San Mateo 13
13
Woun ãbmua nemjĩir dau photarr ag nem ĩgkhaa
(Mr. 4:1-9; Lc. 8:4-8)
1Khãai ãb Jesús ich jẽer sĩerr degmua mawia thʉrrdo igaau oo sĩsijim. 2Maigmua ich bigaau õor pom phʉʉrbaadeewai ichta warag bote ee waaidʉwi dojãrraa barjoisijim. Maagwai chi õran durr mos gaaipaita pos thʉnaajim. 3Mag mam barjopnaata ejemplodam jaaumamua nem khĩir pogkhe jaaumajim. Mag jajawagmamua magjim:
—Woun ãb nemjĩir dau phoon majim aajem. 4Mag sĩi phomam atarr aawai ãaurag chi nemjĩir daudam bʉ diichjem ee burrjim aajem. Magbaa nemchaain beewia sĩi khokhʉʉipʉijim anaabá. 5Maimua ãaur khʉʉn sĩi mok por jojoodog eeta burrjim aajem, wajappai jẽb chukhu sĩerr ee. Makhʉʉnan chi tharrpheen ʉu jopcha tharrphe oberjim aajem. 6Pari edau pechag wʉʉbaadeeu sĩi enanauk aademua phuabaadejim anaabá, mokdau khurau pod ierr khaar jẽrkhaba ʉ̃rʉʉta khaarkha khithee arr aawai. 7Maimua ĩchab tagam photarr miudo arr ee burrwia, chi miuta nemjĩir khãaijã bãau khaphí bãauwia, sĩi chi nemjĩirdam ichdeuta por pʉreu aujim aajem. 8Mamʉ tagam ʉu jẽb wajaug ee burrtarran, wajapha oberwia ʉu nem wajaug phur jopjim anaabá, nem bich dapag maimuajã bich thʉʉ, maimua pogkha bich daii; mamʉ mag sĩsidʉm chan bʉ̃ʉrjã chi vano chukhu.
9Mag nem ĩgkhaadam jaau opʉiwi aig narr khʉʉnag, —Keena, jʉ̃g ʉ̃rʉʉnaa chamʉg nem ĩgkhaadam mua jaau chirʉm wajapha ũrbatgui ajim ich Jesuupai.
Khan jãgwi ejemplodamauta Jesuu õrag nem jaaujeejĩ
(Mr. 4:10-12; Lc. 8:9-10)
10Mag i nem ĩgkha opinaa maach chi khapeenauta irig, —¿Jãgwiata pua jãg ejemplodam jaaumamuata õrag nem jaaujẽ? a jeeu naajim.
11Magbaawai ichdeu marag magjim:
—Pãrau khaugam khõsi ũr naawai warre mʉchdeuta pãrag khaphʉ api chirʉmgui ajim, jãgata Ẽwandam õor thãar ee sĩeicheejẽ. Pari warm khʉʉnag mag khaugpibamgui ajim, amau khaugam khõsi ũrba naawai. 12Mag khãai ar chi thãar onee ũrm khõsi ũr nʉm khʉʉnagta Ẽwandamau warag khĩirjug deeju, ich iek khapcha amkhĩir. Mamʉ ar mag nem waumapha nʉm khʉʉnag chan deeba, warag am jua eem khecheu aumaju ajim. 13Maguata mua sĩi ejemplo jaaumamuata amag nem jaauba aajeeb, mua nem wau chitʉm amau oo nʉmta oobamjonaa mua nem jaau chitʉmjã ũr nʉmta ũrbamjo naawai. 14Amach jãg nʉm gaaimua am gaaita pa sĩebahab Ẽwandamau ich iek gaai jooi Isaías khararrag phãpitarr. Irua phãtarr mag sim:
“Par amau ũrwiajã ũrbamjo khaugbajurau.
Par wajap oo nʉʉ awiajã oobamjo ajurau.
15Mʉkhʉʉn wounaan khĩirjugan sĩita ãr sim; kachjã khĩnaa daupata khĩ sĩsidʉm.
Mag naawai pod ũrjã ũrba ni oojã ooba, ni mʉrʉgjã amach pekau chugpaapi jeeuba nʉm, amach peerdʉ aumkhĩir.” (Is. 6:9-10)
16Mag iekhapʉinaa deeu maragta, —Pari pãar onee abat ajim; pãrau pãach daúacha mua nem wau chitʉm oonaa pãach jʉ̃gʉucha mʉ iekjã ũurjeewai makhʉʉn jooi Isaiaau jaautarrjo khaba nʉmgui ajim. 17Magnaa, Chadcha mʉch imeerba pãrag mag chirʉmgui ajim: Warrgar khapan Ẽwandam i jaaujerr khʉʉnau cha mua nem wau chitʉm pãar denjo amach daúacha oom khõsi atarrjã pod oobajierram. Cha pãrau ũr nʉmjã amach jʉ̃gʉucha ũrm khõsi atarrjã pod ũrba durrajimgui ajim.
Khani jaau sĩ nemjĩir dau photarr ag nem ĩgkhaau
(Mr. 4:13-20; Lc. 8:11-15)
18Maimuan chadau ich Jesuu, —Ũrbat, mua pãrag jaaukhimgui ajim, khani jaau sĩ chaig mʉchdeu nemjĩir dau jaau chirarr ag ejemploou. 19Ar mʉg Ẽwandam iek jaau nʉm ũr nʉmjã pod khaugbam khʉʉnan, chi nemjĩir daudam khʉdjã ee burrwia nemchaainau khopʉitarrjota nʉmgui ajim: Meperau beewia, sĩi khũgurbaicheewai, Ẽwandam iek ʉkhatarrdam deeu ũrba arrjo apäaijem. 20Maimua ar Ẽwandam iek jaau nʉm ũrbaawai ʉkham khõsi ʉkhatarr khʉʉn, jũrr nemjĩir daudam mok por jojoodog ee burrtarrjota nʉmgui ajim. 21Mamʉ jẽb chukag gaaimua chi nemjĩirdam wajap khaarkhaba arrjo, ĩchab mag ũrm khõsi ũrnaa ʉkhatarrjã wajappai ubʉ khaba nʉm. Mag khukhurpai naawai, mag iek wajapham gaaimua chikhamnau khaigbanaa phithurg aawaijã, deeu Ẽwandam iekta isegwi, warr amach naajerrjota wenʉrram khõsi nʉm. 22Maagwai maach khapeen ihãsisisdom khʉʉn, jũrr mag nemjĩir dau miu ee burrwia chi miúa por pʉreu autarrjota nʉmgui ajim. Amau Ẽwandam iek ũrm khõsi ũurjem, mamʉ deeu amach khĩirjug eepai, “Jãgʉm gaaimua pod mʉ phatkhon auba khãijã chitaju,” wa magbam khai, “Mua chadcha ʉkhakhiinjã, pod parhooba mʉchdeu ampierr abaju” a khĩirjuajem. Mag gaaimua mag nemjĩirdam aphʉʉ bãauwia pod cheba arrjo, Ẽwandam athee nem wajapha wawaagjã podba, sĩi serbiibata nʉmgui ajim. 23Magarrau ar Ẽwandam iek ũrwia thãraucha ʉkhaajem khʉʉnan chad, jũrr mag nemjĩir jẽb wajaug ee burrtarrjota nʉmgui ajim. Magʉm khʉʉn Ẽwandam athee nem waum khõsi wau naawai, amachdeu nem wauju ayagpierr waaujemgui ajim: ãaur khʉʉnau nemjĩir chi chemiejo dʉrrcha, ãaur khʉʉnau agpierrpai maimua ãaur khʉʉnau bʉchkhunpai. Mamʉ thumaam khʉʉnau ichiita ichdeu khõsimjo aajemgui ajim.
Phũak dau khaigbam trigo eeu jĩir wejom ee photarr
24Mag jaauwia, deeu ichdeupai mʉg ejemplodam jaaumamua magjim: —Ĩs mua pãrag jaaukhimgui ajim, Ẽwandamau ichdeu õor i agkham ed jãga khaigbam khʉʉn chi wäjäaun eemua isegju. Maan mʉgaugui ajim: Woun ãbmua trigo jĩirjim aajem. 25Mamʉ mag trigo apha sĩerrta, õor thum khãiphobaademich, mag chi nemjĩir pap kha ukhurm beewia jũrr i nemjĩir ee phũak dau khaigbam agjo trigojoo simta phothurjim anaabá. 26Maimua chi trigo bich baupa aadeewai chi phũakjã agjoo dʉi bich baupa joisijim anʉm. 27Magbaadem chi chognaanau oo athaawai amach patrón aar wetwi irig, “Patrón, pua jĩirwai trigo appai jĩirtarrta, ¿jãga ĩs jãg phũak khaigbampata ag ee bich baupa wejo?” ajim anʉm. 28Magbaawai chi papkhʉʉu, “Jã, maach dʉi iekkhõr paraam khʉʉnau khãijã ag ee phũak dau phowia khabahab” ajim anʉm. Magbaa chi chognaanau deeu pʉaba irig, “¿Pua oowai marau ag appai chi khaarpa jẽu werphoon maju aai nʉ?” ajierram anʉm. 29Mamʉ magbaa chi nemjĩir khʉ jooirau, “Oob jẽwaan wetmiet” ajim anʉm, “magba akhiin eeu pãrau chi trigo khaardampa khãijã thʉrreudukham. 30Magju khãai ideu warag ãba bãaupibat” ajim anaabá. “Maimua ya phierr nʉm jaar paawaita mua ag athee õor pʉijugui ajim anʉm, nacha ag appai thʉrrphenaa, khõorjʉ̃naa orpʉimkhĩir. Maimuan chadau agjo chi trigo appai phierrwia chi ausĩiujem ee ausĩujugui” ajim anaabá. Magtarr aawai ichdeu jaautarrjo ideu bãaupiwia, phierr jaar paawaita ich mag chi phũak thʉrrphenaa, ag appai khĩet orpʉijim anaabá. Maagwai õor i agkham edjã ich magta aju Ẽwandamaujã ich iek ʉkhabam khʉʉn dʉi. Mamʉ ich iek ʉkha nʉm khʉʉnan, mag trigo wajap ãkha sĩutarrjo ich aarchata phe auwi ich dʉi ich mag wai sĩsiju a jaaumajim, ich Jesuucha.
Mostaza den nem ĩgkhaadam
(Mr. 4:30-32; Lc. 13:18-19)
31Mag nem khĩir pogkhe jaaumamua ich Jesuupai ĩchab mʉg nem ĩgkhaadamjã jaaujim, mostaza daudam bʉ̃rʉʉ khitʉm igwi: —Pãrau khaphʉ nʉ, jãga sim abarí Ẽwandam iek mua jaau chitʉm, maimua khanjota sim a mua pãrag jaaubarkhiin ajim. Mʉg Ẽwandam iek mua jaau chitʉmʉn, mostaza daudam jẽb ee jĩir sĩubarmjota simgui ajim. 32Iin chadcha tagam nemjĩir dau khãaijã ichta bʉ̃rʉʉcha khitʉm. Mamʉ mag khitʉmʉn nem bãau khaphí bãauwia, nem bʉ pom ãdee aadeewai, sĩi nemchaaindam beewi ag gaai di eucheejemgui ajim. Ich agjota sĩebahab ajim ĩchab mʉg Ẽwandam iek mua pãrag jaau chitʉmjã: Mʉʉgwaiwe chan khapan khábata ʉkha durrum; pari mag durrumuata warag nem pom aaidʉbapäaiwai õor khapankham khʉʉnau ʉkhajugui ajim.
Levadura den nem ĩgkhaa
(Lc. 13:20-21)
33Mag jaaumamua ich Jesuupai, —Ẽwandamau ich iiu aawai mag ich iek aaidʉpi nʉmʉn, ʉʉi ãbmua arin dʉrrcha sim ee levadura pʉitarrjota simgui ajim. Pãrau khaphʉ nʉmgui ajim, levadura bʉ̃rʉʉ pʉitarrjã aaidʉmam ooba simta, arin thum ʉrpi aaujem. Ich agjota sĩebahab ajim ĩchab Ẽwandam iek mʉg mua jaau chitʉmjã. Mʉʉgwaiwe chan õor pom mʉg wejom ee agtha pomcha aaidʉba sim. Mamʉ mʉg atag paawaita durr warpham magwe aaidʉbaadee thumaam khʉʉnau ũrab khaba ũrjugui a jaaumajim.
Jãgwi ejemplo jaaumamuata Jesuu nem jaaujeejĩ
(Mr. 4:33-34)
34Magta Jesuu nem khĩir pogkhe jaaumajim, ejemplodam deemamua. Ejemplo chuk chan õrag nem jaauba aajeejim. 35Mamʉ mag ejemplooupai nem jaaujerran, warrgar Ẽwandam i jaaujerrau Jesús igwia jaautarrjo, ejemplo deemamuata õrag nem jaauju arr aawai ajim. Mag irua ejemploou nem jaaumaju atarran, warrgarwe Ẽwandamau õrag khaugpiba ich thãar eepai wai sĩsierrta jũrr ewag pawi õrag khap amkhĩir jaaumaju ajim. Magtarr aawaita mag ejemplo jaaumam aigjã chadcha ag eyaa obebergmajim.
Jesuu jaaujim, khanta jaau sĩ mag phũak khaigbam trigo ee photarrau
36Mag õrag ejemploou nem jaau obaadeewai õrag wetpi jaaujim. Maimua thum ereubaadee ich jẽer sĩerr di aar majim. Maig maach appai aphobaadee, marau irig maachig jaaupijim, mag phũak dau khaigbam trigo eeu jĩir wejom ee photarr. 37Magbaa ichdeu jaaubaadewi magjim:
—Ar mag chi nemjĩir dau wajapham phojim a chirarr, jã mʉchpaíugui ajim, mʉch chi Emkhooi Iewaa. 38Maagwai irua photarr jẽb, jã mʉg õor pom wejomta jaau sim. Chi nemjĩir dau wajapham, õor Ẽwandamagta ʉdʉraa amach Porkhapi nʉm khʉʉnaugui ajim. Maagwai chi phũak khaigbam, ar sĩi Ẽwandam igar khaba mepeer igar nʉm khʉʉnau. 39Maagwai chi patrón kha ukhur i nemjĩir ee mag phũak dau phothurtarr, jã chi meperaugui ajim. Maimua chi trigo phur joisiewai thʉʉju a jaautarr, Ẽwandamau mʉg durr i agkhajuuta jaau sim. Chi trigo thʉʉ nʉmjo õor dajẽk aju khʉʉn, ich Ẽwandam chognaanaugui ajim, angelnaan. 40Pãrau khaphʉ naabá, phũak phʉnaa, jʉʉupinaa orpäaijem. Ich jãgta aju ĩchab Ẽwandamaujã õor dʉi ichdeu mʉg durr i agkhabarm ed. 41Mag ed mʉch chi Emkhooi Iewaau mua mʉch chognaan pʉijugui ajim, sĩi bigaaum khʉʉnagjã pekau waupinaa amachdeupa nem khaigbam wau sĩerrjeem khʉʉn thum ãbamʉg jʉr phemkhĩir. 42Mag ãbamʉg jʉr phenaa orno paa dʉnʉmjo sim eeta barkhʉʉiju. Magbaawai mag eeta icharaucha bĩenaa gaai machgau am khierr ujãkkhʉr abarjugui ajim. 43Mamʉ warm khʉʉn mamagkham ee, jũrr Ẽwandamagta ʉdʉraa amach wajaug paapi nʉmua i denkha narr khʉʉnan maach Aai thumaam khʉʉn Porkha sim dʉita nʉisijugui ajim. Magnaa ichdeupai, Keena, jʉ̃g ʉ̃rʉʉnaa cha mua nem jaau chirʉm wajapha ũrbat ajim, mag iekhamamua.
Jesús denkhaag jãga aju aai nʉ
44Mag jajawagmamua ĩchab mʉg nem ĩgkhaadamjã jaaujim, ich Jesuu: —Woun ãb chikham jẽb gaai phidkha sĩejim aajem. Mag phidkha simuata jẽb eem nem wajapham oobaadejim anaabá. Magbaawai pod ichdeu arrju khaba aawai, sĩi oo pʉawia, ich nemta warag isegamjo thumaa perkhʉʉipʉiwia, ag phatkhonauta mag ichdeu nem oo pʉatarr chi jẽbpa per aujim aajem.
Maimua ich Jesuupai mag ich nem ĩgkha sim ũr narr khʉʉnag magjim: —Chi mʉ denkhaju khʉʉnaun mag wounau mag phĩr aum khõchgau ich nem thum perkhʉʉitarrjo amach nem wai nʉmjã thumta iseg nʉmjo aju aai nʉmgui ajim, mʉʉta jũrr mag nem ajapham amachdeu ig nʉmjo paarpaag.
45’Mag mʉʉta nem wajapham amachdeu ig nʉmjo paarpaagan, chihoo chi ʉ̃rʉʉcha balee simta per awaag jʉr wenʉrrʉmjo aju aai nʉmgui ajim. 46Mag jʉr nʉmua chi baau atham khʉʉu ich nem wai sim thumaa perkhʉʉiwi jũrr mag chihoo mag ich nem perkhʉʉitarr khãaijã ʉ̃rcha balee simta per athamjota aju, chadcha mʉ denkham khõsi mʉ jʉrwia baau athaawai.
Õor i agkham edan reeu do ʉreu nʉmjo aju jaautarr
47Mag jajawagmamua, —Ẽwandamau õor i agkham edan, ãwarr pʉraag reeu dojãrr do ʉreu nʉmjota ajugui ajim, ich Jesuupai. 48¿Pãrau oowai mag ʉreu wai jorroo awia jiir aunaa, chi ãkhãar theernaa barpʉiwia, chi wajapham appaita auba aajẽ? ajim. 49Ich jãgta ajugui ajim ĩchab Ẽwandamau pãar dʉijã, mʉg durr ichdeu i agkhabarm ed. Ẽwandamau ich chognaanag õor khaigbam khʉʉn chi wäjäaun eemua khĩet theerpi jaauju; 50magnaa mag chi ãkhãraam khʉʉn mag orno paa simjo sim ee barkhʉʉipʉiju. Mag barkhʉʉibapäaiwai mamta icharaucha bĩenaa gaai machgau am khierr ujãkkhʉr ajugui ajim, amach khaigba wenʉrrarr jũrr.
51Mag jaau dichwia ich Jesuupai maach ich dʉi wenʉrrarr khʉʉnagta, —¿Pãrau cha mua jaau chirʉm wajapha khaphʉ nʉ? a jeeujim.
Magbaawai marau, —Eera, maraun khaphʉ nʉmgui anaajim.
52Magbaa ichdeu marag magjim:
—Mʉg iek iiur mua jaau chirʉmjã pãrau chadcha khaphʉ naawai deeum khʉʉnag jawaagjã ya chi machnaankha nʉmgui ajim. Jãg nʉm aig õor Ẽwandam igwia i jʉr nʉm khʉʉnag pãrau jaauju aai nʉmgui ajim, chadcha pãachdeuta nawe Ẽwandamau ich i jaaumienag phãpitarrjã khaphʉnaa mʉg iek iiur mua jaau chitʉmjã khaphʉ naawai.
Jesús Nazaret phobor ee
(Mr. 6:1-6; Lc. 4:16-30)
53Mag ejemplodamau nem jaau sĩewi jaau aaipabaadeewai aigmua mawia 54jũrr Nazaret phoborog petajim, ich bãautarr aar. Mam pabaimaa, Ẽwandam iek jaau nʉm ũraag maach meeun biirdʉajem deg dubwi, õrag Ẽwandam iek jaaubaadejim. Mag irua jajawagmam ũrwia jʉ̃gderraa nʉm iekhau warag amach eepaita, —¿Magʉm ichdeu jamta khaugjimta mag jaaumáma? ¿Jãga ichdeu jãg õor monaau nʉrrʉ́ma? anaa ĩchab, 55Keena, ¿pãrau oowai jãg woun José pa waumie ag iewaa khabá, María dʉím? ¿Jã Santiago dʉi khod khabá, José dʉi, Simón dʉi maimua Judas dʉijã agjo? 56I ʉ̃phʉʉin thum mʉig maach dʉi ich mʉg phobor ee naajem; maagwai ichjã maadeu khaphʉ nʉmgui ajierram, ich mʉiguim aawai. Mag simta, ¿jam khaugthurwiata jãg nem jaau khaauga ichdeu jaaumaajẽma? aajeejim jũrram khʉʉnau.
57Amachdeu mag nʉm gaaimua irua nem jaau simjã asekasba, warag i dʉi khĩir khʉʉukha phobaadejim. Pari magbaa ich Jesuu amag, —Chadcha deeum durram khʉʉnaun mʉg Ẽwandam iek jaau wenʉrrʉm khʉʉnag eenaa am dʉi ajapha aba aajeeb ajim. Mamʉ mag sim, jũrr dich di aig wa dich bãautarr durrpai chan magjã magba warag am kha isee aajerramgui ajim, jũrr amach khĩircha.
58Mag, warag maig chan Jesuu õor mor masim khʉʉn pom monaaubajim, amachdeu i iek ʉkhamapha narr aawai.
© 2011, Wycliffe Bible Translators, Inc. All rights reserved.
