Basketo - 2014 BSE (NT) Drama

Basketo - 2014 BSE (NT) Non Drama

ቶ̈ፊሎሶ̇! ታ̈ኒ ታ ማጻ̈ፊን ቲ̈ኖን ጋልዳ ዬሱ̈ሲ ፌ ታማ̈ርሳ̇ዚንዲኬ ፌ ኦ̈ዚን ዣማ̇ሪኖ ኬሊ̇ንፖ ኤ̈̇ራ ፌ ማራ̇ጺኖ ሃዋ̈ራታንቦ ጌ̈ሻ̇ ኣያ̇ና ጎይባራ ኢንታ̇ ኪ̈ቲኖፖ ዎሃ ፉዳ ኣፋ ሉካ̇ዝ ቃሚ̇ን ዬሊ̇ዝ ዲራስ ኦ̈ኖ ኦ̈ሲን ዎይ ጻ̈ፊኔ። ኢ ዎይሊን ሜታ ኤካ̇ር ዓይቂ̇ኖፖ ዓኒ ዓይቃ ጋርታ̇ፖ̇ ዲንዳር ሼምፓባር ዎንዶ̇ ዎይሊን ኣማ̇ንዝ ማርኪቲባራ ኢንታ̇ብ ፌ̈ና ቤይሲዴ። ኦይዲ ታጳ̇ ቃም ኢንታ̇ባር ቤንቲ̇ ሙታ̇ ጾ̈ሳ̇̇ ካ̈ቲቲ ጎይ ኢንታ̇ ታማ̈ርሲዴ። ፔቲ̇ ጋላስ ኢንታባር ዎልኣ ዶኣር ቡና ኡሽኪ̈ርዶሪ ኢንታ̇ኮ “ቴ ሶ̈ላምባ̇ር ዪንቲ̇ ሲስኪ̇ኖንዶ̇፤ ታ ባ̈ባ ዪንታ̇̇ብ ኢሚ̇̈ሬ ጋ̈ሪ ታስፋ ኢሚ̇ኖን ና̈ጊብትዶኬ፥ ዬሩሳላማፖ̇ ኬስካ̇ሪ ሜላ ቤስ̇ ሉካፒ̇ቴ። ዋ̈ኒ̇ሲ ዋ̈ባር ጣማ̇ቂኔ፤ ዪንቲ̇ ጊላ̇ ቃማ̇ፖ̇ ዓኒ ጌ̈ሻ ኣያ̇ናባር ጣማ̇ቂንቲ̈ሬ” ጌይዴ።
ኢንታ̇ሬ ዎልኣ ሺ̈ቃር ዎንጋርታ ኢ̈ኮ “ጎዳ̈ዶ! ኔ ኢስሬ̈ላ ካ̈ቲቲን ማሃር ኤሳ̇ዝ ኬሊ̇ን ዓት ዬሊ̇ና?” ጋ̈ር ኢያ ኦይጪ̇ዴ።
ኢያር ኢንታ̇ኮ “ጾ̈ሳ̇̇ ባ̈ባ ፌ ሲልጣ̈ናባር ባዝ ዓና̇ ዓኒ̇ ቃምባር ማ̈ቃ̇̈ሬ ጌይኖ ኬሊ̇ን ዪንቲ̇ ኤራንዳ̇ቦ ዳንዳኢባ̈ሴ። ዎቲናካር ጌ̈ሻ̇ ኣያ̇ና ዪንታ̇ ጋልዳ ሶ̈ቤጌይን ዪንቲ̇ ዎልቃ ዲጚ̈ሬ። ዬሩሳ̈ላም ካታማ ጋርታ፣ ዪሁዳ ጋዳ̇ ዎይ፣ ሳማ̈ራ ጋዳ̇ኬ ዓጛር ሳ̈ዝ ቡጊድ ዬሊ̇ዝ ዲራስ ዪንቲ̇ ታ̈ብ ማርካ̇ ማ̈ቂ̇̈ሬ” ጌይዴ።
ዪኖ̇ ኢ ጌዪኖፖ̇ ዓኒ ኢንቲ̇ ኢያ ቤቃ̇ምባራ ፉ̈ዳ ኣፋ ሉኪ̇ዴ፤ ሻ̈ራር ኢያ ጌ̈ሚዴ።
ኢ ሉካ̇ምባራ ኢንቲ̇ ፉዳ ኮት ዎቲ ኢያ ቤቃ ጋልዳ ዎዶን ቦ̈ርስ ኣፊላ ማኢኖ ናምኢ ኣሳን ኢንታ ላፍ ኤቃ̇ሪ ኢንታኮ “ዪንቲ̇ ጋሊላ ጋዶ̇ ኣሳን! ፉዳ ኣፋ ቤቂ̇ሙታ̇ ዓይ ኣብዛብ ኤቂ̇ና? ዓ ዪንቲ̇ ቤቃ̇ምባር ፉዳ ኣፋ ሉኪ̇ኖ ዬሱ̈ሲ፥ ዓና̇ ኢዝፌ̈ን ማ̈ቂ̇ ዬ̈ይሬ” ጌይዴ።

ኢናፖ̇ ኢንቲ̇ ዳብራዛይታ ጋ̈ዝ ኢንዲን ጋልዳፖ̇ ዬሩሳ̈ላም ካታማ ማ̈ቂ̇ ዬ̈ይዴ። ዪና̇ ቤሲ̇ንዳ ዬሩሳ̈ላማፖ̇ ፔቲ̇ ኪሎሜ̈ቲራ ማ̈ቃ̇ምፔ̈ን ጎታ̇̈ሬ። ኢንቲ̇ ካታሚን ጋርታ̇ ጌሊኖፖ̇ ዓኒ ፌ ዶኣዝ ፎ̈ቂን ጋልዳ ኬስኪ̇ዴ። ኢንታ̇ሬ ጴ̈ጥሮ̈ሳ፣ ዋ̈ኒ̇ሳ፣ ዓይቆ̈ባ፣ ኢንዲራ̈ሳ፣ ፊልጶ̈ሳ፣ ቶ̈ማ̈ሳ፣ ባርቶሎሞ̈ሳ፣ ማ̈ቶ̈ሳ፣ ኢልፎ̈ሳ ናኣ ዓይቆ̈ባ፣ ፌ ጋዲምቦ ሚጪንቲ̇ዛ ሲሞ̈ናኬ ዓይቆ̈ባ ናኣ ዪሁዳኬ። ዪን ዎይኬ ማ ማጫ̇ንኬ ዬሱ̈ሳ ኢንዲ̇ን ማ̈ራሚባራ ማ ኢ ኢን̇ናኣንባር ዎልኣ ፔቲ̇ ቡ̈ዳባር ማ̈ቃ̇ር ዎ̈ሳብ ዎልኣ ሺ̈ቂ̈ሬ።
ዪኒ̇ ኬሊ̇ንባራ ጴ̈ጥሮ̈ሲ ፔቲ̇ ጼ̈ታኬ ላምታም ኣስ ማ̈ቃ̇ምፔ̈ኖ ኣማ̇ኒኖ ኣሳን ጊዳ̇ ኤቃ̇ሪ ኢንታ̇ኮ “ቴ ኢሺንታ̇ን! ዬሱ̈ሳ ኤ̈̇ምፔ̈ኒ ኣሳን ቲ̈ኒ ኤኪ̇ ዬይኖ ና̈ሳ ዪሁዳ ባዚን ጌ̈ሻ ኣያ̇ና ቲ̈ኒታር ዳ̈ዊታ ኖ̈ናባር ሶ̈ሊኖ ጌ̈ሻ̇ ማጻ̈ፋ ቃ̈ሊን ፎቲንታ̇ንዳብ ኮሻ̇̈ሬ። ኢ ኑ ጋርታ̇ፖ̇ ፔታ̇ና ማ̈ቃ̇ር ፋይዲንታሪ ዓና̇ ኦ̈ሲን ጋልዳ ቤንታ̇ር ኑባር ኦ̈ኖ ኣሴ” ጌይዴ።
“ዎቲናካሬ ዪ ና̈ሳ̈ዲ ፌ ኢ̈ታ ኦ̈ሳባር ዲጚኖ ሚ̈ሻ̇ባር ሳ̈ዝ ዎጚዴ፤ ኢና ፌ ሚልባር ጉፕ ጋ̈ር ኬዳ̇ር ኢ ሚላ̇ ዳርኢዴ፤ ኢ ሜርማዳር ዎይ ውልኢንቲዴ። ባዝ ዪ̈ና̇ ዬሩሳ̈ላም ጋዳ̇ ዶኢዝ ኣሳን ዎይንቦ ሲስኪንታ̇ዴ፤ ዪና̇ ዎጚንቲ̇ኖ ሳ̈ዚንዳ ኢንታ ኖ̈ናባራ ‘ኣካልዳ̈ማ’ ጌዪንታ̇̇ር ጼይጊንታ̇ዴ፤ ኢዝ ቢርሺቺ̇ንዳሬ ‘ሱ̈ ጋዴ’ ጌንቴ።
“ዪና̇ ማ̈ቂ̇ኖንዳ̇ ማዝሙራ ማጻ̈ፋ ጋልዳ፥
“ ‘ኢ ዶኢ ቤሲ̇ን ካይዝ ማ̈ቆ̇፤
ኦ̈ናካር ኢና ዶኣፖ̇ ጋ̈ቤ’
ማ ‘ኢ ሲልጣ̈ኒን ሜላ ኣሲ ኤኮ̇’ ጋ̈ሪ ጻ̈ፊንቲኖኮታ̇ቦ።
ዬሱ̈ሲ ኑ ጊዳ̇ ጋርታ̇ ቢሪንታ̇ዝ ኬሊ̇ምፖ̇ ኤ̈̇ሪ ዪ̈ዳሬ ዋ̈ኒ̇ሲ ኣስ ጻማ̇ቂ̇ስ ኤ̈̇ኖፖ̇ ኤ̈̇ሪ ዬሱ̈ሲ ፉዳ ኣፋ ሉኪ̇ኖ ቃሚ̇ን ዬሊ̇ዝ ዲራስ ኑባር ዎ ኣስ ማራ̇ጺንታ̇ንዳብ ኮሺ̇̈ሬ። ኣባ ጌይን ኣሳን ዪን ጋርታፖ̇ ፔቲ̇ ኣሲ ኑባራ ዬሱ̈ሲ ዓይቃ ጋርታ̇ፖ̇ ዲንዲኖን ማርኪቲዝ ኣስ ማ̈ቃ̇ንዳብ ኮሺ̇̈ሬ” ጌይዴ።
ኢናፖ ኢንቲ̇ ናምኢ ኣስ ሺ̈ሺ̇̈ዴ። ዪንሬ ቤርሳባ̈ሳ ዎይ ዮስጦ̈ሳ ጌይዛ ዮ̈ሴፋኬ ማ̈ታ̈ሳ። ኢናፖ̇ ኢንቲ̇ ዎ̈ሲ̇̈ርዶሪ “ኣስ ዎይ ቡ̈ዳ ኤሪዛ ጾ̈ሳ̇̇̈ዶ! ዓን ናምኣን ጋርታ̇ፖ̇ ኔ ኦ̈ና ማራጺኖኮ ኑ̈ና ቤይሳቤ። ዪሁዶ ፌ̈ብ ማ̈ቂ̇ዝ ቤስ̇ ሉካ̇ሪ ኣሺ̇ኖ ኦ̈ሲ̇ምቦ̇ ኢ ቤሲ̇ን ሃ̈ዋ̈ራ ማ̈ቃ̇ር ኦ̈ምፔ̈ኖ ኦ̈ናኮ ኑ̈ና ቤይሳቤ” ጌዪ ዎ̈ሲ̇ዴ። ኢንቲ̇ ናምኣንቦ ኢጻ ቃጺ̇ዴ፤ ኢጺንዳ ማ̈ታ̈ሳ ጋልዳ ኬዳ̇ዴ፤ ዪ̈ኮታ̇ቦ ኢ ታጶ̇ ፔቲ̇ ሃዋ̈ራታንባራ ፋይዲንቲ̇ዴ።

聞く ሃዋ̈ 1