If you have would like a copy of this version please contact info@davarpartners.org

Mandeali Bible, CC-BY-SA-4.0, The Love Fellowship (Text). Mandeali New Testament Audio Bible, CC-BY-SA-4.0, Davar Partners International, 2021 (Audio)

Mandeali New Testament

This work is licensed under Creative Commons Attribution-ShareAlike 4.0 License.

यीसू तेस्सा भीड़ा जो कट्ठी हुईरी देखी, होर प्हाड़ा पर चली गया। होर जेबे से तेथी तिन्हा जो उपदेस देंदे बैठी गया ता तेसरे चेले तेस वाले आये। होर यीसू तिन्हा जो किन्हें ये उपदेस देंदा लग्या:


“धन्य ऐं स्यों, जो जाणहां ऐं कि तिन्हा जो परमेसरा री जरूरत ई, क्यूंकि स्वर्गा रा राज तिन्हारा आ।
धन्य ऐं स्यों, जो दुःखी हुंहाँ ऐं, क्यूंकि परमेसरा तिन्हा जो सांति देणी।
धन्य ऐं स्यों, जो दीन ऐं, क्यूंकि परमेसरा स्यों धरती रे हकदार बनाणे।
धन्य ऐं स्यों, जो ईमानदारी किन्हें धार्मिकता मन्झ जीणा चाहे, परमेसरा स्यों रजाई देणे।
धन्य ऐं स्यों, जो दयालु ऐं, क्यूंकि परमेसरा तिन्हा पर दया करणी।
धन्य ऐं स्यों, जिन्हारे मन सुद्ध ऐं, क्यूंकि तिन्हा परमेसर देखणा।
धन्य ऐं स्यों, जो मेल कुराणे वाल़े ऐं, क्यूंकि परमेसरा तिन्हा जो आपणे बच्चे बोलणा।
धन्य ऐं स्यों, जो धार्मिकता री जिन्दगी जीणे री वजहा ले स्ताए जाहें, क्यूंकि स्वर्गा रा राज तिन्हारा आ।”
धन्य ऐं तुस्से, जेबे मेरे चेले हूंणे री वजहा ले माह्णुं तुस्सा री बदनामी करहे होर स्ताये होर झूठ बोली-बोली किन्हें तुस्सा रे बरखलाफ कई किस्मा री बुरी गल्ला बोले। तेबे खुस होर मगन हुएया, क्यूंकि तुस्सा रे कठे स्वर्गा मन्झ बौह्त बडा इनाम रखिरा, इधी कठे कि जो तुस्सा ले पुराणे ज्माने रे नबी थे तिन्हें स्यों भी इंहां करी किन्हें, स्ताईरे थे।


तुस्से धरती रे लोका रे कठे लूणां साहीं ऐं, अगर लूणा रा सुआद बिगड़ी जाए, ता से फेरी केस चीजा किन्हें लूणका बणाया जाणा? फेरी से केसी कामा रा नी आ, सिर्फ एता रे कि तेस जो बाहर सटी दितेया जाए होर माह्णुं रे पैरा हेठ जिकी दितेया जाए। तुस्से पुरे संसारा रे लोका रे कठे ज्योति साहीं ऐं, जो सैहर प्हाड़ा पर बसिरा से नी ल्हुखी सक्दा होर लोक दिऊया भ्खाई किन्हें टोकरी रे हेठ नी रख्दे पर दीवटा पर रख्हा ऐं, तेबे तेता ले तेस घरा रे सारे लोका जो प्रयासा पुज्हा। इंहां करी किन्हें तुस्सा रा जीवन प्रयासा साहीं ऐं माह्णुं रे साम्हणें चम्के ताकि स्यों तुस्सा रे भले कामा जो देखी किन्हें तुस्सा रे बापू री जो स्वर्गा मन्झ आ, बड़ाई करहे।

ये ना समझा कि, हांऊँ मूसा री व्यवस्था या नबिया री लिखीरी गल्ला जो नास करदा आईरा, नास करणे रे कठे नी, पर पूरा करणे रे कठे आईरा। क्यूंकि हांऊँ तुस्सा किन्हें सच्च-सच्च बोल्हा, जेबे तक आसमान होर धरती मिटी नी जाए, तेबे तक परमेसरा री व्यवस्था ले एक मात्रा या एक बिंदु भी बगैर पुरे हुई किन्हें नी मिटणा। इधी कठे जो कोई इन्हा छोटे ले छोटे हुक्मा मन्झा ले केसी एकी जो टाल्ली दे होर तेह्ड़ा ई होरी लोका जो भी स्खाए ता तेस जो स्वर्गा रे राजा मन्झ सभी ले छोटा बोल्या जाणा; पर जो कोई इन्हा हुक्मा जो मन्नघा होर तिन्हा जो स्खाहन्घा, तेस जो ई स्वर्गा रे राजा मन्झ बडा बोल्या जाणा। क्यूंकि हांऊँ तुस्सा किन्हें बोल्हा कि, जेबे तक तुस्सा री धार्मिकता व्यवस्था स्खाणे वाल़े होर फरीसी लोका री धार्मिकता ले खरी नी हो तेबे तक तुस्सा कधी भी स्वर्गा रे राजा मन्झ नी पूजणा।

“तुस्से सुणी चुकिरे कि, परमेसरे पुराणे ज्माने रे लोका जो ये हुक्म दितिरा था, ‘हत्या देख्या करदे’, होर ‘जेह्ड़ा कोई हत्या करघा तेस कच्हरी मन्झ सजा रे लायक बणना।’ पर हांऊँ तुस्सा किन्हें बोल्हा कि, जेह्ड़ा कोई आपणे भाई पर गुस्सा करघा, ता तेस कच्हरी मन्झ सजा रे लायक हूंणां, होर जेह्ड़ा कोई आपणे भाई जो निकम्मा बोल्घा तेस महासभा मन्झ सजा रे लायक हूंणां; होर जो कोई आपणे भाई जो बोले ‘बेकार’ तेस नरका री आगा री सजा रे लायक हूंणां। इधी कठे अगर तू आपणा दान मन्दरा री बेदी पर चढ़ाणे रे कठे ल्याए, होर तेथी तुजो याद आये कि, मेरे भाईया रे मना मन्झ मेरी कठे कुछ सिकायत ई, ता तेथी आपणा दान बेदी रे साम्हणें छाडी दे। होर जाई किन्हें पैहले आपणे भाई किन्हें मेल मिलाप करी ले, तेबे आई किन्हें आपणा दान चढ़ा। जेबे तक तू आपणे व्रोधी साउगी पैंडे मन्झ आ, तेस साउगी झटपट मेल मिलाप करी ले केते एह्ड़ा नी हो कि व्रोधी तुजो हाकमा जो सौंपी दे, होर हाकम तुजो स्पाहीया जो सौंपी दे होर तुजो जेल्हा मन्झ पाई दे। हांऊँ तुस्सा किन्हें सच्च बोल्हा कि जेबे तक तू एक-एक पाई नी देई देह्न्गा तेबे तक तुध जेल्हा ले नी छुटणा।”

“तुस्से तेस हुक्मा जो सुणी चुकिरे जो ये बोल्हा कि, ‘व्यभिचार नी करणा।’ पर हांऊँ तुस्सा किन्हें ये बोल्हा कि, जो कोई केसी जन्नानी पर बुरी नजर पाए से आपणे मना मन्झ तेस्सा किन्हें व्यभिचार करी चुक्केया। अगर तेरी सीधा हाख तुजो पाप कुराणे जो त्यार हुई जाए, ता तेस हाखिया ले पाप करणा बंद करी दे, होर तेता जो काढी किन्हें आपणे वाले ले सट्टी दे, क्यूंकि तेरे कठे ये खरा की तेरे सरीरा मन्झ ले एक हिस्सा नास हुई जाये एता रे बजाय कि तेरा सारा सरीर नरका मन्झ पाई दितेया जाए। अगर तेरा सीधा हाथ तेरे ले पाप कुराणे जो त्यार हुई जाए, ता तेस हाथा किन्हें पाप करणा बंद करी दे, होर तुजो से हाथ काटणा भी पई जाए ता तू एह्ड़ा ई कर, क्यूंकि तेरे कठे ये खरा कि तेरे सरीरा रे अंगा मन्झ ले एक नास हुई जाए एता रे बजाय कि पूरा सरीर नरका मन्झ पाई दितेया जाए।”


ये भी बोल्या गईरा था कि, “जो कोई आपणी लाड़ी जो तलाक दे से तेस्सा जो त्याग पत्र दे। पर हांऊँ तुस्सा किन्हें बोल्हा कि जो कोई आपणी लाड़ी जो व्यभिचारा रे अलावा केसी होर वजहा ले तलाक देहां, ता से आपणी लाड़ी ले व्यभिचार कुराहां, होर जो कोई तेस्सा तलाकसुदा किन्हें ब्याह करहा, से भी व्यभिचार करहा।”

तुस्से ये भी सुणी चुकिरे कि, परमेसरे पुराणे ज्माने रे लोका जो ये हुक्म दितिरा था कि, झूठी कसम देख्या खांदे, पर प्रभु रे कठे आपणी कसम पूरी करेया। पर हांऊँ तुस्सा किन्हें बोल्हा कि, कधी भी कसम देख्या खांदे; ना ता स्वर्गा री, क्यूंकि से ता परमेसरा री राजगद्दी ई। ना ता धरती री, क्यूंकि से तेसरे पैरा री जगहा ई, होर ना यरुस्लेम सैहरा री, क्यूंकि से महाराजा रा सैहर आ। होर आपणे मूंडा री कसम भी देख्या खान्दे क्यूंकि तू एक बाला जो ना चीटा, ना काला करी सक्हा। पर तुस्सा री गल “हां री हां” हो, या “ना री ना” हो; क्यूंकि जो कुछ ऐता ले ज्यादा बढ़ी किन्हें हुंहाँ, से दुस्ट सैताना ले हुंहाँ।


तुस्से तेस हुक्मा जो सुणी चुकिरे जो ये बोल्हा कि, हाखिया रे बदले हाख, होर दान्दा रे बदले दान्द। पर हांऊँ तुस्सा किन्हें ये बोल्हा कि, बुरे माह्णुंआं रा साम्हणां देख्या करदे; पर अगर कोई तेरे मुंहा रे सीधी तरफ तुजो चांडा मारे, ता तेस वखा जो आपणे मुंहा रा दूजा पासा भी फेरी दे। होर अगर कोई मुकद्दमा करी किन्हें तेरा कुरता लैणा चाहे, ता तेस जो आपणा कोट भी लैणे ले नी रोक। होर कोई स्पाही तुजो मजबूर करी किन्हें तेसरा समान एक किलोमीटर लई जाणे रे कठे बोले ता तेस साउगी दो किलोमीटर चली जा। जो कोई तुध ले मांगे, तेस जो दे; होर जो कोई तुध ले धुआर लैणा चाहे, तेस जो नांह नी कर।


तुस्से तेस हुक्मा जो सुणी चुकिरे जो ये बोल्हा था; कि आपणे पड़ोसी किन्हें प्यार रखणा, होर आपणे दुस्मणा किन्हें बैर। पर हांऊँ तुस्सा किन्हें ये बोल्हा कि, आपणे दुसमणा किन्हें प्यार रखा होर आपणे सताणे वाल़े रे कठे प्रार्थना करा। जेस ले तुस्सा आपणे स्वर्गीय बापू रे बच्चे बणना क्यूंकि से खरे होर बुरे लोको पर आपणा सूरज प्रयासा करहा। होर धर्मी होर पापी लोको पर आपणी बरखा देहां। क्यूंकि अगर तुस्से आपणे प्यार रखणे वाल़े किन्हें ई प्यार रखघे, ता परमेसरा तुस्सा जो क्या इनाम देणा? चुंगी लेणे वाल़े भी एह्ड़ा ही करहा ऐं? होर अगर तुस्से आपणे भाई बैहणा जो ही नमस्ते करघे, ता कुण जे बडा काम करहा ऐं? क्यूंकि गैर-यहूदी जो परमेसरा री व्यवस्था जो नी मन्नदे स्यों भी एह्ड़ा करहे? इधी कठे कि तुस्से सिद्ध बणा, जेह्ड़ा तुस्सा रा स्वर्गीय बापू सिद्ध आ।

聞く मत्ती 5