If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

हफ्ते रे पैले रोज्जे तड़के ही से जनानियां कब्र पर तिस खुशबू वाले लेप जो, जिस जो तिन्हा ने तैयार कित्या थिया, लेई करी आई। तिन्हा ने कब्र का पत्थर घिरे रा दिख्खेया, जे कि कब्र रे पराले रखे दा थिया तां से अन्दर गई, पर तिन्हा जो प्रभु यीशु री लास नी मिल्ली जां से इस सोच बिच ही थी कि, तिन्हेरे का लशकदे कपड़े पाये रे दो मणू आई खड़ी होए डरे रे मारे तिन्हा ने अपणे मूह् जमीन पास्से करी दित्ते दो मणूआं ने तिन्हा जो बोल्लेया जे जिन्दा है तिसजो तुसा मुर्दे बिच किजो तोपदे हिन? से कब्र बिच नी हिन से जिन्दा होई गेरे हिन चेता करो जां से हल्ले गलील बिच ही थिये, तिन्हा ने तुसा जो बोल्लेया थिया तिन्हा ने बोल्लेया थिया, कि मणू रे पुत्तर, जे मैं ही है, जो पाप्पी मणूआं रे हत्थां पकड़ाया जाणा, अते सुली पर चढ़ाया जाणा अते तिज्जे रोज्जे जिन्दा होई जाणा ए सब हुणा पक्का थिया। तां तिन्हा जनानियां जो यीशु री गल्लां चेता आई से जनानियां क्रब का वापस हटी आई अते तिन्हा ने ए सब गल्लां तिन्हा ग्यारा चेल्‍लेयां जो अते होर भी मणूआं जो सूणाई। से जनानियां मगदला सहर री मरियम, योअन्ना, अते याकूब री मां, मरियम थी अते तिन्हा कन्ने दूज्जी जनानियां भी थिया जिन्हा जे ए गल्लां प्रेरितां जो दस्सी, पर तिन्हेरी गल्लां चेल्‍लेयां जो रास नी आई अते तिन्हा ने तिन्हेरी गल्लां रा विश्वास नी कित्तेया पर पतरस खड़ा होया अते यीशु री क्रब रे पास्से दौड़ी गेया तिन्ने थल्ले झुक्की करी दिख्खेया तां तिसजो सन रे कपड़े रे अलावा होर किच्‍छ भी नी लिब्बेया अते से ए सब किच्‍छ दिख्खी करी अपणे मन बिच बुड्बुड़ान्दे चली गेया।

तिसी ही रोज यीशु रे होर चेल्‍लेयां बिच का दो जणे, यरुशलेम सहर का कोई ग्यारह किलोमीटर दुर इम्माऊस ना रे ग्रां जो जाया करदे थिये। जे गल्लां होई थी, तिस बारे आपस बिच गल्ल बात करेया करदे थिये जां से तिन्हा गल्लां जो इक्क दूज्जे कने लाया ही करदे थिये कि तखणी यीशु तिते आई पूज्जे अते तिन्हा कन्ने कन्ने चली पे, पर तिन्हा ने यीशु जो पछाणेया नी किजोकी परमेश्वर ने तिन्हा जो यीशु, यीशु ने तिन्हा जो पछानणा नी दित्तेया, यीशु ने तिन्हा जो पूच्छेया, ए कुण गल्लां हिन जे तुसा हन्डदे हन्डदे इक्क दूज्जे कने लाया करदे हिन? से हन्डदे हन्डदे से रुकी गे अते जे गल्लां होईयाँ तिस वजह कने तिन्हेरे मूह् लटकेरे थिये। तिन्हा बिच का क्लियोपास ना रा इक्क मणू ने यीशु बोल्लेया, यरुशलेम सहर बिच रैणे वाला तू कल्ला इक्क इदेया मणू है जिस जो नी पता है कि पिछले दिनां बिच कै होया थिया? यीशु ने तिन्हा जो पूच्छेया, कुण देई गल्लां? तिन्हा ने यीशु जो बोल्लेया, ए सब गल्लां नासरत कस्बे रे यीशु रे बारे बिच हिन। से इक्क इदेय मणू थिये जिन्हा ने जे किच्‍छ कित्ता अते बोल्लेया तिसजो परमेश्वर अते सबणी मणूआं जो ए दिखाई दित्ता कि से इक्क बडे़ शक्तिसाली भविष्यद्वक्ता थिये जिन्हा ने बड़े चमत्कार कित्ते, ते लोक्कां री नजर बिच परमेश्वर रे बड़े सामर्थी गुरु थिये। अते असा रे बड्डे पुरोत्त अते यहूदी धर्म गुरुआं ने यीशु मौत री सजा दैणे तांइ पकड़वाई दित्तया अते मणूआं ने तिन्हा जो ने सुली पर चढ़ाई दित्ता असी सोच्चे दा थिया कि तिन्हा ने इस्राएल जो गुलामी का छुड़ाणा अते इन सब गल्लां जो होए दे अज्ज तिज्जा रोज है, पर असा जो आस थी कि ये ही इस्राएल जो रोमी साम्राज्य का छुटकारा दैणा पर इन्हा सारी गला जो होयरे तिसरा दिन है। अते अवे असा री टोल्ली री जनानियां ने असा जो सोच्चा बिच पाई दित्ते दा है। से अज्ज भयागा तड़के ही कब्र पास्से गई थी, अते तिन्हा जो तित्ते यीशु री लास नी मिल्ली, तिन्हा ने तित्ते का आई करी असा जो बोल्लेया कि तिन्हा स्वर्गदूतां रा दर्शन दिख्खेया अते तिन्हा बोल्लेया थिया कि यीशु जिन्दा हिन, अते फिरी असा रे बिच का किच्‍छ कब्र जो गे अते जिय्यां तिन्हा जनानियां ने बोल्लेया थिया तिय्यां ही दिख्खेया कि यीशु री लास तित्ते नी थी तां यीशु ने तिन्हा दो चेल्‍लेयां जो बोल्लेया, तुसा बड़े बेवकूफ हिन भविष्यद्वक्ता ने शास्त्र बिच जे किच्‍छ बोल्लेया थिया तिन्हा गल्लां पर विश्वास करणा तुसा जो बड़ा मुशकल लग्गेया करदा है? ए जरुरी थिया कि मसीह ए दुख चुक्की करी अपणी महिमा बिच आओ, तां यीशु ने मूसा रे कानून अते सारे भविष्यद्वक्ता री कताबां का सुरु करी के, सारे पवित्रशास्त्र बिच लिखी री गल्लां बिच का खुद रे बारे बिच तिन्हा जो समजाया। से जां तिस ग्रां रे नेड़े पूज्जे, जित्ते से रेन्दे थिये, यीशु रे बर्ताव कने इय्यां लग्गेया कि जिय्यां तिन्हा ने अग्गे जाणा थिया पर तिन्हा ने यीशु पर बड़ा जोर पाया अते बोल्लेया, तुसा असा रे का इत्ते रुकी जाओ किजोकी सूरज डूब्बी गे रा है अते सांज्ज होणे वाली है आखिर यीशु तिन्हेरे तित्ते रुकणे तांइ तिन्हा कने अन्दर चली गे जां यीशु तिन्हा कने रोट्टी खाणे जो बैठ्ठे तां तिन्हा ने रोट्टी चुक्की अते परमेश्वर रा शुकर कित्ता फिरी तिसजो तोड़ी करी तिन्हा जो दित्ती कि तां तिन्हेरी हाख्खी खुली गई अते तिन्हा यीशु जो पछाणी लेया पर यीशु तित्ते का छुपन्त होई गे फिरी से आपस बिच बोल्णा लगे, रस्ते बिच जां से असा रे कने गल्लां करदे थिये, अते असा जो पवित्रशास्त्र बिच का समजाया करदे थिये तां असा रे दिलां बिच उम्मीद कने भरी गेया। फिरी से झट उठ्ठे अते वापस यरुशलेम सहर जो चली गे अते तित्ते तिन्हा जो गेया रा चेल्‍ले अते होर भी मणू लिब्बे अते से तिन्हा कन्ने मिल्ले। जे बोल्लेया करदे थिये, प्रभु जी, सच्ची ही जिन्दा होई गेरे हिन तिन्हा ने शमौन पतरस जो दर्शन दित्तेया। फिरी तिन्हा दोन्नां ने, जे किच्‍छ तिन्हा कन्ने रस्ते बिच होया थिया, तिसेरे बारे अन्दर बोल्लेया अते ए भी कि, जां यीशु ने रोटियां रे टुकड़े तोड़े तां तिन्हा ने यीशु जो किय्यां पछाणेया थिया।

हल्ले से तिन्हा जो ए गल्लां बोलदा ही थिया कि यीशु खुद तिन्हेरे गब्बे आई खड़े होए अते तिन्हा जो बोल्णा लगे, तुसा जो सांती मिल्ले। पर से झुरकी पे अते डरी गे तिन्हा सोच्चेया कि से कोई भूत है, पर यीशु ने तिन्हा जो बोल्लेया, तुसा किजो घबराया करदे हिन? तुसा रे दिलां बिच शक किजो आया करदे हिन? मेरे हत्थां अते पैरां जो दिख्खो ते मेरे जो छुह्ई लियो, कि मैं ही है, अते किजोकी कुसकी भूत बिच मास ते हड्डियाँ नी हुंदी जिय्यां कि तुसा मेरे जो दिखदे हिन। ए बोल्दे बोल्दे यीशु अग्गे आए, अते तिन्हा जो अपणे हथ पैर दिखाए पर तिन्हा जो खुसी भी थी अते हैरान भी थी तिस वजह कने तिन्हा जो विश्वास नी करी पांदे थिये यीशु मरे रे बिच का जिन्दे होई गेरे हिन। तां यीशु ने तिन्हा का पूच्छेया, तुसा का किच्‍छ खाणे जो है? अते तिन्हा ने पकाई री मच्छी रा इक्क टुकड़ा यीशु जो दित्ता यीशु ने तिसजो लेई करी तिन्हा सामणे खाया। फिरी यीशु ने तिन्हा जो बोल्लेया, ए से गल्लां हिन जे मैं तुसा जो बोल्ली थिया, जां मैं तुसा कन्ने थिया, कि हर से गल्ल जे मेरे बारे बिच मूसा रे कानून बिच भविष्यद्वक्ता री कताबां बिच अते भजना री कताबां बिच लिख्खी दी हिन, से सब गल्लां पूरी होणी। फिरी पवित्रशास्त्र जो समजणे तांइ यीशु ने तिन्हेरी मदद कित्ती। अते तिन्हा जो बोल्लेया, पवित्र शास्तर, बिच इय्यां लिख्खे दा है, कि मसीह दुख उठाणा अते तिज्जे रोज्जे मरे रे मणूआं बिच का जिन्दा होई जाणा। अते तिन्हेरा नां लेई करी यरुशलेम सहर अते देस-देस रे लोक्कां बिच पाप्पां का तौबा अते माफी पाणे रा सुब बसेख सुणाया जाणा। तुसा इन सब गल्लां रे गवाह हिन, ते दिख्खो, जिय्यां मेरे पिता ने वादा कित्ते रा है, तिसेरे हिसाब कने मैं तुसा पर पवित्रात्मा जो भेजणा, ते स्वर्ग का ताकत पाणे तिकर तुसा इसी कस्बे बिच ठहरे रेयो।

यीशु फिरी तिन्हा जो सहर का बाहर बैतनिय्याह रे ग्रां तांइ लेई गे अते तिन्हा जो हथ चुक्की करी आशीष दित्ती। जां यीशु अपणे चेल्‍लेयां जो आशीष देया करदे थिये तां तिन्हा जो स्वर्ग पर चुक्की लित्तेया गेया। तां तिन्हा ने यीशु री जे जे कार कीति अते बड़ी खुसी कने यरुशलेम जो हटी आए अते से लगातार मन्दिर बिच आई करी परमेश्वर री तारीफ करेय करदे थिये।

聞く लूका 24