Text: © Alliance biblique de Côte d'Ivoire, 2003 Audio: ℗ 2007 Hosanna

Alladian - 2003 Edition (NT)

Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.

Ɛnvra léyi Zhezü mán n'ɛsɛ̀nkɛn-bɔ̀ bá Zherüzalɛmɛ̀n tɛ̀sɛ̀n, hɩ yɔ vá Bɛtfazhe anmàn bru-yri, ɛẅì-shi-tɛ̀ hɔ̀n léyi ye bi olivie, n'ɛnkpò cɛ tɔ̀n wú nɔn, Zhezü wá n'ɛsɛ̀nkɛn-bɔ̀ anhyrɛ̀ ɔkɔ̀hɔ̀n. Zhezü kɛ dɔ́ yɔ le: “Nyɛ́n hɔ́n anmàn léyi dú nyɛ̀n ezì nɔn; nyɛ lɛ cɔ́ zɛtɛ̀ lɔ frimú-sɛ̀n, yɛ mɔɛn nɛ̀n, nɛ́n mán n'ɛnẅì mɛhi. Nyɛ́n gbɔrɔ yɔ, ô nyɛ́n bɩ́ yɔ nyɛ́n và sɩ́ mɛ̀n. Ke dú kɛ ye yrɛ nyɛ̀n ankà hô, nyɛ́n mrɛ́n ɔmùan le: ‘Ɛẅɛnwrɔn ke ji annɔ̀n hɔ̀n lɔ.’ Kɩ ɛnvra zri lɔ ye le teze yɔ, yɔ hɔ̀n.”
Eci lɔ hán, ô Ɔwɔ-mùanwú-ankà-dɔ́-wrɔn ankà léyi dɔ̀ nɔn kɛ̀ sá nmù:
“Nyɛ́n dɔ́ Siɔn anmàn-bɔ̀ le:
Nyàn, v'ɛnnɛ̀ncüì lɔ kɛ vá mɛ́n,
anwɔwɔ yɩ́ nɛ̀n ɛmɛ̀n, nɛ̀n yɛ́ frimú-sɛ̀n
mán frimú-ẅì wúɛ, frimú-sɛ̀n ẅì.”
Ɛsɛ̀nkɛn-bɔ̀ lɔ hɔ̀n kɩ yɔ hán eci léyi Zhezü wá tán yɔ nɔn. Yɔ sɩ́ frimú-sɛ̀n mán frimú-ẅì lɔ, yɔ bɩ́ y'ɛceci hɔ̀n lɔ yɔ ku annɔ̀n hɔ̀n lɔ wú kɩ Zhezü ci ɛwú yɛ́. Anwrɔn fɛcüè vri tɔ̀n bɩ́ y'ɛceci hɔ̀n lɔ cüe ɛnlevriɛ; ndɔ hɔ̀n kɛ voyan antɛ̀-da cüe ɛnlevriɛ. Anwrɔn hɔ̀n léyi dú Zhezü ezì mán ɛmɛẅi kɛ nán esù nɔn, ke di bobo kɛ dɔ̀ le: “Eci-zrɔ kè dú Davidɛ̀n Ẅì tɛn! Ɔwɔ kè fú ɔwrɔn léyi kɛ vá Ɛẅɛnwrɔn bɩ́mɛ̀n nɔn ɛnshi! Eci-zrɔ kè dú Ɔwɔ tɛn anhobɩ́ ɛwú!” Ɛnvra léyi Zhezü bru Zherüzalɛmɛ̀n nɔn, anmàn-bɔ̀ bukru kɛ jɔ́kɔ́ y'edomɛ̀n. Yɔ yrɛ le: “Antɔn dú ɔwrɔn ndɔ lɔa?” Anwrɔn mrɛ́n ɔmùan le: “Ɔwɔ-mùanwú-ankà-dɔ́-wrɔn Zhezü, Nazarɛtɛ̀n anmàn, Galile kpɔsɔ wú wrɔn.”


Zhezü bru Ɔwɔ-cice-wɔn lɔ mɛ̀n kɩ kɛ wrɔ́ anwrɔn hɔ̀n léyi kɛ hɛ́ ɛci mán ndɔ hɔ̀n léyi kɛ wɔ́ ɛci nanvrɛn lɔ nɔn; nɛ taka ɔkùa-crɔn-bɔ̀ tɛbrɛ̀ mán brɛndre-hɛ́-bɔ̀ kpata cüe. Zɛtɛn nɛ dɔ́ yɔ le: “Ɛwrú Prɔnprɔn hɔ̀n kɛ dɔ̀ le: ‘Ye le bi m'ɔwɔn lɔ, Ɔwɔ-sɛ́n-wɔn.’ Tɛ́n nyɛ́n bɩ́ nɛ̀n nyɛ́n srɔ ɛci-yerɛ-bɔ̀ kpò nànmàn!”
Anvɛ̀-bɔyɛ-bɔ̀ mán ɛnan-kpò-bɔ̀ sɔnba Zhezü ɛtɛ̀sɛ̀n Ɔwɔ-cice-wɔn lɔ mɛ̀n kɩ nɛ̀n kɔrɛ yɔ. Ɔwɔ-cice-bɔ̀ cüìcüì hɔ̀n mán ɛnyànmàn-gbànvri-ankà-yé-bɔ̀ ke bɩ́ ɛmɛ̀nhyì ɛnvra léyi yɔ kán nɛ̀n nɛ hán anvɛmɛ̀n-frɛ́n-ci kɩ ɛẅì hɔ̀n ke di bobo Ɔwɔ-cice-wɔn lɔ mɛ̀n, kɩ kɛ dɔ̀ le: “Eci-zrɔ kè dú Davidɛ̀n Ẅì tɛn!” Zɛtɛn yɔ dɔ́ Zhezü le: “Ɛ yá ankà léyi yɔ dɔ̀ nɛ́n?” Zhezü mrɛ́n yɔ ɔmùan le: “Hɛ̀ɛ̀, ankà ndɔ lɔ nyɛ vá gɔ̀ krɛ́ nɛ̀n mrìmrì Owrú Prɔnprɔn lɔ mɛ̀n: ‘Ɛ hán tán ô ɛẅì hɔ̀n mán ɛẅì dɛ̀kɛ̀ hɔ̀n kɛ̀ mrɛ́n mɛ́n hán’?” Zɛtɛn nɛ̀n teze yɔ kɩ nɛ̀n srɔ ɛntrɛ, nɛ̀n hɔ́n Betani, nanvrɛn de nɛ̀n dɛ́ nɔn.


Ɛcɛ̀n cüe, ɔsɔ̀wrɔ̀ fùtàn, Zhezü vru ɛmɛẅi kɛ vá anmàn, kɩ ɔmùanwù kɛ ẅɛ̀n. Nɛ̀n kán ɛẅì-shi-tɛ̀ tɔ̀n léyi ye bi figie nɔn ɛnlevri mùan kɩ nɛ́n sɔnba yi ɛtɛ̀sɛ̀n, tɛ́n ɛẅi sà kɩ dú nɛ̀n ɛwú. Zɛtɛn Zhezü kɛ dɔ́ ɛẅì-shi-tɛ̀ lɔ le: “E sɩ̀ vru shi ɛẅì mrìmrì!” Ɛnvra zri lɔ ɛẅì-shi-tɛ̀ lɔ wrú. Ɛsɛ̀nkɛn-bɔ̀ lɔ kán eci léyi wɔɛ̀n nɔn kɩ yɔ dú anvɛmɛ̀n-frɛ́n-mɛ̀n. Yɔ yrɛ Zhezü le: “Anhɔntan kɛ̂ ɛẅì-shi-tɛ̀ ndɔ lɔ ke wrú zɛtɛ̀ lɔa?” Zhezü mrɛ́n yɔ ɔmùan le: “Mɛ dɔ́ nyɛ̀n annànwɔrɛ mɛ̀n le: ke dú kɛ nyɛ́n ẅɛn ankàẅì-bùtan, kɩ nyɛ́n sɩ̀ wà ɛnbɔrɛ anhyrɛ̀, kè sɩ̀ dù eci léyi mɛ̀n hán ɛẅì-shi-tɛ̀ ndɔ lɔ nɔn kɩ nyɛ lɛ hán, tɛ́n, nyɛ lɛ dɔ́ ɛnkpò cɛ ndɔ lɔ le: ‘Cɔhɔ́ ɛnu lɔ, ô ɛ̀ hɔ̀n bru ecüe’, kɩ eci lɔ kɛ lɛ hán. Ke dú kɛ nyɛ ẅɛn ankàẅì-bùtan, nyɛ lɛ cɔ́ eci lɔ fɛn léyi nyɛ sán Ɔwɔ-sɛ́n mɛ̀n nɔn.”


Zhezü bru Ɔwɔ-cice wɔn lɔ mɛ̀n kɩ bukru ke yé ankà; Ɔwɔ-cice-bɔ̀ cüìcüì mán Zhüifɛ̀n fɛcüè cüìcüì-bɔ̀, zɛtɛn sɔnba Zhezü ɛtɛ̀sɛ̀n kɩ ke yrɛ nɛ̀n le: “Ɛkɔrɛ̀levri tán mɛ̀n de ɛ hán ɛci ndɔ hɔ̀n lɔ nɛ́n? Antɔn de tán mɛ́n hɩ kɔrɛ̀levri lɔ nɛ́n?” Zhezü mrɛ́n yɔ ɔmùan le: “Mɛ̀n mán me le yrɛ nyɛ̀n ankà zri, ɛnzri kɩ; ke dú kɛ nyɛ tán mɛ̀n ɛmɛẅi ankà hô, zɛtɛn mɛ lɛ dɔ́ nyɛ̀n, ɛkɔrɛ̀levri léyi mɛ́n ẅɛ̀n, hɩ mɛ hán ɛci ndɔ hɔ̀n lɔ nɔn. Antɔn de wá Zhan Batisì ɔkɔ̀hɔ̀n kɛ̀ wá anwrɔn ɛnshi ɛnkru nɛ́n? Ɔwɔ kàle anwrɔnẅì hɛ̀?” Tɛ́n, ecüìwrɔn dú yɔ angranmɛ̀n kɩ yɔ dɔ́ y'edomɛ̀n le: “Ke dú kɛ bɔ́ mrɛ́n ɔmùan le: ‘Ɔwɔ de wá nɛ̀n ɔkɔ̀hɔ̀n nɔn’, ne le yrɛ bɔ̀ le: ‘Cɛci kruhú kɛ nyɛ́n sɩ́ bú Zhan ankà nyɛ̀n tàn ankàẅì hɛ̀?’ Tɛ́n, ke dú kɛ bɔ́ dɔ̀ le: ‘Anwrɔnẅì de wá nɛ̀n ɔkɔ̀hɔ̀n nɔn’, ke ji le bɔ̀ ẅɛn fɛcüè sù, ɔmuhi yɔ lɔ fɛn yɔ tro le Zhan dú Ɔwɔ-mùanwú-ankà-dɔ́-wrɔn tɔ̀n nɔn.” Zɛtɛn yɔ mrɛ́n Zhezü ɔmùan le: “Bɔ̀ sɩ̀ nyrìɛn.” Zhezü mrɛ́n yɔ ɔmùan le: “Ke dú ɔmu lɔ hô, mɛ̀n mán mɛ́n sɩ̀ dɔ́ nyɛ̀n m'ɛkɔrɛ̀levri ankà, ɛci hɔ̀n léyi mɛ hán nɔn hɩ wú.”

Zhezü ke yrɛ le: “Ankà-tro tán de nyɛ ẅɛn ankà ndɔ lɔ wú nɛ́n? Ɔwrɔn tɔ̀n ẅɛn ɛẅì hɔ̀n anhyrɛ̀. Nɛ dɔ́ kpàkpà ẅì lɔ le: ‘M'ɛnẅì, ɛnyɔncì lɔ, ɛ̀ hɔ́n ankɛ̀tɛmɛ̀n ɛ̀ hán ɔkɔ̀hɔ̀n.’ Ɛnẅì lɔ mrɛ́n nɛ̀n ɔmùan le: ‘Hɔ̂, mɛ́n sɩ̀ hɔ̀n’, tɛ́n ɛnẅì lɔ yɛ́, bɩ́ ɛnvra kɩ hɔ́n ankɛ̀tɛmɛ̀n. Zɛtɛn ɛnẅì-nɛ́n-zi lɔ dɔ́ ankà zri lɔ tán anhyrɛmɛ̀n ẅì lɔ. Ɛnẅì ndɔ lɔ mrɛ́n nɛ̀n ɔmùan le: ‘Hɛ̀ɛ̀, Dade, mɛ hɔ́n ankɛ̀tɛmɛ̀n’, tɛ́n ɛnẅì lɔ kè sɩ̀ hɔ̀n hàn. Ɛẅì hɔ̀n anhyrɛ̀ lɔ, tɛtán de hán nɛ́n zi kɔrɛ̀zì-ci nɛ́n?” Yɔ mrɛ́n nɛ̀n ɔmùan le: “Kpàkpà ẅì lɔ.” Zɛtɛn Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: anmàn-wɔɛ̀n-yrɛ-bɔ̀, mán woẅie-wúyɔ̀ kɛ lɛ hɛ́ nyɛ̀n ezì Anhobɩ́ nɛ̀ncüì-dúyri. Ɔmuhi Zhan Batisì vá nyɛ̀n ɛnlevri ankrànkràn yé yri, kɩ nyɛ́n sɩ̀ bù n'ankà nyɛ́n tàn ankàẅì; tɛ́n anmàn-wɔɛ̀n-yrɛ-bɔ̀ mán woẅie-wúyɔ̀ bú n'ankà tán ankàẅì. Kɩ ɛnvra léyi nyɛ́n kán eci ndɔ lɔ nɔn, nyɛ́n sɩ̀ crɔ̀n ny'ɛnbɔrɛ lɔ, ô nyɛ́n bù n'ankà nyɛ́n tàn ankàẅì.”


“Nyɛ́n die nyandrɛn nyàntɛn tɔ̀n ankà-dɔ̀ nukùɛ: Ɛkɛ̀tɛ́-nɛ́n-zi tɔ̀n, tɛ́ ɛci ankɛ̀tɛmɛ̀n; nɛ̀n wá ɔkɔ̀ nɛ̀n sɛ́n ɛkɛ̀tɛ̀ lɔ, nɛ̀n bɔ́ ɛnnànmàn nɛ̀n hán ɛci-borɛ-yri, nɛ̀n hán ɛci-hɛ́n-yri, kɩ nɛ̀n ku ɛyri-nan-wɔn tɔ̀n. Zɛtɛn, nɛ̀n bɩ́ ɛkɛ̀tɛ̀ lɔ nɛ̀n wá ɛkɛ̀tɛ̀-kɔ̀hɔ̀n-hán-bɔ̀ antamɛ̀n, kɩ nɛ̀n hɔ́n ɛyri. Ɛnvra léyi ɛci-küɛ vra cɔ̀ nɔn, ɛkɛ̀tɛ́-nɛ́n-zi wá n'ɛci-bɩtan-bɔ̀ ɔkɔ̀hɔ̀n ɛkɛ̀tɛ̀-kɔ̀hɔ̀n-hán-bɔ̀ lɔ yri, kè bɩ́ nɛ tɛn ɛci kɛ̀ và sɩ́ nɛ̀n. Tɛ́n, ɛkɛ̀tɛ̀-kɔ̀hɔ̀n-hán-bɔ̀ lɔ ẅɛn ɛkɛ̀tɛ̀-nɛ́n-zi ci-bɩtan-bɔ̀ lɔ ɔtɔ̀n gorɛ, wri anhyrɛmɛ̀n mán anhɔnmɛ̀n tɛn lɔ, ɛbù mɛ̀n. Zɛtɛn ɛkɛ̀tɛ́-nɛ́n-zi vru wá anwrɔn ɔkɔ̀hɔ̀n cüɛn vrán kpàkpà-bɔ̀ lɔ, tɛ́n ɛkɛ̀tɛ̀-kɔ̀hɔ̀n-hán-bɔ̀ lɔ, hán yɔ eci zri lɔ. Ɔtrɔmɛ̀n lɔ, nɛ̀n wá n'ɛnẅì ɔkɔ̀hɔ̀n kɩ nɛ̀n ẅɛn ankà-tro le: ‘Yɔ lɛ ẅɛn m'ɛnẅì lɔ n'ɔwá.’ Tɛ́n, ɛnvra léyi ɛkɛ̀tɛ̀-kɔ̀hɔ̀n-hán-bɔ̀ lɔ kán ɛnẅì lɔ nɔn, yɔ dɔ́ y'edomɛ̀n le: ‘Nyàn anja-di-wrɔn lɔ! Bɔ̀ hɔ̀n, bɔ̀ wri nɛ̀n kɩ bɔ́ lɛ srɔ ɛkɛ̀tɛ́-nɛ́n-zi hɔ̀n!’ Zɛtɛn Yɔ ẅɛn nɛ̀n, yɔ kɔ́n ze ɔkɔ̀ mɛẅi, kɩ yɔ wri nɛ̀n.”
Zɛtɛn Zhezü ke yrɛ yɔ le: “Ɛnvra léyi ɛkɛ̀tɛ̀-nɛ́n-zi kɛ lɛ và nɔn, ecitan de nɛ lɛ hán ɛkɛ̀tɛ̀-kɔ̀hɔ̀n-hán-bɔ̀ ndɔ hɔ̀n lɔ nɛ́n?” Yɔ mrɛ́n nɛ̀n ɔmùan le: “Ne le wri ɛkɛ̀tɛ̀-kɔ̀hɔ̀n-hán-bɔ̀ gbàngbàn ndɔ hɔ̀n lɔ, nɛ́n sɩ̀ nyri ɛnzri mán ɛnhyɔ̀bɔ̀, kɩ ne le bɩ́ ɛkɛ̀tɛ̀ lɔ nɛ̀n wá ɛkɛ̀tɛ̀-kɔ̀hɔ̀n-hán-bɔ̀ nyàntɛn hɔ̀n antamɛ̀n; yɔ léyi, yɔ lɛ và sɩ́ nɛ̀n ɛci, ɛci-küɛ vra lɔ nɔn.”
Zɛtɛn Zhezü kɛ dɔ́ yɔ le: “Nyɛ vá krɛ́ mrìmrì, ankà léyi Owrú Prɔnprɔn kɛ dɔ̀ nɛ́n?
‘Obù léyi ɔwɔn-ku-bɔ̀ kɔ́n ze nɔn
hɩ de srɔ ɔwɔn kavà-mɛ̀n-bù.
Ndɔ lɔ dú Ɛẅɛnwrɔn yri và,
bɔ́ tɛn, dú eci anvrɛnvrɛn bɔ́ zìwú!’
Zhezü vru kɛ dɔ̀ le: Hɩ le kruhú de mɛ dɔ́ nyɛ̀n le: ye le bɩ́ nyɛ̀n Anhobɩ́ nɛ̀ncüì-dúyri antamɛ̀n yɛ sɔhɔ́, ô yɛ wá fɛcüè léyi ke le shi ɛẅì fifi nɔn antamɛ̀n. [Ɔwrɔn léyi ke le bore obù ndɔ lɔ wú nɔn, nɛ lɛ bɔyɛ n'edomɛ̀n wá; kɩ ke dú kɛ obù lɔ ke bru Ɔwrɔn tɔ̀n ɛwú hô, nɛ lɛ srɔ ɔwrɔn lɔ nwɔ̀n-hiẅia.]”
Ɔwɔ-cice-bɔ̀ cüìcüì hɔ̀n mán Ɔwɔ-nyànmàn-sùva-wá-bɔ̀ yá Zhezü nyandrɛn mɛ̀n ankà léyi dɔ̀ nɔn, kɩ yɔ nyri ɔmu le y'ankà de nɛ dɔ̀ nɔn. Zɛtɛn yɔ ji ɛyri ô yɔ ẅɛn nɛ̀n, tɛ́n yɔ sú fɛcüè léyi ke bɩ́ Zhezü kɛ hán Ɔwɔ-mùanwú-ankà-dɔ́-wrɔn tɔ̀n nɔn.

聞く Matie 21