Jon 9
9
Jises bwidi ndramak ari madan bwe amwenen
1Jises edek ili, eme ma iy anyolom ndramak ari tinen atehei iy madan bwe. 2Oro lau tan ame ndremenya iy, “Ndramak ta leheya, are lau handru amekes kandriyen ndra-in? Iy ndramak kodo-oh deh, bwe taman uru tinen amekes, ma bwidi madan bwe?”
3Jises anya, “Iy ma taman uru tinen oro bamekes ari kandriyen ndra-in bwe. Idoh asahan ta iri lau kanyolom gok ta Kindrei kameh asahan ta manyah tan. 4Len dah, len tataha ta amekes gok ta iy nane suni jo eme. Buku ben asahan, ari ndramak winiya bamekes gok bwe. 5Buku jo udu ndra kon munyak dah, jo sun handru ta lomada kon munyak.”
6Iy asehek sahou ano, iy sakaruk ili bada ndren, ano iy rawi sakaruk tan nane ma ndren udu bolo minen eme iy tahiy i mada iy ndramak nane. 7Iy asehek i tan, “Ou ala sikine madam kili bolo gwa li Silowam.” (Moson ta sahou i buku doh: “Iy tiye iy kili.”) Eme iy ndramak nane edek ili sikine madan, eme ma madan ma la-uh asak. Ano iy edek iu ili kon.
8Oro lau badu hawen ma oro lau rayah ndranyolom iy bwena anyolou iri lau ta lakou, lelen, “Sala iy ndramak mene ale manyah? ma iy mene anyolou lakou tiri lau?” 9Oro rayah anya, “Iy le ai.”
Oro rayah ja anya, “Bwe, ndramak ari ja. Arile nyolom tan i buku le iy amwenen.”
Ano, iy le amwenen eme asehek i toro, “Jo le asah idah.”
10Oro lau rayah ame lelen iy, “Ya, i buku sah handru madam asak?”
11Iy eme asehek i toro, “Iy ndramak ari, iri aloh nyaran Jises, tahi ndren i madak ma la-uh. Ano iy tiye jo ili sikine madak ili gwa li Silowam. Jo ili sikine madak, eme ma jo anyolom kon ja.”
12Oro ame lelen iy ja, “Ya, iy ndramak badeh, ndraheh?”
Iy anya, “Jo tanan bwe.”
Oro Parasi ndremenyani iy ndramak nane madan ndrasak
13Oro andrei iy ndramak bwena mene madan bwe ili hawe iri Parasi. 14Na len nane Jises tahi ndren i madan, idoh udu bolo len ndrabun tiri Juwis ta amunyau.
15Ta idoh, iri Parasi ame lelen i ndramak nane ja, “I buku sah handru madam asak?” Iy eme tiye i tiri, “Iy tahi ndren i madak, ano iy tiye jo ili sikine madak, eme ma madak asak.” 16Iri Parasi rayah anya, “Iy ndramak nane amekes lakou i buku doh, iy badu hawe Kindrei bwe, tasah iy ba-en hamon ta kandriyen malen ta len ndrabun ta amunyau bwe.”
Rayah anya, “I buku sah handru iy ndramak ta amekes kandriyen ndra-in, amekes kalem i buku doh?” Eme ma apwai iri a la-uh.
17Ano iri Parasi lelen i ndramak nane san rasan ja, “Ou asehek anya iy bwidi madam asak, ya, ou amwenen asehek, i buku sah handru?”
Eme ndramak nane anya, “Iy propet ari ai.”
18Eme ma iri Juwis batehei budon tiri bala ta sahou tan bwe. Iri tiye sahou i ta taman uru tinen kame. 19Uru ame asahan hawe iri. Iri ame lelen uru, “Kede-eh nadu ah? Iy mene ah asehek anya, ah atehei iy madan bwe? Ya, i buku sah handru madan ndrasak ja?”
20Taman uru tinen anya, “Aru tanan, kede-eh nadu aru handru, aru atehei iy asahan, madan bwe. 21Arile aru tanan bwe; i buku sah handru madan ndrasak ja kada-ah, ma are lau handru sihi madan, aru tanan bwe. Aha kandremenya iy. Iy tanan, ma iy winiyan asehek taha.” 22Taman uru tinen asehek, tasah uru anoh iri Juwis. Iri Juwis ndratehei sahou ndra-en aliy bwena, i buku are lau iy asehek anya Jises badeh, Mesaya, iri kameh tikahei iy udu bolo asiu ta atukum tiri Juwis iu ili manan. 23Eme taman uru tinen asehek anya, “Iy ndrabadok, ma iy winiyan ta asehek sahou, aha kandremenya iy.”
24Iri luhi iy ndramak nane eme hamon san rasan ja, ma iri asehek i tan, “Abo, ou tandrakan, ma masiye Kindrei na dah, ma ou asehek sahou handru! Ahi tanan, iy ndramak nane bwidi madam asak, iy badeh, irek ta lomondra ndra-in.”
25Iy ndramak nane madan ndrasak asehek ili tiri anya, “Jo bala tanan bwai, buku iy ndramak doh lomondra ma kandriyen ndra-in udu tan deh bwe. Lakou ari le jo tanan: Bwena mene jo madak bwe, arile nadah madak ndrasak ja.”
26Ano iri ndremenya iy ja, “Saba lakou handru iy amekes ewek tam? I buku sah handru iy sihi madam?”
27Eme iy asehek, “Jo nane ndrasehek taha eh, aha banuhun bwe. Buku sah aha anya kanuhun ja? Sebwe aha anya kasahan iri lau tan ale nadeh?”
28Eme bwidi iri asehek sahou boto-on i tan, “Ou lau tan ari ai! Ahi lau ta Moses labai! 29Ahi tanan Kindrei badeh, asehek sahou i ta Moses, arile ta i ndramak badeh, ahi tanan iy bwai, ma ahi bala tanan, iy badu heh, bwe.”
30Iy ndramak nane madan ndrasak anya, “Adeh! Jo barala tanan, ma baranuhun ai! Aha asehek anya, aha bala tanan, iy badu heh handru, bwe. Jo mene madak bwe, arile iy ndrabwidiy ndrasak ja. 31Ahi tanan, Kindrei winiyan banuhun are lau, iy ta amekes kandriyen ndra-in, bwe. Arile, iy anuhun le iri lau mwasin ta atudun iy, ma iri an hamon handru ta tanan tan. 32Taha marakon banuhun se bwe, ta ndramak ari badeh, bwidi ndramak ari, tinen atehei iy madan bwe, asak ja. 33I buku Jises iy badu hawe Kindrei bwe, iy winiyan babwidiy se lakou bwe.”
34Eme iri asehek i ta ndramak nane madan ndrasak ja anya, “Tinem atehei ou badeh, udu bolo iri kandriyen ndra-in. I buku sah ja, ou anya leheya ahi?” Eme iri tikahei iy udu bolo asiu ta atukum tiri Juwis iu ili manan.
Iri lau batehei budon tiri bala ta Kindrei bwe badeh, i buku iri lau mada iri bwe
35Jises ndranuhun iy ndramak nane iy bwidi madan ndrasak, iri tikahei iy iu ta bolo asiu ta atukum tiri Juwis. Iy ndruni iy, ma iy eme ndremenya iy, “Budon tam kede-eh handru in ta Nadu Ndramak Awas deh?”
36Iy ndramak nane lelen, “Are lau handru, ndramak tinan? Ou tiye keme tek, ma jo katehei budon tek marakon kili le tan.”
37Jises anya, “Ou ndranyolom jo kede-eh, jo le asah asehek sahou hawem.”
38Eme iy ndramak nane anya, “Laban, jo atehei budon tek ndrawek tam.” Ma iy eme aluh i andri udu mada Jises. 39Ano Jises anya, “Jo eme andri kon munyak ta edeu lau ala ta mada sahou, ta iri lau mada iri bwe, winiyan asak. Ya mada iri lau mene mwasin, idah kameh i kaseu ja.” 40Iri Parasi rayah ado hawen ala anuhun iy asehek, eme iri ndremenya, “Ou tiye sah? Sebwe mada ahi kaseu ale?” 41Jises anya, “Buku mada aha bwe handru, badeh, aha bamekes iri kandriyen ndra-in nane doh bwe. Arile aha anya aha ndranyolom ja, badeh kameh kandriyen ndra-in taha udu bwele-e aha kahis.”
© 2001, Wycliffe Bible Translators, Inc. All rights reserved.
