed a meglegeb dini lanto te tanà. Aw ketelaan a te doma otaw, imetayan a din.”
15Meneng minikagi se Timanem diyà kandin, “Eked iyan ketoman, so aw doen mengimatay kamno, mekepito pa se kedaet te pelumun domateng diyà kandin.”
Penga niyan, doen pengilala imbegay te Timanem diyà ki Cain amon eked sikandin imetayi te otaw meketalà kandin. 16Penga niyan, timanan si Cain te Timanem, aw mig-ogpà sikandin doton te ogpeanan te Nod, lenged te eglibtakan te Eden.
Menge bowad-bowad i Cain
17Nayan, migpeleyokay si Cain aw esawa din, aw doen batà dan timebaw si Enok. Dalem niyan, mig-inang si Cain te lonsod, aw yan heman se iningedanan din Enok, onawa te ngadan te batà din. 18Si Enok se amay i Irad. Si Irad se amay i Mehujael. Si Mehujael se amay i Metusael. Si Metusael se amay i Lamek.
19Migdoway si Lamek. Si Ada se ngadan te sebad esawa din, aw si Sela se doma. 20Si Ada se inay i Jabal, aw sikandin se neinang kemonaan te kedita te telediyaga te menge ayam-ayam. Mig-ogpà dan diyà te menge tolda. 21Doen adi i Jabal si Jubal, aw sikandin se neinang kemonaan te kedita te otaw biyasa egpengablit te sista aw egpengedop te seluli. 22Si Sela se inay i Tubal Cain, aw sikandin se menenayab te tebaga aw kinis. Doen heman etebay i Tubal Cain si Naama.
23Minikagi si Lamek diyà te didowa esawa din,
“Ada aw Sela, penenalan kaw den diyà kanak.
E menge esawa ko, seini se kagi ko diyà kenyo.
Mekebatog a den mengimatay te otaw menigbas kanak.
Pengkey pa telaki se megpeeleg kanak, mengimatay a kandin.
24Aw mekepito pa se kedaet te pelumun domateng diyà te otaw mengimatay ki Cain,
Yan mekekepitowan teg pito pa se kedaet te pelumun domateng diyà te otaw mengimatay peden kanak.”
Si Set aw si Enos
25Nayan, penga te pegkematay i Abel, migpeleyokay si Adam aw esawa din, aw doen batà meama timebaw diyà ki Eva. Iningedanan din se batà din ki Set (kelebadan niyan, imbegay), so minikagi sikandin, “Binegayan a te Timanem te sebad batà inselilin ki Abel, so inimetayan sikandin i Cain.”
26Doen batà meama timebaw diyà te esawa i Set, aw iningedanan din se batà din ki Enos.
Nayan, lekat te aldaw sìyan, migtebò se menge otaw migsimba aw migtawal-tawal diyà te Timanem.
© 1982, Wycliffe Bible Translators, Inc. All rights reserved.
