Génesis 17の有名な聖句

シェア

Usa ꞌain ka Abram axa noventa ꞌimainun nueve baritiañu ꞌikë, Nukën ꞌIbun amiribishi ami mëratëkënkin ësokin kakëxa: —ꞌËx kana min ꞌIbu Dios kamabi kushiñuira a ꞌain, usa ꞌain kamina ꞌëx kuëënkësabi ꞌoíshi tsóanan ꞌëx kikësabiokin kamabi ñu ꞌati ꞌain

ꞌimainun kamina bërí Abram kakin anëkë ꞌitima ꞌain. Usa ꞌain ka min anë bërí ꞌia Abraham, ꞌën kana mi bëtsi bëtsi ëmanu ꞌikë unikaman rara ꞌiminuxun ꞌain.

ꞌËn kana achúshi ñu mibëtan ꞌain ꞌimainun kana min rëbúnki kamabëtanribi ꞌanuxun ꞌain, usa ꞌain kana ꞌëx min Dios xënibua ꞌaínbi ꞌiti ꞌain, ꞌianan kana atun Diosribi ꞌinuxun ꞌain.

—Ënë ñu kana mibëtan ꞌain kamina kuati ꞌain: Mix kamina ꞌaisamaira bëtsi bëtsi ëmanu ꞌikë unikaman rara ꞌinuxun ꞌain

Kakëxun ka Nukën ꞌIbu Diosan kakëxa: —ꞌËn mi kakë ax ka ësakin mi kakë ꞌiaxa min xanu Sara ax ka achúshi bëbu tuá bakënti ꞌikën, bakënia kamina min a tuá Isaac kakin anëti ꞌain. Abëtan kana ꞌën achúshi ñu asérabi ꞌati ꞌain, ax ka xënibua ꞌaínbia sinánun aín rëbúnki kamabëtan ꞌakë ꞌiti ꞌikën.

Mi ꞌimainun min rëbúnkikama kana kamabi Canaán me anumi bërí tsókë ënë ꞌinánti ꞌain, ax ka min rëbúnki kamaxa xënibua ꞌaínbi anu tsóti ꞌikë ꞌimainun kana ꞌëx atun Dios ꞌiti ꞌain.

Usakian Nukën ꞌIbu Diosan kakëx ka Abraham rantipuruni memi bëtiki tsóbuti, ësokin sinani kuaiakëxa: ¿Achúshi unin kara cien baritiañu ꞌixun bëchiti ꞌik? ¿ꞌImainun kara Saran noventa baritiañu ꞌixun achúshi tuá ꞌati ꞌik? Ësakin ka Abrahamnën sinánkëxa.

Usakin katankëxun ka Nukën ꞌIbu Diosan ësokinribi Abraham kakëxa: —Bërí ka min xanu ax Sarai kakin anëkë ꞌitima ꞌikën. Aín anë ka bërí Sara kakin anëkë ꞌiti ꞌikën.

ꞌUnántiorakakin kamina aín nëtokë ñu rëbu aín maxaka ꞌikë a tëati ꞌain, ënëx ka ꞌën mibëtan ꞌakë achúshi ñu a ꞌunánti ꞌikën, ësokin ꞌakin kamina ꞌunánti ꞌain nun kananuna achúshi ñu ꞌa kixun.

ꞌAínbi ka ꞌën achúshi ñu mibëtan ꞌakë ax min bëchikë Isaac min xanu Sara ënuax achúshi baritia ꞌikëbë anun ꞌiti nëtë ꞌikëbë bakënkëbë ꞌën ꞌakë ñu ax anubi ꞌiti ꞌikën.

Bërími ësokin ꞌakë ënuxun, kamina kamabi uni mix abë ꞌikë unikaman bëchikënëxa bëbu tuá bakënia mapai achúshi ꞌimainun rabë́ ꞌimainun achúshi nëtë ꞌikëbëtan aín nëtokë ñu rëbu ain maxaka tëati ꞌain, min ñu mëëxunkë uni ꞌimainun min kuríkinënbimi bëtsi menua marukë bëtsi unibi ka aín nëtokë ñu rëbu tëakë ꞌiti ꞌikën. ꞌËx kikësabiokin kamina ꞌunánti okin bëtsi ꞌakësa ꞌakësaribi okin aín nëtokë ñu maxaka ꞌën mi kakësabiokin ꞌati ꞌain. Usakinmi ꞌën mibëtan ꞌakë achúshi ñu ax ka mitsun naminu ꞌunántiokë ꞌiti ꞌikën, usa ꞌain ka mitsun ꞌëbëtan achúshi ñu ꞌakë ax këñútimoi ꞌiti ꞌikën.