Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

फसे का तेवार पेल्याँ जद्याँ ईसू जाणग्यो के, “मारी वाँ घड़ी आ पूगी हे के, मूँ दनियाँ छोड़न बापू का नके जाऊँ।” तो ईसू आपणाँ लोगाऊँ ज्यो दनियाँ में हाँ, जस्यान परेम वो राकतो हो आकरी तईं वस्यानीस परेम राकतो रियो।
जद्याँ ईसू अन वींका चेला हाजकाँ की टेम में खाणो खारिया हा, वीं टेम समोन का पूत यहूदा इसकरियोती का मन में सेतान ईसू ने धोकाऊँ पकड़वाबा की बाताँ नाक दिदी ही। ईसू, यो जाणता हा के, “परमेसर हारोई मारा हाताँ में कर दिदो हे अन मूँ परमेसर का नकेऊँ आयो हूँ अन परमेसर का नके जावूँ हूँ।” ईं वाते ईसू खाणो खाता तका उटन आपणो कुरतो उतार दिदो अन हस्ताड़ो आपणी कमर पे लपेट दिदो। तद्याँ गड़ा में पाणी भरन चेला का पगाँ ने धोबा लागो अन जणी हस्ताड़ाऊँ वाँकी कमर बन्दी ही वणीऊँ वाँका पगाँ ने पूँछबा लागो।
जद्याँ वो समोन पतरस का नके आयो तद्याँ पतरस वाँने क्यो, “हो परबू, कई थाँ मारा पगा ने धोवो?”
ईसू वींने क्यो, “ज्यो मूँ करूँ, थूँ ईंने अबाणू ने जाणे हे, पण पछे हमज जाई।”
पतरस वींने क्यो, “अस्यो कदी ने वेई के, थाँ मारा पगाँ ने कदी धोवो।”
यो हुणन ईसू वींने क्यो, “यद्याँ मूँ थाँरा पग ने धोऊँ, तो थूँ मारो चेलो ने हे।”
समोन पतरस वींने क्यो, “हो परबू, मारा पगा नेईस ने, पण हात अन माता ने भी धो दो।”
ईसू वींने क्यो, “ज्यो हापड़ चुक्यो हे वाँने पगा के अलावा कई धोबा की जरुरत ने हे। पण एक ने छोड़न थाँ हाराई सई हो।” ईसू तो आपणाँ पकड़ाबावाळा ने ओळकतो हो ईं वाते वणी क्यो, “एक ने छोड़न थाँ हाराई सई हो।”
जद्याँ वो वाँका पगा ने धो चुक्यो अन आपणाँ कोट पेरन पाछो आपणी जगाँ पे बेटग्यो, तो वो वणाऊँ केबा लागो, “कई में ज्यो किदो वींका बारा में थाँ हमज्या? थाँ मने ‘गरू’ अन ‘परबू’ केवो हो। थाँ सई केवो हो, काँके मूँ वोईस हूँ। यद्याँ मूँ परबू अन गरू वेन थाँका पगाँ ने धोया तो थाँने भी एक दूजाँ का पगा ने धोणा छावे। काँके में थाँने नमुनो बता दिदो हे के, जस्यान में थाँका हाते किदो हे, थें भी वस्यानीस करता रेवो। मूँ थाँने सई-सई केवूँ हूँ, हाळी मालिकऊँ मोटो ने हे, अन नेई खन्दायो तको आपणाँ खन्दाबा वाळाऊँ। अबे थाँ यो हाँच जाणग्यो हो अन यद्याँ थाँ अस्यान करो तो परमेसर थाँने आसीस देई।
“मूँ थाँका हाराई का वाते ने केवूँ हूँ, जाँने में चुण लिदा वाँने मूँ जाणूँ हूँ, पण यो ईं वाते हे के, पुवितर सास्तर को यो लेक पूरो वे, ‘ज्यो मारा रोटा खावे हे, वीं मारा पे लात उठई।’
“अबाणू वींके वेबा के पेल्याँ थाँने ईं वाते बतारियो हूँ ताँके जद्याँ यो वे जाई तो थाँ विस्वास करो के, मूँ वोईस हूँ। मूँ थाँने सई-सई केवूँ हूँ के, ज्यो मने खन्दाबावाळा ने माने हे, वो मने माने हे। अन ज्यो मने गरेण करे हे, वो मने खन्दाबावाळा ने भी गरेण करे हे।”

या बाताँ क्या केड़े ईसू मन में घणो दकी व्यो अन क्यो, “मूँ थाँने सई-सई केवूँ हूँ के, थाँकामूँ एक जणो मने धोकाऊँ पकड़ा देई।”
तद्याँ चेला होच में पड़ग्या अन एक दूजाँ का मुण्डा ने देकबा लागा के, ईं किंका बारा में केरिया हे। ईसू चेला मेंऊँ एक चेलो लाड़लो केवातो हो, वो ईसू का नके बेटो हो। तद्याँ समोन पतरस वींका आड़ी हानी किदी के, वो ईसुऊँ पूछे के, “वो किंका बारा में केरिया हे?”
तद्याँ वो ईसू का कान्दड़ा का नके मुण्डा लेजान क्यो, “हो परबू, वो कूण हे?”
ईसू वाँने क्यो, “जिंने मूँ यो रोटी को कवो थाळी में डुबान देवूँ वोईस हे।” अन वणा कवो डुबान समोन इसकरियोती का पूत यहूदा ने दिदो। कवो लेताई सेतान वींमें धसग्यो।
तद्याँ ईसू वींने क्यो, “ज्यो थूँ करबा ने जारियो हे, वो जट कर।” पण जीमणा में बेठबावाला मेंऊँ कुई भी ने हमज्यो के, ईसू वणीऊँ या बात काँ किदी। यहूदा का नके रिप्या की नोळी रेती ही। ईं वाते वाँकाणी यो हमज्या के, ईसू वणीऊँ केरियो हे के, ज्यो कई आपाँने तेवार के वाते छावे वो मोल लिले कन पछे गरीबा ने कई दिदे।
तद्याँ यहूदो रोटी को कवो लेन तरत बारणे परोग्यो अन या रात की टेम ही।

जद्याँ यहूदो बारणे परोग्यो तो ईसू क्यो, “अबे टेम आग्यो हे मूँ, मनक का पूत मेमावान व्यो हूँ अन माराऊँ परमेसर की मेमा वेई। यद्याँ माराऊँ परमेसर की मेमा वेवे हे तो तरत परमेसर खुद मूँ मनक का पूत ने मेमा देई।”
“हो मारा प्यारा बाळकाँ, मूँ थाँका लारे थोड़ीक देर तईं हूँ, थें मने होदो अन जस्यान में यहूदी अदिकारियाऊँ क्यो हे, वस्यानीस मूँ थाँकाऊँ भी केवूँ हूँ, ‘जटे मूँ जारियो हूँ वटे थाँ ने जा सको।’ मूँ थाँने एक नुवी आग्या देरियो हूँ के, एक-दूजाऊँ परेम राको। जस्यान में थाँकाऊँ परेम किदो वस्यानीस थाँ भी एक-दूजाऊँ परेम राको। यद्याँ थाँ एक-दूजाऊँ परेम राको, तो अणीऊँ हाराई जाण जाई के, थाँ मारा चेला हो।”

समोन पतरस ईसुऊँ क्यो, “हो परबू, थाँ कटे जावो हो?”
ईसू वींने क्यो, “जटे मूँ जावूँ हूँ वटे थूँ अबे मारा पाच्छे ने आ सके, पण ईंका केड़े थूँ मारा नके आई।”
पतरस वाँने क्यो, “हो परबू, अबाणू मूँ थाँके पाच्छे काँ ने आ सकूँ हूँ? मूँ तो थाँका वाते मारो जीव देबा ने त्यार हूँ।”
ईसू वींने क्यो, “कई थूँ हाँची में मारा वाते आपणो जीव देई? मूँ थाँराऊँ सई-सई केवूँ हूँ के, कूकड़ो जद्याँ तईं ने बोली वतरे थूँ तीन दाण मने ओळकबाऊँ नट जाई।”

聞く यहुन्ना 13