Mark 8
8
1O hwi tědině ebumbu e diyakindi eněně mětě, bu diyaka na ’lombo e jakě; ka Jisus a ndiya beyokwedi beaju, 2ka Mâ‐a vâ na bâ, na, Mbi yěnindi ebumbu ngěbě, ’kabojana ba bi n‘ Umba okava hwi ’lalo, ba diye na elombo e jakě: 3oningě ’Mba validě bâ o ndabo jabu ba je, ba ka hoviyandi na nja o njeya, ’kabojana bâkâ ba vakiyendi yaviděngo. 4Ka beyokwedi beaju bea yavwana Mâ, na, Moto a ka vulě lě ekaba na beja o nginga ono na ove? 5Ka Mâ‐a uwa bâ, na, O li membunda meningě? Ka bâ‐ba vâ, na, Hěmbwědi. 6Ka Mâ‐a vâ na ebimba e diyake o he, ka Mâ‐a nângâ membunda hěmbwědi, ka Mâ‐a vě akeva, ka Mâ‐a buka, ka Mâ‐a vě beyokwedi beaju na ba těkidě o boho boabu; ka bâ‐ba tědě beâ o boho boa ebimba. 7Ba diyaki na lojajaka lohâlě; ka Mâ‐a vambiya ibâtâ, ka Mâ‐a vâ na lo těkudwě tepě o boho boabu. 8Kakana ndi bâ‐ba jakidi, ka bâ‐ba vula, ka bâ‐ba tâlidě nguhu i dikanakidi belinga hěmbwědi. 9Ba jakidi ba diyakindi ba tâjen inai; ka Mâ‐a validě bâ. 10Elěngiaha tepě ka Mâ‐a vama o ’lende na beyokwedi beaju, ka Mâ‐a pâ o pělě ja Dalmanutha.
11Ka Farisi ja viya, ka bâ‐ba yalě o boma penda na Ju, ba vahaka na A hake bâ elembo ya viya oba, ba yějěkiyě Mâ. 12A vegumakindi n‘ iněně, o ilina jaju, ka Mâ‐a vâ, na, E lě nde ya igona těkadi e vahakě elembo? Mbi vâki n‘ inyěni pâkwěpâkwě, O ’bě na elembo e ka věwě igona těkadi. 13Ka Mâ‐a dika bâ, ka Mâ vama pě o ’lende, ka Mâ‐a ’la o mwidi ’pâkwě.
14Ndi beyokwedi ba behalakiděndi o nângâ beja, bu diyanaka o elende wa n‘ umbund‘ umbâkâ. 15Ka Mâ‐a languwa bâ, na, Bandamakiděni, dikakani lěvěn ya Farisi na lěvěn ya Hěrod. 16Ba ka totonganaka bâ mětě na bâ mětě, na, E ndi ’kabojana o hwě ho ha ’bě na beja. 17O Jisus a yowakidě yâ, ka Mâ‐a vâ na bâ, na, E lě nde ’anyu e totonganakě, ’kabojana o ’běni na beja? O ha yoweteni, tombe wa bweyiděni? O ndini melema meanyu yâdiděngo? 18Inyěni na mihâ, wa yěněkěni? Inyěni na matâ, wa yokakani? Wa yongakiděni? 19O ’Mba‐mbi bukakidi membunda metano o tâjen itano, o tâlâkidě li belinga bea nguhu ti beningě? Ka bâ‐ba vâ na Mâ, na, Jomu na bebale. 20Tepě na hěmbwědi o tâjen inai, o tâlâkidě li belingě bea nguhu ti beningě? Ka bâ‐ba vâ na Mâ, na, Hěmbwědi. 21Ka Mâ‐a vâ na bâ, na, E lě nd‘ eanyu e ha bweyakidě?
22Ka Mâ‐a pâ o Běthseda, ka bâ‐ba vana Mâ momo ua pâgu, ka bâ‐ba hâhâlidě Mâ na A kupanake mâ. 23Ka Mâ‐a bweya pâgu o ’nâ, ka Mâ‐a pumana mâ o mboka, o Mâ‐a běkidi malě tuwango o mihâ maju, ka Mâ‐a kahidě benâ beaju o mâ‐a jadi, ka Mâ‐a uwa mâ na ipě a yěnindi elombo. 24Ka mâ‐a tamuwa oba, ka mâ‐a vâ, na, Mbi yěněkěndi bato ona bele ba tamwaka. 25Ka Mâ‐a timbiya pě o kahidě benâ beaju o mihâ maju, ka Mâ‐a panga mâ a tamwakiya oba, ka mâ‐a yongwě, ka mâ‐a yěně bato běhěpi bwebwe. 26Ka Mâ‐a timbě mâ o ndabo ’aju, na, O valake o mboka, o langwaka tepě yâ moto o mboka.
27Ka Jisus na beyokwedi beaju ba vala o mboka ja Sěsaria Filipai; o njeya, ka Mâ‐a uwa beyokwedi beaju, a vâki na bâ, na, Bato ba vâkâ lě, na, Umba lě a nja? 28Ka bâba yavwana Mâ, na, Jân Baptist, ndi bâkâ mâ, na, Ilaias, na bapâkwě mâ, na, Ua basâki umbâkâ. 29Ka Mâ‐a vâ na bâ, na, Nd‘ o vâkâ li na Mbi lě nja? Ka Pitě a yavwuwa, ka mâ‐a vâ na Mâ, na, Âvě ndi Kraist. 30Ka Mâ‐a kelevidě bâ na, ba langwake moto o pěl‘ ’aju.
31Ka Mâ‐a yalě bâ ipakuwa na, Mwanamoto a ka yěněndi belombo beitě; batodu na prist iněně na balěndi ba ka kiyi Mâ, na bâ‐ba ka bweyidi Mâ; ndi na hwi ’lalo A ka pumbuwi pě. 32Ekae nd‘ eaju e kalakidi bwebwe. Ka Pitě a a nângâ Mâ o pěpěkě na mâ‐a ka yalakě ikandidě jaju. 33O Mâ‐a běkidi iběi timběngo, ka Mâ‐a tamuwa beyokwedi beaju, A ka kandakidě Pitě, na, Věngěměkě ’Mba o mbuhwa Setan, ’kabojana wa pikilakiya belombo bea Anyambě, kabo bea bato. 34O Mâ‐a běkidi ebimba ndiyango na beyokwedi beaju, ka Mâ‐a vâ na bâ, na, A ka vitě ’Mba uěhěpi a binake nyolo ’aju, na Mâ‐a bapě krâs ’aju, na mâ‐a ka vilinganakě ’Mba. 35Ikabojana uěhěpi a ka tândě o yongě eměnâ ’aju a ka nyangi yâ, ndi uěhěpi a ka nyangi eměnâ ’aju o nyang‘ ’amě na sango eyamu, mâ tepě a ka yongě yâ. 36Ikabojana e ka kova lě moto nde, oningě a jeya he yěhěpi, na mâ‐a ’hpwa ilina jaju? 37E lě ba nja ’lombo ě ya moto e ka vangwaně ilina jaju? 38Ikabojana a ka yěně ’Mba ndaga jamě ihâni o igona tě j‘ ihonde na bobe ekadi, mâ tepě ua Mwana moto a ka yěně ihâni o Mâ‐a ka viyě n‘ ivenda ja Hangwě na enjěl iyamu.
Attualmente Selezionati:
Mark 8: BNG1895
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.
