Naṉ. 9
9
Yus Nuwaiji̱a̱i̱ chícham najanamu
1Yus Nuwain uchirtiuk péṉker pujutnum yúmiṉkiak chicharuk “Tí nukap pampaṉkrum ataksha nuṉká piaktarum. 2Ashí nuṉkanmaya̱ yajasman nanamtinniasha, nuṉká japinias yujá ainia nunasha tura entsaya̱ ainia nunasha nupetkatniun tsaṉkatkaitjiarme. Tuma ásar atumín ashampramin ártatui. 3Kame ashí árak ainia nu yuátarum tímiajrumna nútiksanak yamaikia ashí namaṉ ainia nunasha yúatniun tsaṉkateajrume. 4Antsu namaṉ iwiaakmartiuk yúashtiniaitrume. Warí iwiaakmari̱ṉkia ni númpe̱nchukait. Tuma asamtai namaṉ númpe̱ntuk peṉké yúashtiniaitrume. 5Ashí maṉkartinniasha Wi sumamtikiattajai. Náṉkamas yajasmasha aneachma aentsun mámtaiṉkia nú yajasmaka mantamnati. Shuar ni írutramuri̱n mámtaiṉkia nú shuaran Wi sumamtikiattajai.
6Kame aentska Wiya áantiaku najanachmakait.
Tuma asamtai shuar chikichan mámtaiṉkia nisha mantamnatniuiti.
7Tura atumsha tí nukap pampaṉtarum
túrarum ashí nuṉkanam piaktarum” tímiayi Yus.
8Yus Nuwain uchirí̱ji̱a̱i̱ tuke chicharainiak 9“Antuktarum, atumji̱a̱i̱ tura atumí tiraṉmí tiraṉkí̱ya̱ ártatna tímianian chichaman yamái nájaneajai. 10Núnisaṉ uunt kanunmaya̱ jíintrara núnancha kame nanamtinniancha taṉkununcha tura kampunniunmaya̱ yajasmanuncha ashí nuṉkanam yujainia núnancha irumpran chichaman nájaneajai. 11Wi tájarmena ju̱ka peṉké yapajniáshtatui. Tura winia chichampruka ju̱i̱ti, ashí shuarnasha tura ashí yajasmancha ama̱a̱ja̱i̱ atakka amukchattajai. Kame atakka nuṉka ama̱a̱ja̱i̱ amuktinkia peṉké atsuttawai. 12-13Nekas tajai tusan yamaikia Winia tuntíakrun yuraṉminiam awajeajai. Atumji̱a̱i̱ nútiksanak ashí yajasmaja̱i̱sha winia chichamprun nájaneaj jú̱naka peṉké yapaji̱áshtiniaitjiai, tajai. 14Wi yuraṉmin nuṉká utsamtikramtai tuntíak yuraṉminiam wajaamtaiṉkia 15Wi atumji̱a̱i̱ núnisaṉ yajasmaja̱i̱sha chichaman najanamiaj nuna enentáimturtatjai. Tura atakka ama̱a̱ja̱i̱ nuṉka emesratniusha peṉké atsuttawai, tájame. 16Warí tuntíak yuraṉminiam wajaamtai Wi íistatjai túran Wi chichaman tuke átinian ashí iwiaaku ainia nuja̱i̱ nájanaj nuna enentáimtustatjai. 17Tura jú̱ tuntíakka ashí aentsja̱i̱ nuyá̱ ashí yajasmaja̱i̱sha Wi chichaman najanamaj nuna nakumui” Yus Nuwain tímiayi.
18Kame Nuwái uchirí̱ kanunmaya̱ jíintrarmia nuka ju̱ ármiayi, Sem, Kaam tura Jajet. Kaamka Kanaana aparí̱yayi. 19Nu menaintiú áishmaṉ Nuwái uchirí̱ armia nuka ashí nuṉkanam ni uchirí̱ji̱a̱i̱ ataksha pampaṉki̱ wéarmiayi.
Nuwái ukunam túrunamuri̱
20Nuyá̱ Nuwaikia takakmas úwan arakmiayi. 21Tura nuna juuk karían umar nampekmiayi. Túruna misú áimiar je̱e̱n ajapén kajinmak inian tepesmiayi. 22Tura Kanaana aparí̱ Kaam, ni aparí̱n Nuwain misú tepan wainiak ikiuak a̱a̱ jiinkí̱ jimiará yachi̱n ujakármiayi. 23Túram Sem Jajetja̱i̱ awaṉkéman tuntupem awaṉkek jurukiar úkumur wéar ni aparí̱n íitsuk nukukarmiayi.
24Nuyá̱ Nuwaikia ni nampekmari̱ya̱ tsa̱a̱r nantaki̱ iniaṉnamu uchirí̱ túramia nuna nekaamiayi. 25Tura Kanaanan yajauchí yúmiṉkiak
“Ame yatsumi iniatairi̱ ainia nuja̱i̱
naṉkaamas íniakur wáitkiatai átatme” tímiayi. 26Nuyá̱ chichaak
“Sémnaka winia Uunt Yusur yaiṉtí
tura Kanaanka Sema iniatairi̱ atí.
27Jajetnaka Yus páantin awajsati
tura Semja̱i̱ irunar pujú atí
antsu Kanaanka ni iniatairi̱ atí” tímiayi Nuwái.
28Ama̱a̱ ama̱a̱rak naṉkaamasmia nuyá̱ Nuwaikia 350 uwí tuke iwiaaku pujumiayi. 29Kame ashí irurmaka Nuwái 950 uwí pujus jakamiayi.
Attualmente Selezionati:
Naṉ. 9: jiv
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©2009 Avant Ministries in cooperation with Wycliffe Bible Translators, Inc. All rights reserved.
