Jenesis 1
1
Kundruh Ta Munyak Asahan
1Ma mwena handru badeh Kindrei mwesekei munyak ma kandrah. 2Ya munyak kahis le badeh ma lakou aliy bwe, ndras badeh nohowan handru udu bolo lulik. Eme ya boto-on ta Malawi Ndrabun ta Kindrei badeh edek bwele-e gwa. 3Eme Kindrei eme, iy anya eh, “Kon kaleu.” Eme badeh kon aleu. Eme iy anyolom badeh ma iy sekesek handru. 4Ano iy atehei ndrokowan udu aliy, udu bolo len hawe lulik. 5Eme iy tondrohani kon aleu badeh, “Len,” ma tondrohani lulik badeh, “Ben.” Ano kon eben ano kon aleu badeh len ari ah.
6Ano Kindrei anya eh, “Ya abo lakou i buku asi jor badeh keme kasahan ki la-uh kon, ari kudu ndrandrahun labai ya ari kudu ndrandrahun labai.” Eme badeh asahan i le buku aliy. 7Eme badeh Kindrei mwesekei lakou i buku asi jor badeh apwai gwa badu andri ma apwai gwa badu loken. 8Eme iy tondrohaniy lakou i buku asi jor nane badeh “Kandrah.” Ano kon eben ano kon aleu badeh, len la-uh ai.
9Ano Kindrei anya ja eh, “Abo gwa badu bahandra kandrah badeh keme lese ma hawe munyak kasahan.” Eme asahan i le buku aliy. 10Eme Kindrei badeh tondrohani kon soboren badeh, “Munyak” ma iy tondrohani gwa udu se nane dah, “Ndras.” Eme Kindrei anyolom badeh ma iy sekesek handru. 11Ano iy anya eh, “Abo kei ma bwidiu kasahan bwele-e munyak, kato-ou buwa kei ma kato-ou salin ya iri badeh ndrateheyan labai.” Eme badeh asahan i le buku aliy. 12Eme saba buwa kei ateh bolo munyak eme loken, badeh Kindrei anyolom ma iy sekesek handru. 13Ano kon eben ano kon aleu badeh len taloh ai.
14Ano Kindrei anya ja eh, “Lakou ta anya badeh kanya bada kandrah ta apou len ma ben, ma kaleheyani kalem ta an ta len ma hawe ta jaha ma hawe len ta atudun nyamon tinan ta atukum. 15Eme oro doh kameh adeu lomada oro kameh anya udu kandrah eme bwele-e munyak.” Eme badeh asahan i le buku aliy. 16Ya eme Kindrei badeh mwesekei lakou la-uh tinan ta anya, iy mwesekei an baden eh ta atondrok len ai. Ya bun baden eh ta atondrok ben ai; ma hawe iy mwesekei iri ndrau ale. 17Ano iy atehei lakou ta anya udu kandrah badeh ta adeu lomadan eme andri bwele-e munyak ai; 18i doh ta atondrok len hawe ben ma ta apou len ma lik. Eme Kindrei anyolom badeh ma iy sekesek handru. 19Ano kon eben ano kon aleu len hahuw ai.
20Ano Kindrei anya ja eh, “Ya abo lakou mulin kasahan bolo gwa ma reu kaso na sirih.” 21Kindrei badeh ndramwesekei iri ni tinan badu ndras ma hawe iri saba lakou mulin ala ado bolo gwa badeh ndrano, ma iri badeh ndrateheyan labai. Eme Kindrei anyolom badeh ma iy sekesek handru. 22Eme iy atehei nyosowan i tiri ma iy anya, “Iri mulin badu gwa kadeu nah ma iri kaweleyani ndras, ma iri sirih ale kasahan solo-an.” 23Eme kon eben ano kon aleu len limeh ai.
24Ano Kindrei anya eh, “Abo iri saba lakou katin haka badeh kasahan bwele-e munyak. Iri katin haka ndriliu ma ndriliu bwe, nadu bwisik ma tinan badeh kasahan. Ya iri badeh ndrateheyan labai.” Eme asahan i le buku aliy. 25Ya eme Kindrei badeh mwesekei iri mari doh ano iy anyolom eme badeh iy sekesek handru.
26Ano Kindrei anya ja eh, “Ya abo i dah kameh to kamwekes ndramak awas ai; ya teheyan ma kone oro ki le buku to. Ya eme oro kameh katondrok iri ni, katondrok iri sirih ma katondrok iri katin haka ndriliu ma ndriliu bwe, bwisik ma tinan.” 27Ano Kindrei badeh mwesekei ndramak awas mwesekei teheyan ma konen i le buku iy, mwesekei mwan ma hawe badih. 28Ano badeh iy atehei nyosowan i turu ma tiye i turu i buku doh, “Ah badeh kamwekes nah ya lundriye ah oro kaweleyani kon munyak mari ma kado katondrok. Ma jo atehei ah badeh katondrok iri ni katondrok iri sirih ma hawe iri katin haka ndriliu. 29Ya saba buwa kei badeh ah kaimon le ai. 30Arile iri katin haka ndriliu hawe iri sirih baden eh, jo atehei nyamon tiri badeh bwidiu ma hawe la-u kei i ta nyumon tiri ai.” Eme badeh asahan le ai. 31Eme Kindrei anyolom lakou mari iy mwesekei doh badeh ma iy sekesek handru ta aliy. Ano kon eben ano kon aleu badeh len onoh ai.
© 2001, Wycliffe Bible Translators, Inc. All rights reserved.
