Luk 6
6
Jo tama len ta amunyau
(Metiu 12:1-8; Mak 2:23-28)
1Ano, udu bolo len ari ta amunyau, Jises hawe oro lau tan adek bolo bilin ari ta wit. Eme oro lau tan abwe-eh buwa wit nane dah, ano oro bosowa udu bolo mine oro, ano oro aimon. 2Eme oro lau rayah ta Parasi anya, “Tasah handru ado abwe-eh buwa wit na len ta amunyau? I buku sah ado ba-en hamon ta kandriyen tahi bwe?”
3Eme Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen ta kundruh ta lakou mene kabin Debit mesekei bwena bwe nadeh? Jo asehek ta lakou kala Debit hawe oro lau tan mene amak son. 4Ya, iy ili bolo asiu ta Kindrei; ya iy andrei jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.” 5Ano Jises edeu sendrehendreh i buku doh, “Jo Nadu Ndramak Awas, ya jo tama len ta amunyau.”
Ndramak badan imek
(Metiu 12:9-14; Mak 3:1-6)
6Ano na len ta amunyau ari ja badeh, Jises ili leheya sahou udu bolo asiu ta atukum tiri Juwis. Eme ndramak ari udu aliy, minen salin imek. 7Ya iri Parasi, ma hawe iri lau ta leheya kandriyen tiri Juwis badeh, takaleh madasan ta kadeu Jises ki ta mada sahou. Eme iri atehei mada iri udu tan, i buku iy kamesekei ndramak dah kamwenen na len ta amunyau dah, deh bwe. 8Arile, Jises ndratanan budon toro, eme iy tiye i ta ndramak minen imek dah anya, “Ou are loke mada lau mari dah!” Eme ndramak minen imek dah, suri iy ere loken.
9Ano Jises lelen oro, “Jo anya kandremenya ado, saba kandriyen mwasin kameh taha kamekes na len ta amunyau? Kamekes kandriyen mwasin ta aseben koha lakou deh, bwe kamekes kandriyen ndra-in ta adai lau?”
10Ano, Jises anyolom ili eme i toro mari, ano iy tiye i ta ndramak minen imek dah anya, “Minem kales!” Eme iy talasei minen ma minen ndramwenen ja. 11Arile, bwai, ndrine oro badeh, isi handru, eme oro asehek nyala oro ari ari, ta saba madasan handru, oro kamekes ki bada Jises.
Oro lau ma ronoh la-uh ta Jises
(Metiu 10:1-4; Mak 3:13-19)
12Ano len ari, Jises iu i kabede-e mandrei, ma iy udu gwek ben ari, amekes salom i ta Kindrei. 13Ano kon aleu, iy luhi oro lau tan ame badeh, iy lebelei oro ronoh la-uh, badu bolo oro ame len, eme iy tondrohani nyara oro badeh, i aposel.#(6:13) Aposel badeh, batun ta atondrok iri lau ta Kindrei ma iy badeh, ndramak ta atiye sahou ta Kindrei i kon ari ari. 14Ya oro badeh: Saimon (udu ja, iy aloh iy Pita), ano nadu tinen Enduru; ano Jemis, ano Jon, ano Pilip, ano Batolomiu, 15ano Metiu, ano Tomas, ano Jemis nadu Alpeyus, ano Saimon aloh Selot,#(6:15) Selot badeh, moson Ndramak ta aliu iri Juwis kame len ta baha tondrok ta Rom 16ano Judas nadu Jemis, ma hawe Judas Iskariyot, ndramak kameh ta edeu sa-oh.
Jises amekes sik ta lau solo-an amwenen
(Metiu 4:24-25; Mak 3:7-12)
17Ano, iy eme andri hawe oro, ales udu bwele-e munyak nyemesen. Ma hawe iri lau tan solo-an handru ado aliy. Ma ale, iri lau buku liliy badu loboho Judiya, badu loboho Jerusalem, ma hawe lau badu loboho mada ndras ta kon tinan Tair hawe Saidon nane an doh ale. Iri ame badeh, anya kanuhun Jises asehek sahou, ma hawe iri atiye iri lau sik udu tiri ame hawen, ta iy kamekes iri kamwenen. 18Ma iri lau ala malawin ndra-in udu la-u iri ale, iy mesekei iri amwenen ja. 19Eme ma iri lau solo-an anya kateu le badan, tasah nyaraha boto-on ta Jises eme len ma mesekei iri mari amwenen ta sik tiri.
Jises leheya lau
(Metiu 5:1-12)
20Ano mada Jises anyolom oro lau tan badeh, ma iy tiye anya:
“Ou are lau ou lakou bwe badeh, ou sekesek.
Tasah, lakou udu baha tondrok ta Kindrei kameh, tam.
21Ou are lau, ou ameson badeh, na dah, ou sekesek.
Idah kameh, ou adih handru.
Ou are lau ou taya na dah,
idah kameh, ou sekesek.
22Ou are lau, iri lau amekes budon ndra-in i tam, ya iri bwale iri ou, hawe iri aluhe, ma hawe iri kaloh ou anya malawin ndra-in udu la-um badeh, ou sekesek,
tasah ou badeh, an hamon ta Nadu Ndramak Awas!
23“Ou sekesek ma ou sandroh ta sekesek i buku lakou doh, katok badam, tasah ndramas mwasin ta lakou doh kameh abe-en ou udu kandrah. Tasah, iri doh mene tubu iri amekes i buku aliy, ili tiri propet.
24“Arile, ado lau tado lakou solo-an mada ado kaleu!
Sisi-in tinan labai kameh ewek bwele-e ado,
tasah len ta sekesek mari tado mene ndrano!
25Ya ado lau bameson bwe kede-eh, mada ado kaleu!
Sisi-in tinan labai kameh ewek bwele-e ado,
tasah ado kameh akohok andra-i labai ta son.
Ya ado lau ta abasa kede-eh, mada ado kaleu!
Sisi-in tinan labai kameh ewek bwele-e ado,
tasah idah kameh ado aden ma taya.
26Ma, mada ado kaleu, i buku none oro lau kamasiye ado, ya ado anya, ado le ai.
Idah kameh sisi-in tinan labai kameh ewek bwele-e ado.
Idoh, i buku none tubu oro mene amekes, anya oro badeh, propet handru. Arile, bwe.
Ado kaseken iri lau amekes budon ndra-in i tado
(Metiu 5:38-48)
27“Arile, jo katiye tado, are lau anuhun bohok dah: Ado badeh, kaseken iri lau amekes budon ndra-in ewek tado. Ma hawe ado ale, kamekes kandriyen mwasin ki toro lau ala budon ndra-in toro udu tado, 28ma hawe ado ale kamekes salom ki ta Kindrei kanyosowani oro lau ala aten ado, hawe oro lau ala amekes bolo manyah tado, udu ndra-in.
29“Ki buku none ari ndramak kubwi lim ki kapam badeh, ou tubuni bilisiu kili ja, iy kubwiy ale; ya ki buku none iy kandrei awin tam, badeh ou atehei awin tam lawe-en kili ale.
30“Ya ki buku none are lau kandremenya ou ta ari lakou tam kili tan, mwasin, ou atehei kili tan. Ya ki buku none are lau kandrei lakou tam badeh, ou sandrek same hamon ja. 31Saba lakou ou aseken iri kamekes kewek tam, badeh, ou amekes ki tiri ki le buku aliy.
32“Ya, buku none ou aseken oro lau le nane aso-ok ou; idah kameh, ou winiyan akohok nyosowan ta aliy i buku sah bah? Ya iri lau ta karei ma lomondra ndra-in badeh, aseken le iri lau ala amekes kandriyen ndra-in i le buku iri. 33Ou winiyan bakohok nyosowan laleyah bwe, i buku none ou aseken le iri lau amekes mwasin le ewek tam. Iri lau ta karei ma lomondra ndra-in amekes ale i buku aliy. 34Ma i buku none ou aseken ta adeu lakou i ta lau mwasin tam le; tasah ou badeh, aseken ta akohok bundruwen keme hamon. Idah kameh, ou winiyan bakohok nyosowan laleyah ta aliy bwe! Iri lau ta karei ma lomondra ndra-in badeh, amekes i buku aliy ale. 35Ndri-iy labai! Ou badeh, aseken iri lau ta amekes bahun i badam, ma ou amekes mwasin i tiri; ya buku ou adeu lakou, ou sabudon ta bundruwen. Badeh, ou kameh akohok ndramas mwasin labai, ma idah kameh ou asahan nadu Kindrei handru badu loken. Tasah, iy badeh, amekes mwasin i bada iri ta adeu wurah bwe, hawe lau ta kandriyen ndra-in ale. 36Ou badeh, ki ndramak ta tikisiy, i buku none tamam Kindrei le.”
Ou satiye ndramak ari ja
(Metiu 7:1-5)
37“Ou satiye kandriyen ta ndramak ari ari; ya, ou winiyan bare ta mada sahou tinan bwe; ou samekes sahou boto-on sala ta lau, ya idah kameh, Kindrei bamekes sahou boto-on bawek tam bwe. Ou mani kandriyen ndra-in tiri, ya idah kameh, Kindrei ale, mani kandriyen ndra-in tam. 38Ou anyohan iri lau lakou, ya idah kameh, Kindrei anyohan ou ale. Ma hawe bundruwe lakou tam eme hamon kameh solo-an labai, ma amou i andri, ma idah kameh, bolo asiu idih na aliy. Idah kameh, ou akohok bundruwe lakou tam, eme hamon kameh in hamon ta bundruwe lakou tam mene. I buku none ou adeu lakou solo-an, idah kameh, ou akohok bundruwe lakou tam in hamon ta lakou tam solo-an. Ya i buku none lakou tam solo-an bwe, idah kameh, ou akohok bundruwe lakou tam i le buku aliy.”
39Jises ale tiye sahou sokek i toro, “I buku none ari ndramak madan bwe anya kaleheya san ki ta ndramak ari ja madan bwe ale, sebwe uru ma la-uh kameh taku a bolo lek nadeh? 40Ado kanuhun. Ari ndramak ta akohok tanan basakalawi ndramak ta leheya iy bwe. Arile, i buku none ari ndramak ta akohok tanan asahan buku ndramak ta leheya iy, mwasin.
41“I buku sah handru, ou nyowonya mutahu kei udu mada nadu tinem ari ja, arile ou batona sobola kei ranah buruwen udu madam bwe nadeh? 42I buku sah handru, ou tiye ili ta nadu tinem ari ja i buku doh, ‘Nadu tine, jo kandrei mutahu kei ranah buruwen udu madam keme len,’ arile len mari ou batona sobola kei ranah buruwen udu bolo madam bwe? Ou lau ta wasai, ma bwena ou andrei sobola kei udu bolo madam keme len op, ano ou kameh anyolom amwenen handru ta akohok mutahu kei udu mada nadu tinem ari ja eme len.
Kei ma buwan
(Metiu 7:1-16; Metiu 12:33-35)
43“Kei mwasin badeh, winiyan bato-ou buwa kei ndra-in bwe. Ma kei ndra-in badeh, winiyan bato-ou buwa kei mwasin bwe. 44Taha winiyan akohok tanan badeh, udu ta buwa kei ari ari ato-ou. Ya malou bobodon ndra-in badeh, winiyan bato-ou buwa kei pik bwe, ma malou kakarik badeh, winiyan bato-ou buwa waen bwe. 45Idoh badeh, moson i buku doh: Buku none ndramak mwasin ma budon mwasin solo-an idih ereu ndrinen, idon adeh, iy ale amekes kandriyen mwasin ale. Iri lau ndra-in, tiri budon ndra-in solo-an ereu ndrine iri, ma iri ale amekes kandriyen ndra-in le. Tasah, boho ndramak badeh, asehek iri budon solo-an ale idih ereu bolo ndrinen.
Ndramak budon mwasin ma ndramak budon ndra-in
(Metiu 7:24-27)
46“Ado aloh jo badeh, ‘Laban, Laban’ ta laleyah le, arile ado ba-en hamon ta sahou tek bwe. 47Arile, jo winiyan leheya ado ta saba san, i buku ari ndramak keme hawek kanuhun sahou tek, ma iy ki-in hamon ta aliy. 48Iy badeh, i buku none ndramak a-eh ndru ta asiu tan udu bada ndren boto-on. Ya eme na len ta wadah atohou badeh, batoho-ei asiu tan bala andri bwe. Tasah, ndru-u asiu tan badeh, boto-on. 49Arile, i buku none ndramak anuhun sahou tek ya eme iy ba-en hamon ta aliy bwe; badeh, iy i buku none ndramak atah asiu tan udu bwele-e ndren laleyah, ya ndru bala andri handru bwe. Ya eme wadah anya katohou, asiu tan taku i andri, ma atokos andra-i labai.”
© 2001, Wycliffe Bible Translators, Inc. All rights reserved.
