Mark 6
6
1Ka Mâ‐a věngěmě omě, ka Mâ‐a vala o wabu, ka beyokwedi beaju bea vitaně Mâ. 2O buhwa boa Iyâjâ bo pâdi, ka Mâ‐a yalě iyokudě o tyâtyi; bato ba yokolakidě Mâ baitě ba mamakindi, na, Momo těkaně a vaniye lě bolombo těkabe ove? I lě nj‘ iyowě i věkudwě Mâ ekadi, i jadi tombekete na belombo beněně be hamakate o benâ beaju. 3A ’bě ukěkěngě ekaně, mwan‘ ’a Meri, mwana nyangwě na Jems, na Josěs, na Judas, na Saimân? Maluku maju ma ’bě na hwě okava? Ka bâ‐ba numba na Ju? 4Ndi Jisus a vâ na bâ, na, Usâki a vâki pěněkě ihekidě kabo o wabu, na o ikaka jaju, na o diyâ jaju. 5A yâlâkě tepě o ha ehavu eněně omě, kabo te ikahidě ja makadu o tango ehâlě ya mebědi, na Mâ na yongakě bâ. 6Ka Mâ‐a mama o pělě ’a ipuhwana jabu j‘ ikamidě.
Ka Mâ‐a vala, A kěkě, A yokwanakidě o mamboka mahâlě.
7Ka Mâ‐a ndiya jomu na bebale, A ka yalakě o loma bâ babale babale, ka Mâ‐a vě bâ ipangiya ja malina mabe. 8Ka Mâ pakuwa bâ na, ba nângâke elombo o ’kěndâ, kabo utumbe pa, hanga elandi ya kola, tombe beja, na ba dâlě o belandi beabu. 9Bâtâkâni sandal o beko: nd‘ o bâtâkeni koto ibale. 10Ka Mâ‐a vâ na bâ, na, Iboko vianyu vi ka pâyě o ndabo, diyakani omě, kabo inyěni o ka valěni oviya omě. 11A ka měndě a věhělidě ’nyěni, na o yokolidě tepě inyěni, o inyěni o ka valěni oviya omě, pupwakani ubulubulu oviya matambi manyu o ilanguwa jabu. Mbi vâki n‘ inyěni pâkwěpâkwě, e ka diyandi bobâbu na ba Sâdâm na Gomâra o buhwa boa yěkě, wa na mboka těně. 12Ka bâ‐ba vala, ba ka kalakiya na bato ba ’luwake melema. 13Ka bâ‐ba pumě děvil iitě, na bâ‐ba ka hakiya mebědi meitě mavulě, na yongě bâ.
14Ka upolo Hěrod a yoka o pěl‘ ’aju (’kabojana dina jaju i diyakindi ja hamana); ka mâ‐a vâ, na, Jân Baptist a pumbuwendi, ovaně nd‘ o behavu beněně be levakudwě o mâ‐a jadi. 15Bâkâ mâ, na, A ndi Ilaias, Bapâkwě mâ, na, A ndi usâki, na ba moto a kwanakě usâki. 16Ndi Hěrod, o mâ‐a yoki yâ, ka mâ‐a vâ, na, A ndi Jân uamě a lenakidi ibâlu; a pumbuwendi oviya iwedo. 17Ikabojana Hěrod mâ mětě t‘ a lomakidi bato ka bweyidě Jân, ka mâ‐a tiniya mâ meboka o ndabo meboka na tina ya Hěrodias, mwad‘ ’a mwana nyangwě Filip; ikabojana a baki mâ. 18Jambojana Jân a vâki na Hěrod, na, E ’bě hohonganěngo na o nângâkâ mwad‘ ’a mwana‐nyângwě. 19Ovaně nd‘ o Hěrodias a yomanaki na ju na mâ‐a vahaka o weya mâ, nd’ a yâlâkě. 20Ikabojana Hěrod a bangakindi Jân, yowěngo, na, a ndi momo uyamu na hole, ka mâ‐a lala mâ; o mâ‐a yokolidě mâ a kalakiya, ka mâ‐a ha belombo beitě, a yěněkěndi mbya na yoka mâ. 21O buhwa boa lukango bo pâdi, boa Hěrod bo jakudwě, ka mâ‐a hadě bapangiyi baju, na ngâwe iněně, na bato baněně ba Galili, isango. 22O mwana ua Hěrodias ua mwajo a vakidi ka yemba, ka mâ‐a tândidě Hěrod na ba diyaki na ju, ka upolo mâ‐a vâ n‘ itângâ, na, Uwaka ’mba elombo ’âvě e vahakě, vâkâna mbi věnd‘ âvě yâ. 23Ka mâ‐a kaniya mâ, na, Eâvě e ka uwě ’mba yěhěpi, mbi ka věnd‘ âvě yâ, tombe e jadi epěhi y‘ ipangiya jamě. 24Ka mâ‐a puma, ka mâ‐a vâ, na nyangwě na, Mbi uwake ’lě nde? Ka mâ‐a vâ, na, Molo mua Jân Baptist. 25Elěngiaha, ka mâ‐a timba o upolo a jadi ngwambe, ka mâ‐a uwa mâ, na, Mbi vahakandi o věkě ’mba kwěi molo mua Jân Baptist o ’pělě bwalo. 26Ndi upolo a yěněkindi ngěbě eitě, ndi o opělě ya ikana na ba diyaki na ju ija, a vahaka o lěvě mâ. 27Elěngiaha tepě k‘ upolo a loma uweyi, ka mâ‐a vâ na molo muaju u vanakwě; ka mâ‐a vala ka lena mâ ibâlu o ndabo ya meboka. 28Ka mâ‐a vana molo muaju o ’pěle bwalo, ka mâ‐a vě muâ itângâ, ka itângâ ja vě muâ nyangwě. 29O beyokwedi beaju be yoki yâ, ka bâ‐ba viya ka nângâ ekengo ’aju, ka bâ‐ba nangidě yâ o malonga.
30Ka metodu ba yolaně ta o Jisus a jadi, ka bâ‐ba languwa Mâ belombo beěhěpi ibeabu be hakidi, n‘ ibeabu be yokwakidě. 31Ka Mâ‐a vâ na bâ, na, Vakani, inyěni mětě, o iboko via nginga dipâ, wa ta yâjâni kwěi; ’kabojana ba vakidi na ba kěkidi, ba diyaki baitě, bu diyaka na epedi e jakě. 32Ka bâ‐ba vala o iboko via nginga, na elende, ikutakuta. 33Ka bato ba yěně bâ‐ba kěkě, ka baitě ba yemba Mâ, ka bâ‐ba ’la membila na ja he omě, bopumaka oviya mboka jěhěpi, ka bâ‐ba tombě bâ, ka bâ‐ba yolaně o Mâ‐a jadi. 34O Jisus a jabwakidi ka Mâ‐a yěně bato baitě, ka Mâ‐a muwa na ngěbě o pěl‘ ’abu, ’kabojana ba diyakindi pani ka medâmbě me diye n‘ utati, ka Mâ‐a yalě bâ iyokudě ja belombo beitě. 35O buhwa bo diyakidi boa vala, ka beyokwedi beaju bea via o Mâ‐a jadi, na, Ekavi vi ndi iboko via nginga, egombe tepě e tombindi. 36Valakidě bâ, ovaně nd‘ o bâ‐ba ka ’lě boulwanakidě o ’hiki na o mamboka, na bâ‐ba ka hambaka pěmbě jabu, ’kabojana ba ’bě na elombo e jakě. 37Ka Mâ‐a yavwana bâ, na, Inyěni, věki bâ ni beja. Ka bâ‐ba vâ na Mâ, na, Ho kěke ka hamba pěmbě i weyakě kama ja fura ibale, na hwa vě bâ na ba jake? 38Ka Mâ‐a vâ na bâ, na, O li membunda meningě? ka t‘ o ’mbuwani. O bâ‐ba ’mbuwedi, ka bâ‐ba vâ, na, Metano, na bejaka bebale. 39Ka Mâ‐a sombiya bâ na ba pangake běhěpi na ba diyake njamba njamba o mbusanga ja betongo. 40Ka bâ‐ba diya megândâ, meâkâ kama, meâkâ mabo matano. 41O Mâ‐a diyakidi membunda metano na bejaka bebale nângângo, ka Mâ‐a ’mbuwa oba, ka Mâ‐a vambiya ibâtâ, ka Mâ‐a buka membunda, ka Mâ‐a vě meâ beyokwedi beaju na ba těkidě o bâ‐ba jadi; a ka kabaka bejaka tě bebale na bâ běhěpi. 42Ka bâ běhěpi ba janidě, ka bâ‐ba vula. 43Ka bâ‐ba tâlidě jomu ja belinga na belinga bebale ti bea nguhu, na bea bejaka tepě. 44Ba jakidi membunda mea pěmbě ba diyakindi ba tâjen ja bamo itano.
45Elěngiaha tepě ka Mâ‐a tundudě beyokwedi beaju na ba vamake o elende, na bâ‐ba vala o mwidi ’pâkwě, o Běthseda, o bohoboho, ulingo muaju u valakidě ebimba ya bato. 46O Mâ‐a timbakidě bâ, ka Mâ‐a vala o ukodi ka kaliya. 47O kolo e pâdi, elende e diyakindi o hanganě ya etima, a dikana o he dipâ. 48Ka Mâ‐a yěně bâ‐ba pěpěněkě n‘ iduka; ’kabojana upupě u diyakindi banjaniděngo na bâ; o ’gombe ya elahe ya benai ya bulu, ka Mâ‐a viya o bâ‐ba jadi a tamwaka o etima, ona a vahaka o bambuwa bâ. 49Nd‘ o bâ‐ba yěni Mâ‐a tamwaka o etima, ba yebakiyendi na, ipě u nd‘ ukuku, ba ka yamaka; 50ikabojana bâ běhěpi ba yěněki Mâ, ka bâ‐ba juka ipikiliya. Ka Mâ‐a hungana o kala na bâ, ka Mâ‐a vâ na bâ, na, Yâdâkâni; a te ’Mba; o bangakeni. 51Ka Mâ‐a vama o bâ‐ba jadi o elende, ka upupě mu a wa; ka bâ‐ba mama nangudi eitě mětě, ba ka utuwaka. 52Ndi bu yongakidě pě elembo ya pěmbě; ’kabojana melema meabu me diyaki bokolo.
53O bâ‐ba jabwakidi, ka bâ‐ba pâ o ehe ya Jěněsarěth, ka bâ‐ba bakama na he. 54O bâ‐ba pumakidi o elende, elěngiaha tepě ka bâ‐ba yowě Mâ, 55ka bâ‐ba vala membila uluaniděngo o etěbě těně yěhěpi, ka bâ‐ba yalě ibapě ja ba diyaki na bebědi o makondo, o iboko viabu vi yokaka na A iwě. 56Iboko viaju vi pâkidi viěhěpi o ba mabâkâ, na ba mboka, na ba ’hiki, vâkâna ba nangakidi mebědi o mehěngě, na bâ‐ba ka hâhâlâkidě Mâ, na ba kupanakě tombekete ihuku ja ngâi ’aju; tango e ma kupanakě Mâ yěhěpi te ma yongaka.
Attualmente Selezionati:
Mark 6: BNG1895
Evidenziazioni
Condividi
Copia

Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.