Luka 20
20
Mbuli ya udahi wa Yesu
(Matayo 21:23-27; Maluko 11:27-33)
1Siku dimoja Yesu kakala Mng'anda ya Imulungu kowafundiza wanhu na kuwapetela Mbuli Inogile. Wakulu wa walava nhosa na wafundiza Malagizo ga Musa hamoja na wavele weza, 2wamulongela, “Tulongele, vino kotenda mbuli zino kwa udahi wa nani? Nani yakugwelele udahi uno?”
3Yesu kawedika, “Beteni na niye niwauze mbuli imoja. Nongeleni, 4vino udahi wa Yohana wa kubatiza ulawa kuulanga hebu kwa wanhu?”
5Wagesa, “Tulonge choni? Twahalonga, ‘Ulawa kuulanga,’ kotuuza, ‘Habali, hamumtogole Yohana?’ 6Na twahalonga, ‘Ulawa kwa wanhu,’ lunhu lose luno lotutowa mabwe, kwavija wose otogola kamba Yohana kakala mtula ndagu wa Imulungu.” 7Avo wamwidika, “Hatujuwile kuulawile.”
8Yesu kawalongela, “Na niye siwalongela bule notenda mbuli zino kwa udahi wa nani.”
Lusimo lwa walimaji mumgunda wa mizabibu
(Matayo 21:33-46; Maluko 12:1-12)
9Abaho Yesu kawalongela wanhu lusimo luno, “Kukala na munhu imoja yahandile mizabibu mumgunda wake. Kawakodisha walimaji, abaho kachola mwiisi iyagwe na kakala siku nyingi. 10Msimu wa kubawa zabibu viuvikile, munhu ija kamtuma msang'hanaji wake yachole kwa walimaji wamgwelele zabibu. Lakini walimaji waja wamtowa msang'hanaji ija, wamuwinga makono gaiyeka. 11Avo kamtuma msang'hanaji iyagwe, lakini walimaji wamtowa vivija na kumuliga, wamuwinga makono gaiyeka. 12Abaho kamtuma msang'hanaji wa kadatu. Ino nayo walimaji wamulumiza, wamwasa kunze. 13Abaho mwene mgunda ija kalonga, ‘Nhende choni? Nomtuma mwanangu nimnogele. Lamda ino omtegeleza!’ 14Lakini walimaji viwamone, wailongela, ‘Ino ayo muhazi wake. Tumkome na uhazi wake okuwa wetu.’ 15Avo wamulava kunze ya mgunda uja, wamkoma.”
Yesu kawauza, “Vino, mwene mgunda kowatenda choni waja walimaji? 16Kokwiza na kuwakoma walimaji wose awo na kowakodisha walimaji wayagwe mgunda awo wa mizabibu.”
Wanhu viwahulike mbuli ayo, walonga, “Bule! Sikuilawilile avo!”
17Lakini Yesu kawalola, kawauza, “Vino, ulonzi uno fambulo jake choni?
‘Dibwe wadilemile wazengaji kamba hadifaya,
digalamuka dibwe kulu da kutamanila kubanza gose!’
18Munhu yoyose yonda yaikwale mdibwe ajo kobeneka beneka na munhu donda dimulagalile domuhonda tipitipi.”
Mbuli ya kuliha kodi
(Matayo 22:15-22; Maluko 12:13-17)
19Wafundiza Malagizo ga Musa na wakulu wa walava nhosa wajuwa kamba lusimo ulo kakala kowafumbila wao. Avo bahaja walonda kumgoga Yesu, lakini wawadumba wanhu. 20Avo wazahila kipindi kinogile. Wawahonga wanhu wayagwe waitende wanoga, wawatuma wamgeze Yesu kwa kumuuza, ili wadahe kumgoga na kumgala kwa mkulu wa Lumi. 21Wanhu awo wamulongela Yesu, “Mfundiza, tokujuwa gweye kofundiza na kulonga ukweli, wala hutonga ukulu wa munhu, lakini kofundiza nzila za Imulungu mna ikweli. 22Tulongele, vino vinoga kuliha kodi kwa mndewa mkulu wa Lumi hebu havinogile bule?”
23Lakini Yesu kaujuwa mwaka ubala wao, kawalongela, 24“Ndagusileni isente. Vino, kihanga kino na twaga dino va nani?”
Wamwidika, “Va mndewa mkulu wa Lumi.”
25Yesu kawalongela, “Vinoga. Vinhu va mndewa wa Lumi mgweleleni mndewa wa Lumi, na va Imulungu mgweleleni Imulungu.”
26Avo, mgameso ga wanhu hawadahile kumgoga kwa mbuli yoyose. Wakanganya ulonzi wake, wanyamala tuulu.
Mbuli ya kuzilibuka kwa wafile
(Matayo 22:23-33; Maluko 12:18-27)
27Abaho Masadukayo, wanhu olonga kamba kuduhu kuzilibuka kulawa kwa wafile. Wayagwe wamcholela Yesu, wamulongela, 28“Mfundiza, Musa katwandikila, ‘Munhu yahafa na kuleka mwehe wake bila wana, ndugu yake munhu ayo kolondigwa yamsole imgane, yamulelele ndugu yake yafile wana.’ 29Kukala na ndugu saba. Ija imkulu kasola mwehe, lakini kafa bila kulela wana. 30Wa kabili kamsola mtwanzi ija, lakini nayo kafa bila wana. 31Abaho wa kadatu kamsola. Vivo ilawilile kwa wose saba wamsola, lakini wafa bila wana. 32Kukimambukizo, mtwanzi ija nayo kafa. 33Lelo mwiisiku ya kuzilibuka, mtwanzi ayo kokuwa mwehe wa nani? Kwavija kakala yasoligwe na wose saba.”
34Yesu kawedika, “Wanhu wa mwiisi ino osola na kusoligwa, 35lakini waja wasaguligwe kuzilibuka kulawa kwa wafile na kuupata ugima onda wize, hawasola hebu kusoligwa. 36Oigala na wasenga wa kuulanga, na hondawafe bule. Wao ni wana wa Imulungu kwavija wazilibuka kulawa kwa wafile. 37Lakini kwa mbuli ya kuzilibuka kwa wanhu wafile, hata Musa kalagusa avo mna imbuli ya ikisolo kikwaka baho kamkema Mndewa, ‘Imulungu wa Abulahamu na Imulungu wa Isaka na Imulungu wa Yakobo.’ 38Heyo ni Imulungu wa wanhu wagima, siyo wa wanhu wafile. Kwavija kumwake heyo wose wagima.”
39Wafundiza Malagizo ga Musa wayagwe walonga, “Mfundiza, kulonga goya!” 40Avo hawadahile kumuuza mbuli ziyagwe.
Mbuli ya Kilisito Mkombola
(Matayo 22:41-46; Maluko 12:35-37)
41Yesu kawauza, “Vino habali wanhu olonga kamba Kilisito Mkombola kolawa mulukolo lwa Daudi? 42Kwavija Daudi mwenyego kolonga mna ikitabu cha Zabuli,
‘Mndewa Imulungu kamulongela Mndewa wangu,
Kala hano mwambu wangu wa mkono wa kudila,
43mbaka niwahume wanhu wakwihile na niweke
hasi mmagulu gako.’
44Daudi mwenyego kamkema, ‘Mndewa.’ Yodahika vilihi Kilisito Mkombola yalawe mulukolo lwa Daudi?”
Yesu kowazuma wafundiza Malagizo ga Musa
(Matayo 23:1-36; Maluko 12:38-40)
45Wanhu wose viwakalile omtegeleza, Yesu kawalongela wanahina zake, 46“Muiteganye na wafundiza Malagizo ga Musa. Wao onogelwa kwanga kuno wavala mikanzu mitali, na kulamusigwa na wanhu mna gamagulilo na kukala mna ivigoda va haulongozi mzing'anda za kumpula Imulungu na mna izinyimwilinyimwili. 47Owonela wagane kwa kusola vinhu vao, na kuitenda wanoga kwa kumpula Imulungu kwa kulonga mbuli nyingi! Awo nhaguso yao yobanza ng'hani!”
NT: © 2014 Pioneer Bible Translators and The Word for the World
OT: © 2019 Pioneer Bible Translators
