Mwanduso 4
4
Kaini na Abeli
1Adamu kambandama Hawa muke wake, na kapata wimo. Kamweleka mwana wa chilume yatangigwe Kaini, nayo kalonga, “Kwa kutazigwa na Mndewa Mulungu nipata mwana wa chilume.” 2Hamwande kamweleka mwana imwenga zina jake Abeli. Abeli kakala mdimi wa ng'hondolo na Kaini kakala mulimi wa isi. 3Maabaho Kaini kagala mavuno yake yamwenga na kayalava kuwa nhosa kwa Mndewa Mulungu. 4Abeli nayo kagala nyama inogile na mavuta ya ng'hondolo wake wa mwanduso kwelekigwa kuwa nhosa. Mndewa Mulungu kanogelwa na Abeli na nhosa yake. 5Mbali Kaini hatogoligwe na Mndewa Mulungu na nhosa yake, ivo Kaini kengilwa na ludoko ng'hani, na kakwesa ng'hombali. 6Maabaho Mndewa Mulungu kamuuza Kaini, “Habali kuna ludoko fana ivo? Habali kukwesa ng'hombali? 7Vino uhatenda yanogile hutogoligwa bule? One uhatenda yehile, uhasanyi wokusepasepa muna ulwivi lwako, wokulonda kukutawala mbali kolondeka uuhume.”
8Maabaho Kaini kamulongela mdodo wake Abeli, “Chihite kumgunda.” Viwakalile kumgunda, Kaini kamzumhila mdodo wake na kamkoma.
9Maabaho Mndewa Mulungu kamuuza Kaini, “Kakulihi mdodo wako Abeli?”
Kamwidika, “Niye sivimanyile bule. Vino niye ndolezi wa mdodo wangu?”
10Maabaho Mndewa Mulungu kauza, “Kutenda choni? Damu ya mdodo wako ilinga fana dizi donililila kulawa muna uulongo. 11Kwaviya kumkoma mdodo wako na damu yake itika muna isi, weye koduwiligwa kulawa iisi youkala. 12One uhageza kulima ndiya, ulongo hawizakupatila chinhu chochose. Kwizawegela na kwizakuwa kwabule ukazi muna iisi.”
13Kaini kamulongela Mndewa Mulungu, “Nhaguso yangu iwa ndala na ibasanya siidaha hata kuipapa. 14Lola diyelo kuniwinga muna iisi inogile na kunisegeza haulongozi hako. Nizakuwa nabule ukazi na nowegela muna iisi yose, na munhu yoyose yondayaniwone kezanikoma.”
15Mbali Mndewa Mulungu kamwidika, “Aka. Munhu yoyose yondayamkome Kaini, kezalihilizigwa miyanza saba.” Maabaho Mndewa Mulungu kamwika nhale kumzuma yoyose yondayaiting'hane nayo, sekeyamkome. 16Kaini kahasegela ha Mndewa Mulungu na kakala isi itangigwa “Nodi”, niiyo ili ubanzi wa ulawilo wa zua wa Edeni.
Welesi wa Kaini
17Kaini kambandama muke wake, nayo kapata wimo na kamweleka Henoko. Maabaho Kaini kazenga bululu na kaditanga Henoko, zina da mwanage. 18Henoko kapata mwana na kamtanga zina jake Iladi; Iladi nayo kamweleka Mehuyaeli; Mehuyaeli kamweleka Mesusayeli, Mesusayeli kamweleka Lameki. 19Lameki kakala na wake waidi, imwe katangigwa Ada na imwenga katangigwa Zila. 20Ada kamweleka Yabali, yakalile tata wa wafugaji wokala muna yamahema. 21Ndugu yake kakala Yubali, iyo kakala tata wa wose wavina wila na wotowa vimbeta na vingodongodo. 22Zila nayo kamweleka Tubalikaini, yoyakalile muhunzi wa via vose va shaba na mazuma. Lumbu wa Tubalikaini katangigwa Nama.
23Lameki kawalongela wake zake,
“Ada na Zila nitegelezeni,
Mweye wake wa Lameki tegelezeni yonimulongelani
Niye nimkoma munhu kwaviya kaning'ha banha
Nimkoma imbwanga kwaviya kanilumiza.
24Ihawa Kaini kolihigwa miyanza saba,
Lameki kezalihigwa miyanza malongo saba na saba.”
Seti na Enosi
25Adamu kambandama kaidi muke wake, nayo keleka mwana wa chilume. Kalonga, “Mulungu kaning'ha mwana wa chilume badala ya Abeli, yoyakomigwe na Kaini.” Ivo kamtanga Seti. 26Seti nayo kapata mwana wa chilume, kamtanga Enosi. Baho wanhu wandusa kumtambikila Mndewa Mulungu.
NT © 2014 Pioneer Bible Translators and The Word for the World
OT © 2019 Pioneer Bible Translators
