Jon 15
15
Jises anya iy bada kei waen handru
1Jises anya, “Jo bada kei waen handru, tama badeh, iy tama bilin handru. 2Buku andrak rayah bato-ou sali iri bwe, tama eme atubwa iu. Tama eme apis la-uk rayah ndra-in iu, ta iri kato-ou sali iri kamwenen ma solo-an. 3Na le iri leheya tek badeh, bwidi aha ndrasahan ha-un. 4Arile ado badeh, kahis badak, jo kihis bada ado ale. Buku andra waen bahis badan tinan bwe, idah kameh iy winiyan bato-ou salin bwe. Idoh i buku ado bahis badak bwe, ado kameh winiyan bato-ou sali ado bwe.”
5Jises anya, “Jo bada kei waen handru, ado badeh, andran. Are lau iy ihis badak ma jo ihis badan, idah kameh iy ato-ou salin solo-an labai. Ado winiya bamekes ari lakou bwe, buku ado bahis badak bwe. 6Are lau iri bahis badak bwe ma bato-ou sali iri bwe, idah kameh akahei iri au. Ma iri kameh asara, ano tukumwi mari i le se, ano iri akahei mara-ei ili bolo jih ta andrakak iu.
7“Buku aha ahis hawek ma aha tawi iri sahou tek udu ndrine aha ihis, aha winiyan ndremenya jo ta iri saba lakou aha aso-ok. Jo kameh winiyan atehei ewek taha. 8Tama akohok lomadan tinan labai, ta aha ato-ou buwa kei solo-an labai. I san le doh bwidi aha asahan iri lau tek handru.
9“Jo aso-ok aha tinan labai, i buku le tama aso-ok jo. Aha ahis ado bolo so-ok tek tinan labai. 10Buku aha a-en hamon ta sahou batanau tek eh, aha kameh ahis ado ta bolo so-ok tek, i buku le jo ndra-en hamon ta iri sahou batanau mara-ei ta tama, ma jo ihis udu bolo so-ok tan. 11Jo ndrasehek tado ta lakou marakon doh, ta iri sekesek tek kudu taha, ma kidih bolo oda aha. 12Sahou batanau tek i buku doh: Aha kaso-ok nadu tine aha ari, ari i buku le jo aso-ok aha labai. 13I buku ari ndramak iy anya kaleheya so-ok tan tinan labai kili tiri kawas tan, badeh, iy katehei iy mara-ei amwenen kili, iy kimek ta aseben iri. Kandriyen ari le doh udu bwele-e iri kandriyen mari. 14Aha marakon badeh, ndra kawas tek le ai, i buku aha an hamon ta iri sahou mene jo ndrasehek taha. 15Jo winiyan baloh aha bonyo-ou ja bwai, tasah iri bonyo-ou bala tana iri ta saba lakou handru iri kabin amekes bwe. Akohok kon ta bonyo-ou eme jo aloh aha kawas tek le, tasah jo ndrasihidiy ndrawek taha iri lakou marakon mene jo anuhun eme ta tama.
16“Ado basolo-ei jo bwe, jo le amwenen andrei ado, ma jo atehei ado ala ta ato-ou buwa kei solo-an, ma sali iri kameh kudu luluwen. Eme ma buku aha asolom i ta tama, ma aha ndremenya iy in ta nyarak ta saba lakou aha aso-ok, tama winiyan atehei ewek taha. 17Eme ma jo kabatanau aha buku doh: Aha kaso-ok nadu tine aha iri ari ja.
Iri lau badu kon munyak kameh baso-ok iri lau ta Jises bwe
18“Ado samaliye, i buku iri lau badu kon munyak baso-ok ado bwe, ado ndratanan, iri ma bwena mene amekes eme tek ale. 19Buku aha badu kon munyak handru, idah kameh lau badu kon munyak aso-ok aha labai, i buku aha badu hawen handru. Arile, jo akohok aha badu kon munyak dah, eme aha badu aliy bwe. Ta idoh le, bwidiy, ma kon munyak baso-ok aha bwe.
20“Aha samani iri sahou mene jo ndrasehek ndrawek taha: ‘Iri lau bonyo-ou winiya basakalawi kabin tiri bwe.’ I buku iri lau adai jo, iri kameh adai aha ale; buku iri an hamon tiri leheya tek, iri kameh an hamon ta leheya taha ale. 21Arile, iri kameh winiyan amekes iri saba lakou ndra-in ewek taha, tasah aha lau tek, ma iri bala tanan ta are lau handru nane suni jo eme dah bwe.
22“Iri winiyan batona kandriyen ndra-in tiri bwe, buku jo bame basehek tiri bwe. Arile, na dah, jo asehek iri lakou ili tiri, eme ma iri ari madasan ta tone ndra-in tiri bwai. 23Are lau bwalen jo, iy bwalen tama ale. 24Iri winiyan batona kandriyen ndra-in tiri bwe, buku jo bamekes lakou bado ndrokowa iri bwe. Arile, na dah, jo amekes iri lakou ale, ari ndramak bamekes se bwe. Iri ndranyolom saba lakou jo amekes, eme ma iri baso-ok aru tama ja bwe. 25Kandriyen nane iri amekes eme asahan, ta sahou ndratorowenei udu bolo kandriyen malen tiri kameh asahan handru. Sahou i buku doh,
‘Iri baso-ok jo bwe, idoh ari katin bwe.’ Wari 35:19; 69:4
26“Seben kameh eme. Malawin Ndrabun iy eme ta nyowonya iri sahou handru ta nyala Kindrei. Iy badeh, udu hawe tama eme. Iy badu hawe tama, arile jo kameh suni iy amwenen ewek hawe aha. Ma iy kameh asehek taha ta nyala iri gok nane jo amekes ma hawe iri kandriyen tek. 27Eme ma aha ale kameh asehek jo, tasah aha ado hawek ndra bwena labai, eme asahan nane dah.
© 2001, Wycliffe Bible Translators, Inc. All rights reserved.
