If you have would like a copy of this version please contact info@davarpartners.org

Kulvi Outer Seraji New Testament, CC-BY-SA-4.0, The Love Fellowship (Text). Kulvi Outer Seraji New Testament Audio Bible, CC-BY-SA-4.0, Davar Partners International, 2022 (Audio).

औटर सेराजी  स्टैण्डर्ड वर्शन

This work is licensed under Creative Commons Attribution-ShareAlike 4.0 License.

बेतनियाह नांओंए गराऊंऐं त एक लाज़र नांओं मणछ बमार। तेऊए ती दूई बैहणी मरिअम और मार्था। अह ती सह ई मरिअम, ज़ुंणी खुशबूदार किम्मती तेला करै प्रभू ईशूए च़रणैं मल़अ त और आपणैं मुंडे शराल़ा करै ईशूए खूर टुशै तै, सह बमार लाज़र त तेसो सकअ भाई। तेऊए बैहणी दैनअ ईशू लै समाद, “हे प्रभू, ज़हा संघै तूह बडी भारी झ़ूरी डाहा, सह आसा बमार।”
एसा गल्ला शूणीं बोलअ ईशू, “अह बमारी निं मौता लै आथी पर अह आसा परमेशरे प्रतपा हणां लै, कि इना महान कामां करै हुंह परमेशरो शोहरू तेऊए महान शगती रहैऊई सके।”
ईशू डाहा त दूई बैहणी मार्था मरिअम और तिन्नें भाई लाज़रा संघै बडी झ़ूरी। ईशू का लागअ थोघ कि लाज़र आसा बमार पर सह ज़िधी त; सह रहअ दूई धैल़ै तिधी। तेखअ बोलअ तेऊ दूई धैल़ै बाद आपणैं च़ेल्लै लै, “च़ाल्ला हाम्हां डेऊणअ ऐबै यहूदा लाक्कै लै।”
च़ेल्लै बोलअ ईशू लै, “हे गूरू, यहूदी च़ाहा ताह अज़ी बी पात्थरा करै मारनअ, तैबी कै तूह तिधा लै च़ाहा डेऊणअ?”
ईशू दैनअ तिन्नां लै ज़बाब, “धैल़ीए कै च़ार पहर निं हंदै? ज़ै कुंण धैल़ी हांढे, तेऊ निं ठोहल़ लागदी किल्हैकि तेऊ का शुझिआ संसारो प्रैशअ। पर ज़ै कुंण राची हांढे, तेऊ लागा ठोहल़ किल्हैकि राची हआ न्हैरअ।” ईशू बोली ईंयां गल्ला तिन्नां ई का, तेखअ बोलअ च़ेल्लै लै, “म्हारअ साथी लाज़र गअ सुत्ती, हुंह च़ाल्लअ तेऊ झ़ैऊंदअ डेऊई।”
तेखअ बोलअ च़ेल्लै तेऊ लै, “हे प्रभू, ज़ै सह सुत्ती गअ, तै कै अह बच़ी जाणअ?” ईशू बोलअ त तिन्नां लै कि लाज़र गअ सुत्ती, पर तिंयां समझ़ै कि तेऊ बोलअ इहअ कि सह आसा निंजा सुत्तअ द। तेखअ बोलअ ईशू तिन्नां लै साफ-साफ, “लाज़र गअ मरी, मुंह आसा एते खुशी कि हुंह ज़ेभै तेऊ प्राण शोटै हुंह निं तेभै तिधी थिई, ताकि तम्हां विश्वास होए। ऐबै च़ाल्ला हाम्हां डेऊणअ तेऊ सेटा लै।”
तेखअ थोमा, ज़हा लै दिमुस बोला, आपणैं साथी च़ेल्लै लै बोलअ, “च़ाल्ला हाम्हां बी हुअ एऊ संघै मरदै डेऊणअ।”

ज़ांऊं तिंयां तिधी पुजै ता, ईशू का लागअ इहअ थोघ कि लाज़रा हुऐ घोरी दाबी च़ार धैल़ै। बेतनियाह त येरुशलेम नगरी का कोई दूई मील दूर। बडै भारी यहूदी तै तिधी मार्था मरिअमा सेटा तिन्नें भाई मरी करै चिंजदै आऐ दै। मार्था ईशूए गल्ला शूणीं आई बाता; तैणीं मिलदी, पर मरिअम रही घरै। मार्था ईशू लै बोलअ, “हे प्रभू, ज़ै तूह इधी हंदअ, तै नांईं त मेरअ भाई कधि मरदअ, पर ऐबै बी आसा मुंह भरोस्सअ कि ज़ुंण बी तूह परमेशरा का मांगे, सह दैणअ परमेशरा ताल्है।”
ईशू बोलअ तेसा लै, “हैल़अ निं करै, तेरअ भाई हणअ ज़िऊंदअ।”
मार्था बोलअ ईशू लै, “मुखा आसा थोघ कि ज़ेभै परमेशरा मरी करै भी करनै ज़िऊंदै तेसा बेला करनअ ताह सह बी ज़िऊंदअ।” (शधाणूं 24:15)
ईशू बोलअ तेसा लै, “हुंह करा मूंऐं दै लोगा बी ज़िऊंदै, हुंह ई दैआ तिन्नां लै ज़िन्दगी। ज़ै कुंण मुंह दी विश्वास करे, सह ज़ै मरी बी जाए, सह हणअ भी ज़िऊंदअ। पर ज़ुंण ज़िऊंदअ आसा और मुंह दी विश्वास करा, तिंयां निं मरनै। कै तूह एसा गल्ला दी विश्वास करा?”
तेसा बोलअ, “हाँ प्रभू हुंह करा एसा गल्ला दी विश्वास कि परमेशरो शोहरू मसीहा ज़ुंण एऊ संसारा दी एछणैं आल़अ त, सह आसा तूह ई।”

इहअ बोली करै सह नाठी और आपणीं बैहणी मरिअमा का च़ुप-च़ुपै बोलअ, गूरू आसा इधी, सह शादा ताह पोर्ही। इहअ शूणीं करै सह तेभी पुजी ईशू सेटा। (ईशू निं अज़ी गराऊंए पुजी त, पर सह आसा त तिधी अज़ी ज़िधी तेऊ मार्था भेटी ती।)
तिन्नैं यहूदी, ज़ुंण पांडा भितरी तिन्नां लै चिंजदै तै आऐ दै, तिन्नैं ज़ाणअ कि मरिअम नाठी हणीं घोरी सेटा लेरदी, ज़िधी लाज़र दाबअ द आसा, और तिंयां बी लागै तेसा पिछ़ू हांढदै।
ज़ांऊं मरिअम तिधी पुजी, ज़िधी ईशू त, तिधी पुजधी तेसा ईशू सेटा माथअ टेक्कअ और खूरा दी उटी बाखा लेरदी-लेरदी बोलअ, “हे प्रभू, ज़ै तूह इधी हंदअ, तै नांईं त मेरअ भाई मरदअ।”
तिन्नां लेरदै भाल़ी हुअ आपणैं मनैं दुखी, और आप्पू बी भर्हुअ तेऊओ गल़। तेखअ बोलअ ईशू मरिअम और यहूदी लै ज़ुंण तेसा पिछ़ू आऐ तै, “तम्हैं तेऊए ल्हास किधी आसा डाही दी दाबी?”
तिन्नैं बोलअ, “हे प्रभू च़ाल्ल, आप्पै भाल़।” ईशूए आछी का छ़ुटै आशू। तेखअ लागै यहूदी आप्पू मांझ़ै बोलदै, “भाल़ा अह तेऊ संघा केतरी झ़ूरी डाहा त।” पर तिन्नां मांझ़ै बोलअ कई लोगै इहअ बी, “अह ज़ुंण कांणै मणछा ठीक करदअ फिरा, इहअ बी निं करी सकअ कि सह मणछ नांईं मरदअ?”

बडअ भारी दुखी हई करै पुजअ ईशू तेसा ज़ैगा, ज़िधी लाज़र त दाबअ द। सह आसा ती एक घोर कोती दी और एकी बडै पात्थरा करै त घोरीओ मोहरअ बंद किअ द। ईशू बोलअ तिन्नां लै, “एऊ पात्थरा बदल़ा पोर्ही।”
तेखअ बोलअ तेऊ मूंऐं दै मणछे बैहणी मार्था, “हे प्रभू, तेऊ का हणीं ऐबै बास्स-शल़ैन्ह लागी दी, आझ़ गऐ तेऊ मरी च़ार धैल़ै हई।”
ईशू बोलअ तेसा लै, “मंऐं ताखा किज़ै बोलअ त कि, ज़ै तूह विश्वास करे तै भाल़णअ ताह परमेशरो प्रतप।” तेखअ बदल़अ तिन्नें सह पात्थर पोर्ही और ईशू सरगा बाखा भाल़ी करै बोलअ, “हे मेरै बाप्पू परमेशर, हुंह करा ताल्है शूकर कि तंऐं हेरी मेरी अरज़ शूणीं। मुखा त थोघ कि तूह शूणां हर बगत मेरी, पर इहअ बोलअ मंऐं तै कि ज़ुंण मुंह फेर ईंयां लोग आसा, ईंयां बी विश्वास करे हुंह आसा तंऐं छ़ाडअ द।”
इहअ बोली करै पाई ईशू ज़ोरै हाक, “हे लाज़र, बागा लै निखल़।” ज़ुंण लाज़र मरी गअ त, सह निखल़अ घोरी का बागा लै! तेऊए देही ती मरगे झिकल़ै करै पल़ेठुई दी और तेऊओ मुंह त कुआया करै बंद। तेखअ बोलअ ईशू तिन्नां लै, “एऊ खोल्हा पोर्ही और एऊ दैआ डेऊणैं।”


तेखअ कई यहूदी मणछ ज़ुंण तिधी मरिअमा सेटा तै आऐ दै तिन्नां मांझ़ै किअ कई मणछै एऊ च़मत्कारा भाल़ी तेऊ दी विश्वास। तेखअ तिन्नां मांझ़ै दैनअ कई ज़ण्हैं फरीसी सेटा डेऊई ईशूए एऊ कामों समाद। इहअ शूणीं की बडै परोहितै और फरीसी कठा हई करै एक सभा और बोलअ, “हाम्हैं कै करा, अह मणछ ता बडै नछ़ैण च़मत्कार रहैऊआ?” ज़ै हाम्हैं एऊ लै एही ई ढील दैंदै रहे, ता सोभी करनअ तेऊ दी विश्वास कि अह आसा मसीहा, और रोमी लोगा करनअ म्हारै मांदरै और देशा दी कबज़अ।
तेखअ तिन्नां मांझ़ै काईफा ज़ुंण तेसा साला माहा परोहित त, तेऊ बोलअ, “तम्हैं करा एही गल्ला कि ज़िहअ तम्हां का निं किछ़ै थोघ आथी! और नां इहअ सोठदै कि तम्हां लै आसा अह भलअ कि म्हारै लोगा लै एक मणछ मरे, सारी ज़ाती ता बरैबाद हणैं का बच़े।” सह गल्ल निं तेऊ आप्पू बाखा बोली, सह आसा त तेसा साला माहा परोहित, तेऊ की आजू हणैं आल़ी गल्ला प्रगट कि ईशू मरनअ इस्राएली लोगा लै। नां कि सिधअ तेसा ज़ाती लै, पर एते तैणीं बी कि परमेशरे छिंघुऐ दै बच्च़ै बी कठा करे। तेसा ई धैल़ी ओर्ही लागै तिंयां ईशू मारनें जोगा करदै।
तैहीता तधा पोर्ही निं ईशू यहूदी लोगा मांझ़ै प्रगटअ नाठअ, पर तिधा का बणां नेल़ देशै एकी ईफराईम नांओंऐं नगरी लै नाठअ और आपणैं च़ेल्लै संघै लागअ तिधी रहंदअ।
यहूदी लोगो ओवार्णैओ थैर त नेल़ और सराज़ा का बी नाठै कई लोग येरुशलेम तेऊ थैरा लै ताकि आप्पू शुचै करी सके। (2 इतिहास 30:17) ता तिंयां लागै ईशू लोल़ै और मांदरै खल़ै हई बोलदै कि तम्हैं कै समझ़ा? कि सह ओवार्णे थैरा लै एछणअ कि नांईं? फरीसी और बडै परोहितै बी त सोभी का इहअ बोली डाहअ द कि, ज़ै कसा का ईशू शुझिए, तै खोज़ै हाम्हां का, ताकि तेऊ कैद करी सके।

聞く युहन्ना 11