Yohana 5

Yesu A Gung Nʊ Nɨ Bʊtɔgɔ A Swam Swamɨ

1A gulɔ gǝmɨ, nǝngɔ Yesu a gwi a shu a Urushalima a dikulom Yahudawagɨɨ. 2A Urushalima kaa gʌto wo, ja kang nǝn lʌbotɨnɔ nʊ. Nǝn nyiyo Yahudawagɨɨ jǝ jo gɔ, Betasda. Gʌto nɨ a kɔtʌgo a Nyanga lɔng Kwamɨ. 3Nǝbɔ mɨ kwamɨgǝnɨ a lada jǝ daa a kukulong wulong nɨ, kululʌmɔ, jǝbɔ nǝbɔ mɨ nǝn naaɨ, jǝbɔ nǝbɔ bʊtɔgɔ a swam swamɨ, jǝ daa wo. [4Jʊ a bwɨɨ, kaam ditɨnɔ kaa bwɛ twama Kwaamaɨ gǝ bɛ bɛ ba mǝg mʊgɔ mwɛ nɨ. Nʊ nɨ a dɔ mwɛmɔ nǝn tɨkǝgaɨ, gǝ nya nya guntǝm a twɨla nɨ gǝ nǝngǝnɨ.]#5:4 Kaam bɛl mʊlalɨ galɨgɔ mɨ nǝn bɛ gola nɨ. 5A daa gɔ, kaa nǝl wo, wʊnɨ a maa jolɔ fʊtǝtaal jeli naalǝb a mʊgɔ twɨla gǝnɔ gǝmɨ. 6Yesu a dǝg nu a kuwo gǝn daamɨ, a kwɛl a nyǝm nʊ nɨ a kʊta nǝn twɨla gǝnɔ. Nǝngɔ Yesu a sʊwa nʊ nɨ gɔ, “Mʊ swɨ lɛ ń gun ka?”

7Nǝngɔ nʊ nɨ nǝn twɨlaɨ a jǝla gǝn gɔ, “Nǝ dʊʊ, mɨ mǝ nǝn nʊ nɨ tɨka ɨ lɛ n dɔ mʊgɔ gʌto nɨ nǝn kwama ja buulʌm mwɛmɨ. Na nǝn kwama mǝ dwama mwɛmɔ lɛɨ, kaa nǝl gǝ laa ɨ laa ɨ dɔtǝmɔ.” 8Nǝngɔ Yesu a jǝla gǝn gɔ, “Gun, do kʌshen mʊnɔ, ya ń yilo!” 9Tʌgo a kang nʊ nɨ a gun a twɨla gǝnɔ gǝm. A do kʌshen gǝnɔ yɔ yɔmɔ lɛ. Jʊ nɨ a bwɨ nǝn Kum Fǝbtǝm. 10Yahudawagɔ a sʊwa nʊ nɨ ja gungi gɔ, “Dwiyen n Kum Fǝbtǝm. A diilɔ gǝmɨ a bʊm bɔ ń do kʌshen mʊnɔ.”

11Nǝngɔ a jǝla ji gɔ, “N nʊ nɨ a gung ii, a sʊwa ɨ gɔ n do kʌshen mǝndɨ ya n yiloi.” 12Nǝngɔ ja bʌ gǝn gɔ, “Nʊ gɔ nuwo a sʊwa ń gɔ do kʌshen mʊnɔ ya ń yiloi?” 13Nʊ nɨ ja gungi, a nyǝm bɔ kɛna nuwoi, jʊ a bwɨɨ nǝbɔ a lada nyɔ a daa gɔ, Yesu a kwɛl a lɛlam a kʊm nǝbɨɨ.

14Nǝngɔ Yesu a nya gǝn a Kan Kwaamanɨ, a sʊwa gǝn gɔ, “Kuwo ń gun! Bɛ bǝla maatǝm bwɨlangkɛlɔ, kage kaa jʊ nɨ a laa wʊnɨ a nya ń.” 15Nǝngɔ nʊ nɨ a shu ya sʊwa dʊʊm Yahudawagɨɨ gɔ nǝn Yesu a gung gǝnɨ. 16Nǝngɔ Yahudawagɔ a tǝl saatǝm naa Yesui, jʊ a bwɨɨ maa kanjǝl nɨ lɛ nǝn Kum Fǝbtǝm. 17Nǝngɔ Yesu a sʊwa ji gɔ, “Tɛtɛ mɨ maa maajɨgɔ lɛ wo, kanga mǝ tǝmɨ mǝ maa lɛɨ.”

18Kɛl nɨ a dǝg Yahudawagɔ a sʊtǝn saatǝm gola nɨ jǝ jʌm Yesu lɛɨ. Ja sʊwa gɔ, “Ke bɔ kaltǝm diil Kum Fǝbtǝmɔ kwaagɔ, a sʊwa tag gɔ, Kwaama nǝn Tɛtɛ gɔ. Kɛl nɨ a sʊwa nyɨɨ, a do dul gǝnɔ dǝngdǝng jǝbɔ Kwaama.”

Kwaan Yesui Bʊla Kwaamaɨ

19Nǝngɔ Yesu a jǝla ji gɔ, “N bɨlǝngkɛl mǝ sʊwa jen nɛɨ, Bwɛ mɨ gɔ maa jǝl lɛ kwaagɔ. Gǝ maa jʊ ga kuwo Tɛ bwɛ maa lɛɨ. Jʊ a bwɨɨ gwam jʊ nɨ Tɛ bwɛ maa lɛɨ, n jʊ Bwɛ maa lɛɨ. 20Tɛ bwɛ swɨ Bwɛ lɛ, gǝ nʊng gǝn nʊng kanjǝl nɨ gwam gǝ maa lɛɨ. Bɨlǝngǝn tag nʊng gǝn nʊng maajɨtɨn nɨ a laa jʊtǝb nɨ, sǝ jǝ́ ta kang a nyiyo. 21Kanga Tɛ bwɛ gǝ gung bʌlʌnɔ lɛ nǝn kʊlɨɨ, gǝ na nyɔ Bwɛ nǝ nǝ kʊlɨ a nʊ nɨ gwam a swɨɨ. 22Tɛ bwɛ tag mɨ gǝ maa nǝbɔ gǝm borang lɛ. A nɨ Bwɛ fɔlɔn maatǝm borangɔ gwam. 23Sǝ nǝbɔ gwam a nǝ Bwɛ dʊʊn, kanga jǝ nǝ Tɛ bwɛ dʊʊn nɛɨ. Nʊ nɨ mɨ nǝ Bwɛ dʊʊn nɛɨ, mɨ nǝ Tɛ bwɛ nɨ lɛ a twam gǝnɨ dʊʊn.

24“Bɨlǝngǝn mǝ sʊwa jen nɛɨ, nʊ nɨ nyʊwa kɛl mǝndɨ lɛɨ, nǝ bɨlǝngkɛl lɛ a nʊ nɨ a twam ɨɨ, nǝngǝn nǝn kʊlɨ nɨ mɨ dɨtǝm woi. Mɨsɔ jǝ nǝ gǝn bwɨlangkɛl lɛ, a kwɛl a yab yabɨ bwaagɔ, a shu a kʊlɨ. 25Bɨlǝngǝn mǝ sʊwa jen nɛɨ, kwamagɔ bɛ lɛ wo, a kwɛl a bɛ bɛɨ, nǝb nɨ a bʊlalaɨ, jǝ nyʊwa nyʊwa diil Bʊla Kwaamaɨ. Nǝb nɨ a nyʊwaɨ, jǝ bʊʊ bʊʊ. 26Kanga Tɛ bwɛ nǝn dul gǝn, n jʌng kʊlɨɨ, gǝ na nyɔ a dǝg Bʊla gɔ a yǝlam jʌng kʊlɨ. 27A nǝ gǝn fɔlɔn maatǝm borangɔ, jʊ a bwɨɨ, gǝ nǝn Bʊla Nǝlɨ.

28“Ka jǝ́ ta lɛ kang a nyiyo a kɛl nɨ gǝm, jʊ a bwɨɨ kwamagɔ bɛ lɛ wo, nǝb nɨ pʌd a mʊgɔ tuutɨnɨ jǝ nyʊwa nyʊwa diil gǝnɔ, 29ja jel. Nǝb nɨ a maa jǝ nyanɨ, jǝ gun gun nǝn kʊlɨ, ja bʊʊ. Nǝb nɨ a maa jǝ bwɨlaɨ, jǝ gun sǝ ja maa jim borang. 30Mɨsɔ mǝ dwal lɛ n maa jǝl kwaamɨ. Mǝ maa borangɔ kanga Kwaama a sʊwa ɨ gɔ n maaɨ. Borang mǝndɨ n dǝngdǝng, jʊ a bwɨɨ ke bɔ swɨtǝm dul mɨ mǝ bwangtǝn nɛɨ, n swɨtǝm dul nʊ nɨ a twam ɨɨ.

Sʊwatǝm Bɨlǝngkɛl A Dul Yesui

31“Na n nǝ nyiyo a dul mɨɨ, nǝtǝm nyiyo mǝndɨ ke bɔ bɨlǝngkɛl. 32Kaa nǝl wo nǝ nyiyo lɛ a dul mɨ. N nyǝm nǝtǝm nyiyo gǝnɔ a dul mɨɨ n bɨlǝngǝn.

33“Jǝ́ twam nǝbɔ a daagɔ Yohana woi. Gǝ nǝn kang gǝn a sʊwa jen bɨlǝngkɛl a dul mɨ. 34Mǝ ya bɔ nǝl a dul nǝtǝm nyiyo nǝfilii. Mǝ sʊwa nyɔ sǝ jǝ́ nya bʊʊlɨ. 35Yohana n fitila nɨ ja lɛ nǝn nyalǝmɨ. Jǝ́ jǝla jǝ́ maa fulotǝm nǝl nǝn nyalǝm gǝnɔ a mʊgɔ kumɔ dǝm.

36“Mǝ nǝngǝn nǝn nǝtǝm nyiyo a dul mɨ, wʊnɨ a laa a nɨ Yohana a nǝ a dul mɨɨ. Kanjǝl nɨ mǝ maa lɛɨ, wʊnɨ Tɛtɛ mɨ a nɨ ɨ gɔ n maaɨ, n jʊtǝb nɨ a yǝlam nʊngtǝm a dul mɨɨ, a nǝ nyiyo gɔ nǝn Tɛtɛ mɨ a twam ɨ. 37Tɛtɛ mɨ nɨ a twam ɨɨ, nǝn gɔ nǝn kang gǝn a yǝlam nǝ nǝtǝm nyiyo a dul mɨɨ. Jǝ́ nyʊwa bɔ diil gǝnɔ wo naa win. Jǝ́ kuwo bɔ kǝga gǝnɔ wo tag. 38Kɛl gǝnɔ a yɨ bɔ a nǝl jenɔ gǝm, jʊ a bwɨɨ jǝ́ nǝ bɔ bɨlǝngkɛl a daagɔ nʊ nɨ Tɛtɛ a twamɨ. 39Jǝ́ tɨtǝn kiyotǝm mʊlalɨ kɛl Kwaamaɨ, jʊ a bwɨɨ a kuwotǝm jenɔ gǝmɨ, jǝ́ nya nya kʊlɨ nɨ mɨ dɨtǝm woi a daa ji woi. Kɛl mʊlalɨtɨn Kwaamaɨ nɨ, nǝji jǝ sʊwa kɛl lɛ a dul mɨɨ. 40Jǝ́ kɔ bɛtǝmɔ a daa mɨ woi sǝ jǝ́ nya kʊlɨ.

41“Mɨ mǝ yo dʊʊlǝn nɛ a daagɔ nǝbɔ woi. 42N nyǝm jen, mɨ swɨtǝm Kwaamaɨ wo a nǝl jen. 43Mǝ bɛ a mʊgɔ dun Tɛtɛ mɨɨ, jǝ́ yo i bɔ. Na kaa nǝl a bɛ a mʊgɔ dun gǝnɨ, jǝ́ yo gǝn yo. 44La jǝ́ nǝ bɨlǝngkɛlɔ nyǝn, na jǝ́ swɨ saatǝm bǝlátǝm a kʊm jen, mɨ jǝ́ saa bǝlátǝm nɨ lɛ jel lɛ a daagɔ Kwaama woi kwaagɔ wini?

45“Ka jǝ́ bʊʊla lɛ jengɔ mǝ ka ka kɛl jenɔ a daagɔ Tɛtɛ woi. Nʊ nɨ ka kɛl jenɔ lɛɨ nǝn Musa, wʊnɨ jǝ́ ya nǝl a daa gǝ woi. 46Na na jǝ́ nǝ bɨlǝngkɛl a daagɔ Musa woi, na jǝ́ nǝ nǝ bɨlǝngkɛl a daa mǝ woi, jʊ a bwɨɨ, Musa a kwɛl a mʊla mʊlaɨ a dul mɨ. 47Na jǝ́ jǝla bɔ jʊ nɨ a mʊlaɨ n bɨlǝngkɛlɨ, la jǝ́ jǝla nyǝn jʊ nɨ mǝ sʊwaɨ n bɨlǝngkɛl?”

Attualmente Selezionati:

Yohana 5: DBD

Evidenziazioni

Copia