Logo YouVersion
Icona Cerca

Mark 9

9
1Ka Mâ‐a vâ na bâ, na, Pâkwěpâkwě, Mbi langwakiyandi ’nyěni, na, o na bâka ba těměkě okava ba veke iwedo kabo ba ta yěně ipangiya ja Anyambě pângo na ngudi.
2Hwi ’toba tombango, ka Jisus a nângâ Pitě na Jems na Jân, ka Mâ‐a valana bâ o ukodi mua udomba o pěpěkě bâ dipâ, ka nyolo ’aju ya ’luwa o pwanj‘ ’abu. 3Ibâtâ jaju i diyakindi ngěningěni botano mětě ka mataya, o diye pě na moto o he a di na ngudi e tanakě jâ wa. 4Ka Ilaias na Mosěs ba pumiya bâ, ba diyaki ba kalaka na Jisus. 5Ka Pitě a yavwana, ka mâ‐a languwa Jisus, na, Uyokwidi, e ndi bwamu na ho diyaka okava, na hwě hwa ha meâkâ melalo, Âvě ’mbâkâ, Mosěs ’mbâkâ, Ilaias tepě ’mbâkâ. 6Ikobojana au yowaka eaju e kalakidi, ’kabojana ba diyaki ba bangaka. 7Omě o diyaki na evindi e yambakiyi bâ, ka joyi ja viya o ’vindi, na, Ekaně a Mwan‘ ’amě a tândâkwě, yokakiyi Mâ ni. 8O bâ‐ba tamuwedi kěběngě kěběngě, elěngiaha tepě, ba yěne pě moto, kabo Jisus, na bâ mětě, pa.
9A pakwakiyi bâ na, ba langwake moto belombo beabu be ma yěně, o bâ‐ba diyakidi ba hubaka ukodi, kabo o Mwana moto a ka pumbuwa oviya bawewe. 10Ka bâ‐ba tata ndaga tědině bâ mětě, ba ka uwanaka bâ metě na bâ mětě, na, ipumbuwa oviya bawewe i lě na. 11Ka bâ‐ba uwa Mâ, na, E lě nde ya Balěndi e vâkě, na, Ilaias nd‘ a ka t‘ o pâ? 12Ka Mâ‐a yavwana, ka Mâ‐a vâ na bâ, na, Ilaias pâkwěpâkwě nd‘ a takě na viya, na Mâ‐a timbě belombo beěhěpi; na nyanga e di lěndwěngo o pělě ya Mwana moto nana a ka yěni majili maitě, na Mâ‐a pějwě. 13Mbi vâki n‘ inyěni, na, Ilaias pâkwěpâkwě a pândi, ndi ba hakite mâ kabo nyanga ’abu e vahakidi bwěsě e di lěndwěngo mâ.
14O Mâ‐a pâkidi o beyokwedi beaju be jadi a yěněkindi ebumbu eněně bâ ulwaniděngo, Balěndi ba uwanaka na bâ. 15Elěngiaha o ebimba yěhěpi e yěni Mâ, ba mamakindi imama iněně, ka bâ‐ba vala o Mâ‐a jadi umbila, ba ka homaka Mâ. 16Ka Mâ‐a uwa Balěndi, na, O uwaka li bâ i nande? 17Ka ’mbâkâ ua ebumbu a yavwana ka mâ‐a vâ na Ju, na, Uyokwidi, mbi ma vanandi mwan‘ ’amě ua momo o Âvě‐o jadi, a di na ilina j‘ imbuke. 18Iboko viaju vi valanakě mâ viěhěpi, vâkâna i hunjaki mâ, a ka pumakě mavudi, a ka kalakidě mahonga, na mâ‐a ka kângâkâ; ndi mbi ma kali na beyokwedi beâvě, na ba pumakě jâ, ndi bu yâlâkě. 19Ka Mâ‐a yavwana mâ, na, A! igona i ha ’bě na ikamidě, Mbi ka diya lě n‘ inyěni nj‘ ulingo ě? Mbi ka hindina lě ’nyěni nj‘ ulingo ě? Vanaki mâ ni o ’Mbambi jadi. 20Ka bâ‐ba pâdě mâ o Mâ‐a jadi: o mâ‐a yěni Mâ, k‘ ilina ja hunja mâ: ka mâ‐a kwa o he, a ka yangalaka, a pumakě mavudi. 21Ka Mâ‐a uwa hangwě, U le nja, Ulingo mua ekae u di diyango o mâ‐a jadi? 22Ka mâ‐a vâ, na, Oviya ukěkě. Njo jâkâ e ’hwaka mâ o veya na o miba nana e weye mâ: ndi ipě O ka hate, yěněkě hwě ngěbě, na nâvě wa hana hwě. 23Ka Jisus a vâ na mâ, na, Oningě o yâliděngě o kamidě, belombo beěhěpi be te be hamaka na ba kamakidě. 24Ka hangwě mwana a yama na manyângâdiba, na, Upangiyi, mbi kamakiděndi; hanaka ’mba n‘ ipuhwa jamě j‘ ikamidě. 25O Jisus a yěnidi na bato ba vakidi membila, ka Mâ‐a kandidě ilina tě ibe, na, Avě ilina j‘ imbuke na poke, Mbi langwakiyand‘ âvě, věngěměkě o mâ‐a jadi, o ngakiye pě o mâ‐a jadi njo ’pâkwě. 26K‘ ilina ja yama, ka jâ‐ja hunja pě mâ, ka jâ‐ja věngěmě; a bě ona ekengo: baitě ba ka vâka na, A wendi. 27Ka Jisus a bweya mâ o ’nâ, ka Mâ‐a hěhě mâ; ka mâ‐a těmě. 28O Mâ‐a vakid‘ o ndabo, ka beyokwedi beaju bea uwa Mâ o pěpěkě, na, E lě nd‘ eahu e ha yâlâkidě o věngidě jâ. 29Ka Mâ‐a vâ na bâ, na, Jângâ těkadi ja yâlě o puma na vilolombo kabo na ikaliya na ihindina.
30Ka bâ‐ba věngěmě omě, ka bâ‐ba pudungana Galili; A vahaka na moto a yowakě. 31Ikabojana A yokwakidi beyokwedi beaju, ka Mâ‐a vâ na bâ na, Mwana moto a bweyudwěndi o benâ bea bato, ba ka weyi Mâ; o Mâ‐a ka bě weyuwěngo, A ka pumbuwandi o buhwa bo‘ ilalo. 32Ndi bu yowakě ndaga tědině, ba ka bangaka o uwa Mâ.
33Ka Mâ‐a pâ o Kapěrnaum; o ndabo ka Mâ‐a uwa bâ, na, E lě nd‘ eanyu e ma sâjaka o njeya, inyěni mětě na inyěni mětě? 34Ndi bâ dâ; ’kabojana o njeya ba ma sâjakandi bâ mětě na bâ mětě, na, ja di wa. 35Ka Mâ‐a diya, ka Mâ‐a ndiya jomu na babale, ka Mâ‐a vâ na bâ, na, Oningě moto te moto a vahaka o diya o bohoboho mâ nd‘ a ka diyě ua mbuhwa ya běhěpi, na uhayi mua běhěpi. 36Ka Mâ‐a nângâ etumbě, ka Mâ‐a tědě yâ o hangan‘ ’abu; o Mâ‐a nângi mâ na benâ beaju, ka Mâ‐a vâ na bâ, na, 37Uěhěpi a ka věhělidě umbâkâ ua betumbě ka ekabe na dina jamě vâkâna a věhělidi ’Mba; a vehělěkidě ’Mba uěhěpi a věhělěkidě ’Mba dipâ, ndi na a lomaki ’Mba.
38Ka Jân a yavwana Mâ, na, Uyokwidi, ho yěněkindi ’mbâkâ a věngěkidě děvil na dina jâvě, ndi a vitaně hwě, ka hwa kandidě mâ, ’kabojana a vitakě hwě. 39Ndi ka Jisus a vâ, na, O kandakidi mâ ni, ’kabojana o ’bě na moto a ka haye elemba o dina jamě, a ka tândě o kala bobe o pěl‘ ’amě. 40Ikabojana a ha hingaka na hwě a nd‘ o pěl‘ ’ahu. 41Uěhěpi a ka mâtidě inyěni imâgi ja miba o dina jamě, ’kabojana o ndini ba Kraist, mbambaye, Mbi vâki n‘ inyěni, a nyange mahomano maju. 42Ndi uěhěpi a ka bevě yâkâ ya betumbě be kamakidě ’Mba, e ndi bwamu wa o pěl‘ ’aju n‘ ilale iněně i tingakwě o ibâlu jaju, na mâ‐a ’hwě o manga. 43Oningě ikadu jâvě ja bev‘ âvě, lenaka jâ; e ndi bwam‘ o pěl‘ ’âvě na nâvě o ngakiya o ’měnâ yěmě wa na o diya na makadu mabale na nâvě wa ’la o Hěl, o veya vi ka měndě vi dime. 45Tepě, oningě itambi jâvě ja bev‘ âvě, lenaka jâ: e ndi bwam‘ opěl‘ âvě na nâvě o ngakiya o ’měnâ o děhimaka wa na o diya na matambi mabale na nâvě wa ’hwě o Hěl, o veya vi ka měndě vi dime. 47Na, oningě dihâ jâvě ja bevidě âvě, tongwaka jâ: e ndi bwam‘ opěl‘ âvě na nâvě ngakiya o ipangiya ja Anyambě na dihâ jâkâ wa na o diya mihâ mabale, na nâvě o uhwě o Hěl ya veya: 48o ukuju muabu u ha waka, na veya vi hiniye. 49Ikabojana uěhěpi a ka mwahudwi na veya, na mwambo muěhěpi u ka mwahudwi na vianga. 50Vianga ndi bwam‘; nd‘ oningě vianga vi diya uju hambe, o ka timbě lě pi viâ ni uju na? Diyakani na vianga inyěni mětě, o ka diyakani jonga inyi mětě n‘ inyi mětě.

Attualmente Selezionati:

Mark 9: BNG1895

Evidenziazioni

Condividi

Copia

None

Vuoi avere le tue evidenziazioni salvate su tutti i tuoi dispositivi?Iscriviti o accedi